“Ey ukwikal ni yamam mu Paradis”

1. Chisu chikemp kurutu Yesu afa, yom ik yalonday kud mpongarik wadinga kukabet kend? (Luka 23:39-43)

YESU ni ampongarik aad apampinau ku jimbet jend kafap kapamp kamwing, pakwez amana bil mar nakash kurutu kwa kufa. (Luka 23:32, 33) Awonsu aad amusipa Yesu ni chamekesha anch kadingap in kwilej end. (Mat. 27:44; Mar. 15:32) Pakwez umwing waswimpa yitongijok yend. Walonda anch: “winvurikang am piukwandama mu want wey.” Yesu wamwakula anch: ‘Chakin am nalond kudi ey ilel unou, ey ukwikal ni yamam mu Paradis.’ (Tang Luka 23:39-43, TMK.) Kwikil chom chimekeshina anch mpongarik winou witiyija uruu wa ‘Want wa mwiur’ walejanangay Yesu mu mudimu wend. Ni Yesu kalondap anch mpongarik winou wafanyina kwandam mu Want wa mwiur. (Mat. 4:17) Pakwez Yesu wading wisambidin piur pa Paradis ukweza pa divu mu machuku ma kurutu. Mulong wak tukutwisha kulond mwamu?

2. Yom ik yimekeshina anch mpongarik wakarumuka wading mwin Yuda?

² Mpongarik wakarumuka wading pamwing ap mwin Yuda. Mpongarik winou wamwela mukwau anch: “Ov, kiumwovilap Nzamb wom? Ey akufishil nich mudi mwamufishilau nich ndiy.” (Luka 23:40) In Yuda amwifukwilang Nzamb umwing, pakwez antu a michid yikwau itiyijang mudiau anzamb avud. (Kub. 20:2, 3; 1 Kor. 8:5, 6) Anch ampongarik inay kadingap in Yuda, afanyina pamwing ap kwipul anch, “Ov, kiuyovilap anzamb wom?” Chikwau kand, Yesu kamutumap kuya kud antu a michid yikwau pakwez kud “amikoku ashadikina, awiy kamu in Isarel.” (Mat. 15:24) Nzamb wayijingunina in Isarel anch Yesu wafanyina kuvumbuk. Mpongarik wakarumuka wading wij pamwing ap chom chinech, ni mazu mend mamekesha anch, wading ukwet kashinsh anch Yehova wafanyina kumuvumbul Yesu mulong wa kuyikel mud mwant wa Want wa Nzamb. Chimeken anch ikundj winou pamwing ap wading uchingejin anch Nzamb wafanyina kand kumuvumbul niyend.

3. Yom ik yeza pamwing ap mu manangu ma mpongarik wakarumuka pisambinay Yesu piur pa Paradis? Rumburil. (Disambishil 2:15)

³ Mud mwin Yuda, mpongarik wakarumuka wading ufanyidin kwijik rusangu piur pa Adam ni Ev ni Paradis mwayitekau kud Yehova. Chawiy mpongarik wafanyina kwijik patok anch Paradis wisambinay Yesu wafanyina kwikal chir chiwamp nakash chikwikala panap pa divu.​—Tang Disambishil 2:15.

4. Yom yamulejau mpongarik umwing kud Yesu yifanyidin kutubachik etu kushinshikin ik?

⁴ Mazu mamulejau mpongarik kud Yesu mafanyidin kutubachik kutongijokin piur pa mutapu ukwikala mwom mu Paradis. Nlel, tukutwish kwilej yom yimwing piur pa Paradis kusutin winyikel wa chisamb wa Mwant Salomon. Ni tukutwish kuchingejin anch Yesu, udia mujim kumusutam Salomon, ukusal pamwing ni antu akuyikela nend pamwing mulong wa kulet mashakamin mapandakena kuwap pa divu. (Mat. 12:42) Chawiy chovaken patok anch “amikoku akwau” afanyidin kusal usu wa kushinshikin piur pa yom yifanyidinau kusal mulong wa kwikal ni dilau dia kushakam chikupu mu Paradis.​—Yoh. 10:16.

MUTAPU IK UKWIKALA MWOM MU PARADIS?

5. Ov, utongin anch mwom ukwikal mutapu ik mu Paradis?

⁵ Yom ik yikwezining mu manang anch watongijokin piur pa mutapu ukwikala mwom mu Paradis? Pamwing ap ukat kutongijokin piur pa ndond yiwamp , mud chir cha Eden. (Dis. 2:7-9) Ukutwish kuvurik uprofet wafunday Mika anch antu a Nzamb akushakam “mu yir yau ya mitond ya nviny ni mitond ya nfung.” (Mike 4:3, 4) Ukutwish kand kuvurik maverse ma Bibil malondina anch kukwikal yakudia yivud nakash. (Kus. 72:16; Isay 65:21, 22) Chawiy ukutwish kusambish kutong mutapu udia mu chir chipandaken kuwap, ushich kurutu kwa tebur wizwila nich yakudia yipandakena kuwap. Ukutwish kand kutongin mutapu ukwizula rinkind nich res ruwamp ra mitond ni yisalamb. Ni ukat kutesh pamwing ap masok ma musangar padia majuku ni arund​—kuwejaku ni antu akuvumbulau​—akat kusanger kusutish chisu pamwing. Yom yiney yawonsu yidiap kwau yilat. Pakad kwidjidjek, yom yiney yawonsu yikusadik kamu pa divu. Mu Paradis tukusal kand mudimu usangareshina nakash.

6. Yom ik tukusala mu Paradis? (Tal chipich.)

⁶ Yehova watutanga mulong wa kusanger mudimu wetu. (Mul. 2:24) Tukukwatakan nakash pakampwil mu Mivu Kanan ya Winyikel wa Kristu. Antu akupanda ku mar makash, pamwing ni mamilion ma antu akuvumbulau, akwikal ni kuswir kwa masun, yakudia, ni ndond ya kushakam. Mulong wakuwanyish yom yiney yawonsu, chikutwit kusal midimu yivud yisangareshina! Mud mutapu Adam ni Ev wadimangau mu chir mwading mushichau, tukwikal ni dilau dia kudim divu mulong wa kudikashish Paradis. Tongijokin kand mutapu tukusangera kuyifundish antu akweta ronganyin rikemp piur pa Yehova ni chitongijok chend ni kuyikwash antu ashinshamena afa kurutu kwa Yesu kwilej yom yivud.

7. Kashinsh ik tufanyidina kwikal nich, ni mulong wak?

⁷ Tukutwish kwikal nich kashinsh anch mwom mu Paradis ukweza ukwikal wa chisambu, wizwila too nich yom tuswirikedina, ni wa kutenchik nawamp. Mulong wak? Mulong Yehova watwinkishin kal chilakej piur pa mutapu ukwikala mwom mwinshin mwa winyikel wa Mwanend. Chilakej chinech chid mu rusangu ra winyikel wa Mwant Salomon.

WINYIKEL WA MWANT SALOMON UTWINKISHIN CHITONGIJOK PIUR PA MUTAPU UKWIKALA PARADIS

8. Mutapu ik wawanyina mazu madia mu Kuseng 37:10, 11, 29 kupwa kwa kumafund kud Mwant David? (Tal “Yipul ya in Kutang” mu mutu wa mulong winou.)

⁸ Mwant David amupepila mulong wa kufund yom piur pa mutapu ukeza kikal mwom mu chisu chikusambishay kuyikel mwant ukweta manangu ni ushinshamena. (Tang kuseng 37:10, 11, 29.) Yisu yivud tuyitangidining antu Kuseng 37:11 anch twisambidin piur pa Paradis ukweza kurutu oku. Tukwet mayingishin ma kusal mwamu mulong Yesu wisambina piur pa chom chinech mu Mafundish ma pa Mukandu, mwamekeshay anch yom yiney yikuwanyin kamu mu machuku ma kurutu. (Mat. 5:5) Pakwez mazu ma David mamekesha kand mutapu wafanyina kwikal mwom mu chirung cha Mwant  Salomon. Chisu chadingay Salomon mwant mu Israel, antu a Nzamb asangera chisambu ni yom yivud yading yiswirikedinau mwi ngand “yizwila mayel ni woch.” Nzamb walonda anch: “Anch wez wendilany mu yijil yam . . . , Nikez kulet chisambu mwi ngand, niyen ukez kulalany kwakad muntu ap kusu umwing kwez kukwakamishany.” (Lev. 20:24; 26:3, 6) Kushilamu kwinoku kwawanyina mu chirung cha winyikel wa Salomon. (1 Jsng. 22:9; 29:26-28) Ni Yehova washilamu anch antu ayimp ading kwifukwilang anzamb akwau “kakwikalakup kand.” (Kus. 37:10) Komb mazu madia mu Kuseng 37:10, 11, 29 mawanyina pasak ni makuwanyin kand mu machuku ma kurutu.

9. Yom ik yalonday mwant mband wa ku Seba piur pa winyikel wa Mwant Salomon?

⁹ Rusangu ra chisambu ni yom yivud yasangerau in Isarel mwinshin mwa winyikel wa Salomon ramushika mwant mband wa ku Seba. Mwant mband winou wasala weny ulemp nakash wa kuya ku yerusalem mulong wa kwimenap amwinend mashakamin madingau nich antu. (1 Ant 10:1) Kupwa kwa kuman mutapu wadinga yom mu want wa Salomon, walonda anch: “Komb anlejin kusu chikunku cha rusangu rey. . . . Akwolik kwau [amakundj] ey, akwolik kwau atushalapol ey akata kwiman kurutu kwey ni akata kutesh yom ya manangu mey!” (1 Ant 10:6-8) Pakwez mashakamin mu winyikel wa Salomon chading kwau chilakej cha yom yikusalay Yehova mulong wa antu chisu chikuyikelay Mwanend Yesu.

10. Yom ik yisadina anch Yesu ikal mujim kumusutamu Salomon?

¹⁰ Yesu umusutinamu Salomon kulemp mu yom yawonsu. Salomon wading muntu wakad kutentam warumboka nakash, ni kurumbuk kwend kwayiletina antu a Nzamb mar. Pakwez, Yesu ud Nyikel uwanyidina wakad kusalang chitil. (Luka 1:32; Heb. 4:14, 15) Yesu washala ushinshamena kud Nzamb chikalap nchik kupak kukash kwamupakau kud Satan. Kristu wamekesha anch kakutwishap kusal chitil ap kapamp kamwing ap kusal chom chikutwisha kuyisal antu end ashinshamena nayimp. Chid chakin anch did dilau dijim nakash dia kwikal ni Mwant mud winou.

11. Anany akumukwasha Yesu kuyikel?

¹¹ Yesu ukusal pamwing nau antu 144 000 akuyikela nend pamwing mulong wa kuyibangin antu ni kuwanyish kushilamu kwa Nzamb piur pa divu. (Kuj. 14:1-3) Antu inay arishina niyau ni yikokokujol yikash nlel, akwikal in ranaken nakash pakuyikelau ni Kristu. Antu inay akuyikela pamwing ni Yesu akusal mudimu ik wa pakampwil?

YOM IK YIKUSALAU AZIZIDILAU MANY?

12. Mudimu ik ukupanay Yehova kud antu 144 000?

¹² Chisend chamwinkishinau kal Yesu pamwing ni antu akuyikela nend chid chijim nakash kusutamu chisend chamwinkishau Salomon. Mwant Salomon wayikela kwend amilion akemp a antu a ngand yimwing kand kwau. Pakwez, antu akutakela mu Want wa Nzamb akubangin tutikit ni tutikit twa antu akushakama pa divu. Chisend chiwamp mud ik chayinkishinau kal antu 144 000 inay kud Yehova!

13. Chisend ik cha pakampwil chikwikalau nich antu akuyikela pamwing ni Yesu?

¹³ Mud Yesu, antu 144 000 akusal niyau mud ant ni in kupesh. (Kuj. 5:10) Mwinshin mwa Chijil cha Moses, in kupesh ading chakusambish ni chisend cha kuchidij ukash wa mujimbu wa antu ni kuyikwash kwikal piswimp ni Yehova. Chijil chading “chijingidij cha yom yiwamp yikeza kwez,” chawiy chitwishikin kulond anch antu akutakela ni Yesu akwikal niyau ni chisend cha kubangin ukash wa mujimb wa antu ni kuyikwash kwikal mu urund wa piswimp ni Yehova. (Heb. 10:1) Twijpap mutapu ant ni in kupesh inay ukusalau pamwing ni antu akushakama pa divu. Chikalap nchik mutapu ukurijekay Yehova yom, tukwet kashinsh anch antu akushakama mu Paradis akutambul umutakel ukwikalau nich kuswir.​—Kuj. 21:3, 4.

YOM IK YIFANYIDINAU “AMIKOKU AKWAU” KUSAL MULONG WA KWIKAL NI DILAU DIA KUSHAKAM MU PARADIS?

14. Kukwatijan ik kudia pakach pa “amikoku akwau” ni akadivar nend a Kristu?

¹⁴ Yesu wayitazuka antu akuyikela nend pamwing anch “chisak chikemp.” (Luka 12:32) Walonda kand piur pa chisak chakaad chatazukay anch “amikoku akwau.” Yisak yiney yaad yid mu ditang dimwing. (Yoh. 10:16) Yisak yiney yaad yikat kusal pamwing ni yikudandamen kusal pamwing djat ni pa dikwikala divu Paradis. Kupwa, antu asadina “chisak chikemp” akushakam mwiur ni “amikoku akwau” akwikal ni dilau dia kusanger mwom chikupu pa divu. Pakwez kud yom yifanyidinau “amikoku akwau” kusal nlel mulong wa kwikal ni dilau dia kushakam mu Paradis.

15. (a) Mutapu ik usadinau “amikoku akwau” pamwing ni akadivar nend a Yesu? (b) Mutapu ik ukutwisha kwimburij chilakej cha mukadivar udia mu magazin? (Tal chipich.)

¹⁵ Mpongarik wakarumuka, wafa kurutu kwa kwikal ni dilau dia kumekesh anch ud mwin kujikitish mulong wa yom yamusadinau kud Kristu. Chinyim ni chinech, etu “amikoku akwau” tukwet mitapu yivud nlel yakumekesh mutapu twiyovila piur pa Yesu. Chilakej, tukat kumekesh anch tumukatin kusutin mutapu tukata kuyisadin akadivar nend azizidilau many. Yesu walonda anch ukez kayirumburish amikoku kukwatijan ni mutapu ukuyisadinau akadivar nend. (Mat. 25:31-40) Tukutwish kuyikwash akadivar nend a Yesu kusutin kuyinung chikas nich mushiku mu mudimu wa kulejan ni wa kwikadish in kwilej. (Mat. 28:18-20) Mulong wa kushiken kusal mwamu, chitwitin kusadin nawamp yom ya kwilej nich Bibil yitwinkishinau, mud buku Sanger Mwom Chikupu!. Anch ukwetapu djat ni katat muntu wilejina nend Bibil, ov, umen nchik anch witekin mupak winou wa kuyifundish antu avud Bibil anch chitwishikin?

16. Yom ik tufanyidina kusal kusambish katat mulong wa kwirijek kwikal an a Want wa Nzamb?

¹⁶ Tufanyidinap kuchingel anch ching twandam bil mu Paradis chad lel twikal ni yaku yikatinay Yehova anch antu akushakamamu ikal nich. Kusambish katat tufanyidin kusal usu wa kwikal in kashinsh mu mazu ni mu yaku yetu ni kwikal isikena mu mwom wetu. Ni tufanyidin kwikal ashinshamena kud Yehova, kud mbay netu wa uruw, ni kud ambay netu in Kristu. Anch twasal usu wa kuziyin kwi mbil ja Yehova patudia mu mangand minam mayimp, chikutuswapel kusal mwamu mu Paradis. Tukutwish kand kukudish ukaliweny ni yaku yimekeshina anch twirijekin mulong wa kushakamamu. Tal mutu wa mulong “Ov, Wirijekin Mulong wa ‘Kuswan Ngand’?” udia mu nimero winou wa Chinong cha Kalam.

17. Ov, tufanyidin kuziy nakash mulong wa yitil yetu ya pasak? Rumburil.

¹⁷ Tufanyidin kand kusal usu wa kulik kwifish nich mulong wa yitil yikash twasala pasak. Chakin kamu, tufanyidinap kuman chipan cha difut mud diawiy diyingishin dia “kusal yitil [kwa kwisotin].” (Heb. 10:26-31) Pakwez tufanyidin kwikal ni kashinsh anch ang twasal usu wa kukarumuk kudiokal ku chitil chijim, twakimb ukwash udiokila kud Yehova ni amakurump a yikumangen, ni twaswimp mwikadil wetu, ukutulikishin kamu rawonsu. (Isay 55:7; Mid. 3:19) Vurik anch Yesu wayileja Afaris anch: “Am kinezap kuyitazuk antu atentamina, pakwez neza mulong wa kuyitazuk akayitil.” (Mat. 9:13) Chipan cha difut chikwet usu wa kubwik yitil yetu yawonsu.

UKUTWISH KUSHAKAM CHIKUPU MU PARADIS

18. Yom ik ukukata kwambambin pamwing ni mpongarik wafa kukabet ka Yesu?

¹⁸ Ukutwish kutongijokin mud ud mu Paradis, ukat kwambamb ni mpongarik wading wisambina ni Yesu. Chakin kamu,en awonsu ukujikitishany mulong wa yakupesh ya Yesu. Ukumwipul pamwing ap chakwel akuleja nsangu jivud piur pa yom yasadika mu chisu chikemp cha mwom wa Yesu panap pa divu ni mutapu wiyovay pamwakulau kud Yesu. Kumutambu ukwau, niyend ukutwish pamwing ap kukwipul mutapu wading mashakamin mu machuku ma nsudiel ma mangand ma Satan. Dikwikal dilau dipandakena dia kwilej Dizu dia Nzamb ni ikundj winou!​—Efes 4:22-24.

19. Mulong wak mwom mu Paradis ukwikal ushangareshina nakash? (Tal chipich cha pa chibur.)

¹⁹ Mwom mu Paradis ukwikal usangareshina nakash. Tukwikal chisu chawonsu pamwing ni antu awamp ni mudimu usangareshina nakash. Ni chipandakena kuwap, dichuku ni dichuku tukwikal ni mutapu wa kumwijik nawamp Tatukwetu wa mwiur ni kusanger yom yikutwinkay. Kukwikal kand yom yivud ya kwilej piur pend, ni piur pa yitang yend. Pakudandamena mivu ya mwom wetu kuvul, rukat retu mulong wa Nzamb rikujimb nakash. Tumujikitishin nakash Yehova ni Yesu mulong wa kutwinkish ruchingej ra kushakam mu Paradis chikupu!