Yikwasha Antu Akwau Chakwel Ajijamana mu Yirung ya Mar

1. Yisu yivud mutapu ik ukatay Yehova kwakul ku malembil ma atushalapol end?

OV, WIJ anch akutwish kukusadin kud Yehova mulong wa kwakul ku malembil ma muntu kampand? Wikala mukurump wa chikumangen, nkwash a mudimu, chibol, ap mwin kulejan, ukutwish kukwash. Chid kand mwamu ap anch ud nsand ap ipal, mukadivar ap nambaz. Anch muntu umukatina Yehova wamulembil mulong wa kumwit ukwash, Nzamb wetu ukat kuyisadin yisu yivud amakurump ni atushalapol end akwau ashinshamena mulong wa ‘kumukasikesh’ muntu winou. (Kol. 4:11) Did dilau dijim nakash dia kumusadin Yehova ni akadivar netu mu mutapu winou! Tufanyidin kwikal aswakela kuyikwash ni kuyongoj akadivar netu anch arish ni mayej makash, yinship yikash, ap anch ayizengol.

YIKWASHA ANTU AKWAU PARISHINAU NI MAYEJ MAKASH

2. Mulong wak chikutwish kutukasiken kuyikwash antu akwau pa chirung cha chipupu?

² Chipupu chikutwish kusal anch chitukasikena kukwashijan amwing nau akwau. Chilakej, tukutwish kutong ja kuyendin antu akwau, pakwez chidiap cha manangu kusal mwamu. Tukutwish kwov ja kuyitazuk antu aburedina nfalang kwez kwol kwetu mulong wa kudia nau pamwing, pakwez kichitwishikinap kand. Tukutwish kusot kumukwash muntu, pakwez chikutwish kutukasiken kusal mwamu anch anamakwetu a mu dijuku niyau amen mar. Tukatin kuyikwash akadivar netu chakin kamu, ni Yehova ukat kusangar anch twasal yawonsu tutwishina mulong wa kuyikwash. (Jnsw. 3:27; 19:17) Yom ik tufanyidina kusal?

3. Yom ik twilejidina ku chilakej cha amakurump a mu chikumangen cha nambaz Desi ? (Jeremiy 23:4)

³ Yom yikutwishau amakurump kusal. Anch ud mukurump, sal usu wa kuyijik amikok nawamp. (Tang Jeremiy 23:4.) Desi, nambaz twisambinang mu mutu wa mulong wasambelangaku ou ulondin anch, “Amakurump a mu chisak chetu cha mudimu wa kulejan alejanang yisu yivud pamwing niyam ni antu akwau kand ni asutishang netu chisu pamwing.”b Usu wasalau atufung inay wasala anch chiyiswapela kumukwash nambaz Desi kupwa kwa anamakwend amwing a mu dijuku kufa ku chipupu cha KOVID-19.

4. Mulong wak amakurump atwisha kumukwash Desi, ni yom ik yikutwishau amakurump kwilejinaku?

⁴ Desi urumburil anch, “Mulong nading niyimen amakurump mud arund nam, chawiy chanswapela kuyilej mutapu nading niyovila ni milong nading nirishina nich.” Dilejan ik dikutwishau amakurump kwilejinaku? Yendinanganya amikoku en mu ukafung kurutu arisha ni milong yikash. Ikalany arund nau. Anch mayej makash mashiken ni ukwetap mutapu wa kuyendin, kimb mitapu yikwau ya kwambamb nau. Desi ulondin anch, “Yisu yimwing amakurump kushalijan antazukang ap kwintumin mesaj pa dichuku diawiy dimwing. Maverse mantanginau mampukuna nakash, ap anch mading maverse nija nawamp.

5. Mutapu ik ukutwishau amakurump kwijik yom yiswirikedinau akadivar nau anambaz nau, ni mutapu ik ukutwishau kuyikwash?

⁵ Mutapu uwamp wa kwijik yom yiswirikedinau akadivar nau anambaz ney ud wa kuyisejin piswimp ni kuyipul yipul nich nkeu. (Jnsw. 20:5) Ov, akwet yakudia yiwanyidina, mwon wa kwiyokish nich, ni yom yikwau yiswirikedinau? Ov, ad mu ubaj wa kushadish mudimu ap wa kuyopat mu chikumbu mulong aburedin nfalang ja kuchifutin. Ov, akwet kuswir kwa kuyikwash kwit ukwash wa guvernema anch chitwishikin? Desi watambula ukwash wa kumujimbu wadiokala kud ambay nend in Kristu. Pakwez rukat ra amakurump, ni kukasikesh kwau kusutin kusadin Bibil yawiy yamukwasha pakampwil kujijamen yikokujol yend. Ulondin anch: “Amakurump alembila nam pamwing. Ap anch nivurikinap kamu nawamp yom yalondau mu malembil, pakwez nivurikin mutapu niyova. Chading mud Yehova ukat kwinlej anch, ‘Udiap amwiney.’”—Isay 41:10, 13.

6. Yom ik yikutwishau kusal antu avud mu chikumangen mulong wa kuyikwash antu akwau? (Tal chipich.)

⁶ Yom yifanyidinau antu akwau kusal. Tuchingejidining anch amakurump ayikwash akadivar nau anambaz netu mu chikumangen. Pakwez Yehova utwitin etu awonsu kuyikasikesh ni kuyikwash akwetu. (Gal. 6:10) Ap anch twasal kwetu yom yikemp mulong wa kumukwash muntu uyedina, chisal chinech cha rukat chikutwish kumukasikesh nakash. Mwan mukemp ukutwish kumufundin mukadivar tumazu pa ka dipaper ap kumutumin kachifatul mulong wa kumukasikesh nich. Nsand wapamina kal ukutwish kumulandin yom ku sok ap kusal yom yikwau kand. Antu akwau a mu chikumangen akutwish kuyisukin antu ayedina yakudia ni kuyitwadin kwol kwau. Chakin kamu, anch mayej masamburokin, muntu mwawonsu mu chikumangen ukutwish kwikal ni kuswir kwa kumukasikesh. Yisu yimwing tukutwish kusutish chisu pamwing ni akadivar nau anambaz mulong wa kwambamb nau kupwa kwa yikumangan, chikal mes ni mes ap kusutin videoconference. Amakurump niyau akweting kuswir kwa kuyikasikesh. Atuman amwing ayifundidin amakurump mikand mulong wa kuyijikitish piur pa mudimu ukash wasadinau pa chirung cha chipupu. Chid chom chiwamp nakash anch kumutambu wetu twasal usu wa ‘kukasikeshijan mu ritiy muntu ni mukwau, ni kukwashijan kand’!​—1 Tes. 5:11.

YIKWASHA ANTU AKWAU CHISU CHIRISHINAU NI YINSHIP YIKASH

7. Yikokujol ik yikutwisha kwikalaku kupwa kwa yinship yikash?

⁷ Yinship yikash yikutwish kumushiken muntu kwa chikashimwish ap mu mutapu wakad kutongin. Antu arishina ni yinship yiney akutwish kushadish yom yau, yikumbu yau, ap kufish akatish nau. Yom yiney yikutwish kand kuyishiken akadivar nau anambaz netu. Yom ik tukutwisha kusal mulong wa kuyikwash?

8. Yom ik yifanyidinau amakurump ni antakel a majuku kusal kurutu kwa yinship yikash kushiken?

⁸ Yom yifanyidinau amakurump kusal. Amakurump, yikwashany akadivar nen kwirijek kurutu kwa yinship yikash kushiken. Ikalany nich kashinsh anch antu awonsu mu chikumangen ij yom yifanyidinau kusal mulong wa kwichidij ap mulong wa kuyijikish amakurump. Margaret, twisambinang mu mutu wa mulong wasambelangaku ou ulondin anch: “Amakurump asutisha chikunku cha maswir ma chikumangen mulong wa kutubabesh piur pa ubaj wafanyina kudiokal ku kasu kafanyina kulank mu dit kwindond twading tushicha. Alonda anch, ang antakel alet mbil ya kudiokal ku yikumbu ap anch yom yakasikan, tufanyidin kuchin pakad kulab.” Kubabesh kwinoku kwashika kamu pa chisu chiwanyidina mulong kupwa kwa ambing atan kasu kalanka. Chisu cha difukwil dia mu dijuku, antakel a mu majuku akutwish kuchirikin yom yikutwishay muntu ni muntu kusal. Anch en pamwing ni anen wirijekany kurutu kwa chisu, chikukuswapelany kulik kuzazat anch kwashiken yinship yikash.

9. Mutapu ik ukutwishau amakurump kusal usu mulong wa kutenchik yom kurutu ni kupwa kwa chinship chikash kushiken?

⁹ Anch ud ntakel wa chisak cha mudimu wa kulejan, ikal ni kashinsh anch ukwet ma nimero masadidinau in kulejan adia mu chisak chey ni wij ndond yishichau kurutu kwa yinship yikash kushiken. Sal list ni shinshikinang chisu chawonsu anch kud nsangu ja kuwej ap ja kuswimp. Anch wasal mwamu chikukuswapel kumutazuk mwin kulejan mwawonsu ni kwijik yom yikwetay nich kuswir anch kwashiken yinship yikash. Muleja pakad kulab ntakel wa chisak cha amakurump nsangu jinej chakwel niyend amulejamu kalam wa munyingumuku. Anch akadivar inay asal mudimu pamwing, akutwish kukwash mu mutapu uwamp. Kupwa kwa kasu kujimik, kalam wa munyingumuku wa anambaz Margaret wakanganya kulal mu dichuku dia kabuj ni chikunku, mulong wading ukwatiken nakash mu kutakel mudimu wading usadinau amakurump wa kuyitazuk ni kubangin ku maswir ma akadivar nau anambaz 450 ashemunika. (2 Kor. 11:27) Kusal mwamu kwawiy kwayikwasha kumubangin muntu mwawonsu wading ukweta kuswir kwa ndond ya kushakam.

10. Mulong wak amakurump afanyidin kukwat nich usey nakash mudimu wa ukafung? (Yohan 21:15)

¹⁰ Amakurump akwet chisend cha kuyikasikesh akadivar kusutin Bibil ni cha kuyikwash antu akweta yakamish. (1 Pita 5:2) Anch yinship yikash yashiken, amakurump afanyidin chakusambish kusal usu wa kwikal nich kashinsh anch akadivar nau anambaz ad mu diking, akwet yakudia, ya kudjal ni ndond ya kushakam. Pakwez mu kusut kwa angond avud, antu asutidina mu yinship yikash akutwish kwikal ni kuswir kwa kuyikasikesh mu spiritu ni mu manangu. (Tang Yohan 21:15.) Harold usadina ku Komite wa Mutiy ni watanijana ni akadivar nau anambaz avud arisha ni yakamish yidiokila ku yinship yikash ulondin anch “chitining kamu chisu mulong wa kuvuramen yom yashikena. Antu akutwish kusambish kand kwiyov nawamp, pakwez chikutwish kuyikasiken kuvuramen akatish nau afila, yom ya usey nakash yashadishinau, ap mashakamin ma ubaj madingau nich. Kuvurik yom yiney kukutwish kulangwishiril kand kusansan ku muchim. Chinech chimekeshinap anch kakwetap ritiy pakwez yid kwau yovil yakin.”

11. Yisu yivud majuku makutwish kwikal ni kuswir kwa yom ik? (Tal chipich.)

¹¹ Amakurump akat kusadin chiyul chilondina anch “ovany ushon pamwing nau antu ovila ushon.” (Rom 12:15) Antu apandina ku yinship yikash akutwish kwikal ni kuswir kwa kuyinkish kashinsh anch Yehova ni ambay nau in Kristu achidandamedin kuyikat. Chikuyit amakurump kukwash majuku kulam program wau wa mu spiritu, mud kwikal ni chaku cha kulembil, kwilej, kuya ku yikumangan, ni kwipan mu mudimu wa kulejan. Amakurump akutwish kand kuyikasikesh anvaj kuyikwash anau kushinshikin pa yom yakad kusheshikang ku yinship yikash. Anvaj, yivurishany anen anch Yehova ukwikal chisu chawonsu murund nau ni anch ukudandamen kwikal pamwing nau mulong wa kuyikwash. Ni yirumburilany anch akutwish kwikal mu dijuku dia pa mangand mawonsu dia akadivar nau anambaz adia kwaku mulong wa kuyikwash.​—1 Pita 2:17.

12. Yom ik yikutwishau kusal antu akwau mulong wa kukwash ku yinship yikash?

¹² Yom yifanyidinau antu akwau kusal. Anch yinship yikash yashiken piswimp ni ndond ushicha, yipula amakurump mutapu ukutwisha kukwash. Pamwing ap ukutwish kwipan mulong wa kuyak antu ashila yikumbu yau ap ipanina mulong wa kukwash ku yinship yasadikina chakwel ashakama kwol kwey mu chisu kanang. Ukutwish kand kupan yakudia ni kuyikwash akadivar adia mu maswir. Ap anch yinship yikash yasadikin kulemp ni ndond ushicha, ukutwisha kand kukwash. Mutapu ik? Kusutin kulembil mulong wa antu adia kwi ndond yiniya. (2 Kor. 1:8-11) Ukutwish kand kunung chikas ku mudimu wa kupan ukwash kusutin kupan yipan mulong wa kukwash nich mudimu wa pa mangand mawonsu. (2 Kor. 8:2-5) Anch ukwet mutapu wa kuya kukwash kwi ndond kwashikedina yinship yikash, yipula amakurump akuleja mutapu ukutwisha kukwash. Anch akulej kusal mwamu, akutwish kukufumb chakwel akusadin kwi ndond ni pa chisu chikuswirikedinau nakash.

YIKWASHA AKADIVAR KUJIJAMEN KUZENGOL

13. Yikokujol ik yikatau kurish nich akadivar adia mu jingand mukangeshinau mudimu wetu wa kulejan?

¹³ Mu jingand mukangeshinau mudimu wetu wa kulejan, kuzengol kukat kuletish yikokujol yivud mu mwom ya antu. Akadivar adia mu jingand jinej akat kurish ni milong ya nfalang, mayej, ni kufish akatish nau. Pakwez mulong wa kukangesh kwa mudimu, amakurump akutwish pamwing ap kukangany kwambamb ap kuya kuyital akadivar akweta kuswir kwa kuyikasikesh. Yom yiney yamushikena Andrei, twisambinang mu mutu wa mulong wasambelangaku ou. Nambaz umwing wa mu chisak chend cha mudimu wa kulejan warisha ni milong ya nfalang. Kupwa wasadinap kand akisidan, chita kumubaril kujim, ni chinech chafanyina kumukangesha kusal mudimu. Chikalap nchik kukangesh kwa mudimu ni chipupu, akadivar asala yawonsu yatwishau mulong wa kukwash, ni Yehova wading umen yom yiney yawonsu.

14. Mutapu ik ukutwishau amakurump kulet chilakej chiwamp mu kumuchingejin Yehova?

¹⁴ Yom yifanyidinau amakurump kusal. Andrei walembila ni wasala yom yatwishay kusal. Mutapu ik wakulay Yehova? Yehova wamutumina akadivar kushalijan mulong wa kumukwash. Amwing amutwalang kopital. Akwau amukwashang ni nfalang. Yehova wayibachika kusal yawonsu yatwishau, ni wayukisha uumwing wau ni usu wau wasalau. (Heb. 13:16) Anch akangesh mudimu wetu wa kulejan, amakurump akat kuyit akadivar akwau mulong wa kukwash. (Jer. 36:5, 6) Mu yawonsu, muchingejinany Yehova. Ukutwish kukukwashany mulong wa kuwanyish maswir ma akadivar nau anambaz.

15. Mutapu ik tukutwisha kulam uumwing wetu wa win Kristu chisu chituzengodinau?

¹⁵ Yom yifanyidinau antu akwau kusal. Anch akangesh mudimu wetu, tukutwish kusambish kukumangan ni akadivar mu tuyisak tukemp tukemp. Chawiy chid cha usey kulam chisambu pakach petu kusambish katat. Utufanyidina kurishikish ud Satan kadiap etu ayinetu. Kangal washinshikin pa kurumbok kwa akadivar ney, anch kwalank kupwitamijan pakach pey ni mukadivar ney, ufanyidin kusal usu wa kupwish milong swa. (Jnsw. 19:11; Efes 4:26) Ikal uswapela kuyikwash antu akwau. (Tit. 3:14) Mutapu wamukwashau nambaz wading mu maswir wikala ni yibachikin yiwamp pa mudimu wa chisak. Antu a mu chisak ikala piswimp nakash mud antu a mu dijuku dimwing.​—Kus. 133:1.

16. Kukwatijan ni Kolosay 4:3, 18, mutapu ik tukutwisha kuyikwash akadivar nau anambaz netu azengodinau?

¹⁶ Tunan ni tunan twa akadivar nau anambaz in Kristu akat kumusadin Yehova chikalap nchik kukangesh kwa mudimu wetu mu jingand jivud. Amwing pakach pau akat kuyikas mu jinkan mulong wa ritiy rau. Tukutwish kulembil mulong wa awiy, mulong wa majuku mau, ni mulong wa akadivar atekina mwom yau mu ubaj mulong wa kuyikwash akadivar nau anambaz inay nich yom ya mu spiritu, ya kumujimbu, ni kuyilondin ku dirumburish.c (Tang Kolosay 4:3, 18.) Kangal wapipej usey wa malembil mey!​—2 Tes. 3:1, 2; 1 Tim. 2:1, 2.

17. Mutapu ik ukutwisha kwirijek kusambish katat mulong wa kuzengol?

¹⁷ Ey ni dijuku diey ufanyidinany kwirijek kusambish katat mulong wa kuzengol. (Mid. 14:22) Kangal wapakish kutong yom yiyimp yawonsu yikutwisha kushiken. Pakwez, kasikesh urund wey ni Yehova ni yikwasha kand aney kusal mwamu. Anch wikal ni yakamish yisu yimwing, ufanyidin kumufungwil Nzamb muchim wey. (Kus. 62:7, 8) Isambinany mu dijuku dien mayingishin mafanyidina kukubachikany kumuchingejin Yehova.d Mud muchidia piur pa yinship yikash, kwirijek kwey ni kumuchingejin Yehova kukuyiletin aney kutakaman ni chisambu.

18. Yom ik yituchingedina kurutu oku?

¹⁸ Chisambu cha Nzamb chikat kusal twiyova anch tud mu diking. (Fil. 4:6, 7) Kusutin chisambu chinech, Yehova ukat kutukwash kwiyov pee chikalap nchik mayej, yinship yikash, ap kuzengol kukutwisha kwikal ni yibachikin pad etu nlel. Ukat kuyisadin amakurump akata kusal mudimu ukash mulong wa kutubangin. Ni ukat kutukasikesh etu awonsu kukwashijan amwing ni akwau. Chisambu tusangaredina nlel chikutukwash kujijamen yikokujol ya kurutu, ap ‘mar makash.’ (Mat. 24:21) Pa chisu chinicha tukwikal ni kuswir kwa kulam chisambu chetu ni kuyikwash antu akwau kusal mwamu. Pakwez kupwa kwa chinship chinech, tukurishap kand ni mar makutwisha kutuletin yakamish. Kupwa tukusanger chad yom yisotiningay Yehova mulong wetwetu​—chisambu chiwanyidina ni cha chikupu.​—Isay 26:3, 4.