Ov, Chitwishikin Kusanger Yom Tukweta?

“Kusanger yom yikwetau kukat kuyisal atuzwendj ikala ampich; kuburen kusanger kukat kuyisal ampich ikala atuzwendj.”​—Benjamin Franklin.

KUKWATIJAN nich jinswir jinej, antu avud ileja anch kusanger yom yikwetau kakutwishap kukuland mudi yom ya kulandish. Chidiap chom chishimokishena anch kusanger kwinoku​—chovil cha kusanger chidia mu muchim—​chimeken anch chikasiken kuchikal nich mu mangand makasikeshina maku ma kupit yom yivud, kusal yom yijim, ap kwikal nich mwom uyisangareshina antu akwau! Ov, yom yiney yikwet usu pa ey?

• In kupalangesh jinsangu ja kwisak alejen anch musangar udiokil ku kukimbijol yom yivud.

• Kubambel ku mudimu ap ku shikol kukutwish kukukasikesh kwisikesh usey wey ni wa yom yikutwishau kusal kudi antu akwau.

• Antu aburedining kusanger yom yiukata kuyisadil.

• Arund akutwish kukubachik chakwel wikala ni ris ra yom yikwetau.

• Udandamedin kuburen yakul ku yipul yey yijim piur pa mwom.

Piturishina nich yom yiney, ov, chitwishikin kusanger yom yitukweta? Kambuy Paul wisambina piur pa ‘kusangar nich yom yikwetay.’ Yisu yimwing, ndiy wadinga nich yom yivud ni pa yisu yikwau wadinga ni yikemp. Arund nend amusangera pakwez antu akwau amusipa. Chikwau kand, ndiy walonda anch “Nilejin kal kand mutapu wa kusangar yisu yawonsu mu mitapu yawonsu.”​—Filip 4:11, 12.

Kusanger yom yitukweta chidi chom chakad kwijik kudi antu akad kupakish ap dichuku dimwing kwikal nich, pakwez mudi mwalonday Paul, chitwishikin kwilej kusanger yom yitukweta. Tukwitin kushinshikin katat kamu ak yom yitan yakad kwijik piur pa kusanger yom yitukweta yilejenau mu Bibil, Dizu dia Nzamb.