Mujikitishany Yehova ni Tambulany Yiyukish

1. Ov, mulong wak Yehova uwanyidin kamu kujikitish kwetu?

YEHOVA, Mwin Kupan “yiyukish yawonsu yiwamp ni yom yawonsu yiwanyidina,” udi chakin kamu muntu ufanyidina kujikitish kwetu. (Jak. 1:17) Mulong udi kalam wetu mwin rukat, ukat kuwanyish maswir ma antu awonsu ma ku mujimbu ni ma muspiritu. (Kus. 23:1-3) Wamekesha anch udi “kwikang kwetu ni usu wetu”​—pakampwil mu chisu cha mar! (Kus. 46:1) Mu win yakin tukwet mayingish mavud ma kwitiy yalonday nfund a kuseng anch: “Mujikitishany [Yehova] mulong ndiy udi muwamp. Rukat rend rudimukina rushiching chikupu.”​—Kus. 106:1.

2, 3. (a) Ov, ubaj ik udiaku anch twasambish kwikal ni muchim wakad kujikitish? (b) Ov, yipul ik tukushinshikina mu mutu wa mulong winou?

² Ov, mulong wak chidi cha usey kudi etu kushinshikin piur pa kujikitish? Mudi mwatakelau kulond, antu a mu machuku ma kwinsudiel ikadil kal akad kujikitishang. (2 Tim. 3:2) Antu avud akat kuman yiyukish yau mudi chom chafanyinau kwikal nich. Mulong ayibachikin kudi mangand ma wingend a mushing ni ma pibilisite, ma miliyon ma antu masadin usu wa kwikal ni yom yivud piur pa kusanger yom yikwetau. Etu niyetu tukutwish kwikal abachikinau kudi chitongijok chinech chiyimp. Mudi in Isarel a pasak, tukutwish kusambish kwikal antu akad kujikitish ni kushadish musangar wa urund wetu wa usey ni Yehova ni yiyukish twatambwila kudi ndiy.​—Kus. 106:7, 11-13.

³ Chikwau kand, tushinshikin chikutwisha kutushiken anch turishin ni mar. Mu yisu yiney, tukutwish kwikal aziyishenau ni kusambish kushadish kwikalaku kwa yiyukish yetu. (Kus. 116:3) Pakwez, ov, mutapu ik tukutwisha kukudish ni kulam muchim wa kujikitish? Ov, chom ik chikutwisha kutukwash kulam chitongijok chinech anch tudi mu chisu cha mar nakash? Tushinshikinany amboku yom yiney.

‘A! YEHOVA, MIDIMU YIVUD YA UFUN YIWASALA KAL EY’

4. Ov, mutapu ik tukutwisha kulam mu muchim wa kujikitish?

⁴ Anch tusal usu wa kukudish ni kuulam mu muchim mwikadil wa kujikitish, tufanyidin kwitiyij ni kutongijokin pa yiyukish yidiokila kudi Yehova ni kushinshikin midimu yend yitentamina. Pasalay nfund a kuseng mwamu, washimoka mulong wa yom ya ufun yasalay Yehova.​—Tang Kuseng 40:5; 107:43.

5. Ov, chom ik tukutwisha kwilejin kudiay kambuy Paul piur pa kwikal nich kujikitish?

⁵ Tukutwish kwilej yom yivud kudiay kambuy Paul piur pa kukudish muchim wa kujikitish. Pakwez, watongijokina pa yiyukish yend, mulong wa kumekesh kujikitish kwakin. Paul wading wij nawamp anch wading ‘mwin kusalan masaal ni mwin kuzengolan ni mwin kudiulan.’ Chawiy wading kujikitish ap anch pakur wading ukweta mwikadil wa ukayitil, Nzamb ni Kristu amumekeshina riy ni amwinkisha chisend cha mudimu. (Tang 1 Timote 1:12-14.) Paul wamekesha kand kujikitish kukash mulong wa in Kristu nend ni wading kumujikitish Yehova mulong wa mikadil yau yiwamp ni mudimu wau ushinshamena. (Fil. 1:3-5, 7; 1 Tes. 1:2, 3) Chisu chadingay Paul mu mashakamin ma mar nakash, wading kumujikitish Yehova mulong wa ukwash watambulay kudi akadivar nend a muspiritu. (Mid. 28:15; 2 Kor. 7:5-7) Chawiy lel, chishimokishinap payikasikeshinay Paul in Kristu ni mazu minam: “Mujikitishangany Nzamb . . . , lejijanany ni kubabeshijanany umwing ni mukwau nich manangu mawonsu. Muwangilany Nzamb miminy ya kuseng, ni miminy ya win Kristu, ni miminy ya kumushiman.”​—Kol. 3:15-17.

KUTONGIJOK NI MALEMBIL YOM YIKWASHINA MULONG WA KWIKAL NICH KUJIKITISH

6. Ov, umujikitishin Yehova pakampwil mulong wa ik?

⁶ Ov, mutapu ik tukutwisha kwimburij chilakej chiwamp cha Paul pa kwikal ni kujikitish? Mudi Paul, tufanyidin kutongijokin pa yom yasalay Yehova mulong wetwetu. (Kus. 116:12) Anch muntu wakwipul anch, ‘Ov, yiyukish ik yidiokila kudi Yehova yiukata kusanger nakash?’ ov, mutapu ik tufanyidina kwakul? Ov, pakach pa yiyukish yiney, ukuwejinap ni urund wey wa usey uukweta ni Yehova? Ap dilikishin dia yitil diwatambula mulong wa ritiy ukweta mu chakupesh cha difut cha Kristu? Ov, ufanyidin kujimbul majin ma akadivar ni anambaz akukwasha chisu chiwamana mar nakash? Pakwez, mbay ney mukatish wa uruw ap aney akatish afanyidin kwikal pakach pa yom ukulonda. Mu win yakin, yom ya kulond yidi yivud. Kwikal ni chisu cha kutongijokin pa yiyukish yiwamp yidiokila kudi Tatukwey wa rukat, Yehova, kukez kwizwish muchim wey nich kujikitish ni kukez kukubachik kwikal mwin kujikitish dichuku diawonsu.​—Tang Kuseng 92:1, 2.

7. (a) Ov, mulong wak tufanyidin kumujikitish Yehova mu malembil metu? (b) Ov, mutapu ik ukutwisha kutaninamu mu kumujikitish Yehova mu malembil mey?

⁷ Anch tulamin yiyukish mu manangu ni mu muchim yetu, tukwikal tayad ni kumulembil Yehova ni kumujikitish. (Kus. 95:2; 100:4, 5) Antu avud akat kuman anch kulembil chidi chom chidiaku ching mulong wa kumwit Nzamb yom. Pakwez, twij anch Yehova ukweting musangar pitukata kumujikitish mulong wa yom tukweta. Bibil upanin yilakej yivud ya atushalapol ashinshamena amujikitisha Nzamb mu malembil mau, mudi Ana ni Ezekias. (1 Sam. 2:1-10; Isay 38:9-20) Chawiy lel, chifanyidina kuyimburij atushalapol ashinshamena amekesha mwikadil wa kujikitish. Mwaning, mujikitisha Yehova mu malembil mulong wa yiyukish ukweta. (1 Tes. 5:17, 18) Yiyukish yidiokila ku kusal mwamu yidi yivud. Ukwikal nich manangu mawanyidina, ukukudish rukat rey mulong wa Yehova, ni ukez kusej piswimp nend.​—Jak. 4:8.

8. Ov, chom ik chikutwish kusal anch tshadisha musangar mulong wa yawonsu yasalay Yehova mulong wetwetu?

⁸ Ov, mulong wak tufanyidin kwikal ababela chakwel kangal tushadisha musangar wa yom yiwamp yipaninay Yehova? Mulong twaswana mwikadil wa kulik kujikitish. Shinshikin pa chinech: Adam and Eve, anvajetu a kusambish, ayiteka mu chir cha Eden mu paradis. Ayiwanyishina maswir mau mawonsu, ni ading ni mutapu wa kushakam mu chisambu chikupu. (Dis. 1:28) Pakwez kasangerap yiyukish yau. Ading akwet ris ra kwikal nich yom yivud. Mudi chibudikin, ashadisha yom yawonsu. (Dis. 3:6, 7, 17-19) Mulong tudi mu mangand makad kujikitish, etu niyetu tukutwish kusambish kulik kusanger yom yitwinkishinay Yehova. Tukutwish kusambish kuman urund wetu nend mudi chom chakad usey. Tukutwish kushadish muangar wetu mulong wa chisend tukweta cha kwikal mu uumwing ni akadivar a pa mangand mawonsu. Tukutwish kusambish kutongijokin ching piur pa yom ya mu mangand minam makeza kusut. (1 Yoh. 2:15-17) Mulong wa kwipuk kuwil mu mupit winou, tufanyidin kutongijokin pa yiyukish tukweta ni kumujikitish Yehova chisu chawonsu mulong wa chisend tukweta chakwikal antwend.​—Tang Kuseng 27:4.

PITURISHINA NICH YIKOKUJOL

9. Piturishina nich yikokujol yikash, ov, mulong wak tufanyidin kutongijokin pa yiyukish tukweta?

⁹ Kwikal nich muchim wa kujikitish kukutwish kutukwash kujijamen yikokujol yikash. Tukutwish kwiyov aziyina anch turishin nich mashakamin mamwing mu mwom makad kupwa, mudi kushakam ni mbay wa uruw wakad kwikal mukaritiy, mayej makash, rufu ra mukatish ney, ni kusheshik kwa yom ku mar ma chitangil. Mu yisu yiney, tukutambul ukwash ni usu anch twatongijokin pa yiyukish tukweta. Tushinshikinany yom yiney yasadika.

10. Ov, mutapu ik wataninayimu Irina mu kutongijokin pa yiyukish yikwetay?

¹⁰ Irinaa, chibol wa chisu chawonsu wa mu Amerik wa Kwiyand, amwata kudi mukurump washikena ku kulik uyakin ni wamulika ndiy ni anend. Ov, chom ik chamukwasha Irina chakwel aya kurutu mu mudimu wa Yehova nich kushinshaman? Ulondin anch: “Nikwet pakampwil musangar mulong wa diking dia Yehova mulong waman. Kusutil ku kushinshikin pa yiyukish ya dichuku diawonsu, Nikutwish kuman chisend chidiaku pa kwikal muntu wijikinau ni ukatinau kudi Tatukwetu mwin kutulam wa mwiur. Nij anch kukezap kwinlik ap pakemp.” Ap anch Irina wamana yom yiyimp yivud mu mwom wend, chitongijok chend chiwamp chamukwasha ni udi musul wa musangar kudi antu akwau.

11. Ov, chom ik chamukwasha Kyung-sook kujijamen mayej makash?

¹¹ Kyung-sook, ushicha mu Asia, wasala mudimu wa uchibol pamwing ni nfumwend mu mivu kusut pa 20. Kapamp kamwing, amupima kudi mwingang ni amukwata nich mayej ma cancers du poumon ni amuleja anch kwading kumushadidin angond musamban a kwikal ni mwom. Ap anch ndiy ni nfumwend arisha nich yikokujol yivud, yijim ni yikemp, ading akwet ching kashinsh piur pa ukash wau wa mujimbu. Nambaz walonda anch: “Mayej minam mangovisha kuyip nakash​—Namana anch nashadish kal yom yawonsu, ni nova wom nakash.” Ov, chom ik chamukwasha Kyung-sook kurish nich yom yiney? Ulondin anch: “Uchuku wawonsu kurutu kwa kuya kulal, Nading kuya piur pa chikumbu chetu ni kulembil nich dizu dikash piur pa yom yitan yinasangera nakash mu dichuku. Chawiy lel, Niyova anch nikwet musangar, ni Nikala ubachikinau kumekesh rukat ram mulong wa Yehova.” Ov, mutapu ik wataninamwiy Kyung-sook mu malembil madingay kusal uchuku wawonsu? Ulondin anch: “Nashikena ku kwijik anch Yehova ukat kutukwash chikweta yikokujol ni tukwet yiyukish yivud mu mwom wetu kusut yikokujol.”

12. Ov, mutapu ik watambulay Jason ukwash kupwa kwa kufa kwa mukajend?

¹² Jason, wadinga kusal ku biro wa mutiy wa mu Afrik, wasala mu mudimu wa chisu chawonsu mivu kusut pa 30. Ulondin anch: “Mukajam wafa, kwasutin kal mivu sambwad, ni runeng rimeken anch chikutwish kukasikan kuripandakan. Pinitongina piur pa mayej ma cancer marishay nich, chading chifanyidin kwikal chom chiziyishena nakash.” Ov, chom ik chamukwasha Jason kwikal mukash? Ulondin anch: “Katat, Nikat kuvurik chisu chiwamp Nasutisha ni mukajam, ni Nikat kumujikitish Yehova mulong wa kuvurik kwinoku. Niyovil nawamp kamu ni kupwa nikat kumujikitish Yehova chisu chawonsu mulong wa yom yiwamp nivurikina. Kujikitish nadinga nich kwapana kushalijan kukash mu mutapu wam wa kuman yom. Nikat ching kov runeng mulong wa kuziy mulong wa rufu ra mukajam, pakwez kumujikitish Yehova mulong wa kwinginkish uruw uwamp ni chisend cha kumusadil pamwing ni antu akwau amukatina kukat kutenchik mutapu wam wa kuman yom.”

13. Ov, chom ik chamukwasha Sheryl kurish nich kufa kwa in mu dijuku diend?

¹³ Chisu chasadika mar ma chitangil matazukinau anch Typhon mukash mwi ngand ya Philippines mu 2013, Sheryl, wadinga ukweta mivu 13, washadisha yom yend yawonsu. Nambaz winou walonda anch: “Nashadisha chikumbu cham, ni nashadisha in mu dijuku diam.” Tatukwend ni makwend, ni anamakwend asatu, afa chisu chasadika mar minam. Ov, chom ik chamukwasha Sheryl kwikal mukash chikalap nchik mar makash mamushikena? Wading ukweta musangar mu muchim ni wading kuvurik nich kujikitish yiyukish yatambulay. Ulondin anch “Namana yawonsu yasalau akadivar ni anambaz mulong wa kuyikwash ni kuyikasikesh antu adinga akweta kuswir kwa ukwash.” Uwejidinaku anch: “Nikwet musangar nakash mulong Yehova udi Nzamb wam. Ukata kutwinkish chisu chawonsu yom tukweta nich kuswir.” Mwaning, kulam mu manangu yiyukish tukweta kudi kwa usey nakash anch tumen mar. Kwikal ni musangar mu muchim kukat kutukwash kurish nich nawamp milong ya runeng yikata kutushiken.​—Efes 5:20; tang Filip 4:6, 7.

‘NIKWEZ KASANGAR NI KUZANGIJAL MUDI [YEHOVA]’

14. Ov, ruchingej ik ra musangar rituchingedina etu? (Tal chipich cha kwinsambishil.)

¹⁴ Mu rusangu ra muntu, antu a Yehova akweting musangar wa yiyukish yikwetau. Chilakej, kupwa kwa kuyikol ku uswik wa Farao ni amasalay end ku mem ma Karung Musuz, in Isarel amekesha musangar wau pa kuwang miminy ya kushiman ni kujikitish. (Kub. 15:1-21) Lel, chiyukish chijim tukweta chidi ruchingej retu ra kwikal akodilau ku yom yawonsu yiyimp yikata kutumesh mar ni runeng. (Kus. 37:9-11; Isay 25:8; 33:24) Tongin mutapu tukeza kwiyov chisu chikezay Yehova kushesh akankuny end awonsu ni kutwandjik mu mangand masu ma chisambu ni kutentam. Dined dikwikal dichuku dia kujikitish mudi ik!​—Kuj. 20:1-3; 21:3, 4.

15. Ov, chom ik usotina kusal mu muvu wakabuj wa 2015?

¹⁵ Tuchingejin kutambul yiyukish yivud ya muspiritu yidiokila kudi Yehova mu muvu wa 2015. Pakwez, tukutwish kurish nich yikokujol yimwing. Chikalap nchik yikokujol yikutwisha kweza, tukwet kashinsh anch Yehova kakezap kutulik. (Kuv. 31:8; Kus. 9:9, 10) Ukudandamen kutwinkish yom tukweta nich kuswir mulong wa kumusadil nich kushinshaman. Chawiy lel, tufanyidin kwikal nich kashinsh mu muchim mudi kikalay nich muprofet Abakuk, walonda anch: “[Ap] anch mitond ya nfung yalik kusong mabuj, ap anch mitond ya nviny yalik kusong mabuj, ap anch mitond ya mpach yarukumwok, ap anch yir yalik kusong yakudia, ap anch amikoku awonsu afa, ap anch kwaburen angomb, Ap mwamwap nchik nikez kasangar ni kuzangijal, mulong [Yehova] Nzamb udi Mupandish wam.” (Aba. 3:17, 18) Mwaning, mu muvu winou, tufanyidin kumekesh musangar wakin mulong wa yiyukish tukweta ni kwikal abachikinau kulondul chiyul chidia mu mufund wa muvu wa 2015 udi anch: “Mujikitishany [Yehova] mulong ndiy udi muwamp.”​—Kus. 106:1.