Kumekesh

Ranaken kud antu awonsu

Dichuku dimwing, mu Nouvelle Zelande nambaz umwing watala video ulondina anch: “Soucions-nous les uns des autres,” ulejena mutapu ukatay kov Yehova riy ni kurimekesh. (Isay 63:7-9) Wakwata mupak wa kusadin yom yilejay ni kukimb mitapu ya kuyikwash antu akwau. Mu kusut kwa chisu pa dichuku diawiy dinda, pading payilay nambaz winou, wasankanijana ni mband umwing uburedina ndond ya kulal, kupwa wamulandina ya kudia. Mband winou watambula. Chisu chachirikay nambaz mulong wa kumwink ya kudia, wasadina trakt Ov, Mar Makez Kupwa? mulong wa kumulej yom yilondinay Bibil piur pa Yehova.

Mband winou wadila. Walonda anch amulidina mu dijuku dia Atuman pakwez walikap uyakin pasut kal mivu yivud. Machuku makemp wamulembila Yehova chakwel amukwasha kuchirik mu uyakin. Nambaz wamwinkisha Bibil, kupwa wambamba nend mulong wa kusambish kwilej Bibil.a

Niyetu tukutwish kwimburij ranaken ra Yehova mulong wa antu akad kumwijik, kuwejinaku akadivar nau anambaz a mu chikumangen. Tukutwish kand kumekesh ranaken anch twakimb mitapu ya kupan uman kud antu akwau.