Bibil Udi wa Ukwash Nlel Unou
“Dizu diey didi kutok ku mend mam ni chimunyik mwi njil yam.”—KUSENG 119:105.
MUTAPU IK USHALIJADINAY BIBIL NI MIKAND YIKWAU? Mikand yimwing yikutwish kumekan mud yiwapina, pakwez yikutwishap kumutakel muntu. Ni mikand ya katat ya malejan yifanyidin chisu ni chisu kuyitenchikiril. Ku mutambu ukwau, Bibil ulejen anch “Yom yawonsu yafundau pakur mu Mukand wa Nzamb ayifunda mulong wa kutulej etu.”—Rom 15:4.
CHILAKEJ CHIMWING: Ap anch udiap mukand utakedila milong ya chimwingang, Bibil ukwet yiyul ya ukwash piur pa uwamp wa yovil ya muchim ni wa ukash wa kumujimbu. Chilakej, ulondin anch: “Mwom wa mujimbu kudi kushakam zong kwa muchim.” (Jinswir 14:30) Bibil ubabeshin kand anch: “Muntu ukat kwiyauril kudi akwau ukat kwisotil rusot rend amwinend, chad ukat kushesh chiyul chiwamp.” (Jinswir 18:1) Chikwau kand, ulondin anch “Chiyukish cha mwin kupan chipandakenamu cha mwin kutambul.”—Midimu 20:35.
YIMEKESHINAU KUDI KUKIMBIJOL: Kushakam zong, urund ukash, ni muchim wa kupan yikutwish kuwapish ukash wa mujimbu wey. Jurnal wa in Amerik utadina milong ya ukash wa mujimbu (The Journal of the American Medical Association) ulejen anch: “Amakundj akata kujimanang nakash adi tupamp twaad mu ubaj wa mayej ma ku wong makutwisha kuyijip ap kuyishikish ku kalip kupandakanamu antu akata kushimpish muchim.” Mivu dikum ya kwilej mu Australie yamekesha anch amapal akata “kwambambang nawamp ni arund, ni antu akatau kukulej milong ya ujindj ku internet” akweting machuku mavud pa divu. Ni mu muvu wa 2008, in kukimbijol a mu Canada ni a mu États-Unis ileja anch “kupan nfalang kudi akwau kuletining musangar kupandakanamu kujisadil amwinend.”
OV, CHOM IK UTONGINA? Ov ukutwish kuchingejin chiyul piur pa milong ya chimwingang yidiokila mu mukand win wawonsu wafundau kwasutin kal mivu 2000? Ov, Bibil udi buku wa pakampwil?
[Tablo wa jinsangu udia pa paj wa 8]
“Bibil winsangareshin nakash . . . mulong ukwet chiyul chiwamp nakash mudi chinech cha milong ya chimwingang.”—PROFESSEUR HOWARD KELLY, MEMBRE FONDATEUR DE LA JOHNS HOPKINS UNIVERSITY ET DE SON ÉCOLE DE MÉDECINE