Yakul Ku Yipul Yen

◼ Mulong wak chifanyidina kushinshikin nawamp mulong wa kulondwil yikumangan ku telefon?

Yikumangen yivud yasadil yitenchik chakwel chikal chitwishikina mulong wa antu amwing akad kutwish kwez kukumangan ku yikumangan ku Chot cha Want mulong wa mayej ap mulong wa yishiken yimwing alondwila yikumangan kwolikwau kusutil ku telefon. Chitin njingunin yiwamp ni kwitenchik nawamp chakwel kushinshikin anch ditenchik dien dia rukat adisakidin chakin kamu kudi antu adiswiridina. Chawiy lel, amakurump imanyidina ditenchik dined afanyidin kutenchik ni kutal nawamp mutapu musadidilau ditenchik dined chakwel “yom yawonsu ayisala mu kuwanyin ni mu kufanyin.”—1 Kor. 14:40.

Amakurump akushinshikin nakash chakwel anch ditenchik dined diasina bil in kulejan a chikumangen ayendila misong ya machuku mavud ap ayibid akad kutwish kwend ashichinga ndond yimwing. Mwin kulejan uyedila ap udia mu mwikadil ukash, ap mwin kwilej Bibil uyila kurutu ukutwisha kwikal ushich kwolikwend, niyend ukutwish wisakin ditenchik dined ni kumuchindin ku uvud wa antu akumanganang. Kwi ndond kwakad kwikal matelefon mavud mulong wa kuwanyish maswir minam, chitwishikin kusadil yitenchik yikwau, mudi kukwat yikumangan pa kaset.

Chakin kamu, kwikil chom cha kwisakidin chitukutwisha kwisikej nich kwikalaku kwa muntu amwinend ku yikumangan. Kukumangan kwetu kwin kamu pamwing ni akadivar netu kuletining ‘kwongojijan ku ritiy retu’ ni kuyikwashining antu asu asangera nawamp maswir ma kukumangan pamwing. Anch tudiaku ku yikumangan yetu, tukwilej yom yivud kusutil ku yakumenaku, amakurump akutwish atwinkish ukash utuswiridina, ni tukwimen ayinetu rukat ra chirungil ra ukadivar. Mazu manam malonday nambaz umwing ipal madi makin kamu, pamubwikatau padingay ni kubudik mu Chot cha Want, walonda anch: “Kwikil ukutwisha kukubwikat ku telefon!”—Rome 1:11, 12.

Mudi Ana “kadiokalap mu tempel,” nlel, amapal etu avud chisu ni chisu ezining kurutu kwa chisu ku yikumangan ya Ukristu anch ukash wau wa ku mujimbu ni mikadil yikwua mudiau yiyitwishishin. (Luka 2:36, 37) Anch chiswiridin kulondwil yikumangan ku telefon, kafanyidinap kukuman mudi anch yidi njil yikwau yiswinkena kukumangan ku Chot cha Want. Mu kwimburij chilakej chau chiwamp, el tudandamenany kusanger ni kusal usu chakwel twikalaku ku yikumangan yetu pitumwifukwidila Nzamb wetu mujim, Yehova.—Kus. 95:1-3, 6; 122:1.