Ov, Mulong Wak Kwilej Bibil?

Ov, kandikal kwey wiyipulangap yipul mudi yiney? Anch mwawiy, udiap kwey amwiney. Antu a pa mangand mawonsu akat kwiyipulang yipul yijim yitadina piur pa mwom. Ov, watanin kal yakul?

Ma miliyon ma antu akutwish kulond anch, “Mwaning!” Mulong wak? Mulong atanin yakul yisangareshina ku yipul yau mu Bibil. Ov, usotin kwijik chilondinay Bibil? Ukutwish kutaninamu mu program wa dilejan dia Bibil nau Atuman a Yehova pakad kufut nfalang.a

Chakin, chisu chikatau antu amwing kushiken ku kuyikimb mu Bibil, amwing akat kulondang anch: “Nikwatiken.” “Yinkasikedin.” “Nikwetap chisu.” Pakwez antu akwau amening yom mu mutapu windjing. Akat kusangerang yisu yikatau kwilej yifundishinay Bibil. Shinshikin yilakej yikemp yiney:

• “Nading ni kuya mu egliz wa Katolik ni wa Mishon, mu tempel wa Sikh, mu kuvan wa a Buddhist, ni chikwau kand nileja shikol ya teoloji ku iniversite. Pakwez yipul yam yivud piur pa Nzamb katwishap kuyakul. Kupwa kwa machuku, Kaman wa Yehova umwing weza ku chikumbu cham. Pinatesha mutapu wakulangay nawamp ku yipul kusutil Bibil, Nitiya kwilej nend Bibil.”​—Gill, wa mu Angleterre.

• “Nadinga ni yipul yivud nakash piur pa mwom, pakwez yakul yakulangay paster wa mu egliz nadinga yansangareshap. Pakwez, Kaman wa Yehova wakula ku yipul yam kusutil ching mu Bibil. Chisu chanlejay mulong wa kwilej Bibil, Nitiya kamu ni musangar.”​—Koffi, wa mu Bénin.

• “Nashimoka piur pa mwikadil wa afu. Nading nij anch afu akutwish kuyisal aom nayimp, pakwez Naswirikena kwijik chilondinay Bibil. Chawiy lel nasambisha kwilej Bibil ni murund nam wadinga Kaman.”—José, wa mu Brezil.

• “Napakisha kutang Bibil pakwez namuteshap kwam. Chad Kaman wa Yehova weza ni wanrumburila uprofet uvud wa mu Bibil. Naswirikena kand kwilej yom yikwau.”—Dennize, wa mu Mexique.

• “Niyipulanga anch chakin kamu Nzamb ukutwish kwimbangin. Chawiy lel nakwata mupak wa kumulembil Nzamb wa mu Bibil. Chikwacha, Kaman wa Yehova wakokala ku chis cham, ni nitiyija kwilej nend Bibil.”​—Anju, wa mu Népal.

Kwijik yom mudi yiney kwanvurisha mazu ma Yesu malonday anch: “Ayuk kwau atuzwendj mu michim.” (Mateu 5:3) Chakin, antu akweting maswir ma chivadik ma kumwijik Nzamb. Ching Nzamb ndiy ukutwisha kuwanyish maswir minam, ni ukat kusal mwamu kusutil ku Bibil, Dizu diend.

Chad, kwilej Bibil kwitin ik? Mutapu ik ukutwisha kutaninamu? Yakul yiney akuyakul mu mutu wa mulong ulondwilaku ou.