MUTU WA MULONG WA PA CHIBUR | CHIDING CHA USEY KULEMBIL?
Mulong Wak Antu Akat Kulembilang?
“Nading nikatin nakash masengan ma nfalang. Nalembila mulong wa kuwin. Pakwez chasadikap mwamu.”—Samuel,a Kenya.
“Yawonsu yitwasalanga ku shikol yading ching kuchirikin malembil mamwing mamwing matufundishau.”—Teresa, Philippines.
“Nikat kulembilang anch nikwet mulong. Nikat kulembilang mulong wa kwit dilikishin dia yitil ni mulong wa kwikal mwin Kristu muwamp.”—Magdalene, Ghana.
Yom yalonday kal Samuel, Teresa, nend Magdalene yimekeshin anch antu akat kulembilang mulong wa kwit yom kushalijan, yimwing ya usey kusutamu yikwau. Malembil ma antu amwing mading ma kashinsh; makwau madingap ma kashinsh. Pakwez, ap anch akat kulembilang mulong wa kutwish ekzamen ku shikol ap kulembil chakwel chisak chau cha ndundu chiwina, chakwel Nzamb atakela dijuku diau, ap mulong wa yom yikwau, ma miliyon ni ma miliyon ma antu akweting maswir ma kulembil. Chad, kukimbijol kumekeshin anch ap antu akad kwikal ni relijon akat kulembilang chisu ni chisu.
Ey ukat kulembilang? Anch chidi mwamu, ukat kulembilang mulong wa kwit yom ik? Ap anch ukweting chaku cha kulembil ap bwat, ukutwish kwiyipul anch: ‘Chiding kamu cha usey kulembil? Kuding muntu ukata kuteshang?’ Mwin kufund umwing walonda anch malembil madi kwau “mudi mwon . . . ap mudi kwambamb ni insh wey upitina.” Amakurump amwing a amingang atongining niyawiy mwamu, amening kulembil mudi “kwiyokish ni mwon wa antu ajal.” Kulembil kufanyidin kwikal kwa kuchirikin yom yimwing yimwing ap mudi mwon utambwila kudi mwingang?
Chinyim ni chinech, Bibil ulejen anch malembil masutinamu mitapu ya kwiyokish. Utulejin anch kudi muntu ukata kuteshang malembil masadiningau antu mu mutapu uwamp ni mulong wa kwit yom yitentamina. Chinech chidi chakin? Tushinshikinany amboku uman winou.
a Majin mamwing amaswimpa.