Yipul Ya In Kutang

Ov, mazu ma kambuy Paul madia mu 1 Korint 15:29 marumburikin anch in Kristu amwing a pa chirung chend ayibatishang pa ndond ya antu afila kal?

Bwat, Bibil ap mabuku malejena nsangu ja pakur malejenap anch yom ya mutapu winou yasadikang.

Mutapu umukarumwinau verse winou mu ma Bibil mavud uyibachikin antu amwing kutong anch pa chirung cha Paul kwading antu abatishangau pa ndond ya antu afila kal. Chilakej, mu ma Bibil mamwing, verse winou amukarumwin anch: “Anch afu kakuvumbukap kwau, chad chikwikal nchik piur pa antu akatau kubatish mulong wa afu?”

Pakwez, tal yom yafundau kud in kwilej a nsangu ja Bibil aad. Dr. Gregory Lockwood walonda anch chitongijok cha kwel anch antu ayibatishang “pa ndond ya antu afila kal chikwetap mufulandal mu mabuku ma nsangu ja pakur ap mu Bibil.” Chilik chimwing, Mulej Gordon D. Fee wafunda niyend anch: “Kwikil uman udiokila mu Bibil ap mu buku wa nsangu ja pakur piur pa dibatish dia mutapu winou. Manswik Masu malondinap chom ap chimwing pa mulong winou; ni kwikil uman umekeshina anch in Kristu a mu mivu chitot yakusambish asalang chom chinech, ap marelijon masambisha kuvadik kupwa kwa rufu ra atwimbuy.”

Bibil ulejen anch in kwilej a Yesu afanyina ‘kwikadish antu a michid yawonsu in kwilej, kuyibatish, . . . kuyilej kuziyil ku yom yawonsu’ yalejanay. (Mat. 28:19, 20) Kurutu kwa kumubatish muntu mud mwin kwilej, muntu winou wading ufanyidin kwilej bil, kwitiyij yom yilejinay, ni kumuziyin Yehova ni Mwanend. Muntu wadia wafila kal, wajikinau kal mwi nzay, kadingap kakweta mutapu wa kusal yom yiney; ni kwikil mwin Kristu udia mwom wafanyina kumusadinay.—Mul. 9:5, 10; Yoh. 4:1; 1 Kor. 1:14-16.

Chad, yom ik yading yikimbinay kulond Paul?

In Kristu amwing kadingap kitiyina anch kukwikal divumbuk. (1 Kor. 15:12) Paul kadingap kitiyina chitongijok chau. Walonda anch dichuku diawonsu wading mu ubaj ni “kurezik ku rufu pichuku pichuku,” ap anch kafap. Pakwez chikalap nchik ubaj wamushikena, Paul wading ukwet kashinsh anch, ap anch wafa, ukutwish kuvumbuk mud chitang cha mu spiritu chikweta usu, mud mutapu wavumbukay Yesu.—1 Kor. 15:30-32, 42-44.

In Korint ading afanyidin kwijik anch ang muntu wikal mwin Kristu uzizidilau many, ukwikal ni yikokujol dichuku diawonsu ni ukufa kurutu kwa kuvumbuk. Chawiy ‘kuyibatish mu Yesu Kristu’ kurumburikin kand ‘kuyibatish mu rufu rend.’ (Rom 6:3) Chinech chirumburikin anch mud Yesu, afanyina kuman mar ni kufa chakwel lel avumbuk ni kuya mwiur.

Mivu yaad ni kusut kupwa kwa kumubatish mu mem, Yesu wayileja atwimbuy end aad anch: “Ukez . . . Kutambul[any] dibatish dia mar dinikutambula am.” (Mar. 10:38, 39) Yesu kadingap kakimbina kulond anch akumubatish kand mu mem. Wading ukimbin kuyilej anch kushinshaman kwend kukumushikij ku rufu rading rimuchingedina. Paul wafunda anch azizidilau many ading afanyidin kuman “mar mend, chad [atwish lel] kutambul uyaj pamwing nend ndiy.” (Rom 8:16, 17; 2 Kor. 4:17) Chawiy niyau ading afanyidin kufa chakwel lel avumbuk mulong wa kuya mwiur.

Komb, mutapu uwamp wa kukarumun mazu ma Paul ud anch: “Chad, mutapu ik ukusalau antu akatau kubatish mulong wa kwikal afu? Anch afu kakuvumbukap kwau, mulong wak chad akat kuyibatish kand mulong wa kwikal afu?”