MUTU WA MULONG WA KWILEJ WA 23
Anvaj—Yikwashany Anen Kumukat Yehova
“Mukata [Yehova] Nzamb wey nich muchim wey wawonsu, ni mupim wey wawonsu, ni manangu mey mawonsu.”—MAT. 22:37.
MUMINY 134 An Adi Chipan cha Nzamb
YIDIA MU MUTU WA MULONG WINOUa
1-2. Rumburil mutapu tukutwisha kuswimp mutapu wetu wa kutesh mbil ja Bibil anch mashakamin metu maswimp.
PA DICHUKU diau dia uruw, ngatan muwamp ni mukajend wa ufun akat kuta matu chisu chikatau kuyisadin diskur dia Bibil dia uruw. Mbil ja Bibil jikatau kwisambin mu diskur dined jidiap jisu kud awiy. Pakwez kusambish kamu pinapa ni kudandamen, nsangu jinej jikwikal chad ni kurumburik kujim nakash kud awiy. Ov, mulong wak? Mulong akusambish chad kujisadin mud ambay a uruw.
2 Chid chilik chimwing kand anch ambay a uruw ikal anvaj. Mu kusut kwa mivu, ading ateshin kal madiskur mavud misambidina mutapu wa kulil an. Pakwez katat mbil jinej jikwikal ni kurumburik kukwau kud awiy. Aval kal mwan wau ayinau. Chisend chiwamp mud ik! Chakin kamu, yishiken yisu yikutwish kuswimp mutapu wetu wa kuman mbil ja Bibil twijing nawamp machuku mawonsu. Ni chinech chawiy chiyibachikina in kumwifukwil Yehova kutang Mifund, ni mud mwayilejau ant a Isarel kusal, afanyidin kutongijokin pa Mifund ‘machuku mawonsuʼ ma mwom wau.—Kuv. 17:19.
3. Yom ik tukwisambina mu mutu wa mulong winou?
3 En anvaj, ukwetany chisend chimwing chijim nakash chikutwishay mwin Kristu kwikal nich, kwawiy kulond anch chisend cha kuyifundish anen piur pa Yehova. Pakwez ufanyidinany kusal yom yivud kusutamu kwau kuyilej anen jinsangu piur pa Nzamb. Ufanyidinany kuyikwash anen kumukat Yehova nakash kamu. Yom ik ufanyidinanya kusal mulong wa kuyikwash anen kumukat Yehova? Mu mutu wa mulong winou, tukwisambin mbil jinying ja Bibil jikutwisha kukukwashany en anvaj. (2 Tim. 3:16) Tukuman kand mutapu watanidinawamu anvaj amwing mu kusadin yiyul ya Bibil.
MBIL JINYING JIKUTWISHA KUYIKWASH ANVAJ
Yibudikin ik yiwamp yikwikalaku padiau aney anch wakimb chisu chawonsu umutakel wa Yehova ni wayishil chilakej chiwamp? (Tal paragraf wa 4, 8)
4. Chom ik chikutwisha kuyikwash anvaj kukudish rukat mulong wa Yehova mu michim ya anau? (Jakobu 1:5)
4 Mbil ya 1: Kimbany umutakel wa Yehova. Mwitany Yehova chakwel akwinkishany manangu ukwetanya nich kuswir mulong wa kuyikwash anen kumukat Nzamb. (Tang Jakobu 1:5.) Ndiy Muntu uwanyidina kukwinkishany en yiyul. Kud mayingishin mavud mamekeshina mulong wak chid mwamu. Cha kusambish, Yehova ukwet ronganyin nakash mud nvaj. (Kus. 36:9) Ni chad kaad, yiyul ya manangu yikatay kupan yiletining chisu chawonsu yiyukish.—Isay 48:17.
5. (a) Ov, dirijek dia Yehova diletin yom ik mulong wa kuyikwash anvaj? (b) Mud mutapu mulejenau mu video, yom ik wileja kal kusutil mutapu Mukadivar ni Nambaz Amorim wayililau anau?
5 Kusutil Dizu diend ni dirijek diend, Yehova utwinkishin yakudia yivud nakash ya mu spiritu yikutwisha kuyikwash anvaj kuyilil anau chakwel amukata Yehova. (Mat. 24:45) Chilakej, ukutwishany kutan yiyul yiwamp nakash mu mitu ya milong yilondina anch “Ukwash Mulong wa Majuku,” yabudishangau mu gazet Lankany! wa Français, kudiosh mivu yivud ni katat yid chad pa kapend ketu ka web. Chikwau kand, mavideo mavud mukatau kuyipul antu ni makata kurumburil yom yashikena madia pa jw.org, makutwish kuyikwash anvaj kusadin yiyul ya Yehova chisu chiyilidinau anau.b—Jnsw. 2:4-6.
6. Mutapu ik umenay nvaj umwing umutakel watambulay ndiy ni mukajend kusutil dirijek dia Yehova?
6 Anvaj avud akat kujikitish nakash mulong wa ukwash ukatay Yehova kupan kusutil dirijek diend. Tatuku umwing utazukinau anch Joe ulondin anch: “Chiswapelap kuyilil an asatu mu uyakin. Am ni mukajam tukat kumwitang Yehova chisu chawonsu chakwel atukwasha. Ni twading kumanang anch kud mutu wa mulong kampand ap video kanang washikang kamu pa chisu chiwanyidina mulong wa kutukwash kurish ni chakamish kanang twading turishina nich. Kukimb umutakel wa Yehova kukat kutukwash kamu nakash chisu chawonsu.” Joe ni mukajend amana anch yom yiney yayikwasha anau kusej piswimp ni Yehova.
7. Mulong wak anvaj afanyidin kushinshikin chilakej chiyishidinau anau? (Rom 2:21)
7 Mbil ya 2: Fundishany kusutil chilakej. An akat kuyishinshikin nakash anvajau ni yisu yivud akat kuyimburij. Chakin kamu, kwikil nvaj ap umwing uwanyidina. (Rom 3:23) Ap mwamu, anvaj akweta manangu akat kusal usu wau wawonsu mulong wa kuyishil anau chilakej chiwamp. (Tang Rom 2:21.) Tatuku umwing ulondin piur pa an anch: “Ad mud ma shifon makata kupwit mem.” Uwejidinaku kand anch: “Akutwish kuman anch chilakej chetu chikwatijadinap ni yom tusadina usu wa kuyifundish.” Chawiy ang tukatin kamu anch anetu amukata Yehova, rukat retu mulong wa Nzamb rifanyidin kwikal rikash nakash ni rimekan kud antu awonsu.
8-9. Yom ik wilejidina kusutil yom yilondinau Andrew ni Emma?
8 Kud mitapu yivud yikutwishau anvaj kusadin mulong wa kuyifundish anau kumukat Yehova. Andrew, mukadivar umwing ukweta mivu 17 ulondin anch: “Anvajam ankasikeshang nakash kwijik usey wa malembil. Urel wawonsu, Tatuku walembilang niyam, ap anch am amwinam nading nalembilang kal. Anvajam atuvurishang anch: ‘Ukutwish kwambamb ni Yehova chisu chin chawonsu ukatina.’ Kwinkasikesh kulembil mutapu winou kwampukuna nakash, ni katat nikat kwiyov nawamp nakash kwambamb ni Yehova ni nikat kumuman kamu mud Tatuku mwin rukat.” Anvaj, kangal amboku wapipejany rukat ren ukwetanya mulong wa Yehova, mulong rikutwish kwikal ni yibudikin padiau anen.
9 Tal bil kand chilakej cha nambaz Emma. Chisu chayichinau kud tatukwau, wamusha makwend a Emma ni mabaz nakash. Emma ulondin anch: “Kud yisu yivud maku kadingap kamu ni nfalang, pakwez watulejang mutapu ukatay Yehova kuyibangin ni kuyikwash atushalapol end. Namana kusutil mashakamin mend anch witiyijin kamu mwamu. Maku wading kamu usadidin yom yading kulejanangay.” Dilejan ik tudioshinaku? Anvaj akutwish kuyifundish anau kusutil chilakej chau ap mu yisu ya yakamish.—Gal. 6:9.
10. Yisu ik yafanyinau anvaj in Isarel kusadin mulong wa kwambamb nau anau? (Kuvurik Yijil 6:6, 7)
10 Mbil ya 3: Ambambany nau anen chisu ni chisu. Yehova wayileja anvaj in Isarel a pasak kuyifundish anau piur pend. (Tang Kuvurik Yijil 6:6, 7.) Anvaj inay ading ni yisu yivud mu dichuku ya kwambamb nau anau ni kukudish rukat mulong wa Yehova mu michim yau. Chilakej, nsand mwin Isarel wasutishang asaa avud mu kumukwash tatukwend kukun mbut ap mu kwangul. Pakwez mpanyend wasutishang dichuku dia kabuj mu kumukwash makwend kuchim, ni kusal kand midimu yikwau ya ku chikumbu. Chisu chasalangau anvaj pamwing nau anau, isambinang kamu yom yivud nakash ya usey. Chilakey, afanyinang kwisambin uwamp wa Yehova ni kuman mutapu uyikwashinay mu dijuku diau.
11. Chom ik chikutwisha kuyikwash anvaj in Kristu kwambamb nau anau?
11 Yom yikat kuswimp mu kusut kwa chisu. Mu jingand jivud, anvaj nau an kakwetap chisu chivud cha kwisamb mu dichuku. Anvaj akutwish kwikal ku mudimu, ni an akutwish kwikal ku shikol. Mud chibudikin, anvaj afanyidin kukimb yisu yikutwishau kwambamb nau anau. (Efes 5:15, 16; Fil. 1:10) Difukwil dia mu dijuku dikutwish kukwash kusal mwamu. Nsand umwing Alexander ulondin anch: “Tatuku wirijekang kamu nawamp mulong wa difukwil dia mu dijuku, ni wasalang usu wawonsu chakwel kangal chom kanang chirumbangesha chisu chinech cha kwikal pamwing. Kupwa kwa kwilej, twambambang chad etu awonsu.”
12. Yom ik yifanyidinay ntakel wa dijuku kuvurik chisu chitakedinay difukwil dia mu dijuku?
12 Anch ud ntakel wa dijuku, yom ik ukutwisha kusal chakwel difukwil dia mu dijuku diyisangaresha aney? Ukutwish pamwing ap kwilej nau aney mukand wetu usu Sanger Mwom Chikupu! Dilejan dined dikutwish kukukwashany kwambamb nawamp nakash nau an. Chakin kamu, anch ukatin anch aney akuleja yovil yau ni milong yau, chiwapinap kusadin chisu cha difukwil dia mu dijuku mulong wa kuyifish nich ap kuyiswejen. Ni kangal kujiman anch mwaney walond chom chimwing chakad kukwatijan ni mbil ja Bibil. Chawiy, ufanyidin kumujikitish mulong ukulejin yovil yend, ni mukasikesha chakwel asambish kulond pakad kwidjidjek yom yitonginay. Ukutwish kumukwash mwaney nawamp nakash ching anch wijik kamu yom yitonginay ni mutapu wiyovilay.
Mutapu ik ukutwishau anvaj kusadin yitang mulong wa kuyifundish anau piur pa mikadil ya Yehova? (Tal paragraf wa 13)
13. Yisu ik yikwau yikwetau anvaj ya kuyikwash anau kusej piswimp ni Yehova?
13 Anvaj, kimbany yisu kanang mu dichuku mulong wa kuyikwash anen kusej piswimp ni Yehova. Ufanyidinanyap kwen kuchingel ching chisu cha kwilej kamu Bibil mulong wa kuyifundish chad piur pa Nzamb wetu mwin rukat. Talany yom yilondinay maku umwing utazukinau anch Lisa: “Tukat kuyikwash anetu kuman uumwing udia pakach pa Yehova ni yitang. Chilakej, anch kabu wetu wasal yom ni yayisipish anetu, tukat kuyilej anch Yehova ud Nzamb wa musangar ni watusadina yom chakwel niyetu twikal ni musangar ni kusanger kand yom yiletishina maswimbu.”
Anvaj, ov, uyijany arund a anen? (Tal paragraf wa 14)d
14. Mulong wak chid cha usey anch anvaj ayikwasha anau kutond arund nau kwa manangu? (Jinswir 13:20)
14 Mbil ya 4: Yikwashany anen kwikal nau arund awamp. Dizu dia Nzamb dilejen kamu patok anch arund netu akutwish kwikal ni yibachikin yiwamp ap kand yiyimp pad etu. (Tang Jinswir 13:20.) En anvaj, ov, wijany arund a anen? Ov, wayimenanyap kal ni kusutish nau chisu kanang pamwing? Yom ik ukutwishanya kusal mulong wa kuyikwash anen kwikal nau arund amukatina Yehova? (1 Kor. 15:33) Ukutwishany kuyikwash kukwat mipak ya manangu mu kuyitazuk antu akweta urund uwamp ni Yehova kwimbomb pamwing nen ku difukwil dia mu dijuku dien.—Kus. 119:63.
15. Yom ik yikutwishau anvaj kusal mulong wa kuyikwash anau kwikal nau arund awamp?
15 Shinshikin bil yom yamushikena tatuku umwing utazukinau anch Tony. Urumburil yom yasalay ndiy ni mukajend mulong wa kuyikwash anau kwikal nau arund awamp: “Mu kusut kwa mivu, am ni mukajam twayitazukang kwol kwetu akadivar nau anambaz a mivu kushalijan ni a jingand kushalijan. Adiangang yakudia pamwing netu ni twasalang nau difukwil dia mu dijuku pamwing. Winou ud kamu mutapu uwamp nakash wa kwijikijan nau antu amukatina ni amusadidina Yehova nich musangar. Twatambula yiyukish nakash mu kuyitazuk atulam a miyingumuku, amishoner nau antu akwau kushakam kwol kwetu. Yom yayishikena, mushiku wau ni muchim wau wa kwipan yayikasikesha kamu nakash anetu ni yayikwasha kumusejin Yehova piswimp.” Anvaj, salany usu wen wawonsu mulong wa kuyikwash anen kwikal nau arund awamp.
KANGAL WASHADISHANY RUCHINGEJ!
16. Chikwikal nchik anch mwan walond anch kakatinap kwend kumusadin Yehova?
16 Chad chikwikal nchik anch chikalap nchik usu usadinanya, mwanen umwing walond anch kakatinap kwend kumusadin Yehova? Kangal kulond anch udiany anvaj ayimp ni wakanganyan kal. Yehova watwinkishin kal etu awonsu—kuwejaku ni mwanen—want ipetu, kwawiy kulond anch ukaliweny wa kutond anch tukumusadin ap bwat. Anch mwanen wakwat mupak wa kumulik kwend Yehova, chifanyidinap kushadish ruchingej ra kwel anch dichuku dimwing ukez kumuchirikin. Vurikany chilakej cha mwan washadika. (Luka 15:11-19, 22-24) Nsand winou wapumbukina kulemp nakash ni njil yitentamina, pakwez kwinsudiel, wachirika. Antu amwing akutwish kulond anch “chinech chid kwau chilakej. Ov, yom yiney yikutwish kamu kusadik chakin?” Inge, yikutwish kusadik. Oku yawiy kamu yom yamushikena nsand umwing utazukinau anch Elie.
17. Yom yamushikena Elie yikukasikeshin mutapu ik?
17 Elie ulondin piur pa anvajend anch: “Asala usu wau wawonsu mulong wa kwinkwash kumukat Yehova ni Dizu diend, Bibil. Pakwez pinawanyisha mivu dikum, nasambisha wimbwambol.” Elie wasambisha kusal yom yiyimp oku wamwifukwil lel Nzamb, ni wadiula usu wawonsu wading usadinau anvajend mulong wa kumukwash mu spiritu. Kupwa wadiokala kwol kwau, ni wasambisha chad kusal yom yiyimp kamu. Ap mwamu, wading kwisambang ni murund nend umwing mwamu piur pa Bibil. Elie urumburil anch: “Mulong nadandamena kumulej murund nam piur pa Yehova, namana anch natongang nakash piur pa Yehova. Nich kashinsh, mbut ja uyakin wa Bibil jading jilela mu muchim wam, jasalangau anvajam usu wa kukun, jasambisha kukul pakemp pakemp.” Mu kusut kwa chisu, Elie wachirika mu uyakin.c Tong musangar mud ik wovau anvajend pa kuman mutapu wasalau usu wa kumufundish kumukat Yehova kudiosh kamu ku wanikanch wend!—2 Tim. 3:14, 15.
18. Mutapu ik wiyovila piur pa anvaj asadina usu nakash wa kuyifundish anau kumukat Yehova?
18 Anvaj, ijikany anch akwinkishanya chisend chimwing chiwamp nakash cha kulil antu asu akumwifukwila Yehova machuku ma kurutu. (Kus. 78:4-6) Chisend chinech chiswapelap bwat, ni tukujikitishinany nakash mulong wa usu usadinanya wa kuyikwash anen! Anch wadandamenany kusal usu wen wawonsu mulong wa kuyikwash anen kumukat Yehova ni kudandamen kuyikand ni kuyipup, ikalany nich kashinsh anch Tatukwetu wa mwiur ukusangar kamu nakash.—Efes 6:4.
MUMINY 135 Kutazuk kwa Yehova: “Mwanam Ikundj, Ikal Mwin Manangu”
a Anvaj in Kristu ayikatining kamu anau nakash. Akat kusal usu nakash mulong wa kuwanyishin maswir ma ku mujimbu ni kuyikwash kwikal ni musangar. Cha usey kand, anvaj inay akat kwikasikesh chipandakena mulong wa kuyikwash anau chakwel amukata Yehova nakash kamu. Mutu wa mulong winou ukwisambin mbil jinying jikutwisha kuyikwash anvaj kuwanyish rutong riner.
b Tal pa jw.org video ukweta mutu wa mulong anch Jéhovah nous a appris comment élever nos enfants mu Français.
c Tal mutu wa mulong “Bibil Ukarumwin Mwom ya Antu” mu Chinong cha Kalam cha 1 Ngond wa 4, 2012 mu Français.
d KURUMBURIL CHIPICH: Mulong wa kusal usu wa kuyijik arund a anend, tatuku umwing ukat kusengan basket ni mwanend ni arund a mwanend.