Ov, Usadil Chakwel Yikumangan ya In Kristu Yikala Yikasikeshina?
“Anch wakumanganany pamwing, . . . yawonsu yifanyidin kuyikasikesh.”—1 KOR. 14:26.
1. Kulondulijan ni 1 Korint shapitre wa 14, ov, risu rutong ra usey ra yikumangan ya in Kristu?
‘CHINECH chadinga chikumangan chikasikeshina mudi ik!’ Ov, wamekeshap kal yovil mudi yiney kupwa kwa kukumangan ku chikumangan ku Chot cha Want? Chakin kamu wayimekeshap kal! Chinech chishimokishinap, mulong yikumangan ya chikumangen yiding chakin kamu musul wa dikasikesh. Kupwa, mudi kamu muchadinga pa machuku ma in Kristu a kusambish, rutong ra usey ra yikumangan yetu nlel ridi ra kuyikasikesh mu spiritu antu awonsu akumangena. Tal mutapu ukasikeshidinay Paul piur pa rutong riner ra yikumangan ya in Kristu mu mukand wend wa kusambish wayifundilay in Korint. Shapitre wa 14 mwawonsu, ulondil ni kuchirikinamu anch malejan mawonsu mapaninau ku yikumangan ya chikumangen mafanyidin kwikal nich rutong ra mutapu umwing—“kuyikasikesh in chikumbu cha Nzamb [chikumangen].”—Tang 1 Korint 14:3, 12, 26.a
2. (a) Ov, yikumangan yikasikeshina yidi chibudikin cha yom ik? (b) Chipul ik tukeza kushinshikin?
2 Tuteshin anch yikumangan yikasikeshina, ap yitungina, yidi chakusambish chibudikin chawonsu cha usu wa spiritu wa Nzamb. Chawiy lel, tusambishining chikumangan ni chikumangan nich malembil makin kudi Yehova, kumwit Tatukwetu wa mwiur chakwel ayukisha kukumangan kwetu nich ukash wa spiritu utumbila. Twij anch yid yawonsu ya chikumangen yikutwish kusal pamwing chakwel program wa yikumangan wikala ukasikeshina pichitwishikina. Chawiy lel, ov, yom ik tukutwisha kusal anch muntu ni muntu wikala nich kashinsh anch yikumangan yitakedilau rubing ni rubing ku Chot cha Want yidi chisu chawonsu musul wa diswedish ni dikasikesh dia muspiritu?
3. Ov, yikumangan ya in Kristu yikwet usey mutapu ik?
3 Chakwel twakula, tukushinshikin mitambu kanang ya yikumangan yetu yifanyidinau kulam mu manangu kudi awiy akata kuyitakel. Tukez kand kushinshikin mutapu chikutwisha chikumangen chakabuj kusadil pamwing mu kwikadish yikumangan chisu cha dikasikesh mulong wa in kukumangan awonsu. Mutu wa mulong winou udi wa usey ujim nakash kudi etu mulong yikumangan yetu yidi yikumangan yitumbila. Chakin kamu, kukumangan ni kwakul ku yikumangan yidi mitambu ya usey ya difukwil dietu kudi Yehova.—Kus. 26:12; 111:1; Isay 66:22, 23.
Kwilej Bibil Rawiy Rutong ra Kukumangan
4, 5. Ov, risu rutong ra Dilejan dia Chinong cha Kalam?
4 Etwawonsu tusotin kutambul sens ukwash udiokilinga ku dilejan dietu dia Chinong cha Kalam rubing ni rubing. Chawiy lel, chakwel tutesha nawamp rutong ra kusambish ra chikumangan chinech, tuchirikinany bil kuswimp kumwing kwasadika pa Chinong cha Kalam ni mitu ya milong ya kwilej.
5 Kusambishin pa dichap dia kwilej dia kusambish dia Chinong cha Kalam cha Chiwong 15, 2008, awejina tuyom twa usey pa chibur cha piur. Ov, watumana kal? Shinshikin nawamp pa chibur cha gazet ukweta. Ukuman padi Bibil uburilau kwishin kwa chinong. Kuwejinaku kwa yipich yiney kukasikeshin diyingishil dietu dia kwikal ni Dilejan dia Chinong cha Kalam. Didi kand dia kwilej Bibil nich ukwash wa gazet winou. Mwawiy, pa Dilejan dietu dia Chinong cha Kalam dia rubing ni rubing, akat ‘kurumburil’ Dizu dia Nzamb ni mudi kamu muyadinga pa chisu cha Nehemiy pakur, akat “kwovakesh nawamp.”—Neh. 8:8; Is 54:13.
6. (a) Kuswimp ik kwasalau pantaliken nich Dilejan dia Chinong cha Kalam? (b) Ov, yom ik yifanyidina kulam mu manangu piur pa “kutang” maverse?
6 Mulong Bibil wawiy mukand wetu wa kusambish wa kwilej, aswimpin yom yimwing ku Dilejan dia Chinong cha Kalam. Maverse mavud majimbwilau mu mitu ya milong ya kwilej amalejen anch “tang.” Atukasikeshin etwawonsu kusadil Bibil wetu ayinetu chakwel kulondul kutang kwa maverse pamatanginau ku chikumangan. (Mid. 17:11) Ov, mulong wak? Anch twaman chiyul cha Nzamb mu Bibil wetu ayinetu, chikwikal ni usu ukash piur petu. (Heb. 4:12) Chawiy lel, kurutu kwa kutang nich dizu dizambukina maverse mudi minam, mwin kutakel chikumangan ufanyidin kuyinkish in kukumangan chisu chifanyidina chakwel kukimb maverse minam ni kulondul pamwing pamatanginau.
Tukwet Yisu Yivud ya Kumekesh Ritiy Retu
7. Ov, chom ik tufanyidina kusal pitwilejina Chinong cha Kalam?
7 Kuswimp kukwau mu mitu ya milong ya dilejan dia Chinong cha Kalam kwambaten nich kulep kwau. Mu mivu ya katat, yidi yiswimp. Chawiy lel, pakatau Kwilej Chinong cha Kalam, asadidil chisu chikemp mulong wa kutang maparagraf pakwez chisu chijim achitekin mulong wa kupan yakul. Antu avud mu chikumangen akwet chisu cha kumekesh patok ritiy rau kusutil ku kwakul ku yipul yifundinau, ku kusadil maverse, ku kulond mu wiswimp piur pa yom yasadika yimekeshina manangu ma kulondul yijil ya Bibil, ap mu mitapu yikwau. Chifanyidin kusutish kand yisu yimwing mulong wa kwisambin piur pa yipich.—Tang Kuseng 22:22; 35:18; 40:9.
8, 9. Wisu mudimu wa ntakel wa Dilejan dia Chinong cha Kalam?
8 Pakwez, kukwikal chisu cha kupan yakul yishalijadina ching anch antu alet yakul mu wiswimp ni muntu utakedila chikumangan wipuk kulond nakash pa chisu cha Dilejan dia Chinong cha Kalam. Chawiy lel, ov, chom ik chikutwisha kumukwash mwin kutakel chakwel kutan kwisikan pakach pa kurumburil kwend ni yakul ya in kukumangan chakwel anch chikumangen chikala chiyikasikeshina antu awonsu?
9 Chakwel wakula, shinshikin chilakej chimwing. Dilejan dia Chinong cha Kalam ditakedilau nawamp didi mudi chit cha yisalamb ya ufun yiwapila kutal. Mudi kamu mudinga mu chit cha yisalamb, yisalamb yivud kushalijan, chawiy lel Dilejan dia Chinong cha Kalam adisadil nich yakul yivud yishalijadina. Mudi mukatau kushalijan yisalamb ku kujimb, mwawiy mukatau kushalijan yakul ku kujimb ni mu mutapu wa kuyilet pa chisu cha kukumangan. Ov, mudimu ik ukwetay mwin kutakel? Kurumburil kwend kwa pachipatu kudi mudi tuyikunku tukemp twa masuku akatau kuwej nawamp ku chit cha yisalamb. Tu masuku twinetu tukatap kumekan kupandakanamu yisalamb yin bwat; pakwez, tukat kukwash chakwel chom chimekana chiwamp ni yisalamb yikala mu umwing. Chilik chimwing, muntu utakedila ufanyidin kulam mu manangu anch mudimu wend udiap wa kuyikel, pakwez udi wa kurijek mazu ma kushiman mapaninau kudi chikumangen. Mwawiy, anch yakul yivud yishalijadina yikatau kupan chikumangen ni yirumburil yikemp yipaninau nawamp kudi mwin kutakel ya kwatijan nich ukaliweny, yikez kwikal mudi chit cha yisalamb ya ufun ya mazu makeza kuyisangaresh awonsu akumangena.
‘Tupanany Machuku Mawonsu Yakupesh ya Kushiman Kudi Nzamb’
10. Ov, mutapu ik wadingau ni kuman in Kristu a kusambish yikumangan ya chikumangen?
10 Mutapu mulejenay Paul piur pa yikumangan ya win Kristu mu 1 Korint 14:26-33 yitukwashin kutesh nawamp mutapu wadingau ni kutakel yikumangan yiney mu chitot cha kusambish cha mivu. Parumburilay verse winou, mwin kwilej Bibil umwing wafunda anch: “Chom cha kashinsh cha pakampwil piur pa mudimu wa Egliz wakusambish chifanyidin kwikal anch muntu mwawonsu washikena ku kwiyovil anch ukwet niyend chisend ni amushindidil kupan ukwash kanang ku chikumangan. Ikundj kadingap ni kwez nich chitongijok kusu cha kutesh; kadingap ni kwez mulong kusu wa kutambul pakwez mulong wa kupan.” Chakin kamu, in Kristu a kusambish ading amen yikumangan ya chikumangen mudi yisu ya kumekesh ritiy rau.—Rom 10:10.
11. (a) Ov, chom ik chikata kukwash nakash chakwel yikumangan yikala yikasikeshina, ni mulong wak? (b) Ov, chiyul ik tukutwisha kusadil mulong wa kuwapish yakul yetu ku yikumangan? (Tal note.)
11 Kumekesh ritiy retu ku yikumangan kukat kukwash nakash ku “kuyikasikesh in chikumbu cha Nzamb [chikumangen].” Ukez kwitiyij chakin kamu anch chikalap nchik uvud wa mivu twakumangena kal ku yikumangan, chidandamedin kwikal cha musangar wakin kutesh yakul yakwilau kudi akadivar netu ni anambaz. Yakul yakin ya amakurump ni ambay netu akaritiy yikat kutushikang ku muchim; twovil musangar wa kubangin kujim kwa amakurump in ranaken; ni tukutwishap kukwash pakwez tukat kumwemwet pakatau an akemp kupan kapamp kamwing yakul yimekeshina rukat ra kashinsh mulong wa Yehova. Chakin kamu, kusutil ku kwakul, etwawonsu tukat kusadil pamwing chakwel yikumangan ya in Kristu yikala yikasikeshina.b
12. (a) Yom ik tukutwisha kwilejin ku chilakej cha Moses ni Jeremiy? (b) Ov, malembil makwet mudimu ik mu kupan yakul?
12 Pakwez, mulong wa antu abutwalela, kwakul kukutwish kwikal kukasikena. Anch chidi mwamu ku mutambu wey, chikutwish kwikal cha ukwash kuvurik anch mwikadil wey kiudiap wa pakampwil. Ap kand atushalapol a Nzamb mudi kamu Moses ni Jeremiy amekesha kuburen kuchingejin mu ukaliweny wau wa kulond kurutu kwa antu avud. (Kub. 4:10; Jer. 1:6) Pakwez, mudi kamu mwayikwashay Yehova atushalapol inay a pasak kumushiman patok, Nzamb ukez kakukwash chakwel upana yakupesh ya kushiman. (Tang Hebereu 13:15.) Ov, mutapu ik ukutwisha kutambul ukwash wa Yehova chakwel upwisha wom wey wa kwakul? Chakusambish, rijek nawamp chikumangan. Chawiy lel, kurutu kwa kuya ku Chot cha Want, mushejina Yehova mu malembil ni mwita chakwel akwinkisha usu wa kwakul. (Fil. 4:6) Witin chom chidia “mudi mudia rusot rend,” chawiy lel ukutwish kuchingejin anch Yehova ukez kwakul ku malembil mend.—1 Yohan 5:14; Jinsw. 15:29.
Yikumangan Yikweta Rutong ra ‘Kuyikwash, Kuyikasikesh, ni Kuyongoj’
13. (a) Ov, chikumangan chikutwish kwikal nich usu ik piur pa in kukumangan? (b) Yipul ik yidia ya usey wa pakampwil pantaliken ni amakurump?
13 Paul ulejen anch rutong ra usey ra yikumangan ya chikumangen ridi ra ‘kuyikwash, kuyikasikesh ni kuyongoj’ antu akumangena.c (1 Kor. 14:3) Ov, mutapu ik ukutwishau amakurump in Kristu nlel unou kushinshikin anch misamb yau ku yikumangan yiyikasikeshin ni kuyongoj akadivar ni anambaz? Chakwel twakula, tushinshikinany bil piur pa chikumangan chatakelay Yesu mu wiswimp kupwa kwa kuvumbuk kwend.
14. (a) Milong ik yasambela chikumangen chatenchikay Yesu? (b) Ov, mulong wak atwimbuy ashikena ku kwov musangar ‘pasejay Yesu piswimp, ni kuyilej.’?
14 Chakusambish, shinshikin milong yasadika kurutu kwa chikumangan chinech. Mu machuku makemp kurutu kwa kumujip Yesu, atwimbuy awonsu “amuchina, aya mau,” ni mudi wasambelay kulond “muntu ni muntu waya kwol kwend.” (Mar. 14:50; Yoh. 16:32) Kupwa, kwa kuvumbuk, kwend Yesu wayitazuka atwimbuy end adinga anenganena chakwel akumangana ku chikumangan cha pakampwil.d Mu kwakul, “in kwilej dikum ni umwing aya ku mukandu mwi ngand ya Galalia mudi mwayilejau kudi Yesu.” Pashikau, “Yesu waseja piswimp, wayileja.” (Mat. 28:10, 16, 18) Tongin bil chafanyina kwikal cha musangar mudi ik kudi atwimbuy payikumangejay Yesu! Yom ik yisambinay Yesu?
15. (a) Ov, Mutu wa mulong ik wisambinay Yesu, pakwez chom ik chalikay kwisambin? (b) Ov, mutapu ik chikumangan chinech chayikasikesha atwimbuy?
15 Yesu wasambisha nich kupan chijikish anch: “Anginkishin kal ulabu wawonsu.” Kupwa wayinkisha mudimu wa kusal anch: “Yangany kudi antu a michid yawonsu yikarumunany kwikal in kwilejam.” Kupwa, wayinkisha nich rukat kashinsh anch: “Nikwikal ni yenen machuku mawonsu.” (Mat. 28:18-20) Ov, umen chalikay Yesu kusal? Ndiy walika kuyipup atwimbuy end; kasadinap kand chikumangan chinech mulong wa kuyipul piur pa yibachikin yau ap kupandikesh yovil yau ya kufa nich kusutil ku kwisambin piur pa ritiy rau rikemp pa chirung kanang. Chikwau kand, Yesu wayikasikesha anch ndiy ni Tatukwend ayikatin chawiy chayinkishau mudimu winou ujim. Kuyisejin kwinoku kwa Yesu kwadinga ni usu wa mutapu ik kudi atwimbuy end? Awiy atambula ukwash, dikasikesh, ni rongoj chawiy lel, pa yisu yimwing kupwa kwa kukumangan kwinikwa, achirikina kand mulong wa “kulejan ni kurumburil Rusangu ruwamp.”—Mid. 5:42.
16. Mutapu ik ukatau amakurump in Kristu nlel kwimburij chilakej cha Yesu mu kutakel yikumangan yidia musul wa dikasikesh?
16 Mu kumwilikej Yesu, amakurump nlel amening anch yikumangan yidi yisu ya kumekesh rukat rikash pantaliken ni ambay nau akaritiy rukat rikwetay Yehova pantaliken ni antu end. (Rom 8:38, 39) Chawiy lel, mu yikunku yisutishinay ku chikumangan, amakurump akat kwimen pa kuyikasikesh akadivar nau, kangal pa uyimp wau. Kakatap kurumburish yibachikin ya akadivar nau. Pa ndond pa kusal mwamu, mazu mau makat kumekesh anch ayimen ambay nau akaritiy mudi antu amukatina Yehova ni asotina kusal yom yitentamina. (1 Tes. 4:1, 9-12) Chakin kamu, amakurump akutwish pa chisu kanang kuswir kupan chiyul chakwel kutenchik yom mu chikumangen chakabuj, pakwez anch antu aswiridina ukwash adi akemp, chiyul mudi chinech chiwapidil kuchipan yisu yivud mu mambamb ma kuns ni antu aswiridina ukwash. (Gal. 6:1; 2 Tim. 2:24-26) Padingay ni kulejan ku chikumangen chakabuj, rutong ra amakurump rifanyidina rading ra kuyikasikesh. (Isay 32:2) Asadining usu wa kulond mwamu chakwel kwinsudiel kwa chikumangan, antu awonsu akumangana atambula usu ni dikasikesh.—Mat. 11:28; Mid. 15:32.
Musul wa Dikasikesh
17. (a) Mulong wak chidi cha usey nakash kupandakanamu chisu chawonsu anch yikumangan yetu yikala ndond ya kujingamin? (b) Ov, chom ik ukutwisha kusal amwiney chakwel yikumangan yikala yikasikeshina? (Tal mushet “Mitapu Dikum ya Kwikadish Yikumangan Yikala Yikasikeshina Kudi Ey ni Kudi Antu Akwau.”)
17 Mulong mangand ma Satan mikadil kal ma chisum nakash, tuswiridin kushinshikin anch yikumangan yetu ya in Kristu yidi ndond ya diking—musul wa dikasikesh mulong wa antu awonsu. (1 Tes. 5:11) Nambaz umwing warisha pamwing ni nfumwend nich kupakiu kukash mu mivu kanang wavurika anch: “Kwikal ku Chot cha Want kwading mudi kwikal mu chikas cha kubangin cha Yehova. Pa chisu twadinga kwinikwa, ading atunyingumokin kudi akadivar netu in Kristu ni anambaz, twiyova anch twadinga ni usu wa kutek chisend chetu kudiay Yehova, ni twikala nich chilik cha chisambu mu muchim.” (Kus. 55:22) El amboku, antu awonsu akumangena ku yikumangan yetu atambula dikasikesh ni rongoj chilik chimwing. Chakwel twikal nich kashinsh anch chikwez kwikal mwamu, dandamenany amboku kusal usu wetu wawonsu chakwel yikumangen ya win Kristu yikala yikasikeshina.
[Mazu madia kwishin kwa paj]
a Asambela kulond anch yom yimwing yasadikanga mu yikumangan ya in Kristu a mu mivu chitot ya kusambish yikez kupwa. Chilakej, tukatap “kulond nich jindim jakad kwijikan” ap ‘kubwak.’ (1 Kor. 13:8; 14:5) Ap mwamu, malejan ma Paul matukwashin kutesh nawamp mutapu chifanyidina kutakel yikumangan ya in Kristu nlel unou.
b Mulong wa yiyul pa mutapu wa kuwapish yakul yetu ku yikumangan, tal Chinong cha Kalam, cha Mwinses 1, 2003, paj wa 19-22.
c Mulong wa kushalijan kudia pakach pa “kukasikesh” ni “kongoj,” buku Vine’s Expository Dictionary of Old and New Testament Words, urumburil anch dizu dia Grek dikarumwinau “kongoj” dilejen “kujimb kwa ranaken kupandakenamu [kukasikesh].”—Ilikej nich Yohan 11:19.
d Chinech chikutwish kwikal chisu chisambinay Paul palonday anch Yesu “wamekana kapamp kamwing kudi in kwitiyin yitot yitan.”—1 Kor. 15:6.
Mutapu ik Ukwakula?
• Ov, yikumangan ya in Kristu yikwet usey wa mutapu ik?
• Mulong wak yakul yipaninau ku yikumangan yikwashin ku “Kukasikesh chikumbu cha Nzamb ap [chikumangen]”?
• Ov, yom ik tukutwisha kwilejin kusutil ku chikumangan chatakelay Yesu ni atwimbuy end?
[Kamushet/Yipich yidia pa paj wa 26, 27]
MITAPU DIKUM YA KWIKADISH YIKUMANGAN YIKALA YIKASIKESHINA KUDI EY NI KUDI ANTU AKWAU
Irijeka kurutu. Anch wilej kurutu kwa chisu malejan makezau kwisambin ku Chot cha Want, yikumangan yikukusangaresh nakash ni yikez kukwinkish yovil yikash.
Kumangan pakad kujing. Mulong kukumangan kuwamp kukat kumukasikesh nakash muntu mwawonsu udiaku, kwikalaku kwey kukez kuwapish yom.
Shik pa chisu chifanyidina. Anch ushich kurutu kwa program kusambish, ukutwish kuwang pamwing muminy wa kusambish ni malembil, yidi yom yitukwashina niyawiy kumwifukwil Yehova.
Ez ni yom yawonsu yifanyidina. Ez nich Bibil wey ni mikand ya kusadil ku chikumangan chakwel ulondula nawamp ni ulama yitongijok yisambinau.
Ipuk kuzuwol. chilakej, tang jinsangu jikutwishau ku kutumin mu telefon kupwa kwa yikumangan, kangal watang pa chisu cha yikumangan. Mu mutapu winou, ukutek yisakin yey pa ndond pau.
Akul. Anch antu avud apan yakul, antu avud akez kutambul dikasikesh ni ukwash kusutil kudi mazu mashalijadina ma ritiy.
Akul mu wiswimp. Chinech chikat kuyinkish antu avud pichitwishikina chisu cha kwakul niyawiy.
Wanyish mudimu. Pitudia in Kwilej ku Shikol ya Mudimu wa Uteokras ap in kwakul ku Chikumangan cha Mudimu, irijeka nawamp, chirikinamu kurutu kwa chisu, ni pakish kusal usu chakwel kangal walik kusal yikunku yikwinkishinau.
Yijikitisha asadila yikunku. Yileja antu asalang yikunku ku chikumangan ap apanang yakul mutapu usangaredina usu.
Salany yom pamwing. Kulangwish kwa rukat ni misamb yikasikeshina kurutu ni kupwa kwa yikumangan kuwejidin nakash musangar ni yiyukish yidiokila ku kwikalaku.