MUTU WA MULONG WA KWILEJ WA 50

Ritiy Rikweta Midimu Rikutwish Kututwal ku Kutentam

“Ashich mu ritiy mudi mwashakamay ngakiril wetu Aburaham.”—ROM 4:12.

MUMINY 119 Tufanyidin Kwikal ni Ritiy

YIDIA MU MUTU WA MULONG WINOUa

1. Anch twashinshikin ritiy ra Aburaham, chipul ik tukutwisha kwiyipul?

AP ANCH antu avud ateshinap kal piur pa kwikalaku kwa Aburaham, avud kijingap kamu yom yivud piur pend. Pakwez, wijaku yom piur pa Aburaham. Chilakej wij anch: Aburaham amutazuka anch “udi ngakiril wa in kwitiyij awonsu.” (Rom 4:11) Ukutwish kwiyipul anch: ‘Ov, niyam nikutwish kwikal ni ritiy rikash mudiay Nzamb mud Aburaham?’ Inge, ukutwish kwey.

2. Mulong wak chid cha usey kwilej chilakej cha Aburaham? (Yakobu 2:22, 23)

² Mutapu umwing tukutwisha kukudish ritiy mud ra Aburaham kud kusutin kwilejin ku chilakej chend. Pamwinkishau mbil ku Nzamb, Aburaham washemunikina mwi ngand ya kulemp, washakama mu minkand mu mivu yivud, ni witiya pakad kulab kumupan mwanend Isak. Yom yiney yawonsu yasalay ya mekesha ritiy rikash. Aburaham wikala murund wa Nzamb kusutin ritiy ni yisal yend. (Tang Yakobu 2:22, 23.) Yehova ukatin anch etu awonsu kuwejaku ni yeyey twikala ni dilau dend mulong wa kwikal arund nend. Mulong wa diyingishin dined, wamupepila Paul ni Jakobu kwisambin piur pa chilakej cha Aburaham. El tushinshikinany chilakej chend, mud mwisambidinau mu Rom shapitre 4 ni Yakobu shapitre 2. Paul ni Jakobu awonsu aad isambina piur pa chom cha usey nakash piur pa Aburaham.

3. Mufund ik wa Bibil wasadinay Paul ni Jakobu?

³ Paul ni Jakobu asadina mazu madia mu Disambishil 15:6, masambishina anch: [Aburaham] wamwitiyija [Yehova], niyend [Yehova] wamuchindila mudi mudia kutentam kwend.” Yehova ukat kumutazuk muntu anch utentamin anch wasal yom yimusangareshina ndiy. Chisangareshin nakash kwijik anch Nzamb ukutwish kumutazuk muntu wakad kuwanyin ni mukayitil anch utentamina! Chilik chimwing Nzamb ukutwish kukutazuk niyey anch utentamin ni chiswapel kwau kud ndiy kusal mwamu. Tukwilej mulong wak Yehova wamutazuka Aburaham anch utentamin ni yom ik ufanyidina kusal mulong akutazuk anch ud muntu utentamina.

TUFANYIDIN KWIKAL NI RITIY MULONG WA KWIKAL ANTU ATENTAMINA

4. Yom ik yifanyidinau antu kusal mulong wa kwikal atentamina?

⁴ Mu mukand wayituminay in Rom, Paul walondang anch antu awonsu asala yitil. (Rom 3:23) Chawiy mulong wak Nzamb utwitiyijin ni kututazuk anch antu atentamina? Mulong wa kuyikwash in Kristu awonsu kwakul ku chipul chinech, Paul wasadina chilakej cha Aburaham.

5. Mulong wak Yehova wamutazuka Aburaham anch muntu utentamina? (Rom 4:2, 4)

⁵ Yehova wamutazuka Aburaham anch muntu utentamina chisu chadiokalay mwi ngand ya Kanan. Mulong wak Yehova wamutazuka Aburaham anch utentamin? Ov, chading mulong Aburaham walama kamu Chijil cha Moses? Bwat kwau. (Rom 4:13) Chijil chinech achipana ku muchid wa Isarel mu kusut kwa mivu 400 kupwa kwa Nzamb kumutazuk Aburaham anch ud muntu utentamina. Chawiy mulong wak Nzamb wamutazuka Aburaham anch utentamin? Yehova wamumekeshina Aburaham ranaken ni wa mutazuka anch utentamin mulong wa ritiy rend.—Tang Rom 4:2-4.

6. Mutapu ik ukutwishay Yehova kumutazuk muntu wakad kuwanyin anch utentamin?

⁶ Paul walonda anch ang muntu watek ritiy mudiay Nzamb, “utentamin mulong wa ritiy rend.” (Rom 4:5) Paul wawejinaku anch: “David niyend walonda kand mwamu ya kuyuk kwa muntu witiyau kudi Nzamb anch, utentamin wakad kuchind yisalijok yend anch: ‘Ayuk kwau antu alikishidinau kal kuyip kwau kudi Nzamb, awiy kamu ajimangeshilay kal yitil yau; wayuk kwend muntu wakad kuchindilau yitil yend kudi Mwant Nzamb.” (Rom 4:6-8; Kus. 32:1, 2) Nzamb ukat kulikishin yitil ya antu atekina ritiy mudiay ndiy. Ukat kuyilikishin kamu rawonsu ni kulik kand kuvurik kand yitil yau. Umening anch antu inay atentamin mulong wa ritiy rau.

7. Mulong wak tukutwisha kulond anch atushalapol a Nzamb a pasak ading atentamin?

⁷ Ap anch Nzamb wayitazuka anch ad antu atentamina, Aburaham, David, ni atushalapol end akwau ading antu akad kuwanyin. Pakwez mulong wa ritiy rau, Nzamb wayimana anch atentamin, pakampwil anch wayifanakesh ni antu akad kumwifukwil ndiy. (Efes 2:12) Mu mukand wend wayifundinay in Rom Paul warumburila anch tufanyidin kwikal ni ritiy mulong wa kwikal mu urund ni Nzamb. Aburaham ni David ikala arund a Nzamb mulong ading ni ritiy mudiay ndiy, niyetu tukutwish kwikal arund a Nzamb anch twikal ni ritiy mudiay ndiy.

MUTAPU IK UKWATIJADINA RITIY NI MIDIMU?

8-9. Yom ik yitonginingau antu amwing piur pa yom yafunday Paul ni Jakobu, ni mulong wak?

⁸ Mu yitot ya mivu, kukwatijan kwa ritiy ni midimu akutadikijana nakash mu marelijon ma makasu. Antakel achirelijon amwing afundisha anch chom chimwing chifanyidinay muntu kusal mulong wa kupand chitin kwau kumwitiyij Yesu Kristu. Ukutwish kuyitesh akat kulond anch “Itiyij mudiay Yesu chakwel upanda.” Antakel inay akat kusadin mazu ma Paul malondina anch: “muntu witiyinau kudi Nzamb anch utentamin wakad kuchind yisalijok yend.” (Rom 4:6) Pakwez, amwing akat kulond anch ukutwish “kwipandish amwiney” anch ukat kuya mu egliz ni kusal yom yiwamp. Mulong wakumekesh anch chitongijok chau chid chakin akat kusadin Jakobu 2:24 ulondina anch: “Nzamb umuyingishin muntu mulong wa yisalijok yend yiwamp yasadilay, kichidiap ching kusu mulong wa ritiy rend.”

⁹ Mulong wa yitiyij yau yishalishadina in kufund amwing achirelijon atonga anch Paul ni Jakobu katanijadinap piur pa ritiy ni midimu. Kukwatijan ni alej amwing achirelijon alondin anch, Paul witiyija anch muntu ukwet kwend ching kuswir kwa ritiy chakwel Nzamb amwitiya, pakwez Jakobu witiyija anch muntu ufanyidin kusal yom yiwamp mulong wa kwikal ni dilau dia Nzamb. Mulej umwing witiyijina milong ya Nzamb ulondin anch: “Jakobu kateshap mulong wak Paul wakasikeshina pa kulond anch muntu ukwet kuswir kwa ritiy mulong wa kwikal utentamina, ni mulong wa chom chinech Jakobu kitiyap kurumburil kwa Paul.” Pakwez Yehova wamupepila Paul ni Jakobu kufund yom yiney. (2 Tim. 3:16) Chawiy, kukutwish kwikal mutapu uswapela wa kukwatakesh yom yalondau. Kusutil kushinshikin nawamp yom yafundau.

Yipich: Kambuy Paul ni “midimu ya Yijil” yisatu yidiokila mu chijil cha Moses. 1. Muntu umwing uchimin ndand wa ulombu wa kanyik ku rizez ra disun. 2. Yakudia ya pasak ni mwan amukoku wakosh, dibot dia kad chivish, ni yom ya mayij yiridina. 3. Ikundj umwing ukat kowal ku makas ni mukwau umuzizidin mem. — Paul wayikasikesha in Kristu in Yuda ading mu Rom, anch ritiy rimedinap pa midimu ya Chijil cha Moses (Tal paragraf wa 10)b

10. “Midimu” ik yisambinay Paul? (Rom 3:21, 28) (Tal kand chipich.)

¹⁰ “Midimu” ik yikasikeshidinay Paul mu mukand wa Rom 3 ni 4? Wafanakesha chakusambish ni “midimu ya chijil,” yidia mu chijil chamwinkishau Moses ku mukandu wa Sion. (Tang Rom 3:21, 28.) Chimeken anch pa chirung cha Paul in Kristu amwing in Yuda itiyija anch afanyidin kulondul Chijil cha Moses ni kusal midimu yading yitinau mu Chijil chinech. Mud chibudikin, Paul wasadina chilakej cha Aburaham mulong wa kumekesh anch muntu kakwetap kuswir kwa kulondul Chijil cha Moses mulong wa kwikal ni dilau dia Nzamb. Pakwez Paul warumburila anch tukwet kuswir kwa ritiy. Chinech chikasikeshin kwijik anch, ang tukwet ritiy mudiay Nzamb ni Yesu Kristu tukutwish kwikal ni dilau dia Nzamb.

Collage: The disciple James and an example of a kind deed. A first-century Christian couple happily gives food and clothing to a poor older woman while others in fine clothing converse in the background. — Jakobu wayikasikesha in Kristu kumekesh ritiy kusutil “midimu” mud kusal yom yiwamp pakad kasolikany (Tal paragraf wa 11-12)c

11. “Midimu” ya mutapu ik yisambinay Jakobu?

¹¹ Chawiy, midimu yilondinau mu Jakobu 2 yidiap yom yitinau mu Chijil cha Moses yilejenay Paul. Jakobu wisambina piur pa midimu ap mijikit yifanyidinay mwin Kristu kusal mu mwom wend wa dichuku diawonsu. Midimu mud yiney yikat kumekesh anch mwin Kristu ukwet ritiy mudiay Nzamb ap bwat. Tal yilakej yaad yasadinay Jakobu.

12. Mutapu ik urumburilay Jakobu kukwatijan kudia pakach pa ritiy ni midimu? (Tal kand chipich.)

¹² Mu chilakej chakusambish, Jakobu warumburila anch in Kristu kafanyidinap kwikal ni kasolikany. Wafanakesha dinans dined ni chilakej cha muntu wamekesha ranaken kud muntu mpich pakwez wamudiul kazwendj. Jakobu walonda anch muntu ukutwish kutong anch ukwet ritiy, pakwez ov, rimeken mu yisalijok? (Jak. 2:1-5, 9) Mu chilakej chakaad, Jakobu wisambidin piur pa muntu umumena ‘mukadivar ap nambaz uburedin yidjal ap yakudia’ chad ndiy walik kumukwash. Ap mwamu muntu winou ukutwish kulond anch ukwet ritiy, pakwez rimekedinap mu yisal; muntu ukutwish kulond anch ukwet ritiy, pakwez yisal yend yikumekesh anch kakwetap kwend ritiy. Mud mwafunday Jakobu “ritiy anch ridi irinau rakad yisalijok yiwamp, ridi kwau ritiy rifila.”—Jak. 2:14-17.

13. Chilakej ik chasadinay Jakobu mulong wa kumekesh anch tukwet kuswir kwa kwikal ni ritiy rimekedina mu yisal? (Jakobu 2:25, 26)

¹³ Jakobu wasadina chilakej cha Rahab muntu wamekesha ritiy rend mu yisal. (Tang Jakobu 2:25, 26.) Watesha piur pa Yehova ni witiyija anch ukuyikwash in Isarel. (Jos 2:9-11) Wamekesha ritiy rend mu yisal—ni wayichidija in kutentish aad a in Isarel adinga mu ubaj. Mud chibudikin, Rahab ni Aburaham ayitazuka anch atentamin ap anch ad akad kuwanyin ni kalondulap Chijil cha Moses. Twilejin kusutil chilakej cha Rahab anch chid cha usey nakash kumekesh ritiy retu mu yisal.

14. Kutanijan ik kudia pakach pa yom yafunday Paul ni Jakobu?

¹⁴ Paul ni Jakobu arumburila mu mutapu uswapela ritiy ni midimu mu mitapu yaad. Paul wayileja in Kristu in Yuda anch kafanyinap kwikal ni dilau dia Yehova kusutil kwau kusal midimu yimedina pa Chijil cha Moses, chawiy Jakobu wakasikeshina anch in Kristu awonsu afanyidin kumekesh ritiy rau mu kusal yom yiwamp kud antu akwau.

Yipich: Akadivar nau anambaz akat kumekesh ritiy rau mu midimu. 1. Mukadivar umulangwishin ikundj ushicha mu kaking ka ayilim ni umubangidin pa shikay kal ku chikumangan. 2. Nambaz ufundin mukand. 3. Ambay a uruw apanin uman pa prezantwar. — Ov, ritiy rey rikat kukubachik kusal midimu yitiyinay Yehova? (Tal paragraf wa 15)

15. Mu mitapu ik tufanyidina kumekesh ritiy retu kusutin midimu yetu? Tal kand chipich

¹⁵ Yehova kalondinap anch ang tukimbin kwikal antu atentamina tufanyidin kamu kusal yom mud mwasalay Aburaham. Kud mitapu yivud tukutwisha kumekeshin ritiy mu midimu. Tukutwish kuyak antu asu mu chikumangen, kuyikwash akadivar nau anambaz adia mu maswir, ni kusal yom yiwamp kud antu a mu dijuku dietu, yiney yawiy yikutukwasha kwikal ni dilau ni yiyukish ya Nzamb. (Rom 15:7; 1 Tim. 5:4, 8; 1 Yoh. 3:18) Mutapu umwing wa usey tukutwisha kumekesh anch tukwet ritiy ud kusutin kulejan rusangu ruwamp kud antu akwau. (1 Tim. 4:16) Etu awonsu pakach petu tukutwish kumekesh kusutil yisalijok yetu anch tukwet ritiy mu kushilamu kwa Yehova anch kukuwanyin kamu chakin. Anch twasal mwamu, tukutwish kumekesh chakin kamu anch Nzamb ukutuman anch tutentamin ni ukututazuk anch arund nend.

RUCHINGEJ RID RA USEY MULONG WA KWIKAL NI RITIY

16. Mutapu ik wading ukwatijadina ruchingej ni ritiy ra Aburaham?

¹⁶ Mu Rom shapitre 4 tukutwish kwilejinamu dilejan dikwau dia usey nakash piur pa Aburaham: ud usey wa kwikal ni ruchingej. Yehova wamushilamu Aburaham anch ukuyiyukish “michid yawonsu”. Tongin pa ruchingej ripandakena kuwap rafanyinay Aburaham kwikal nich! (Dis. 12:3; 15:5; 17:4; Rom 4:17) Chawiy, ap anch Aburaham wading ni mivu 100 ni Sara wading ni mivu 90, kafanyinap kwikal ni ruchingej anch akuval mwan. Mu kuman kwa muntu, chading chimeken anch chikasiken kud Aburaham ni Sara kuval mwan. Kwading kamu kupak kukash kud Aburaham. “Nich ruchingej, ap anch kikwadingap chom cha kuchingej, chawiy mwamu ndiy wikala ngakiril wa michid yivud.” (Rom 4:18, 19) Chakin kamu, ruchingej riner rawanyina. Wikala tatukwend a Isak, mwan wachingelay mu mivu yivud.—Rom 4:20-22.

17. Mutapu ik twija anch tukutwish kwikal antu atentamina ni arund a Nzamb?

¹⁷ Tukutwish kwikal ni dilau dia Nzamb ni kwikal achindilau mud antu atentamina ni arund a Nzamb mud mwadingay Aburaham. Chawiy chakasikeshinay Paul pafunday anch: “Mazu malondau anch: ‘amwitiya anch [Aburaham], utentamin’ kamafundap ching kusu mulong wendendiy amwinend, bwat, pakwez amafunda kand mulong wetwetu akwitiyay Nzamb anch, tutentamin, mulong twamwitiyij kal Nzamb wamuvumbula Yesu Nsalejetu kwikal kand mwom.” (Rom 4:23, 24) Mud Aburaham, tukwet kuswir kwa kwikal ni ritiy rikash ni kusal midimu yiwamp ni kwikal ni kashinsh anch yom yawonsu yikaninay Yehova yikuwanyin. Paul wadandamena kwisambin piur pa ruchingej retu mu Rom shapitre 5, yawiy yom tukwisambina mu mutu wa mulong ulondwilaku ou.

MUMINY 28 Nany Udia Murund Nend a Yehova

a Tukwet kuswir kwa kwikal ni dilau dia Nzamb chakwel atuman anch tutentamin ku mes mend. Mutu wa mulong winou wisambidin yom yafunday Paul ni Jakobu ni mutapu ukutwisha ritiy ni midimu yetu kutukwash kwikal ni dilau dia Yehova.

b KURUMBURIL CHIPICH: Paul uyikasikeshin in Kristu in Yuda kushinshikin pa ritiy kulik pa “midimu ya chijil,” mud kudjal ndand ukweta ulombu wa mem ma kanyik, ap kusal musambu wa pasak ap kusal yishankur.

c KURUMBURIL CHIPICH: Jakobu wakasikeshina pa kumekesh ritiy kusutin kusal yom yiwamp kud antu akwau, mud kuyikwash atuzwendj.