Musadila Nzamb Mwin Want Ipau

“Anch chakin, tumukatil Nzamb, tuziyidil kand ku yijil yend. Chawiy yijil yend kiyikasikenap nakash kudi etu.”—1 YOHAN 5:3.

OV, UKUTWISH KWAKUL?

Ov, mutapu ik upakishinay Satan kusal anch yijil ya Nzamb yikala mudi chisend chilimina?

Ov, mulong wak tufanyidin kubabal nakash piur pa arund?

Ov, chom ik chikeza kutukwash kushal ashinshamena kudi Nzamb wa want ipau?

1. Ov, mutapu ik umenay Yehova want ipau, ni mutapu ik wamekesha chinech kudi Adam nenday Ev?

YEHOVA udi Muntu umwing kusu ukweta want ipau wawonsu. Chikwau kand, ndiy kakatap kuusadilang nayimp; ap kuusadil amwinend mu kutalel yom yawonsu yisadilau atushalapol end kachom pa kachom. Pakwez, ndiy wayinkisha want ipau, uyikwashina kutond yom yikutwishau kusal ni kuwanyish maku mau mawonsu. Chilakej, Nzamb wamwinkisha Adam nenday Ev chijidik chimwing kusu—chijil chakwel anch kafanyidinap kudia ku “dibuj dia mutond . . . wa ronganyin ra kuwap ni kuyip.” (Dis. 2:17) Ov, chilik ik chamushena cha want ipau chadingau nich mu kuwanyish rusot ra Sakatang wau!

2. Ov, mulong wak anvaj etu a kusambish ashadisha want ipau wayinkishau kudi Nzamb?

² Mulong wak Nzamb wayinkisha anvaj etu a kusambish want ipau? Ndiy wayitanga mu chifu chend ni wayinkisha kom, ni kuchingejin anch rukat rau kudi ndiy mudi Sakatang wau rikuyitakel mwinjil yiwamp. (Dis. 1:27; Rom 2:15) Cha ushon, mulong Adam nenday Ev akanganya kumusangaresh Mwin Kuyinkish Mwom wau muwamp ni want ipau wayinkishau. Chad, awiy atonda want ipau uyimp wayinkishau kudi Satan, wadinga want ipau wa kwishakamin. Pakwez, pa ndond pa kutan want ipau uvud, anvaj etu a kusambish ilandisha ayinau ni anau a mu machuku ma kurutu mu uswik wa chitil, ni yibudikin yiyimp nakash.—Rom 5:12.

3, 4. Ov, mutapu ik upakishinay Satan kutudimb etu kwambatan nich yany ya Yehova?

³ Anch Satan watwisha kuyidimb antu aad awanyidina—pakad kujimbul yitangil yivud ya muspiritu—chakwel alika ukaleng wa mangand mawonsu wa Nzamb, ukutwish kukudimb niyey. Mutapu wend wa kusal yom udi kwend winiwa. Ndiy upakishin kutudimb chakwel tutonga anch yany ya Nzamb yilimina nakash, yitukishin musangar. (1 Yoh. 5:3) Yitongijok yiney yikutwish kwikal nich usu pad etu anch twadandamen kuyitesh. Nambaz umwing ukweta mivu 24 wiyandjika mwinjil ya masandj walonda anch: “Arund ayimp ikal ni usu ukash padi am, pakampwil mulong nova wom wa kwikal nich yitongijok yakad kwambatan nich ya arund nam.” Wamen kal pamwing ap niyey yibachikin ya arund mudi yiney.

⁴ Cha ushon, mulong chisu chimwing yibachikin yiyimp ya arund yikutwish kudiokil mu chikumangen cha in Kristu. Nsand umwing Kaman ulejen anch: “Namana ansand amwing ading atil urund ni antu akad kwitiyij, chawiy lel chinech chasambisha kwinkakin kudi awiy, kupwa nasambisha kwikal mudi awiy. Mwikadil wam wa muspiritu wasambisha kuyip. Kinasangerap kand yakudia ya muspiritu yadingau ni kulet ku yikumangan, ni chasambisha kwinkasiken kuya mu mudimu wa kulejan. Chinech chamekesha anch nifanyidin kukatul urund winou, chawiy chom nasala!” Ov, wij anch arund ney akutwish kwikal nich usu padi ey? Tal chilakej chiletinay Bibil pa chisu chiwanyidina.—Rom 15:4.

NDIY WIYA MICHIM YAU

5, 6. Ov, mutapu ik wayidimbay Abisalom antu akwau, ni ov, ndiy watwisha kusal yatenchikay?

⁵ Mu Bibil mudi yilakej yivud ya antu adinga nich chibachikin chiyimp pa antu akwau. Chilakej chimwing chidi cha Abisalom, mwan wa Mwant David. Abisalom wadinga nich chifu cha ufun. Pakwez, mudi Satan, ndiy walikidila maku ma ris chakwel mizula mu muchim wend, chaad wasambisha kusot kwikal pa nkwas ya want ya tatukwend, pakwez kadingap ni mbil ya kushakam pa chitwam chinech.a Mu kupakish kusend want, Abisalom walangwisha ushon ukash kudi ambay nend in Isarel ni kuyilej nich manangu anch chikumbu cha mwant chaburena kuyibangin. Mwaning, mudi Djabul mu chir cha Eden, Abisalom wimekesha amwinend mudi muntu muwamp, ni kumusadil tatukwend yom yiyimp.—2 Sam. 15:1-5.

⁶ Ov, Abisalom watwisha kusal yom yatenchikay? Chitwishikin kulond anch, mwaning, mulong Bibil ulejen anch: “[Abisalom] wading ni kwozang michim ya in Isarel.” (2 Sam. 15:6) Pakwez, kwinsudiel chibud cha Abisalom chamushikija ku kuwa amwinend. Ni chamushikija ku rufu ni tunan twa antu twamulondula twafa.—2 Sam. 18:7, 14-17.

7. Ov, malejan ik tukutwisha kwilejin kusutil ku rusangu ra Abisalom? (Tal chipich chidia pa paj wa 19.)

⁷ Ov, mulong wak in Isarel inay ayidimba mwamu? Awiy asota pamwing ap yom yayikanay Abisalom. Ap ayidimba pamwing ap kudi ufun wend wa ku mujimbu. Chikalap nchik yom yashikena, tukutwish kwikal nich kashinsh anch: Kuburen kwau kushinshaman kudi Yehova ni kudi mwant wend watonday, kwasala ayidimba antu inay mwamu. Nlel unou, Satan udandamedin kuyisadil ‘antu adi mudi Abisalom’ mulong wa kupakish kwiy michim ya atushalapol a Yehova. Awiy akutwish kulond anch ‘yany ya Yehova yikangeshin kwikal nich want ipau.’ Ni ‘talany antu awonsu akad kumusadil Yehova. Awiy akwet yom yawonsu ya kuyisangaresh!’ Ov, ukutwish kuman anch yitongijok yiney yidi ya makasu ni kushakam ushinshamena kudi Nzamb? Ov, ukwitiyij anch ching kusu “yijil yiwanyidina,” yijil ya Kristu yawiy yikutwisha kukutwal ku want ipau wakin? (Jak. 1:25) Anch chidi mwamu, sanger yijil yiney, ni kangal wapakish dichuku ap dimwing kusadil nayimp want ipau wey wa in Kristu.—Tang 1 Pita 2:16.

8. Ov, yilakej ik yakin ya mwom yimekeshina anch musangar udiokilap ku kuburen kuziyil ku yijil ya Yehova?

⁸ Satan usotining kuyidimb ansand pakampwil. Mukadivar umwing ukweta katat mivu 30 ulondin piur pa chisu chadingay nich dikum dia mivu anch: “Namana anch yijil ya Yehova yikat kukangesh kwikal nich want ipau, kinayimanap mudi diking bwat.” Chibudikin, ndiy wasala masandj. Pakwez chinech chamuletinap musangar. Ndiy walonda anch: “Nashala nich yovil ya kwifish nich ni runeng mu mivu yivud.” Patonginay pa chisu chadingay mu dikum dia mivu, nambaz umwing wafunda anch: “Kupwa kwa kusal masandj, ukwiyov mashik ni kuburen chom. Ap katat kupwa kwa mivu 19, yitongijok yiyimp yikat kwinchirikin mu manangu.” Nambaz mukwau walonda anch: “Mwikadil wam wading nich chibachikin chiyimp nakash padi antu nading nikatina nakash, ni wasala nikala nich yibudikin yiyimp mu manangu mam, muspiritu ni mu yovil. Chikasiken kushakam pakad kwitiyik kwa Yehova.” Satan kakusotap anch utongina pa yibudikin ya chitil.

9. (a) Ov, yipul ik yikutwisha kutukwash kushinshikin rutong retu piur pa Yehova ni pa yijil ni yany yend? (b) Ov, mulong wak chidi cha usey kumwijik Nzamb nawamp?

⁹ Chidi cha ushon mud ik pa kuman anch ansand avud adinga mu uyakin—ni ap amakurump avud—ileja mu mutapu ukash anch kwisangaresh mu chitil kukwet yibudikin yiyimp nakash! (Gal. 6:7, 8) Chawiy lel iyipula amwiney anch: ‘Ov, nitiyijin anch mipit ya Satan yidi chakin kamu—kudimban kuyimp? Ov, nimumen Yehova mudi Murund nam wa piswimp, muntu ukata kulondang uyakin ni usotina yom yiwamp kudi am? Ov, nikwet kashinsh anch ndiy kakezap dichuku ap dimwing kwinkish chom chidia chakin kamu chiwamp ni kushiken ku musangar wam ujim?’ (Tang Isay 48:17, 18.) Pa ndond pa kulond mwaning mu muchim wey, ufanyidin kwijik yom yivud pa ndond pa kwikal nich ronganyin rikemp piur pa Yehova. Ufanyidin kumwijik nakash ni kwitiyij anch yijil ya Bibil ni yany yend yimekeshin anch ndiy utukatin, ni kasotinap kukangesh kwikal nich want ipau.—Kus. 25:14.

KULEMBIL MULONG WA MUCHIM UZIYIDILA NI WA MANANGU

10. Ov, mulong wak tufanyidin kwikasikesh kumwilikej Mwant nsand Salomon?

¹⁰ Padingay nsand, Salomon walonda nich kwitudish mu malembil anch: “Niyam nichidi kwam nsand, kinijap mwa kwandamin ap mwa kubudikin.” Kupwa wita muchim wa manangu ni wa kuziyil. (1 Ant 3:7-9, 12) Yehova wakula ku malembil minam ma muchim umwing, ni ukutwish kukwakul niyey, ap anch udi nsand ap mukurump. Chakin kamu, Yehova kakezap kukwinkish ronganyin ni manangu mu chilay. Pakwez, ukez kukwinkish manangu anch wilej nakash Dizu diend, walembil mulong wa kwit spiritu utumbila, ni wasaladil nakash yom yawonsu utambwila ku chikumangen cha in Kristu. (Jak. 1:5) Pa chinech, Yehova usadining anch atushalapol end ansand ikala nich manangu nakash kupandakenamu antu awonsu akad kwijik chiyul chend, ap antu atazukinau anch “in manangu ni antu ilejina” mu mangand minam.—Luka 10:21; tang Kuseng 119:98-100.

11-13. (a) Ov, malejan ik ma usey tukutwisha kwilejin mu Kuseng 26:4, mu Jinswir 13:20, ni mu 1 Korint 15:33? (b) Mutapu ik ukutwisha kusadil yany yiney ya Mukand wa Nzamb?

¹¹ Pa kwilikej usey wa kwilej Bibil ni kutongijokin pa yitukata kutang chakwel tushikena ku kumwijik Yehova nakash, shinshikinany maverse minam malondwilaku. Verse ni verse ukwet chany cha chimwing cha usey piur pa mutapu tufanyidina kutond arund netu: “Kinishichip nau antu a makasu, ap kwend nau in kutwambol.” (Kus. 26:4) “Muntu ukata kwend ni in manangu niyend ukez kwikal mwin manangu, pakwez ukata kwend nau ayisup ukez kaman mar.” (Jinsw. 13:20) “Arund ayimp akat kuyipish yaku yiwamp.”—1 Kor. 15:33.

¹² Ov, malejan ik ma usey tukutwisha kwilej kusutil ku maverse minam? (1) Yehova usotin tutonda nawamp arund netu. Ndiy usotin kutulam mu mashakamin ma kumujimbu ni muspiritu. (2) Tudi abachikinau ku uwamp ap ku uyimp kudi antu tutila nau urund; chinech chikat kushikenang mu mwom. Mutapu ufundinau maverse minam umekeshin anch Yehova witin muchim wetu. Mutapu ik? Ijik anch kwikil verse ap umwing pakach pa maverse minam amufundin mudi chijil, mudi “ufanyidinap . . .” Pakwez, amafundin mudi mazu malejena uyakin. Pakwez, Yehova utulejin anch: ‘Yom yawiy ey. Ov, chom ik ukusala? Muchim wey udi nchik?’

¹³ Kupwa, mulong maverse minam masatu amalejen mudi uyakin wa pakampwil, chitwishikin kumasadil chisu chawonsu ni ku jindond jawonsu. Chilakej, iyipula amwiney anch: Mutapu ik nikutwisha kwipuk urund ni antu “in kutwambol”? Ov, mu mikadil ik nikutwisha kwikal pamwing ni antu inay? (Jinsw. 3:32; 6:12) Ov, anany adia “in manangu” asotinay Yehova anch ikala arund nam? Ov, anany adia “ayisup” asotinay anch nipuka? (Kus. 111:10; 112:1; Jinsw. 1:7) Ov, “yaku yiwamp” ik nikeza kuyipish anch natond arund ayimp? Ov, nikutwish kutan arund ayimp ching mu mangand? (2 Pita 2:1-3) Mutapu ik ukutwisha kwakul ku yipul yiney?

14. Mutapu ik ukutwisha kuwapish urel wey wa Kwifukwil mu Dijuku?

¹⁴ Mu kushinshikin mwamu pa Mukand wa Nzamb, ov, mulong wak tukutwishap kushinshikin kand pa mikand yikwau ya Bibil yiletina yitongijok ya Nzamb pa milong yisambina pa dijuku diey?b Anvaj, salany usu wa kwisambin pa mitu ya milong yiney pa chisu cha urel wa Kwifukwil mu Dijiku. Piusadila mwamu, lam mu manangu anch rutong rey ridi ra kuyikwash yid ni yid ya dijuku chakwel yisangera nakash kupandakan kwa rukat ra Nzamb kudi etu mudi mumekeshina yijil ni yany yend. (Kus. 119:72) Chikwau kand, dilejan dined difanyidin kuyipwitin antu awonsu adia mu dijuku chakwel ikala piswimp ni Yehova ni piswimp umwing ni mukwau.

15. Mutapu ik ukutwisha kujingunin anch ukudishin muchim wa manangu ni uziyila?

¹⁵ Ov, mutapu ik ukutwisha kulond anch ukat kukudish muchim wa manangu ni wa kuziyil? Mutapu umwing udi kwilikej yitongijok yey ni ya muntu umwing ushinshamena wa pasak, mudi Mwant David, wafunda anch: “Nasangar kusadil rusot rey, A Nzamb wam, mwawiy, yijil yey yidi kal mu muchim wam.” (Kus. 40:8) Chilik chimwing, nfund a Kuseng 119 walonda anch: “A, mudi nikatila yijil yey! Nikat kuyitong mu yisu yawonsu.” (Kus. 119:97) Rukat riner rikutwishap kupamin mu divu dikemp bwat. Pakwez, ridiokil ku kwilej, ku kulembil, ku kutongijokin nakash ni yom yatushikena mu mwom—ukuman mu mwom wey yiyukish yivud nakash yidiokila ku kuziyil ku yijil ya Nzamb.—Kus. 34:8.

KURISH MULONG WA WANT IPAU WEY WA WIN KRISTU!

16. Ov, chom ik tukeza kujingunin anch twawin njit jetu mulong wa kukimb want ipau wakin?

¹⁶ Mu rusangu ra muntu, michid yarisha jinjit jivud mulong wa kukimb want ipau. Chawiy, ey ukutwishap kusal usu mud ik chakwel urisha muspiritu mulong wa kukimb want ipau wey wa win Kristu! Ijik anch akankuny ney kadiap ching kusu Satan, mangand, ni spiritu wend muyimp. Ufanyidin kurish kand nich kuburen kuwanyin kwey amwiney, kuwejinaku ni muchim wey ukata kudimban. (Jer. 17:9; Efes 2:3) Mwaning, nich ukwash wa Yehova, ukutwish kupandakan njit jinej. Chikwau kand, mu kupandakan kwawonsu—kujim ap kukemp—kukez kwikal nich yibudikin yiney yaad yiwamp. Chakusambish, tukez kusangaresh muchim wa Yehova. (Jinsw. 27:11) Cha kaad, piumena usu wa kukwol wa “yijil yiwanyidina yikata kupan want ipau,” ukez kusal usu wa kwitekin mupak wa kushal ‘mwinjil jiwongina’ jitwadila ku mwom wa chikupu. Kupwa, ukez kusanger want ipau ujim uyilaminay Yehova antu ashinshamena mulong wa machuku ma kurutu.—Jak. 1:25; Mat. 7:13, 14.

17. Ov, mulong wak tufanyidinap kuziy mulong wa kuburen kuwanyin kwetu, ni ukwash ik upaninay Yehova?

¹⁷ Pakwez, etu awonsu tukat kurumbukang. (Mul. 7:20) Anch chinech chashiken, kangal waziy ap waman anch ukwetap usey. Ap anch warumbuk, lank ni yang kurutu—ap anch chifanyidin kwit ukwash kudi amakurump a mu chikumangen, sal mwamu. Jakobu wafunda anch “kulembil kwinoku anch kwikal kwa ritiy, ukumwok muyej. [Yehova] Nsalejetu ukez kumulangwish, chad anch wasala yitil, akez kumulikishin.” (Jak. 5:15) Mwaning, kangal wavuramen anch Nzamb ukwet riy chakin kamu ni ukupwitin ey mu chikumangen mulong umen ukaliweny wey. (Tang Kuseng 103:8, 9.) Chawiy lel, piumusadidila Yehova nich muchim wey wawonsu, ndiy kakezap kukulik.—1 Jnsg. 28:9.

18. Mutapu ik tukutwisha kusal yom kwambatan ni malembil ma Yesu mafundau mu Yohan 17:15?

¹⁸ Padingay ni kulembil uchuku wend wa nsudiel ni atwimbuy end ashinshamena 11, Yesu walonda mazu minam mawamp mulong wa awiy: “Uyichidij kudi Sakudimban, ndiy kamu Muyimp.” (Yoh. 17:15) Yesu katonginap ching kusu piur pa atwimbuy nend, pakwez ndiy wisambina kand piur pa in kumulondul end awonsu. Chawiy lel, tukutwish kwikal nich kashinsh anch Yehova ukez kwakul ku malembil ma Yesu kusutil ku kutulam mu machuku minam makash. “Ndiy [Yehova] udi rukibu ra in kwendil mu kuwap . . . Ukat kulam jinjil ja antwend amwitiyila.” (Jinsw. 2:7, 8) Mwaning, jinjil ja kushinshaman jikatap kuburenang yikokujol, pakwez jidi jimwing kusu jitwadila ku mwom wa chikupu ni ku want ipau wakin. (Rom 8:21) Kangal walikidil muntu ap umwing akudiosha mwinjil yiney!

[Mazu madia kwishin kwa paj]

[Chipich chidia pa paj wa 19]

Ov, mutapu ik tukutwisha kuyijingunin antu adi mudi Abisalom a katat ni kwilam ayinetu mulong wa awiy?