Ikal ni Chitongijok cha Nzamb piur pa Maar

Ukwet kashinsh anch ukat kusangerang yipan kushajin ya Yehova, kuwejinaku want ipau wey wa kutond mutapu wa kutaninamu mu yipan yiney. chisangareshina, Bibil ulejen anch nvin chid chipan cha Nzamb, palondinay anch: ‘Yakudia yikat kuyinkish antu usu, maar ma nving makwisangaresh nich.’ (Mul. 10:19; Kus. 104:15) Pamwing ap wamen kal anch antu avud ashikedin kal kwikal ni milong yivud mulong wa maar. Chikawau kand, kud yitongijok kushalishan ni mbil jipalangena pa mangand mawonsu piur pa maar. Yom ik yikutwisha kuyikwash in Kristu mulong wa kukwat mipak ya manangu piur pa maar?

Chikalap nchik ndond tushicha ap yitwapamina, chisu tukwatina mipak tufanyidin kwimen pa chitongijok cha Nzamb, kulik pa yitongijok ya antu atunyingumukinamu. Mwamu tukutwish kwikal ni mwom wa musangar.

Mud mutapu umena, antu avud nlel akat kuna maar nakash. Antu amwing akat kuna maar mulong wa kwipuwangej. Akwau akat kuna mulong wa kupwish nich milong. Ni mu jindond jimwing, muntu unila maar nakash ud muntu uswila ni ukweta usu.

Pakwez in Kristu, akwet umutakel udiokila kud Sakatang wau wa rukat. Chilakej, ukat kutubabesh piur pa ubaj udiokiling ku kuleu maar. Tutangin mu Jinswir 23:29-35 piur pa antu akata kuna maar nakash ni milong yikata kuyishiken.a Daniel, mukurump wa chikumangen uda mu Erop, uvurikin mashakamin madingay nich kurutu ikala mwin Kristu wakin, ulondin anch “Kuna maar nakash kwambachika kukwat mipak yiyimp, ni nikala ni yibudikin yiyimp yikata kwinsal nayimp anch navurik.”

Mutapu ik tukutwisha kukwat mipak yiwamp piur pa maar ni kwipuk milong yikata kudiokal kukuna maar nakash? Chid cha usey kukil mbil ja Nzamb jitutakela mu yitongijok ni mu yisal yetu.

El tushinshikinany yom yilondinay Bibil piur maar ni yom yikata kuyibachik antu avud kuna maar.

MBIL JA BIBIL

Dizu dia Nzamb dilikishinap kuna maar mu chilik chisikena. Pakwez Bibil ulejen anch kuna nving kukat kusangareshan. Tutangin anch: “Yang, ukadia yakudia yey nich musangar ni kuna maar mey ma nviny nawamp.” (Mul. 9:7) Pa chisu chimwing Yesu niyend wana nviny, mwamu kand mwasalau atushalapol akwau ashinshamena a Nzamb.​—Mat. 26:27-29; Luka 7:34; 1 Tim. 5:23.

Chikalap nchik mwamu, Dizu dia Nzamb dilejen patok kushalijan kudia pakach pa kunaku maar ni kwichuch. Ulodin patok anch: “Kangal wakwachikany ku maar.” (Efes 5:18) Ni ulondin kand anch “in kukwachik maar . . . kakuswanap mu Want wa Nzamb.” (1 Kor. 6:10) Mwaning, Yehova ujidikin kamu kuna nakash ni kukwachik. Pakwez, pa ndond pa kukwat mipak ya kuna maar yimedina pa yom yitiyinau antu kwi ndond tushicha, tufanyidin kulondul mbil ja Nzamb.

Antu amwing akat kutong anch akutwish kwau kuna ap maar mavud pakad kuleu. Pakwez chid kamu cha ubaj nakash. Mifund yimekeshin patok anch kwikal “aswik a maar” kukutwish kumushikij muntu ku kurumbuk nakash ni kusal chitil chijim ku mes ma Yehova. (Tit. 2:3; Jnsw. 20:1) Yesu ni ndiy walonda anch “kukwachik maar” kukutwish kumukangesh muntu kwandam mwingand yisu ya Nzamb. (Luka 21:​34-36) Chawiy, chom ik chikutwisha kumukwash mwin Kristu kwipuk milong yikutwisha kudokal ku kuna maar?

TONGIN MULONG WAK UNILA NI UVUD WA MAAR UNILA

Chisu tukwatina mupak piur pa kuna maar chid chaubaj nakash kwimburij yom yisadinau antu avud ndond tushicha. In Kristu akweta manangu akat kusal yom yikutwisha ku musangaresh Yehova piur pa mulong utadina kudia ni kuna. Bibil utuvurishin anch: “Chawiy yom yawonsu yiukusalanya, anch kudia ap anch kuna, salany yawonsu mulong wa kulet uyaj kudi Nzamb.” (1 Kor. 10:31) Ey yawiy yipul ni mbil ja Bibil jifanyidina kushinshikin:

Ov, nikat kunang maar mulong wa kuyisangaresh antu akwau? Kubudik 23:2 ulondin anch: “Kangal kulondul chisak cha antu avud.” Pinap Yehova wa yibabesha in Isarel anch kangal ayimburij antu ading alikina kumusangaresh ndiy. Kubabesh kwinoku kud kand kwa usey nlel kud in Kristu. Anch twalikidil mipak ni yitongijok ya antu piur pa maar yikala ni usu pad etu, tukutwish kuya kulemp nakash ni Yehova ni mbil jend.​—Rom 12:2.

Ov, nikat kuna mulong wakumekesh anch nikasiken ku maar? Ndond jimwing, chitongijok chakuna nakash akat kuchitiy kud antu avud. (1 Pita 4:3) Pakwez tal yom yitukasikeshinay 1 Korint 16:13 kusal “Babalany, imanany dang mu ritiy, jijamanany, ikalany akash.” Chakin kamu maar makutwish kumukwash muntu kwikal ni usu? Bwat kamu. Maar makutwish kuziyish ukaliweny wa muntu wa kotong ni wa kukwat mipak yiwamp. Mud chibudikin kuna nakash kukatap kumekesh anch muntu ukasiken. Pakwez kukat kumumekesh usup wa muntu. Isay 28:7 urumburil muntu ukata kuna maar nakash, chad ukat kurumbangan ni kwipwakalijan.

Usu wakin ukat kudokal kud Yehova ni witining ‘kushal achila ku mes ni kushal iminya dang mu ritiy.’ (Kus. 18:32) Tukat kusal mwamu mu kwikasikesh kwipuk ubaj ni kusutin ku kwat mipak yikutwisha kulik kuyipish urund wetu ni Yehova. Yesu wading ni urund ukash ni Yehova, ni antu avud ading amulimishin mulong wading utakamen ni wasalang usu wa kusal yom yiwamp.

Ov, nikat kuna maar mulong wakuvuramen yakamish ap milong? Nfund a kuseng ukweta manangu amupepila kufund anch: “Mu kuvul kwa minan mu muchim wam kwongoj kwey [Yehova] kwatokish kal ku muchim wam too.” (Kus. 94:19) Anch Ukwet yakamish piur pa chom kanang imwita Yehova akukwash kangal maar bwat. Mutapu uwamp wakukukwash kupwish yakamish ud wa ku mulembil Yehova . Antu amwing amana anch kukimb yiyul kud arund aswila a mu chikumangen kud kwa ukwash. Nlel unou kuna maar mulong wa kurish ni yikokujol kukutwish kukepish usu wa muntu wa kukwat mipak mulong wa kusal yom yiwmp. (Ozey 4:11) Daniel, wisambinangau kwimsambishin witiya anch: “Narisha ni yakamish ni yovil ya kwifish nich. Nasambisha kuna mulong wa kurish ni mulong winou, pakwez yikokujol yapandakana nashadisha urund ni kalimush kam.” Yom ik yamukwasha chad Daniel? “Najingunina anch ni kwet kuswir kwa ukwash wa Yehova pakwez ukwash wa maar bwat. Panasala mwamu natwisha kurish ni milong yam ni kuyipandakan,” mwamu mulondinay Daniel. Uyakin ud anch Yehova udaku chisu chawonsu mulong wa kutukwash ap anch mulong wetu wamekan mud kwikil ruchingej.​—Fil. 4:6, 7; 1 Pita 5:7.

Ufanyidin kushinshikin anch ukwet kuswir kwa kuna piwiyipwila yipul yilondwilaku ey, ‘Antu a mu dijuku ap arund a piswimp akat kuman anch kuna chikadin kal chaku cham?’ Anch mwawiy, chikutwish kumekesh anch wakudishin kal chaku ap mulong wakad kupwish. ‘Ov, nikat kuna nakash kusutamu pakur?’ Ukutwish kwikal mwikadil wa muntu, ap anch kakatap kuna maar nakash ukutwish kwiyandjik mwi njil yiney. ‘Ov, chinkasikedin kusal machuku pakad kuna maar?’ Anch chid mwamu, kuna chikadin kal chaku ap kukwachik. Chimeken anch ukwet kuswir kwa ukwash wa antu ileja milong ya maar mulong wa kukwash kulik mwikadil winou.

Mulong kuna nakash kukutwish kulet milong yivud, in Kristu amwing atondin kulik kuna maar min mawonsu. Akwau alikin kuna mulong wa diyingishin dia kulil kuwil mu mupit. Anch mbay ney mwin Kristu wa kwat mupak winou, ukutwish kumekesh ranaken kusutin kulimish mupak wend pakad kumunyinyit.

Ap watanidinamu mulong wa kwitekin mipak kanang. Mwin Kristu ufanyidin kwitekin mipak piur pa uvud wa maar mafanyidinay kuna. Ap ukutwish kwitekin mbil piur pa tupamp tufanyidinay kuna, pamwing ap pa rubing ap chisu cha kudia. Antu amwing itekidin mimbu piur pa milad ya maar mafanyidinau kuna, mud nving, ap maar makad kuswej nakash, ap kwipuk maar mabombodinau. Anch muntu witekin mimbu piur pa kuna maar chikumuswapel kwilam. Ni mwin Kristu uswila kakwet kuswir kwa kwiyakamish piur pa yom yikutongau antu akwau mulong wa kutond kwend.

Anch wakwat mipak piur pa kuna maar, tufanyidin kand kutong mutapu ukwiyovau antu akwau. Rom 14:21 ulondin anch: “Chom chiwamp chidi kulik kudia mbij, ap kuna maar, ap kusal chom chikwau chikutwisha kumuwish mwanamakwey mwin Kristu mu chiti.” Mutapu ik ukutwasha kusadin chiyul chinech? Mekesh rukat wa ukadivar. Anch wiyov anch kuna maar maleushena kukat kumupwakesh muntu mukwau, ov, chinech chikukubachikap kulik kuna? Anch wasal mwamu umekeshina anch uyikatin ni uyilimishin antu akwau, ni ukimbinap ching kuwap kweyey amwiney.​—1 Kor. 10:24.

Chikwau kand, guvernema ukutwish kulet mbil piur pa maar, chakin kamu in Kristu afanyidin kulimish mbil jinej. Yijil yiney yikutwish kukangesh antu akweta mivu kanang kuna maar. Ap yijil yikutwish kukangesh muntu kuna maar pendishinay ap pasadidinay machin min mawonsu.​—Rom 13:1-5.

Yehova watwinkisha want ipetu wa kusanger yom yatwinkishay. Kuwejinaku chipan cha want ipetu wa kutond yom tufanyidina kudia ni kuna. Kutond kwetu kukat kumekesh anch tukat kusadin chipan chinech mulong wa kumusangaresh Tatukwetu wa mwiur.