Mwom Wey wa Machuku ma Kurutu Wimedin pa Yik?

YOM YITIYIJINAU ANTU AVUD

KUBWAK KUSUTIN ATUTUMBU: Antu amwing itiyijining anch mutapu wilonginau atutumbu pa dichuku dikuvadikay muntu wawiy umekeshina mutapu ukwikala mwom wend wa kurutu. Akat kuya kud antu akata kubwak kusutin atutumbu, mulong wa kupakish kwijik yom yikuyishikena ni kukimb mutapu wa kusal mulong wa kwiyep ubaj.

KUPONG: Antu akwau itiyijin anch kuya kud in kupong kukutwish kuyikwash kwijik mulong wak yom kanang yishikedin mu mwom wau ni yom yifanyidinau kusal. Anch ang ajingunin kudiokila yom yiney, akutwish chad kuyipuk, kukimb mutapu wa kuyipwish, ni kwikal ni mwom uwamp.

KUYIFUKWIL ANGAK AFILA KAL: Antu akwau kand itiyijin anch afanyidin kuyidutish angakau afila kal ap kwikal ni anzamb avud chakwel ayiking ni kuyiyukish. Van,a ushicha mu Vietnam, ulondin anch: “Nading nitiyijin anch ang nayifukwil angak, nafanyina kwikal ni mwom uwamp kusambish katat ni kwikal ni musangar mu mwom pamwing ni an am mu machuku ma kurutu.”

KUVADIK KAPAMP KAKWAU: Antu avud itiyijining anch ang muntu wafa, ukutwish kuvadikiril kand ni yiney yikutwish kusadik tupamp tuvud. Itiyijin kand anch yom yiwamp ap yiyimp yikata kuyishiken yid yibudikin ya yom yasalau mu mwom ukur kurutu kwa kuvadikiril.

Ap anch antu avud akat kulond anch kitiyijinap yom yiney, pakwez akat kwiyandjik mu yom mud kubwak kusutin mifund ya mu makas, makalash, kart, ni yom yikwau. Akat kutong anch pamwing ap yisal yiney yikutwish kuyikwash kwijik yom yikushikena mu machuku ma kurutu.

YISU YIBUDIKIN YIKATA KWIKALAKU?

Ov, antu akweta yitiyij yiney ni kuyisadin akat kwikalang ni mwom uwamp ni wa musangar mu machuku ma kurutu?

Shinshikin yom yamanay Hào ushicha mu Vietnam. Wiyandjika mu kubwak kusutin atutumb, kupong, ni kuyifukwil angak mulong wa kukimb umutakel. Ov, watwisha? Hào ulondin anch: “Nashadisha nfalang jivud, nandama mu dibaz dijim, novijanap kand nau antu a mu dijuku diam, ni nikala ni yakamish nakash.”

Qiuming udia mu Taiwan, niyend wading witiyijin mu kubwak kusutin atutumbu, kuvadikiril, kupong, ni difukwil dia angak. Kupwa kwa kushinshikin nawamp yom yiney ulondin anch: “Najingunina anch mafundish ni yishankur yiney yovijadinap ni yipwitamijadin yimwing ni yikwau. Najingunina kand anch kubwak kusutin atutumbu kwading kwa makasu. Piur pa yitiyij ya kuvadikiril kapamp kakwau; mutapu ik ukutwishay muntu kuswimp ni kuwapish mwom wend wa kurutu anch kavurikinap yom yasalay mu mwom wasambelaku?”

Mud mwashikedinau kal kujingunin Hào, Qiuming, pamwing kand ni antu akwau avud, mwom wetu wa machuku ma kurutu wimedinap pa kupong, kubwak kusutin atutumbu, difukwil dia angak, ap pa kuvadikiril. Ov, chinech chirumburikin anch tukutwishap kuwapish machuku metu ma kurutu?

Antu avud atongining anch mutapu wa kwikal ni mwom uwamp mu machuku ma kurutu ud wa kwilej mashikol malemp ni kwikal ni nfalang jivud. Yibudikin ik yatanau antu avud akwata mupak winou?