Tumutumbishany etu awonsu Yehova ni Mwanend
Mutapu ukutwishau kutambul ukwash sens awonsu akukumangana ku chivurikish pa ndol 8
1 Ov nany winkishinau katumb ka pakampwil nlel? Adi antu akata kusal yom yijim pantaliken ni mangand. Pakwez yisu yivud, kupwa kwa machuku, yisal yau akat kuyivuramenang. Ov chom ik tukutwisha kulond piur pa yisal yikata chakin kuyikwash antu awonsu? Chisal chijim nakash pa yisal yiney akuchishinshikin piswimp nakash pituvurikina Yakudia ya Urel ya Mwant kupwa kwa muten kuzwek pa dichuku dia Ndol 8, 2001.
2 Ov nany uwanyidina katumb ka piur nakash? Baibel wakwil anch: “A! [Yehova, NW], . . . ey yey uwanyidina kutambul uyaj, ni katumb, ni ukash. Mulong yey watanga yom yawonsu.” (Kuj. 4:11) Chidiay Sakatang, Yehova udi Nyikel Mwin Mangand mawonsu. Kuwanyin kwend kwa kumwink katumb kukwikalap ni nsudiel!—1 Tim. 1:17.
3 Yesu Kristu, Mwan a Nzamb, wasala yisal ya katumb yikuleta yiyukish yakad nsudiel kud antu. Wamwilikeja mutapu uwamp Tatukwend. (Yoh. 5:19) Kuziyil kwend kuwanyidina ni mudimu wend ushinshamena kwamusala kwikal “ndiy uwanyidina kutambul ukash, ni dipit, ni manangu, ni usu, ni katumb, ni uyaj, ni kushiman.” (Kuj. 5:12) Tatukwend wamwinkisha katumb pamuswanishay kwikal Mwant. (Kus. 2:6-8) Niyetu kand, tukwikal ni chisu cha kuyitumbish mwaad wau Tatuku ni Mwan anch twavurik Yakudia ya Urel ya Mwant pa dichuku dia Ndol 8, 2001.
4 Cha ushon, chidi anch mu chishimu cha antu akemp kusu amwinka Yehova ni Mwanend katumb kayifanyidina. Pasak, ap kand antu a Nzamb a pasak, in Isarel, ading kusu ni kumusadil Yehova mudimu umwing wakad usey. Chinech chading kuburen kalimish nakash. (Mal. 1:6, NW) Kalimish kafanyidina kitining kuziyil kushinshamena kwimanyidina pa rukat ni kusanger mulong wa yawonsu yatusadinau Yehova ni Mwanend. Kupan katumb ni kalimish ya mutapu winou kurumburikin anch tumekeshin wom wa Nzamb ni kalimish, kuyitiyin Yehova ni Yesu mu jinjil jetu jawonsu. Chikumangen cha Ukristu chikasikeshin kufundish ni kuyikwash akwau kusal chilik chimwing.
5 Chisu cha pakampwil cha kumekesh katumb: Musambu wa Chivurikish chidi chikumangan chimwing chikweta dirumburik dijim nakash kud antu a Yehova muvu ni muvu. Muntu mwawonsu usotina kumusadil ni kumutumbish Yehova ufanyidin kwikalaku. (Luka 22:19) Tuchingejin anch ku amiliyon 6 a Atuman’a Yehova asadila, kukwiwejin antu in kusanger chakwel uvud wa in kukumangan ushikena amiliyon 14 ni kusut. Chidi chisu chiwamp mud ik cha kumutumbish Tatukwetu wa mwiur! Ap anch musambu winou utadin Yesu, katumb ni kalimish kamekeshinau mulong wa yom yasalay kapanin kushiman kud Tatuku, wamutuma.— Yoh. 5:23.
6 Ov chom ik tukutwisha kusal chakwel kukwatikesh chisu chinech cha pakampwil? Tukutwish kuyikwash antu asu amekeshina kusanger kutambul sens ukwash. Yikasikesha kukumangan, ni ndond yichiswiridina, pan ukwash uwamp chakwel kuyikwash kushik ndond ya chikumangan. Yirumburila rutong ra diskur. Yijikisha kud akwau. Yimenau ni kutesh yikutwisha kuyibachik chakwel kusot kwibomb pamwing netu mu kumutumbish Yehova.
7 Kangal kudiburil usu wa program. Mwin kwilej ku iniversite umwing walonda anch: “Nakumangana kal yisu yivud ku sakrament wa Komony mu egliz wam, pakwez chinech chidi kamu chishalijadina nakash. Naman kal anch chinech chidi kamu mud mutapu ulondina Baibel, Nitongin anch ukwetany uyakin.” Wasambisha kukumangan ku yikumangan pakad kujing ni kupwa watambula dibatish.
8 Tuyikwashany antu asu kuya kurutu: Fund majin ma antu asu ezina kukumangan ku Chivurikish, ni kupwa sambish kuyendil chakwel kuchirikin yom yikasikeshina yilejinau ni yamenau. Yijikisha yikumangan yikwau, mukutwishau kuwejin ku ronganyin rau ra Baibel. Kuchirikinamu kwa shapitre 17 wa buku Connaissance, “Kuman Diking Pakach pa Antu a Nzamb,” kukez kuyijikish yakudia ya muspiritu yivud yipaninau ku chikumangan, yakudia yidia tayad mulong wa wawiy. Irijekany mulong wa kutal nau pamwing band video Our Whole Association of Brothers [Toute la communauté de nos frères] chakwel akutwish kwimen ayinau nich mes mau, uumwing, musangar, ni mushiku wa antu a Yehova!
9 Chidi cha usey anch antu in kusanger ileja mutapu ukutwishau ayinau kumekesh katumb ni kalimish mulong wa Yehova. Rumburil anch kulembil nich muchim umwing utok kukat kumusangaresh Yehova ni udi musul wa chisu chawonsu wa dikasikesh dia muspiritu. (1 Yoh. 5:14) Nich kusadil difundish dia 8 kushik ni ku difundish dia 12 dia broshir Nzamb Witin, rumburil mutapu wa ngikadil yikata kumwinkish Yehova katumb. Anch wisambinany milong yidia mu broshir Les Témoins de Jéhovah, paj 30-31, yikasikesha antu asu kutongin mutapu ukutwishau kumutumbish Yehova nich kusal ayinau mudimu wa kulejan.
10 Kusanger yakupesh ya Yesu ni mulong wa chisend chetu cha kusal mudimu mud in kwilej end kukat kumutumbish Tatukwend ni kulet yiyukish kud akwau. Yesu wakana anch: “Muntu mwawonsu usotila kwinsadil am, Tatukwam ukez kumulimish muntu mwawonsu ukata kwinsadil.”—Yoh. 12:26.