Mulika Yehova Akutakela Ku Want Ipau Wakin

“[Kwonganyin] yijil yiwanyidina yikata kupan want ipau.”—JAK. 1:25.

OV, UKUTWISH KURUMBURIL?

Ov, yijil ik yikata kutakel ku want ipau wakin, ni chiyukish ik tukutwisha kutan mu yijil yiney?

Ov, chom ik tukutwisha kutan mu kwikal nich want ipau wakin?

Ov, want ipau ik ukata kuyichingel antu awonsu akat kwendil mu jinjil ja mwom?

1, 2. (a) Ov, chom ik chikata kushiken ku want ipau udia mu mangand, ni mulong wak? (b) Ov, want ipau wisu uchingejinau atushalapol a Yehova kurutu?

TUDI mu chirung mupandakena ris, kujip chijil, ni chisum. (2 Tim. 3:1-5) Pa chinech, winyikel ukat kutek yijil, ampurish, ni kutekol ma kamera mulong wa kutal nawamp. Mu jingand jikwau, antu akat kutek mpuny mu yikumbu yau, tufur ku yis ni kutek kasu ka nzembu ku jimpangu. Antu avud akat kulik kudiokal pol uchuku ap kusha anau chakwel asengana pol—muten ap uchuku pakad kuyilam. Chimeken patok anch, kwikil want ipau, ni yisal yiney yidandamedin kwikalaku.

² Pasak mu chir cha Eden, Satan walejana anch antu akutwish kwikal nich want ipau wakin anch alik kumuziyil Yehova. Minam mamekana kwikal makasu mayimp mud ik! Chikwau kand, palikinau antu kuziyil ku yany ya muspiritu yitenchikinau kudi Nzamb, yisak yidandandamedin kuman mar. Mwikadil winou uyimp ukwet kand usu padi etu atushalapol a Yehova. Pakwez, tukwet ruchingej ra kuman disudiel dia uswik wa antu ku chitil ni kasolikany ni kusanger yitazukinay Bibil anch “want ipau wa uyaj pamwing nau an a Nzamb.” (Rom 8:21) Chawiy lel, Yehova wasambishin kal kutenchik atushalapol end mulong wa want ipau winou. Ov, mu mutapu ik?

3. Ov, chijil ik chapanay Yehova kudi in kwilej a Kristu, ni chipul ik tukeza kushinshikin?

³ Chakul chimedin pa chom chatazukay Jakobu nfund-a-Bibil anch “yijil yiwanyidina yikata kupan want ipau.” (Tang Jakobu 1:25.) Bibil mukwau ukarumwin dizu dined anch ‘chijil chitwinkishina want ipau’ (The New English Bible) ni ‘chijil chiwanyidina cha want ipau’ (The New American Bible). Chaad, antu amening yijil mudi mipak yimutekidinau muntu, kakatap kuyiman mudi want ipau bwat. Ov, “yijil yiwanyidina yikata kupan want ipau” chom ik? Ni mutapu ik yikata yijil kutwinkish want ipau?

YIJIL YIKATA KUPAN WANT IPAU

4. Ov, yisu “yijil yiwanyidina yikata kupan want ipau,” ni nany ukata kutaninamu?

⁴ “Yijil yiwanyidina yikata kupan want ipau” yidiap Yijil ya Moses bwat, mulong yijil ayiteka mulong wa kujingunin yitil ni yawanyina padiay Kristu. (Mat. 5:17; Gal. 3:19) Ov, Jakobu wisambina piur pa Yijil ik? Ndiy watongina piur pa “chijil cha Kristu,” chatazukau kand anch ‘chijil cha ritiy’ ni “chijil chikata kutukwol.” (Gal. 6:2; Rom 3:27; Jak. 2:12) Pakwez mu “yijil yiwanyidina,” mudi yom yawonsu yitinay Yehova kudi etu. In Kristu azizidilau many ni “amikoku akwau” akat kutaninamu mu yijil yiney.—Yoh. 10:16.

5. Mulong wak yijil ya want ipau yiliminap?

⁵ Chinyim nich yijil ya mu jingand jivud, “yijil yiwanyidina” yidiap yikasikena ap yilimina pakwaz yidi yijil yiswapela ni yany ya pakampwil. (1 Yoh. 5:3) Yesu walonda anch: ‘Mpand yam yiswakel kwitwik, ni chisend cham chipipel.’ (Mat. 11:29, 30) Chikwau kand, “yijil yiwanyidina” yikwetap kuswir kwa kwikal nich muruzu wa mazu ma kupup, mulong yimedin pa rukat ni yidi mu manangu ni mu muchim, kangal pa masalet ma mayal.—Tang Hebereu 8:6, 10.

MUTAPU UTWINKISHINA “YIJIL YIWANYIDINA” WANT IPAU

6, 7. Ov, chom ik tukutwisha kulond piur pa yany ya Yehova, ni mulong wak yijil ya want ipau yikat kupandish?

⁶ Mipak yapanay Yehova kudi yitang yend yikweta manangu yidi mulong wa ukwash ni diking diau. Send chilakej, yijil ya yom ya kumujimbu yikata kutakel usu ni milong. Antu kakatap kulikang umutakel wa yijil yiney. Pakwez, akat kuyisanger, ni kwitiyij anch yijil yiney ya chitangil yidi ya usey mulong wa ukash wau wa kumujimbu. Chilik chimwing, yijil ya muspiritu ni ya mashakamin ya Yehova, yilejenau mu “yijil yiwanyidina” ya Kristu, yidi mulong wa ukwash wa muntu.

⁷ Kupwa kwa kwikal diking, yijil ya want ipau yikat kututwishish kusangaresh maku metu mawonsu pakad kwisal nayimp ayinetu ap kupwitijan nich mbil ni want ipau wa antu akwau. Pa chinech, ujindj wa kwikal chakin kamu nich want ipau—kutwish kusal yitusotina—tufanyidin kukudish maku matentamina, mambatena nich untu ni yany ya Yehova. Chikwau kand, tufanyidin kwilej kukat yom yikatinay Yehova ni kukish yom yikisinay, yitukwashinau kusal kudi yijil ya want ipau.—Amos 5:15.

8, 9. Ov, yiyukish ik yimenau antu alondwila yijil ya want ipau? Let chilakej.

⁸ Mu mwikadil wetu wakad kuwanyin, turishining mulong wa kupandakan maku mayimp. Pakwez, pitulondwila yijil ya want ipau mu mutapu ushinshamena, tumen usu wend wa kulet want ipau nlel unou. Chilakej: Mwin kwilej Bibil musu watazukau anch Jay wading ukat kuna ruwand. Pilejay anch chaku chinech chading chiyimp kudi Nzamb, ndiy wafanyidina kukwat mupak. Ov, wela kudandamen kuziyil ku mujimbu wend ap kumuziyil Yehova? Nich manangu, ndiy watonda kumusadil Nzamb, ap anch mujimbu wend wasambisha kuman mar mulong wa yom yiletina impu mu ruwand. Ov, ndiy wiyova nchik kupwa kwa kupandakan chaku chend? Ndiy walonda anch: “Niyova kwikal nich want ipau mu mutapu wamushena ni musangar.”

⁹ Jay wileja kusutil ku yamushikena anch want ipau wa mangand, usadila anch antu ‘atongina pa yom yikatilay muntu’ yitekina mu uswik, pakwez want ipau wa Yehova, urumburikina “rusot ra [mwiku utumbila],” uletina want ipau ni utwadila ku “mwom wakin ni chisambu.” (Rom 8:5, 6) Ov, kwisu kwatanay Jay usu wa kupandakan yaku yend ya uswik? Kiwadingap usu wend bwat, pakwez wadiokala kudi Nzamb. Ndiy walonda anch: “Nileja Bibil pakad kujing, nalembila mulong wa kwit mwiku utumbila, kupwa nakimba ukwash wa rukat ramekeshau kudi in Kristu adia mu chikumangen.” Yom yiney yimwing yikutwish kutukwash pitukimbina want ipau wakin. Tushinshikinany mutapu ik.

KWONGANYIN MU DIZU DIA NZAMB

10. Ov, chom ik chirumburikina “kwonganyin” mu yijil ya Nzamb?

¹⁰ Mu Jakobu 1:25 afundin anch: “muntu mwawonsu ukata kwonganyin yijil yiwanyidina yikata kupan want ipau. Chad anch wadandamen kusal mwamu . . . Nzamb ukez kumuyukish ku yom yawonsu yikez kusalay.” Dizu dia kusambish dia Grek diakarumunau anch “kwonganyin” dirumburikin “kushinshikin mwinimwa,” ap kusal usu. Mwaning, anch tusotin anch yijil ya want ipau yikala nich usu mu manangu ni mu muchim wetu, tufanyidin kusal usu wetu wawonsu kusutil kwilej nakash Bibil ni kutongijokin mu malembil pa yitutangina.—1 Tim. 4:15.

11, 12. (a) Ov, mutapu ik wakasikeshay Yesu usey wa kusal anch uyakin wikala mashakamin metu? (b) Mudi mulejenau kwiur oku, ov, ubaj ik wipukay changadim umwing pakampwil?

¹¹ Pa chisu chinech chimwing, tufanyidin ‘kudandamen’ ap kujijaman, mu kusadil Dizu dia Nzamb, ni kusal anch uyakin wikala mwom wetu. Yesu waleta chitongijok chinech chimwing payilejay antu amwing amwitiyija anch: “Anch en waziyilany malejan mam, en udiany in kwilejam chakin. Ukez kwijikany uyakin, chad uyakin ukez kukukwolany.” (Yoh. 8:31, 32) Buku umwing ulejen anch pinap ‘kwijik’ kurumburikin ‘kutal, kuman yom yawonsu.’ Chawiy lel, tufanyidin ‘kwijik’ uyakin mu mutapu ujim pitusadila anch wikala mashakamin metu. Kupwa tukutwisha kulond anch “dizu dia Nzamb” dikata “kusal mudimu” mudi etu, mu kukarumun untu wetu chakwel tumwilikej nakash Tatukwetu wa mwiur.—1 Tes. 2:13.

¹² Iyipula amwiney, ‘Ov, nij chakin kamu uyakin? Ov, nasadil anch wikala mashakamin mam? Ov, nisotin kand “want ipau” wa mangand?’ Patongay pa usand wend, nambaz umwing walilau kudi anvaj in Kristu wafunda anch: “Piupamina mu uyakin, Yehova udi mwinimwa, mudi mwadingay. Pakwez ku mutambu wam, kandikal nimwijika chakin kamu ndiy. Kandikal nileja kukis yom yikisinay. Kandikal nitiyija yom yidia ya usey kudi ndiy. Ni kandikal nilejap kumulembil anch nidi mu mar. Nachingejina ching kusu pa manangu mam amwinam, namana anch mading ma chamwamu mulong nadingap nija chom.” Kupwa, nambaz winou wamana anch manangu mend madinga mayimp nakash, ni wakarumuna yom yivud mu mwom wend. Wasambisha kusal mudi chibol wa rawonsu.

MWIKU UTUMBILA UKUTWISH KUKUKWASH WIKALA NICH WANT IPAU

13. Ov, mutapu ik ukutwisha mwiku utumbila wa Nzamb kutukwash chakwel twikala nich want ipau?

¹³ Mu 2 Korint 3:17, afundin anch: “Kudia [mwiku utumbila] wa Nsalejetu [Yehova] kwawiy kwinikwa kudia want ipau.” Ov, mutapu ik ukata mwiku utumbila kutwinkish want ipau? Pakach pa yom yikwau, mwiku winou utwinkishin mikadil yidia ya usey mulong wa kwikal nich want ipau: “rukat, ni musangar, ni chisambu, ni kushimpish kwa muchim, ni kudimuk, ni kuwap, ni win yakin, ni kwitudish, ni kwilam.” (Gal. 5:22, 23) Pakad mikadil yiney, pakad rukat, kwikil chisak cha antu chikutwisha kwikal chakin kamu nich want ipau—chinech chimeken patok mu mangand nlel unou. Chawiy lel, kupwa kwa kujimbul dibuj dia mwiku, kambuy Paul walonda kand anch: “Yijil ya Moses kiyilondilap chom cha kupompat yom yiney.” Ov, chinech chirumburikin ik? Chirumburikin anch dibuj dia mwiku wa Nzamb kadipompatinap kudi chijil ap chimwing chikutwisha kudikangesh kuya kurutu. (Gal. 5:18) Chikwau kand, ov, dinans ik diela kwikal mu chijil chinicha? Yehova usotin anch tukudisha chikupu mikadil ya win Kristu ni tuyimekesha pakad chikangesh.

14. Ov, mutapu ik ukata spiritu wa mangand kuyitek mu uswik antu akata kumuziyil?

¹⁴ Antu asangaredina spiritu wa mangand akutwish kutong anch akwet want ipau, mulong akat kuwanyish maswir mau ma ku mujimbu. (Tang 2 Pita 2:18, 19.) Pakwez, uyakin udi chinyim ni chitongijok chinech. Mulong muruzu wa yijidik ni yany yidi ya usey mulong wa kukangesh yisal ni maku mau mayimp. Paul ulejen anch: “Nzamb katekap yijil mulong wa antu atentamina, pakwez wateka yijil mulong wa antu akata kujip yijil ni in kubwambwil.” (1 Tim. 1:9, 10) Adi kand aswik a chitil, chiyibachikina ku ‘kusangaresh mijimbu yau ni yitongijok yau,’ chidia mwant muyimp. (Efes 2:1-3) Mu mutapu umwing, antu inay adi mudi atupwapu andamina kapamp kamwing mu dilong dia woch. Mulong wa kusot kudia, akat kuwil ayinau mu mupit.—Jak. 1:14, 15.

IKAL NI WANT IPAU MU CHIKUMANGEN CHA IN KRISTU

15, 16. Ov, mutapu ik udia wa usey urund tukweta mu chikumangen, ni want ipau ik tukata kutaninamu?

¹⁵ Piwasambisha kukumangan mu chikumangen cha win Kristu, chirumburikinap anch wandamin mu chisak kanang cha arund. Pakwez, wandamin mu chikumangen mulong Yehova wakupwitina kudi ndiy. (Yoh. 6:44) Ov, chom ik chamubachika ku kusal mwamu? Ov, wamen anch udi muntu utentamina, umwovila Nzamb wom? Ukutwish kwakul anch: “Bwat kwau!” Pakwez, chom ik chamanay Nzamb? Ndiy wamana muchim usotina kutesh chijil chend chiletina want ipau, muchim ukeza kuziyil ku chibachikin chend chiwamp. Mu chikumangen, Yehova wadisha muchim wey nich yakudia ya muspiritu, ni kukudiosh mu uswik wa relijon wa makasu ni mu kwitiyij yom ya kutongin kwau, ni kukulej mutapu wa kukudish untu wa win Kristu. (Tang Efes 4:22-24.) Chawiy chisadila anch wikala nich chisend cha kwikal pakach pa antu amwing kusu mu mangand awanyidina kuyitazuk anch ‘antu akweta want ipau.’—Jak. 2:12.

¹⁶ Tongin pa chinech: Piudia pamwing ni antu amukatina Yehova nich muchim wau wawonsu, ov ukat kwovang wom? Ov, ukat kwitalang yisu yawonsu pa makij mey? Piukata kwisamb ku Chot cha Want, ov uyitadiling akadivar ni anambaz ney nich dis dimwing ni kupwa wital amwiney? Chidi chinyim mud ik! Pakwez wiyovil zwaang ni want ipau. Ov, ukutwish kwiyov mwamu pa yinship ya antu a mangand? Bwat kwau! Chikwau kand, want ipau ukweta katat pakach pa antu a Nzamb udi kwau kusu chifanikesh cha want ipau ukeza kwikal nich mu machuku ma kurutu.

“WANT IPAU WA UYAJ PAMWING NAU AN A NZAMB”

17. Ov, mutapu ik wambatena want ipau wa antu ni antu “akumekeshay Nzamb mudi anend”?

¹⁷ Pisambinay piur pa want ipau wayilaminay Yehova atushalapol end adia pa divu, Paul wafunda anch: “Yom yawonsu yatangay Nzamb yikat kuchingel nich impu nakash kuman anany akumekeshay Nzamb mudi anend.” Ni kuwejaku kand anch: “yom yatangay Nzamb akez kuyikwol chakwel kangal yez kuvund. Chad niyau yikez kutambul want ipau wa uyaj pamwing nau an a Nzamb.” (Rom 8:19-21) “Yom yatangay Nzamb” yirumburikin antu akweta ruchingej ra kushakam pa divu, antu akeza kutaninamu kusutil kudi “akumekeshay Nzamb” mudi anend azizidilau many a muspiritu. Kumekan kwinoku kukez kusambish pakezau “an” inay kuvumbuk ni kuya mwi ndond ya muspiritu, ni kusal pamwing mudimu wa kuyidiosh antu ayimp pa divu ni kulam “runtu ruvud” mu ditenchik disu dia yom.—Kuj. 7:9, 14.

18. Ov, mutapu ik ukeza kwikalaku want ipau kudi antu in kuziyil, ni want ipau ik ukezau kusanger?

¹⁸ Antu akolau akez kuman want ipau usu—want ipau ku chibachikin cha Satan ni ayilembil. (Kuj. 20:1-3) Kukez kwikal kupand mud ik! Kupwa, arund nend a Kristu ant ni in kupesh 144000 akeza kuyikel akudandamen kuyipandish antu kusutil ku kusadil pakemp pakemp yiyukish ya chakupesh cha difut djat ni pakeza kupwil chitil ni kuburen kuwanyin kwasambisha ni Adam. (Kuj. 5:9, 10) Pakezau kumekesh kushinshaman kwau ap mwishin mwa choziu, antu akez kushiken ku kuwanyin kwakin kwa want ipau wadinga mu rutong ra Yehova mulong wa awiy—“want ipau wa uyaj pamwing nau an a Nzamb.” Tongin bil! Kwikil chom chikeza ap dichuku dimwing kukukangesh kusal yom yitentamina kurutu kwa Nzamb, mulong mujimbu wey wawonsu ni untu wey akez kuukarumun nakash mu chifu cha Nzamb.

19. Nlel unou, ov chom ik tufanyidina kudandamen kusal chakwel tushala mwinjil ya want ipau wakin?

¹⁹ Ov, usotin nakash “want ipau wa uyaj pamwing nau an a Nzamb”? Anch mwamu, likidil manangu ni muchim wey chakwel autakela kudi “yijil yiwanyidina yikata kupan want ipau.” Mwaning, ileja nakash Mukand wa Nzamb. Shakam kwambatan nich uyakin, ni sal anch wikala iwey kamu. Lembil chakwel utambula mwiku utumbila. Tambul yom yawonsu yiletinau ku chikumangen cha in Kristu ni yakudia ya muspiritu yipaninay Yehova. Ni kangal wamulikidil Satan chakwel akudimba, mudi mwamudimbay Ev, mu kutong anch jinjil ja Nzamb jiyitekin antu mu uswik. Chakin kamu, Djabul ukutwish kumekan anch ukwet manangu nakash. Pakwez mudi mutukeza kuman mu mutu wa mulong wambakena, tusotinap ‘kutupandakan kudi Sakudimban, mulong twij kal nawamp yom yitenchikinay.’—2 Kor. 2:11.

[Chipich chidia pa paj wa 14]

Ov, nisotin kand “want ipau” kanang udia mu mangand?

[Chipich chidia pa paj wa 14]

Ov, nasadil anch uyakin wikala mashakamin mam?