MUTU WA MULONG WA KWILEJ WA 22
Yiyul ya Manangu Mulong wa Kutukwash Kutakel Mwom Wetu
“[Yehova] ndiy ukata kupan manangu.”—JNSW. 2:6.
MUMINY 89 Tesh, Ziyin ni Akukuyukish
YIDIA MU MUTU WA MULONG WINOUa
1. Mulong wak etu awonsu tukwet kuswir kwa manangu? (Jinswir 4:7)
OV, CHAKWITINAP kal kukwat mupak wa usey nakash? Pakad kwidjidjek, walembila mulong wa kumwit Yehova manangu. (Jak. 1:5) Mwant Salomon wafunda anch: “Manangu chid chom cha usey nakash.” (Tang Jinswir 4:7, NWT.) Chawiy, Salomon kadingap kisambidina piur pa manangu ma mitapu yawonsu. Wading wisambidin piur pa manangu madiokila kud Yehova Nzamb. (Jnsw. 2:6) Pakwez, ov, manangu madiokila kud Nzamb makutwish kutukwash kupwish milong turishina nich nlel? Mwaning, makutwish kutukwash, mud tukimbina kuman mu mutu wa mulong winou.
2. Mutapu ik umwing tukutwisha kamu kwikal in manangu?
2 Mutapu umwing tukutwisha kamu kwikal in manangu ud wa kwilej ni kusadin malejan ma amakundj aad ading ni mamangu nakash. Chakusambish, tukwisambin piur pa Salomon. Bibil ulondin anch “Nzamb wamwinkisha Mwant Salomon manangu ni ronganyin rijim nakash.” (1 Ant 4:29) Cha kaad, tukwisambin piur pa Yesu, wading ni manangu nakash makad kutwish kwilakej ni muntu mukwau. (Mat. 12:42) Asambela kulond piur pa Yesu anch: ‘Spiritu wa Yehova ukwikal padi ndiy, Spiritu wa manangu ni wa kujingunin.’—Isay 11:2.
3. Yom ik tukwisambina mu mutu wa mulong winou?
3 Salomon ni Yesu asadina manangu mayinkishau kud Nzamb, ni apana yiyul ya ukwash piur pa milong yitutadina etu awonsu. Mu mutu wa mulong winou, tukwisambin yiyul yisatu: Usey wa kwikal ni chitongijok chisikena piur pa nfalang, mudimu wa ku mujimbu, ni piur pa ayinetu.
CHITONGIJOK CHISIKENA PIUR PA NFALANG
4. Mutapu ik wading ushalijadina mashakamin ma Salomon ni ma Yesu piur pa nfalang?
4 Ku mutambu umwing, Salomon wading mpich mujim nakash, ni wading ushich mu chikumbu chiwamp nakash. (1 Ant 10:7, 14, 15) Ku mutambu ukwau, Yesu wading ni yom yikemp ya ku mujimbu, ni kadingap ni chikumbu chend. (Mat. 8:20) Pakwez, awonsu aad ading ni chitongijok chisikena piur pa yom ya ku mujimbu, mulong awonsu Musul wa manangu mau wading Yehova Nzamb.
5. Chitongijok ik chisikena chadingay nich Salomon piur pa nfalang?
5 Salomon wading wij anch nfalang jikat “kukwash.” (Mul. 7:12) Anch tukwet nfalang, tukutwish kuland yom tukweta nich kuswir, ni pamwing ap yom yikwau tukatina. Pakwez, chikalap nchik wimpich wend, Salomon wajingunina anch kud chom cha usey nakash kusutamu nfalang. Chilakej, wafunda anch: “Dijin [diwamp] dipandiken dipit dijim.” (Jnsw. 22:1) Salomon wajingunina kand anch antu akatina nfalang kakatap kusanger yikwetau. (Mul. 5:10, 12) Ni utubabeshin kulik kutek ruchingej retu rawonsu mwi nfalang, mulong chikalap nchik uvud wa nfalang tukutwisha kwikal nich, jikutwish kutwik pakad kulab.—Jnsw. 23:4, 5.
Ov, mutapu tumena yom ya ku mujimbu utukangeshin kutek yisakin ya Want pa ndond yakusambish mu mwom wetu? (Tal paragraf wa 6-7)d
6. Chitongijok ik chisikena chadingay nich Yesu piur pa yom ya ku mujimbu? (Mateu 6:31-33)
6 Yesu wading ni chitongijok chisikena piur pa yom ya ku mujimbu. Wading ukatin kudia ni kuna. (Luka 19:2, 6, 7) Chisu chimwing, wasala mar mawamp nakash—chawiy chading chilay chend cha kusambish. (Yoh. 2:10, 11) Ni pa dichuku diamujipau, wading udjadin disun dia usey nakash. (Yoh. 19:23, 24) Pakwez Yesu kalikidinap yom ya ku mujimbu kwikal chom cha usey nakash mu mwom wend. Wayileja in kwilejend anch: “Kwikil muntu ukutwisha kuyisadil ansalejend aad nawamp . . . Kiukutwishanyap kusadil kapamp kamwing Nzamb ni mapit ma pa mangand.” (Mat. 6:24) Yesu wafundisha anch ang twakimb bil Want wa Nzamb, Yehova ukutenchik chakwel twikal ni yom tukweta nich kuswir.—Tang Mateu 6:31-33.
7. Mutapu ik wataninayamu mukadivar umwing mu kwikal ni chitongijok chisikena piur pa nfalang?
7 Kusadin yiyul ya manangu ma Nzamb piur pa nfalang kwayikwashin kal akadivar nau anambaz netu avud. Tushinshikinany chilakej cha mukadivar Daniel udia mujich. Ulondin anch: “Pinading mwanikanch, nakwata mupak anch nikutek yom ya mu spiritu pa ndond ya kusambish mu mwom wam.” Mulong wading ni mashakamin mapipela, Daniel watwisha kusadin chisu ni ukaliweny wend mulong wa kukwash kwi ndond kwading yinship ya mar ni kusadin ku Betel. Ulondin kand anch: “Nikutwish kulond nich win kashinsh anch kandikal ninanangap mulong wa njil natonda. Chid chakin anch nafanyina kwikal ni nfalang jivud anch nateka mupak wa kukimb nfalang pa ndond ya kusambish mu mwom wam. Pakwez nfalang jafanyinap kwinkwash kwikal ni arund awamp nakash mud anikweta katat. Anch nipana kukimb nfalang, ing kinikwetap musangar mud unikweta katat mulong nitekin yisakin ya Want pa ndond yakusambish. Kwikil uvud kanang wa nfalang tukutwisha kwilikej ni yiyukish yinginkishinay Yehova.” Chakin kamu, tukat kutaninamu nakash anch twashinshikin pa yom ya mu spiritu, pa ndond pa kushinshikin pa kukimb nfalang.
CHITONGIJOK CHISIKENA PIUR PA MUDIMU WA KU MUJIMBU
8. Mutapu ik twija anch Salomon wading ni chitongijok chisikena piur pa mudimu? (Mulej 5:18, 19)
8 Salomon watazuka musangar udiokila ku yibudikin ya mudimu wetu ukash anch “kupan kwa riy kwa Nzamb.” (Tang Mulej 5:18, 19.) Wafunda anch: “Mudimu wawonsu ukat kulet dipit.” (Jnsw. 14:23) Salomon wading wij kurumburik kwa yom yading yilondinay. Wading nsalamudimu mukash! Watunga yikumbu, wadima nviny, yir, ni wapunda majiy ma mem. Watunga kand misumb. (1 Ant 9:19; Mul. 2:4-6) Wading mudimu ukash wasalay, ni pakad kwidjidjek yamuletina musangar mu chilik kanang. Pakwez Salomon kachingejinap anch midimu yiney yawiy kusu yafanyina kumuletin musangar. Wipana kand nakash mu midimu ya mu spiritu. Chilakej, watakela mudimu wa kutung tempel wa ufun mulong wa difukwil dia Yehova—wasala mudimu winou mu mivu sambwad! (1 Ant 6:38; 9:1) Kupwa kwa kwipan mu midimu ya ku mujimbu ni ya mu spiritu, Salomon wajingunina anch midimu ya mu spiritu yid ya usey nakash kusutamu kwau ya ku mujimbu. Wafunda anch: “Kwinyim kwa yom yiney yawonsu, kwashal chom chimwing cha kulond. Mulimisha Nzamb, ziyil ku malejan mend.”—Mul. 12:13.
9. Mutapu ik wamekeshay Yesu anch mudimu wa kumujimbu wadingap wa usey nakash kud ndiy?
9 Padingay nsangarum pa divu, Yesu wasalang mudimu wa kufet mabay. (Mar. 6:3) Pakad kwidjidjek, anvaj end asangera nakash ukwash wend chisu chading chisadinau usu nakash wa kuwanyish maswir ma dijuku diau. Mulong Yesu wading muntu uwanyidina, wafanyina kand kusal mudimu wend wa kusong mabay mu mutapu uwanyidina, ni antu avud afanyina kusanger mudimu wend! Chimeken anch Yesu wasangera nakash mudimu wend. Pakwez, chikalap nchik mudimu wa kumujimbu wasalangay, witekinang kand chisu mulong wa kusal yom ya mu spiritu. (Yoh. 7:15) Kupwa, mulong wading mwin kulejan wa chisu chawonsu, wayiyula in kwilejend anch: “Kangal wasurubany kusu yakudia yikata kuvund, pakwez surubany yakudia yikata kulet mwom wa chikupu.” (Yoh. 6:27) Ni mu Mafundish mend ma pa Mukandu, Yesu walonda anch: “Kumangejinany mapit men mwiur.”—Mat. 6:20.
Mutapu ik tukutwisha kulam chitongijok chisikena piur pa mudimu wa ku mujimbu ni yom ya mu spiritu? (Tal paragraf wa 10-11)e
10. Chikokujol ik chikutwishau kurish nich antu amwing piur pa midimu yau ya ku mujimbu?
10 Manangu ma Nzamb matukwashin kwikal ni chitongijok chiwamp piur pa mudimu wa ku mujimbu. Mud in Kristu, atufundishin kal kusal ‘mudimu ukash . . . , mudimu uwamp.’ (Efes 4:28) Yisu yivud, amakurump a midimu amening win kashinsh ni mushiku wetu, ni akutwish kutulej mutapu ukwatinau nich usey mutapu wetu wa kusal mudimu. Chinech chikutwish kutubachik kusambish kusal mudimu mu asaa avud, mulong wa kumubachik mukurump wetu wa mudimu kwikal ni chitongijok chiwamp piur pa Atuman a Yehova. Pakwez kupwa kwa chisu chikemp, tukutwish kujingunin anch twasambishin kal kudiwul yisend yetu ya mu dijuku ni midimu ya mu spiritu. Tufanyidin kusal usu wa kuswimp ni kwikal isikena.
11. Yom ik yilejay mukadivar umwing piur pa kwikal ni chitongijok chisikena piur pa mudimu?
11 Mukadivar nsand utazukinau anch William wamana chakusambish usey wa kutek mudimu wa ku mujimbu pa ndond yau. Urumburil piur pa mukurump umwing wa chikumangen wasadinay mudimu pasak anch: “[Mukadivar winou] ud chilakej chiwamp nakash cha muntu ukweta chitongijok chisikena piur pa mudimu wa ku mujimbu. Ukat kusal mudimu nakash, ni ukwet urund uwamp nau antu akata kumuland yom, mulong ukat kusal mudimu uwamp nakash. Pakwez urel, kupwa kwa mudimu, ukat kushinshikinang pa dijuku diend ni pa difukwil diend. Pakwez, ov, wij? Ud pakach pa antu nija akweta musangar!”b
CHITONGIJOK CHISIKENA PIUR PA AYINETU
12. Mutapu ik wamekeshay Salomon anch wading nich chitongijok chisikena piur pa amwinend, pakwez mutapu ik wachishadishay?
12 Padingay kashalapol ushinshamena wa Yehova, Salomon wading nich chitongijok chisikena piur pa amwinend. Padingay nsand, wijika nich kwikepish mimbu yend, ni wakimba umutakel wa Yehova. (1 Ant 3:7-9) Kwinsambishin kwa winyikel wend, Salomon wading wij kand nawamp ubaj wa kwikal mwin kwibaz. Wafunda anch: “[Kwitutul] kukat kusambelaku chad lel kusheshik, ni muchim wa kwibaz ukat kulet kuwa.” (Jnsw. 16:18) Cha ushon, mu kusut kwa chisu Salomon wakanganya amwinend kusadin chiyul chend. Chisu kanang mu winyikel wend, wikala mwin kwitutul, ni wasambisha kubwambwil kwi mbil ja Nzamb. Chilakej, chijil chimwing chading chilondin anch mwant mwin Hebereu kangal “wez wavudish amband end, chamwamu muchim wend ukez kupumbuk.” (Kuv. 17:17) Salomon wajipa chijil chinech, ni wata amband 700 ni wading kand ni amband a kuns 300, ni avud pakach pau kadingap in kumwifukwil Yehova! (1 Ant 11:1-3) Pamwing ap Salomon watonga anch yom yiney yafanyinap kwau kumuletin ubaj. Chikalap nchik yom yading yitonginay, mu kusut kwa chisu, Salomon watana yibudikin yiyimp mulong wamubwambwila Yehova.—1 Ant 11:9-13.
13. Yom ik tukutwisha kwilej kusutin kutongijokin pa mwikadil wa kwikepish wa Yesu?
13 Yesu walama chitongijok chisikena ni cha kwikepish piur pa amwinend. Kurutu avadika pa divu mud muntu, Yesu wasala yom yivud yiwamp nakash mu mudimu wend mulong wa Yehova. Kusutin Yesu, Nzamb “watanga yom yawonsu yidia mwiur ni yidia pansh.” (Kol. 1:16) Pa chisu chamubatishau, chimeken kamu anch Yesu wavurika yom yasalay padingay ni Tatukwend. (Mat. 3:16; Yoh. 17:5) Pakwez kuvurik yom mud yiney kwamubachikap Yesu kwikal mwin kwitutul. Chinyim ni chinech, kasalap chom ap chimwing mu mutapu wa kwimekesh anch wading wa piur kuyisutamu antu akwau. Wayileja in kwilejend anch, “kezap mulong wa [kumusadil], pakwez weza mulong wa kuyisadil antu akwau, ni kupan kand mwom wend mulong wa kuyikwol antu avud.” (Mat. 20:28) Walonda kand nich kwikepish anch kakutwishap kusal yom yidiokila ku rusot rend amwinend. (Yoh. 5:19) Kwikepish mud ik kwamekeshay Yesu! Watushila chilakej chiwamp nakash tufanyidina kulondul.
14. Yom ik tukutwisha kwilejin kud Yesu piur pa kwikal ni chitongijok chiwamp piur pa ayinetu?
14 Yesu wayifundisha in kwilejend kwikal ni chitongijok chiwamp piur pa ayinau. Chisu chimwing, Yesu wayinkisha kashinsh anch: “Nzamb wachindil kal nswich jawonsu jidia ku mitu yen.” (Mat. 10:30) Mazu minam matwongojin nakash, pakampwil chisu tukutwisha kwikal nich yitongijok yiyimp piur pa ayinetu. Chinech chirumburikin anch Tatukwetu wa mwiur ukat kutubangin chikurikina—anch tukwet usey nakash ku mes mend. Tufanyidinap kwidjidjek piur pa dirumburish dia Yehova ni kulond anch tuwanyidinap kwetu kwikal atushalapol end ni kutambul mwom wa chikupu mwi ngand yisu.
Yom ik yikutwisha kutushiken anch twikal ni chitongijok chiyimp piur pa ayinetu? (Tal paragraf wa 15)f
15. (a) Chitongijok ik chisikena piur pa ayinetu chatukasikeshau kukudish mu Chinong cha Kalam? (b) Mud mulejenau pa chipich pa paj wa 24, yiyukish ik tukushadisha anch twishinshikin nakash ayinetu?
15 Pasut kal mivu 15, Chinong cha Kalam chatukasikesha kukudish chitongijok chisikena piur pa ayinetu anch: “Chakin kamu, tufanyidinap kwitongin nakash mu chilik cha kwitutul; ap tufanyidinap kwiman anch tukwetap kwetu usey. Pakwez tufanyidin kukudish chitongijok chisikena piur pa ayinetu, charumburik anch kwijik mutambu tukasikena ni mutambu tuziyina. Nambaz umwing ulondin piur pa chom chinech anch: ‘Kinidiap muntu muyimp nakash, pakwez kinidiap kand muntu muwamp nakash. Nikwet mutambu nikasikena ni mutambu niziyina, ni chid mwamu kud muntu mwawonsu.’”c Ov, ukutwish kuman mutapu chidia cha usey kukudish chitongijok chisikena piur pa ayinetu?
16. Mulong wak utwinkishinay Yehova umutakel wa manangu?
16 Yehova ukat kutwinkish umutakel wa manangu kusutin Dizu diend. Utukatin ni ukatin anch twikal ni musangar. (Isay 48:17, 18) Mupak wa mamangu ukutwisha kutuletin musangar nakash tufanyidina kukwat—ud wa kutek rusot ra Yehova pa ndond ya kusambish mu mwom wetu. Anch twasal mwamu, tukwipuk milong yivud yirishinau nich antu akata kushinshikin nakash pa nfalang, mudimu wa ku mujimbu, ap pa ayinau. Elany amboku umwing ni umwing pakach petu akwat mupak wa kwikal mwin manangu ni kusangaresh muchim wa Yehova!—Jnsw. 23:15.
MUMINY 94 Kujikitish Mulong wa Dizu dia Nzamb
a Salomon ni Yesu ading ni manangu nakash. Yehova ndiy wayinkisha mamangu minam. Mu mutu wa mulong winou, tukuman yom tukutwisha kwilejin ku yiyul yamupepilau Salomon ni Yesu piur pa kwikal ni chitongijok chisikena piur pa nfalang, mudimu wa ku mujimbu, ni piur pa ayinetu. Tukuman kand mutapu wataninawam akadivar netu kusutin kusadin yiyul ya manangu ya Bibil yitadina yom yiney.
b Tal mutu wa mulong “Mutapu Wa Kusanger Mudimu Wey,” mu Chinong cha Kalam cha 1 Ngond wa 2, 2015.
c Tal mutu wa mulong “La Bible peut vous aider à trouver la joie” mu Chinong cha Kalam cha 1 Ngond wa 8, 2005, mu Français.
d KURUMBURIL YIPICH: John ni Tom ad akadivar ansand adia mu chikumangen chimwing. John ukat kusutish chisu chivud nakash mulong wa kuwapish motak wend. Tom ukat kusadin motak wend mulong wa kuyikwash nich antu akwau kwipan mu mudimu wa kulejan ni kuya ku yikumangan.
e KURUMBURIL YIPICH: John usadin asaa a pa mutu ku mudimu. Kakatinap kumuziyish mukurump wend wa mudimu. Chawiy, chom chawonsu chimwitinau kusal kud mukurump wend wa mudimu kupwa kwa asaa a mudimu, John witiyin. Dichuku diawiy dimwing urel, Tom udia nkwash a mudimu wamutwalangaku kal mukurump umwing mu mudimu wa ukafung kumutal nambaz. Pakur, Tom wamurumburila mukurump wend wa mudimu anch ukat kusha yisu yivud ya urel mukach mwa rubing mulong wa kwipan mu difukwil diend mulong wa Yehova.
f KURUMBURIL YIPICH: John wishinshikidin nakash amwinend. Tom, utekin yom ya mu spiritu pa ndond ya kusambish kusutamu kwitongin amwinend, ukwet arund avud ni ukwashin kurijek Chot cha Chitentam.