Ilejina ku Dizu dia Nzamb

Ov, Mulong wak in Kristu Atambwil Dibatish?

Mutu wa mulong winou wisambidin piur pa yipul walangwisha pamwing ap ni ulejen kwisu ukutwisha kutang yakul mu Bibil wey. Atuman a Yehova akez kusanger kwisambin pamwing ney pa yakul yiney.

1. Ov, dibatish dia in Kristu dirumburikin chom ik?

Dibatish dirumburikin kwit urund uwamp ni Nzamb. Chawiy lel, mwin Kristu ufanyidin kutambul dibatish, pa wan kanch bwat, pakwez pa chisu chipaminay ap chikwetay ukaliweny wa kwilej piur pa Nzamb ni kwikal mwin kwilej wa Yesu. (Midimu 8:12; 1 Pita 3:21) Tukat kwikal in kwilej a Yesu pitukata kwilej ni kusal yom yatulejay.—Tang Mateu 28:19, 20.

Pa chirung cha atwimbuy a Yesu, antu avud akwata mupak pakad kulab chakwel ileja piur pa Nzamb ni Yesu. Chilakej, pilejay muntu umwing anch rufu ra Yesu rafungula njil ya kupand, ndiy wikala kapamp kamwing mwin kwilej. Nlel unou, antu avud akatishina uyakin akwata mupak wa kwikal in kumulondul Yesu.—Tang Midimu 8:26-31, 35-38.

2. Mulong wak Yesu watambula dibatish?

Yesu wading ni mivu 30 pa mwandjikau mu mem ma Kawit ka Yordan kudi Yohan Mubatish. Dibatish dia Yesu diamekesha mupak wend wakwatay mulong wa kusal rusot ra Nzamb. (Hebereu 10:7) Ndiy wapana kand mwom wend mudi yakupesh mulong wa yitil ya antu. Ap kurutu eza pa divu kudiokal mwiur, Yesu wading umukatin ni kumuziyil Tatukwend, Yehova.—Tang Marko 1:9-11; Yohan 8:29; 17:5.

3. Ov, mulong wak mwin Kristu ufanyidin kutambul dibatish?

Mwikadil wetu ushalijadin ni wa Yesu—etu twavadika akayitil. Chikwau kand, rufu ra Yesu ra kwipan rasala anch etu tutwisha kwikal ni urund uwamp ni Nzamb. (Rom 5:10, 12; 12:1, 2) Tukutwish kwikal aend mudi chid cha dijuku diend. (2 Korint 6:18) Mutapu ik tukutwisha kwikal nich chisend chinech? Mu malembil metu ayinetu, tufanyidin kwipan kudi Yehova, kuchip kusal rusot rend mu mwom wetu wawonsu. Kupwa kwa kwipan mwamu mu malembil metu ayinetu, tukumekesh patok kusutil ku dibatish.—Tang Mateu 16:24; 1 Pita 4:2.

4. Mutapu ik ukutwisha kwirijek mulong wa kutambul dibatish?

Atuman a Yehova akat kwilej Bibil ni muntu mwawonsu usotina kwikal piswimp ni Nzamb. Kwilej Bibil ni kukumangan ku yikumangan ya in Kristu kukez kukasikesh rukat retu kudi Nzamb ni ritiy retu kudi ndiy. Kukez kutukwash kand kukudish mikadil ni yaku yiwamp. Kukudish rukat, ritiy, ni mikadil yikwau yimusangareshina Nzamb kukez kukukwash chakwel ushakam kwambatan ni kuchip kwey kwa kumusadil Yehova chikupu.—Tang Yohan 17:3; Hebereu 10:24, 25.

Anch usotin kwijik jinsangu jivud, tal shapitre wa 18 wa buku winou, Chom Ik Chakin Kamu Chifundishinay Bibil?, wapalangeshau kudi Atuman a Yehova.