MUTAPU WA KUKANGESH RUKIS KUDANDAMEN KUVULIJAN

2 | Kangal Wafundakesh

Bibil Ulondin Anch:

“Anch muntu wakusalany yom yiyimp, niyen kangal wamusadilany yom yiyimp. . . . Salany nich usu wen wawonsu mulong wa kushakam nich chisambu nau antu awonsu. Arund nam, kangal wafundakeshany, . . . Mudi mufundilau mu Mukand wa Nzamb anch: ‘Yam Nzamb nikeza kufundakesh, yam nikeza kulejan kadimu kudi antu akata kuyimesh akwau mar.’”—ROM 12:17-19.

Chirumburikina Mazu Minam:

Ap anch kujiman anch aturumbukin chiding chivadik, Nzamb kakatap kusangar anch twafundakesh. Pakwez, utukasikeshin kumuchingel ndiy, mulong piswimp ap ukudiosh uyimp wawonsu.—Kuseng 37:7, 10.

Yom Ukutwisha Kusal:

Anch muntu wakad kuwanyin wafundakesh, chinech chikat kusal anch rukis ridandamen kuya kurutu. Chawiy, anch muntu wakurumbukin ap wakujimesh, kangal wafundakesh. Sal usu wa kwakul nich chisambu ni pakad ujim. Ni yisu yimwing, chikutwish kwikal chiwamp kudiwul yom yiyimp yakusalangau. (Jinswir 19:11) Pakwez, chid chakin anch yisu yikwau, ukutwish kukwat mupak wa kutwal mulong kud antu awanyidina kuupwish. Chilakej, mud anch muntu wakusal yom yiyimp nakash ya chisum, ukutwish kukwat mupak wa kutwal mulong kud ampurij ap antakel akwau.

Kudandamen kufundakeshijadin kukatap kupwish milong

Chad chid nchik anch umenap mutapu uwamp wa kupwish mulong mu chisambu? Ap chikwikal nchik anch wasalang kal usu wey wawonsu mulong wa kupwish mulong mu chisambu, pakwez kwikil yibudikin yiwamp? Kangal wafundakesh. Mulong kusal mwamu kukutwish kuyipish yom nakash. Pakwez anch walik kufundakesh, ukukangesh rukis kudandamen. Ukutwish kwilej kuchingejin mutapu upwishiningay Yehova milong. “Mukungamena, chad ndiy ukukukwash.”—Kuseng 37:3-5.

Rusangu Rakin—ADRIÁN

Nalika yitongijok ya kufundakesh

Adrián wikala mwin chisum ni rukis padingay mwanikanch, ni wading kufundakesh kud muntu mwawonsu wamurumbukinang. Ulondin anch: “Yisu yivud, niyandjikang mu kurish ni mat, ni tupamp tuvud antanang mwi njil pifil, nasuzang kal mash.”

Adrián wasambisha kwilej Bibil padingay ni mivu 16. Ulondin kand anch: “Pinading nidandamedina kwilej Bibil, namana anch nifanyidin kuswimp yom yimwing mu mwom wam.” Wading ukwet kuswir kwa kulikap rukis ni chisum. Wasangera nakash pa kampwil yom yilejay mu Rom 12:17-19 piur pa kulik kufundakesh. Ulondin anch: “Nashikena kwitiyij anch Yehova ukupwish kuburen kutentam mu mutapu watenchikay kal ni pa chisu chiwanyidina. Pakemp pakemp, natwisha kulikap yisal yam ya chisum.”

Dichuku dimwing urel, chisak cha ansand ampopol arishang pakur ni chisak chadingay Adrián chaya kumurishikish. Mukurump wa chisak wamubula ni wamwel anch: “Anch ud ikundj wa kashinsh, ez turish!” Adrián ulondin anch: “Nova kamu ja kurish nend.” Pakwez pa ndond pa kufundakesh, Adrián wasala malembil miswimp mu muchim, ni wachina mau.

Adrián udandamedin kulond anch: “Dichuku dialondulaku, nasankanijana ni mukurump wa chisak cha ampopol wambula. Nova ujim nakash ni nasota kufundakesh. Pakwez nakashimuka pinamana ikundj winou wansejin ni walond anch: ‘Nlikishina amboku mulong wa yom nakusalang nangalosh uchuku. Mu kulond win kashinsh, niyam nikatin kwikal mud ey. Nikatin kwilej Bibil.’ Nova musangar nakash mulong nasala usu wa kulik kufundakesh! Cha musangar, twasambisha kwilej Bibil pamwing.”