Ov, Uvurikin?

Ov, watangin nawamp manimero ma Chinong cha Kalam cha muvu winou? Akul lel ku yipul yilondwilaku ey:

Mutapu ik umwing ukutwisha kutaninamu mu kwishil chisu cha kwambamb ni Yehova, cha kumutesh, ni cha kutongijokin piur pend?

Ukukwat mipak yiwamp, ukwikal mulej muwamp nakash, ritiy rey mudiay tatukwey wa mwiur rikukasikan.​—w22.01, p. 30-31.

Mutapu ik tukutwisha kutaninamu mu kumuchingejin Yehova ni antu atondinay kal mulong wa kutakel dirijek diend?

Chawiy chinech chisu cha kwilej kuchingejin mu mutapu usadiningay Yehova yom kusutin kuziyin ku umutakel ni mipak ya amakurump. Pa chirung cha mar makash, chikutwit kuziyin ku umutakel ukutwinkishau ap anch twatong anch wovakenap ap anch ukasiken kuziyin.​—w22.02, p. 4-6.

Yom ik yading yifidinay mwangel kumulej Zakariy palonday anch “akez kaman Zorobabel [nich moj wa kupim nich]”? (Zak. 4:8-10)

Chishimushimu chinech chayinkisha antu a Nzamb kashinsh anch afanyina kupwish kumutung tempel winou, ni wafanyina kamu kwikal mud mukatinay Yehova.​—w22.03, p. 16-17.

Mutapu ik tukutwisha kwikal ‘chilakej chiwamp . . . Ku kulond kwetu’? (1 Tim. 4:12)

Tufanyidin kulond mu mutapu uwamp ni wa kalimish mu mudimu wa kulejan, kuwang nich musangar wawonsu, kwikal ni chaku cha kwakulang ku yikumangan, kulond mu mutapu wa win yakin ni mu mutapu uyikasikeshina antu akwau, ni kwipuk mazu ma kuchirilan.​—w22.04, p. 6-9.

Mulong wak yom yikwetau annam anying ayidiany (mant) alejenau mu Daniel shapitre 7 ayikwet kud nnam umwing wa chidiany mud murumburilau mu Kujingunik 13:1, 2?

Nnam wa chidiany ulejenau mu Kujingunik 13 kamekeshinap want umwing kusu mud want wa Rom. Pakwez, umekeshin maguvernema mawonsu mayitakedila kal antu pa mangand makabuj.​—w22.05, p. 9.

Mutapu ik uwamp wa kumekesh anch tuchingejidin mu kutentam kwa Yehova?

Anch muntu watusaal ap waturumbukin, tufanyidin kusal usu wa kwipuk ujim ni rukuny ni kusha milong mu makas ma Yehova. Ukupwish milong yawonsu yikata kudiokal ku chitil.​—w22.06, p. 10-11.

Yom ik yifanyidinay mukadivar winkishangau chisend cha kulembil ku yikumangan kulam mu manangu?

Malembil madiap mulong wa kupan chiyul mu chikumangan ap kufundish. Chidiap kwau cha usey kulond “yom yivud” pakampwil kwinsambishin kwa yikumangan. (Mat. 6:7)​—w22.07, p. 24-25.

Mu mutapu ik ukezau “antu awonsu asala [yom yiyimp]” kuvumbuk “mulong wa dirumburish”? (Yoh. 5:29)

Kakusutap ku dirumburish diyimp, dimedina pa yom yasalau pakur. Akuyirumburish kukwatijan ni yisal ni mikadil yau kupwa kwa kuyivumbul.​—w22.09, p. 18.

Ku chitentam chasadika mwi ngond wa 9, 1922, mukadivar Rutherford wayikasikesha antu kusal yom ik?

Ku chitentam chasadikina mu Cedar Point mu Ohio, mu États-Unis., walonda anch: “Mwant uyikedil! En udiany in kulejan end. Chawiy, lejanany, lejanany, lejanany Mwant ni Want wend!”​—w22.10, p. 3-5.

Isay shapitre wa 30 ulejen mitapu ik yisatu yikatay Nzamb kutukwash kujijaman?

Shapitre winou umekeshin anch ukat (1) kutesh ni kwakul ku malembil metu, (2) kutwinkish umutakel, ni (3) kutuyukish katat ni mu machuku ma kurutu.​—w22.11, p. 9.

Mulong wak tukutwisha kulond anch mazu madia mu Kuseng 37:10, 11, 29 mawanyina pasak ni makuwanyin kand kurutu oku?

Mazu ma David misambidin chakin mashakamin mawamp mading mu Isarel wa pakur, mud chisu cha winyikel wa Mwant Salomon. Yesu ndiy wisambina piur pa paradis wa machuku ma kurutu ni wajimbula verse wa 11. (Mat. 5:5; Luka 23:43)​—w22.12, p. 8-10, 14.