Ilejina ku ‘Chijingidij cha Uyakin’

“Nikwet chijingidij cha ronganyin ni uyakin mu yijil ya Nzamb.”—ROM 2:20.

1. Ov, mulong wak tufanyidin kutongin nakash piur pa kurumburik kwa Chijil cha Moses?

PAKAD mikand yapepilau yafundau kudi kambuy Paul, chela kutukasiken kutesh kurumburik kwa milad yivud ya Chijil cha Moses. Chilakej, mu mukand wend kudau in Hebereu, ndiy walejana patok piur pa mutapu Yesu mudi “mwin kupesh mujim” wafanyidina “kuyilikishin antu yitil” kapamp kamwing ni rawonsu ni kusal anch antu awonsu akweta ritiy atambula “kwikol kwa chikupu.” (Heb. 2:17; 9:11, 12, TMK) Paul warumburila anch dizang diading kusu “chilikej chifanakena pakemp nich yom ya kashinsh yidia mwiur” ni anch Yesu wikala cha pakach wa “manswik mapandakena kuwap” kupandakenamu manswik ma Moses. (Heb. 7:22; 8:1-5) Mu chirung cha Paul, kurumburil kwinoku kwa Chijil kwading kwa usey nakash kudi in Kristu, ni kudi kwa usey kand lel unou. Kutukwashin kujingunin nakash usey wa yom yasalay Nzamb mulong wetwetu.

2. Ov, chom ik chatambulau in Kristu in Yuda kupandakanamu Akamichid?

² Payifundinay Paul in Kristu a ku Rom, ndiy walonda mazu mamwing pantaliken ni yid ya chikumangen yadinga ya in Yuda ni yileja Chijil cha Moses. Ndiy witiyija anch antu inay, mulong wa ronganyin rau ra Chijil cha Nzamb, awiy atambula “chijingidij cha ronganyin ni uyakin” piur pa Yehova ni yany yend yitentamina. Kutambul ‘chijingidij cha uyakin’ ni kalimish kadiokila ku muchim pantaliken nich uyakin winou kwayitwishisha in Kristu in Yuda, mudi in Yuda ashinshamena kurutu kwau, ayitakela, ayileja, ni kuyitokish antu akad kwijik Chijil chapanay Yehova kudi antwend.—Tang Rom 2:17-20.

CHILIKEJ CHIFANAKENA NICH YAKUPESH YA YESU

3. Ov, mutapu ik tukutwisha kutaninamu mu kwilej piur pa yakupesh ya pasak ya in Yuda?

³ Chijingidij cha uyakin chisambinay Paul chidi kand cha usey kudi etu chakwel tutesha jintong ja Yehova. Yany yidiokila ku Chijil cha Moses yashadishap kurumburik ap kumwing ap usey way. Nich chinech mu manangu, tushinshikinany amboku piur pa mulad umwing wa Chijil chinech—mutapu yakupesh ni yipan kushalijan ya yitakela in Yuda itudishina kudi Kristu ni kuyikwash kwijik yitinay Nzamb kudi awiy. Chawiy lel, yitiyij ya usey ya Yehova kudi atushalapol end yikezap kuswimp, tukez kuman kand anch yijil ya Nzamb kudi in Isarel piur pa yakupesh ni yipan chikutwish kutukwash chakwel tushinshikina usey wa mudimu wetu utumbila.—Mal. 3:6.

4, 5. (a) Ov, chijil cha Moses chading ni kuyivurish antu a Nzamb chom ik? (b) Ov, chijil cha Nzamb piur pa yakupesh chading ni kwisambin yom ik?

⁴ Chikasiken kuvuramen yayilejau in Yuda a pasak mulong milad yivud ya Chijil cha Moses yikasikeshina piur pa yitil yau. Chilakej, muntu mwawonsu wakwata ku chital cha mufu wafanyidina kwitokish. Mulong wa kwitokish, adinga ni kujip ni kwosh ngomb usuz. Maut mend ading ni kumalam chakwel ez asala nich “mem ma kwishitwish nich,” madingau ni kumwichidil muntu wadingau ni kutokish pa dichuku dia kasatu ni dia sambwad kupwa kwa kwijondish. (Kuch. 19:1-13) Mulong wa kuvurish anch kuvalijan kwa antu kwading kuletin kuburen kuwanyin ni chitil, mband anch waval wadinga ufanyidin kulondul chisu chimwing cha kwishitul chafanyidinay kwitokish kusutil chakupesh.—Lev. 12:1-8.

⁵ Ita yakupesh ya anam mu mikadil yikwau yivud ya mwom wa dichuku ni dichuku mulong wa kwitokish ku chitil. Ap anch in kwifukwil ajingunina ap bwat, yakupesh yiney—ni yadingau ni kupan ku chikumbu cha Yehova—yading “chilikej chifanakena” cha yakupesh yiwanyidina ya Yesu.—Heb. 10:1-10.

KURUMBURIK KWA YAKUPESH

6, 7. (a) Ov, chom ik chayikwasha in kwifukwil in Isarel chakwel atonda milambu yakupesh, ni chom chinech chading chisambedil kulejan yom ik ya kurutu? (b) Ov, yipul ik tukutwisha kwiyipul ayinetu?

⁶ Chijil chijim piur pa nnam mwawonsu wafanyidinau kupan kudi Yehova chading anch nnam ufanyidin kwikal “wakad ulim” mu mikadil yawonsu—wakad kwikal mputames, wakad chitat, ulim ap mayej. (Lev. 22:20-22) Padingau ni kupan in Isarel mbut ap mabuj mudi milambu kudi Yehova, awiy ading afanyidina kupan “mabuj,” “yom yipandakena kuwap” ya kwangul yau. (Kuch. 18:12, 29) Yehova kadingap ni kwitiyij mulambu wadinga pa ndond ya kaad. Chijil chinech cha usey piur pa milambu ya annam chading chilejen anch yakupesh ya Yesu yikez kwikal zwang ni yakad ubid ni anch Yehova ukez kupan chom chiwamp nakash ni chikatinay nakash mulong wa kuyikol antu.—1 Pita 1:18, 19.

⁷ Anch muntu wadinga ni kupan mulambu wading umujikitishin chakin kamu Yehova mulong wa uwamp Wend wawonsu, ov kakezap kusanger kutond chom chiwamp nakash chikwetay? Muntu ni muntu wafanyidina kutond mulambu ukezay kupan. Pakwez, ndiy wading wij anch Nzamb kakezap kusanger mulambu wakad kufanyin mulong chinech chela kumekesh anch muntu umen mulambu mudi chom chamwamu ap chisend chikash. (Tang Malakiy 1:6-8, 13.) Chinech chifanyidin kutubachik tutongina pa mudimu tukata kumusadil Nzamb anch: ‘Ov, nikat kumusadil Yehova nich chitongijok cha mutapu ik? Ov, chikwikalap chiwamp kudi am kuchirikin mwikadil wa mudimu wam ni yikata kwimbachik chakwel nisala mudimu wend?’

8, 9. Ov, mulong wak tufanyidin kushinshikin piur pa spiritu wayibachika in Isarel chakwel apana milambu yau?

⁸ Anch mulong wa mwin Isarel wading kumekesh kwa kwisotil kwa kujikitish kudiokila mu muchim pantaliken ni Yehova ap, mudi mwadinga chakupesh cha kwosh, kwit kwa kwitiyik kwend, chelap kukasikan kutond nnam ufanyidina kulambul. Mwin kwifukwil ukusangar kumwinkish Yehova chom chend chiwamp nakash. Nlel unou, in Kristu kakatap kupan milambu mudi yalejanau mu Chijil cha Moses, pakwez afanyidin kupan milambu, mu kusadil chisu, usu, ni mapit mau mulong wa kumusadil Yehova. Kambuy Paul wisambina piur pa “milamu yikata kwitiyil” ya ruchingej ra in Kristu ni “kusal nawamp ni kukwashijan” mudi milambu yimusangareshina Nzamb. (Heb. 13:15, 16) Spiritu ukata kuyibachik antu a Yehova kwipan mu mijikit mudi yiney umekeshin mutapu mudiau in kujikitish ni kusanger mulong wa yom yawonsu yayinkishau kudi Nzamb. Chawiy lel, kudi yom yidia chilik chimwing pakach pa yaku ni yibachikin ya antu ipanina mu mujikit wa in Kristu nlel unou ni antu alambula pasak milambu ya kwisotil.

⁹ Ov, chom ik tukutwisha kulond, piur pa chisu chita Chijil cha Moses kupan mulambu wa chitil wadingay ni kupan muntu mulong wa uyimp usadilay? Ov, utongin anch kumushindil muntu chakwel apana mulambu kwela kumekesh kushalijan pakach pa rusot ra muntu ni mwikadil wend wa kupan? Ov, ndiy wela kupan pamwing ap milambu yiney ku usu? (Lev. 4:27, 28) Chinech chelap kwikal mwamu anch muntu upanina mulambu wading usotin chakin kamu kulam urund uwamp ni Yehova.

10. Ov, ‘yakupesh’ ik yikutwishau kupan in Kristu chakwel atenchika urund wayipa?

¹⁰ Chilik chimwing, nlel unou tukutwish kujingunin anch pakad kwijik wamurumbukin kal mukadivar kampand. Kom key kakutwish kukulej anch ey warumbuk kal. Muntu mwawonsu ukata kumwifukwil Yehova nich muchim wend wawonsu ukez kusal usu wend wawonsu chakwel kutenchik kurumbuk, kimwawiyap? Chinech chirumburikin kwit dilikishin nich muchim wawonsu kudi muntu mwawonsu twarumbukinang, anch kudi chitil chijim nakash, kukimb ukwash wa muspiritu udiokila kudi amakurump in Kristu akatish. (Mat. 5:23, 24; Jak. 5:14, 15) Chawiy lel tufanyidin kufut chom chimwing mulong wa kutenchik kurumbuk twamurumbukinang mbay netu ap Nzamb amwinend. Ap mwamu, pitukata kupan ‘yakupesh’ yiney, tukat kuchirish urund wetu ni Yehova ni akadivar netu ni kwikal nich kom katok. Chinch, chitukasikeshin kand etu anch jinjil ja Yehova jidi jiwamp nakash.

11, 12. (a) Ov, yakupesh ya chisambu yamekesha ditenchik ik? (b) Ov, yakupesh ya chisambu yikwet kurumburik ik mu difukwil dishitwila nlel unou?

¹¹ Yakupesh yimwing yalejanau mu Chijil cha Moses ading ayitazukin anch milambu ya chisambu. Chinech chading chirumburikin kwikal mu chisambu ni Yehova. Muntu wading upanina mulambu winou ni dijuku diend afanyidina kudia mbij ya chakupesh cha nnam, pamwing ap mu kapalikany kamwing ka tempel. Mwin kupesh wading usadila mudimu wading ni kutambul chikunku cha mbij, mudi mwadingau ni kusal in kupesh akwau ading asadila ku tempel. (Lev. 3:1; 7:32, 33) Mwin kwifukwil wading upanin chakupesh chend nich rusot ra kwikal nich urund uwamp ni Nzamb. Chinech chading mudi mwin kwifukwil, dijuku diend, in kupesh, ni Yehova amwinend ading adil pamwing yakudia, mu chisambu.

¹² Chinech chading chisend cha usey mud ik, mu chifanikesh, kumwit Yehova ku yakudia yiney ni kwitiyij kudi ndiy? Chimeken anch, mwin chikumbu wasota kupan yom yend yiwamp kudi angendj inay a katumb. Kwikalaku kwa yakupesh ya chisambu, chikunku cha chijingidij cha uyakin wa Chijil, kwamekesha anch kusutil ku chakupesh chijim cha Yesu, antu awonsu asotina kwikal mu urund wa piswimp ni wa chisambu ni Sakatang wau akutwish kusal mwamu. Nlel unou, tukutwish kusanger urund wa Yehova ni wa antu akwau anch twapan kwa kwisotil mapit ni usu wetu mu mudimu wend.

KUBABESH PIUR PA YAKUPESH

13, 14. Ov, mulong wak mulambu wapanay Mwant Saul wadingap witiyikina kudi Yehova?

¹³ Pakwez, mulong wa kwitiyik kudiay Yehova, yakupesh yafundau mu Chijil cha Moses chafanyidina kuyilambul nich mwikadil uwamp wa manangu ni wa muchim. Pakwez, Bibil ukwet yilakej ya kubabesh piur pa yakupesh yakad kwitiyik kudi Nzamb. Ov, chom ik chasala anch ayilika? Shinshikinany amboku mikadil yaad.

¹⁴ Muprofet Samwel wamuleja Mwant Saul anch chading chisu cha kuyirumburish in Amalek. Chawiy lel, Saul wafanyidina kuyijip akankuny nend pamwing ni yivam yau. Pakwez, kupwa kwa kuyijip, Saul wayileja amasalay end anch amulama Agag mwant wa in Amalek mwom. Ndiy walama kand yivam yau yiwamp mudi chom chimwing chelau kulambul kudiay Yehova. (1 Sam. 15:2, 3, 21) Ov, chom ik chasalay Yehova? Ndiy wamulika Saul mulong wa kuburen kuziyil kwend. (Tang 1 Samwel 15:22, 23.) Ov, chom ik twilejina pa chinech? Chakwel Nzamb itiyija, yakupesh yifanyidin kubombakan pamwing ni kuziyil ku yijil yend.

15. Ov chom ik chamekesha chaku chiyimp cha in Isarel amwing ipana pa chirung cha Isay?

¹⁵ Chilakej cha mutapu winou chidi kand ni mu buku wa Isay. Mu chirung cha Isay, in Isarel ading atongin anch akat kulambul kudi Yehova. Pakwez chaku chau chiyimp chasala anch yakupesh yau yikala ya chamwamu. Yehova wipula anch: “Ov, utongilany anch, am nikatil yakupesh yivud yiukata kwinlambulany? En wapandakeshanyimu kal yakupesh ya kwosh ya amakwal a amikoku, ni ya many ma annam en awamp. Kinasangerap nich mash ma amakwal a ampemb. . . . Kangal wanletilany kand milambu yitakanena. Yawiy kamu ya diseng dia malash. Kinikatilap Misambu yen ya Kwarik kwa Ngond.” Ov, mulong wading nchik? Nzamb wayileja anch: “Ap anch wavudishany kulembil, kinikukuteshanyap, mulong makas men mizwil sens nich mash. Owalany mem, itokishany, dioshany yisalijok yen yiyimp kurutu kwam. Likany kusal nayimp.”—Isay 1:11-16.

16. Ov, chom ik chikutwisha kumekesh anch mulambu awitiyijin kudi Nzamb?

¹⁶ Yehova kasangerap yakupesh yapanau kudi akayitil akad kukarumuk. Pakwez, malembil ni milambu ya antu ading ni kwipan nich kashinsh mulong wa kuziyil ku yijil ya Nzamb ndiy wading ukat kuyitiyij. Chijingidij cha Chijil chayileja antu inay anch awiy ading akayitil ni ading aswiridin kuyilikishin. (Gal. 3:19) Yom yiney yasala anch ova ushon. Chilik chimwing nlel unou, tufanyidin kwitiyij anch tuswiridin yakupesh ya Kristu, ukutwish kudiosh chakin kamu yitil. Anch twatesh ni twasanger chakupesh chinech, Yehova “ukusangar” mulong wa yom yawonsu tukata kumwinkish mu mudimu wetu wa kwipan.—Tang Kuseng 51:17, 19.

KWITIYIJ CHA KUPESH CHA DIFUT DIA YESU!

17-19. (a) Ov, mutapu ik tukutwisha kumekesh nawamp kudi Yehova kujikitish kwetu mulong wa yakupesh ya difut dia Yesu? (b) Ov, chom ik tukeza kwisambin mu mutu wa mulong ulondwilaku?

¹⁷ Chom chisadina anch tuyipandikenamu antu ashakama pa chirung cha kurutu kwa in Kristu chidi anch tukatap kudandamen kuman ching kusu “chijingidij” cha ntong ja Nzamb bwat. (Heb. 10:1) Yijil piur pa milambu yayikasikesha in Yuda chakwel ikala nich chaku chiwamp cha kwikal mu urund uwamp ni Nzamb—kumujikitish nich kashinsh, kwikal nich rusot ra kumusadin yom yiwamp, ni kwitiyij kuswir kwa kukolik. Tujikitishin kurumburil kudia mu Mikand ya Grek ya in Kristu, yitulejina chakwel twijika anch kusutil ku difut, Yehova ukez kudiosh rawonsu yibudikin ya chitil ni utukwashin katat chakwel twikala nich kom katok kurutu kwend. Yakupesh ya difut dia Yesu yidi ditenchik diamushena mud ik!—Gal. 3:13; Heb. 9:9, 14.

¹⁸ Chakin kamu, tuswiridinap ching kusu kutesh kurumburik kwa yakupesh ya difut chakwel tutaninamu. Kambuy Paul wafunda anch: “Chawiy Yijil ya Moses yading kalam wetu djat ni pashikinay Kristu, chakwel tukutwish kuying kurutu kwa Nzamb mulong wa ritiy.” (Gal. 3:24) Ni ritiy riner rikutwishap kuburen yisal. (Jak. 2:26) Chawiy lel, Paul wayikasikesha in Kristu a mu mivu chitot ya kusambish adinga nich chijingidij cha ronganyin chalejanau kudi Chijil cha Moses chakwel asadila ronganyin riner. Mu kusal mwamu, chaku chau chela kwambatan nich yany ya Nzamb yadingau ni kulejan.—Tang Rom 2:21-23.

¹⁹ Nlel unou ap anch in Kristu kayitinap kuziyil ku Chijil cha Moses, awiy afanyidin kupan yakupesh yitiyijinay Yehova. Mutu wa mulong ulondwilaku ukez kutulej mutapu tukutwisha kusal mwamu.

KIMBANY YAKUL KU YIPUL YINEY:

․․․․․

Ov, yakupesh yalejanau mu Chijil cha Moses yafanikesha chom ik?

․․․․․

Ov, chom ik chifanikeshina yakupesh yimwing yasalau kudi in Isarel ni yisadilau kudi in Kristu nlel unou?

․․․․․

Ov, yom ik yimekeshina anch yakupesh akez kuyitiy kudi Yehova ap bwat?

[Tablo wa jinsangu udia pa paj wa 19]

Yitiyij ya usey ya Yehova pantaliken ni atushalapol end yikutwishap kukarumuk

[Chipich chidia pa paj wa 20]

Ov, nnam wa mutapu ik wela kupan kudi Yehova?

[Chipich chidia pa paj wa 21]

Antu akata kupan yakupesh yitiyijinay Yehova akat kutambul kwitiyik kwend