Yehova Wayukisha Mupak Wam Chipandakena

NAVADIKA mu muvu wa 1934. Anvaj am, Fred ni Edna Molohan ading ikala kal in Kwilej a Bibil (Atuman a Yehova) mu mivu 20. Nijikitishin nakash, mulong anfundisha kumukat Yehova. Twading tushich mu Parsons ka musumb kakemp kadia pakach a kurul ni kwingangel kwa Kansans. Antu avud ading mu chikumangen chetu ading azizidilau many. Dijuku dietu diayangang pakad kujing ku yikumangan ni mu mudimu wa kulejan. Diampos urel, twading ni chaku cha kulejan mu mikombil, kutazukinau nlel anch kupan uman pa ndond yidia antu avud. Yisu yimwing, twaziyang, pakwez Tatuku watulandinang krem kupwa kwa mudimu wa kulejan.

Chikumangen chetu chikemp chading ni teritwar mujim mwading tumal tukemp tukemp tuvud ni maferm. Pa ndond pa kutwinkish nfalang mulong wa mikand yetu, antu amwing ading ku maferm atwinkishang yakudia ya mayij, may, (madioshidinauwap pa changil), ap kand anzol. Tatuku wading kupanang nfalang mulong wa mikand, chawiy yakudia yiney yakwashang dijuku dietu.

KAMPANY WA KULEJAN

Anvajam asendang fonograf mulong wa kusal nich mudimu wa kulejan. Nading nichidi mwanikanch nakash mulong wa kumusadin, pakwez nakatang kumukwash Tatuku ni Maku kwakish mulong wa kutesh madiskur ma Mukadivar Rutherford patwayichirikinang antu ni malejan ma Bibil twatakelang.

Tatuku wateka baful mujim piur pa motak wetu, ni motak winou wading wa model wa Ford 1936 wikala ni yom ya kujimbish nich dizu. Wading uwapin nakash mulong wa kusal nich mudimu. Twatekang chakusambish mizik mulong wa kupwit manangu ma antu, ni kupwa twatekang madiskur ma Bibil. Kupwa twayinkishang antu asangaredina mikand.

Mu kamusumb ka Cherryvale, mu Kansas, Tatuku wanyingumokang ni motak ukweta chom cha kujimbish nich dizu mu park, kwi ndond kwipuwangejinangau antu avud Diarubing. Kupwa, ampurij eza amulej anch ufanyidin kunyingumok ni motak pol pa park. Tatuku waya ni motak mwinjil yading piswimp ni park chakwel antu adia mu park akutwish kudandamen kutesh nawamp program. Chading chisangareshina nakash kwikal pamwing ni Tatuku ni yay ikundj, Jerry pa yisu mudi yiney.

Mu mivu yinaya, twasala kand makampany mu materitwar mwading antu avud ading alikina kutesh. Mudi munasambelang kulond kwinsambishin, twafanyina kulank mukach mwa uchuku ni kusambish kutek matrakt ni mabuku kwinshin kwa yis ya yikumbu ya antu. Kupwa kwa yiney, twafanyina kutanijan etwawonsu pol pa ul mulong wa kuman anch ampurij akwatangap kal muntu umwing.

Yom yikwau yatusangaresha mu mudimu wetu wa kulejan yawiy yatazukangau anch marche pubilicitaire. Twadjalang ma pancart ni kusambish kunyingumok mu musumb. Nivurikin chisu chezau akadivar mu musumb wetu ni anyingumuka mu musumb ni mapancart mading malondina anch : “La religion est un piège et une escroquerie.” Asambishina kwetwetu ni anyingumoka mu musumb piswimp kilometre umwing ni chikunku kupwa achirika kwetwetu. Cha musangar, kwikil muntu wayikangesha, pakwez antu avud asangera kuman yom yading yisadikina.

YITENTAM YASADIKA PINADING MWANIKANCH

Yisu yivud dijuku dietu diayangang ku Texas mulong wa yitentam. Tatuku wading kusadinang ku sosiete wa train, chawiy twandamang ku train pakad kufut mulong wa kuya ku yitentam, ni mulong wa kuya kuyital anamakwetu. Fred Wismar yayend a maku ni mukajend Eulalie, ading ashich mu musumb wa Temple mwi ngand ya Texas. Mantu Fred Wileja uyakin kwinsambishin kwa mivu ya 1900 padingay nsand, amubatisha, ni wayilejang anamakwend pamwing ni maku yom yading yilejinay. Akadivar ading mu Texas ading amwij mantu Fred nawamp mulong wading serviteur de zone (utazukinau katat anch kalam wa munyingumuku). Wading muntu muwamp ukweta musangar ni mushiku ni wading chilakej chiwamp nakash kudi am.

Mu muvu wa 1941, twaya ni train ku St. Louis, mu Missouri, mulong wa chitentam chijim. An awonsu ayitazuka kushakam pamwing kurutu kwa chimet mulong wa kutesh diskur dia Mukadivar Rutherford diading dilondina anch “Enfants du Roi.” Kwinsudien kwa diskur dined, an awonsu 15 000 asangara nakash. Mukadivar Rutherford nau in kumukwash end amwinkisha umwing ni umwing wa pakach petu buku musu wading utazukinau anch Enfants.

Mwi Ngond wa 4, 1943, twakumangana ku chitentam chading chikweta mutu wa mulong ulondina anch “Appel à l’action” mu musumb wa Coffeyville, mu Kansas. Kwinakwa twatesha kwijikish kulondina anch yikumangen yawonsu yifanyidin kwikal ni shikol yisu yitazukinau anch Shikol ya Mudimu wa Uteokras. Twatambula kand buku wa malejan 52 twafanyina kusadin ku shikol yiney. Mukach mwa muvu winawa, nasala diskur diam diakusambish mudi nsand wa shikol. Chitentam chinech chading kand cha pakampwil mulong atubatisha pamwing nau antu akwau akemp mu dijiy mwading mem matalel, piswimp ni ferm.

NAKATA KUSADIN KU BETEL

Napwisha shikol ya sekonder mu 1951 ni nafanyina kukwat mupak wa yom nafanyina kusal mu mwom wam. Mukadivar Jerry wading kusadinang ku Betel. Chakin niyam nakata kuya ku Betel, chawiy natuma fomu wam. Kupwa kwa chisu chikemp antazuka ku Betel ni nasambish kusadin kwinikwa dichuku dia 10 Ngond wa 3, 1952. Winou wading mupak uwamp nakash wankwasha kumusadin Nzamb chipandakena.

Nachingeja kusadin ku departema wa kuchap mulong wa kukwash kuchap magazet ni mikand yikwau. Pakwez yom yadingap mwamu. Chawiy, anginkisha chisend cha kusal mudi mwin kupan yakudia ku tebur, ni kupwa nasadina kwi mpish. Nasangera mudimu winou ni nileja yom yivud. Twasalang kwa kuswinkanijan ni nikalang ni chisu nishadidina mukach mwa dichuku. Yisu yivud nayangang mu bibiliyotek wa Betel ni nasadinang mabuku mavud mading mwinimwa mulong wa kusal dilejan dia muntu panrend. Chinech chankwasha kukasikesh ritiy ram ni urund wam wa piswimp ni Yehova. Nakwata mupak wa kumusadin Yehova ku Betel mu mivu yivud. Jerry wadiokala ku Betel mu muvu wa 1949 ni wamwata Patricia, pakwez ashakama piswimp ni Brooklyn ni wankwasha ni kwinkasikesh pinading muntu musu ku Betel.

Chisu chikemp kupwa kwamam kushik ku Betel, akadivar asambisha kukimb antu asadidina ku Betel mulong wa kuyiwej ku list wa in kusal madiskur a ku Betel. Akadivar ading pa list winou, ading ni chisend cha kwendin yikumangen yading mu makilometre 320 pol pa Brooklyn. Kwinikwa asalang madiskur ma antu awonsu ni kulejan pamwing ni chikumangen. Nading pakach pa akadivar atondau. Nich yakamish, nasambisha kwendin yikumangen ni kusal madiskur ma antu awonsu. Chisu chinicha, madiskur ma antu awonsu masalang saa umwing. Yisu yivud, nayangang mu weny ni train mulong wa kwendin yikumangen. Nivurikin Diarubing dimwing urel pa chirung cha ruval mu muvu wa 1954. Nandama mu train mulong wa kuchirik ku New York ni nading nitongin kushik ku Betel urel. Pakwez pitwading mwi njil kwatuta rikind mukash pamwing ni mbundu. Moter wa train wajima ni twakanganya kushik mu musumb wa New York djat ni saa ya katan Diakaj kamu pamanch. Nayila mwi njil yijim yidiokila ku gar mulong wa kuya ku Brooklyn ni pakad kulab naya kusambish kusal mudimu mwi mpish. Nading nalabangaku kal pakemp, ni nading niziyin nakash mulong nakera uchuku wa kabuj. Pakwez musangar nading nich mulong wa kusadin yikumangen ni kutanijan nau akadivar ni anambaz avud asu wading uvud nakash kusutamu kwipan kwawonsu nasala.

Mu mivu ya yakusambish ku Betel, nasambisha kand kusal ku program wa Dilejan dia Bibil wamekeshangau rubing rawonsu ku radio wetu, WBBR. Stidio wading ku chimet cha kaad cha chikumbu cha 124 Columbia Heights. Mukadivar Alexander H. Macmillan, wasadina ku Betel mu mivu yivud, wasalang yisu yawonsu ku program winou wa radio. Twading ni chaku cha kumutazuk anch Mukadivar Mac. Wading chilakej chiwamp nakash kudi etu ansand ading ku Betel mulong washala ushinshamena chikalap nchik mar.

Mu muvu wa 1958, chisend cham chaswimpa ni nasambisha kusal pamwing nau ansand apwishang ku Shikol ya Gilead. Nafanyina kuyikwash akadivar nau anambaz inay akweta mushiku kwikal ni maviza, ni nafanyina kurijek weny wau. Pa chisu chinicha weny wa avion wading ukwet usey nakash, chawiy ansand a shikol apwishang ku Gilead atumangau mu Afrik ni mu Aziy ayangang ni bato. Kupwa kwa mivu, pakepa usey wa weny wa avion amishoner avud ayangang ni ma avion.

WENY MULONG WA YITENTAM

Mu 1960, nalanda biye wa avion wa kudiokal mu États-Unis mulong wa kuya mu Europe mulong wa chitentam cha pa mangand mawonsu cha muvu wa 1961. Naya ku chitentam chimwing cha yitentam yiney ku Hamburg, mu Allemagne. Kupwa kwa chitentam, am ni akadivar akwau asatu a ku Betel twafutina motak ni twadiokala ku Allemagne mulong wa kuya mu Italie mulong wa kutal biro wa mutiy wa mu Rom. Pitwadiokala kwinikwa, twaya mu France, twasuta Mikandu ya Pyrénées ni twandama mu Espagne, ndond yading yikangeshinau mudimu wetu. Twatwisha kuyinkish akadivar a mu Barcelone mabuku mamwing, twamavunga ni mading mameken kwau mudi chipan. Chading cha musangar nakash kumanijan nau! Pitwadiokala kwinikwa, twaya mu Amsterdam ni kupwa twachirika mu New York.

Mu 1962, anginkisha chisend cha kutenchik weny wa akadivar nau anambaz 583 ading afanyidina kukumangan ku yitentam ya pa mangand mawonsu. Chitentam chasadika mu 1963 chading ni mutu wa mulong ulondina anch “La bonne nouvelle éternelle.” Antu atumau afanyina kukumangan ku chitentam cha mu Europe, Asie, ni ku Pacifique Sud, ni afanyina kuya kand ku Honolulu, mu Hawaii, ni kupwa ku Pasadena, mu Californie. Afanyina kand kuya kutal ku Liban ni Jourdain mulong wa kwijik jingand ja mu Bibil. Departema wetu watenchika mulong wa weny twafanyina kusal ku avion ni ku mahotel twafanyina kulal ni walanda maviza mawonsu.

MBAY WA WENY MUSU

Muvu wa 1963 wading muvu wa usey nakash kudi am mulong wa diyingishin dikwau. Dichuku dia ngond 29 Ngond wa 6, twatijana ni Lila Rogers wa mu Missouri, weza ku Betel mu 1960. Rubing rumwing kupwa kwa kwatijan, am ni Lila twandama mu chisak cha akadivar ading anyingumukina mangand ni twaya mu Grèce, Égypte, ni mu Liban. Twadiokala kwinikwa ni avion mulong wa kuya ku Yordan. Chawiy kwinikwa ading akangeshin mudimu wetu ni amakurump a ngand alika kuyinkish Atuman a Yehova maviza. Chawiy, twadingap nich kashinsh ka yom yikusadika chisu tukushika kwinikwa. Tong mutapu twova musangar ni kushimok pitwamana chisak cha akadivar nau anambaz imanang kal mu chiwandj cha avion nich disun dijim pafundinau anch “Wezanyaku Atuman a Yehova”! Chading chiwamp nakash kutal jingand ja mu Bibil ni kuman jindond jading jishichay Aburaham, Isak, ni Jakob, kwi ndond kwafundishay Yesu nau atwimbuy end ni kwi ndond kwasambishina win Kristu chakwel upalangan ushik ni “kwinsudiel kwa divu.”​—Midimu 13:47, TMK.

Mu mivu 55, Lila wikala mbay nam ushishamena mu yisend yawonsu yatwinkishangau. Twaya kutal mu Espagne ni mu Portugal tupamp tuvud chisu chading chijidikinau mudimu wetu. Twafanyina kuyikasikesh akadivar nau anambaz ni kuyitwadin mikand ni yom yikwau yadingau nich kuswir. Twatwisha kand kuyital akadivar amwing ading mu rukan mu musumb wa Cádiz, mwi ngand ya Espagne. Nova musangar nakash mulong nayisadina diskur dia kuyikasikesh.

Kusambishin mu muvu wa 1963, narijekang weny mulong wa kaya ku yitentam ya pa mangand mawonsu yasadikang mu Afrique, Australie, mu Amérique Centrale ni Amérique du Sud, Europe, ni Extrême-Orient, Hawaii, Nouvelle Zélande, ni Porto Rico. Am ni Lila twasutisha yitentam yimwing yitwakad kuvuramen, mudi chitentam cha mu Varsovie, mwi ngand ya Pologne, mu 1989. Akadivar avud mu Russie eza ku chitentam chinech chijim. Chinech chading chitentam chau chakusambish! Twatanijana nau akadivar nau anambaz ading mu rukan pa chisu cha Union Soviétique mu mivu yivud mulong wa ritiy rau.

Chisend chikwau chinasangera nakash chading kwendin ni kukasikesh majuku ma Betel nau amishoner a pa mangand mawonsu. Kapamp ketu ka nsudiel twaya mu Corée du Sud ni kwinikwa twamanijana nau akadivar 50 ading mu rukan mu Suwon. Awonsu ading ni chitongijok chiwamp ni ading achingejin kumusadin kand Yehova pakad chikangesh. Kutanijan nau, kwatukasikesha nakash!​—Rom 1:11, 12.

UVUD WA IN KULEJAN UKAT KULET MUSANGAR

Namana mutapu Yehova wayukishay antwend mu mivu yivud. Pinatambula dibatish mu muvu wa 1943, kwading in kulejan piswimp 100 000. Nlel kudi in kulejan 8 000 000 ni kusut amusadidina Yehova mu jingand 240. Mudimu ukash wa ansand a shikol a ku Gilead wakwashin nakash kuvulijan kwinoku. Kwinginkishin musangar nakash kusal pamwing nau amishoner avud ni kuyikwash mulong wa kuya kuwanyish yisend yau.

Nikwet musangar nakash mulong pinading nsand nakwata mupak wa kusadin mwom wam mu mudimu wa Yehova ni yom nasala mu Betel. Yehova wanyukisha chipandakena mu mivu yawonsu yiney. Kudioshaku yom yawonsu yinasangera mu mudimu wam ku Betel, Lila ni yamam twasangera kulejan pamwing ni yikumangen yivud ku Brooklyn mu mivu 50 ni kusut ni twikala nau arund avud akin.

Nidandamedin kusadin ku Betel nich ukwash wa Lila dichuku diawonsu. Ap anch nikwet mivu 84 ni kusut, nikwet musangar wa kudandamen kusal midimu ya usey ni kukwash mutiy wa kutum mikand.

Chidi cha musangar nakash kwikal mu dirijek dipandakena kuwap dia Yehova ni kuman anch mazu madia mu Malaki 3:18 madi makin malondina anch: “Antwam akez kaman kand kwaurik kwa yom yikeza kamekan, kudi antu atentamina ni kudi antu ayimp, mwaning, kudi antu akata kwinsadil am ni kudi antu akad kwinsadil.” Dichiku diawonsu tukat kuman anch mangand ma Satan mayil kuyip nakash ni antu kakwetap ruchingej ni akwet musangar ukemp mu mashakamin mau. Pakwez antu amukatina ni amusadidina Yehova akwet musangar mu mwom yau, ap pa yisu ya mar, ni akwet ruchingej rakin ra machuku ma kurutu. Chidi chisend chiwamp nakash cha kuyilej antu akwau rusangu ruwamp! (Mateu 24:14) Piswimp ap Want wa Nzamb ukuswinkesh mangand makur nich paradis. Tuchingedin nakash kwez kwa dichuku dined! Kupwa, antu awonsu adia pa divu akwikal ni ukash wa mujimbu uwamp ni musangar, ni akushakam chikupu.