Buku Dzra Wubidzri Dzra Samuwele
23 Lawa i mazritu ya wugamu ya Davhida:
“Mazritu ya Davhida, n’wana wa Yese,
Mazritu ya wanuna lweyi a tlakuxiwiki,
Muhlawuliwa wa Xikwembu Nkulukumba wa Yakobe,
Mukhandhi tlhelo muyimbeleli wa tinsimu a Israyele, lweyi a nyonxisaka.
2 Yehovha a ni nyike ntamu akuva ni hlaya dzrungula dzrake;
A ni byele leswi ni fanelaka ku swi hlaya.
3 Xikwembu Nkulukumba wa Israyele a vulavulile;
Yene zribye dzra Israyele a ni byele a ku:
‘Loko lweyi a fumaka vhanu a lulamile
Nakone a fuma hi ndlela leyi kombisaka leswaku a hlonipha Xikwembu Nkulukumba,
4 A mfumu wake wu fana ni ku vaninga a mixweni,
Loko dambu dzri tlhava ka mixo lowu wu nge ke na matlavi.
Wu fana ni ku vaninga loku ku va ka kone ntsrhaku ka loko ku ne mpfula,
Loku ku yentxaka leswaku ku mila byanyi a misaveni.’
5 Xikwembu Nkulukumba a wu vonisa xileswo ndangu wanga
Hikusa a hambe xipfumelelanu xa hi lani ku nga helikiki na mine,
Xipfumelelanu lexi xi tiyiki nakone xi nga ni wutsrhokotsrhoko hinkwabyu.
Leswi a ni dumbisiki swone, hi leswi ni swi vilelaka akuva ni nyonxa ni va ni huluka.
Hi leswo swi taka yentxa a hluvukisa ndangu wanga.
6 Kambe hinkwavu lava va kalaka va nga pfuni ntxhumu va txukumetiwa ku fana ni minsinya leyi nga ni mitwa,
Leyi swi kalaka swi nga koteki ku yi suselela hi mavoko.
7 Lweyi a va khumbaka,
A fanela ku va na a lulamile, a ni tlhazri dzra nsimbi ni mphinyu wa kone,
Kutani va fanela ku hisiwa hi ndzrilo va hela lani va taka va na va li kone.”
8 A mavito ya tinhenha ta yimpi ta Davhida hi lawa: Yoxebe-baxebeti wa Muhakhimoni, muzrangeli wa masotxha mazrazru ya ntamu. Khambi dzrin’wana a dlaye 800 wa vavanuna hi tlhazri dzrake. 9 A wawubidzri hi wunhenha i Eliyazari, n’wana wa Dodo, n’wana wa Ahohi. Eliyazari a a li yin’we ya tinhenha tizrazru ta yimpi ta Davhida, leti a ti na Davhida nkama lowu va yiki tlhontlha Vafilista. A Vafilista a va hlengeletanile va lulamela ku lwa, kambe loko masotxha ya Vaisrayele ma hlenhlile, 10 Eliyazari a tame a lwa, a dlayetela Vafilista lakakuva a voko dzrake dzri za dzri kazrala, a xiyandla xake xi patsra ni ku tiyela hi ku khoma xipada. Xileswo hi siku ledzro, Yehovha a yentxe leswaku a hlula hi ndlela leyikulu ma va a masotxha lawa a ma na Eliyazari ma* ta ta teketela mintxhumu ya vhanu lava a va dlayeteliki.
11 A wawuzrazru hi wunhenha i Xamimahi, n’wana wa Age, wa Muharari. Loko Vafilista va hlengeletanile a Lehi, lani a ku ni masimu ya timbaweni, a masotxha ya Vaisrayele ma tsrutsrumile* hi ku txhava Vafilista. 12 Xamimahi a yime a tiya, a lwela masimu wolawo, a dlayetela Vafilista lakakuva Yehovha a yentxa leswaku a hlula hi ndlela leyikulu.
13 Ka 30 wa vazrangeli, ku suke vazrazru va ya kumana na Davhida a mhakweni ya Adulamu hi nkama wa ntsrhovelo. Hi nkama wolowo a masotxha ya Vafilista a ma dzime mintxhatxha* ya wone a Nkoveni wa Refayimi. 14 Davhida a a li ku tumbeleni, kasi a Betlehema a ku ni mintxhatxha ya Vafilista. 15 Hiloko Davhida a ku: “Ingiki ni ngo kuma mati ya xihlovo lexi kumekaka a nyangweni wa Betlehema!” 16 Hiloko tinhenha letiyani ta tizrazru ti ya hlasela mintxhatxha ya Vafilista, kutani ti ka mati a xihloveni lexi kumekaka kusuhi ni nyangwa wa Betlehema, ti ya nyika Davhida. Kambe Davhida a yala ku ma nwa, a va a ma halata hansi akuva ma va gandzrelo ka Yehovha. 17 A ku: “Yehovha, a ni nge txhuki ni swi yentxa leswo! A ni nge yi nwi ngati ya vavanuna lava va bekiki wutomi byavu a nghozini.”* Xileswo a yale ku ma nwa. Leyi i mintxhumu ya ku hlamalisa leyi yentxiwiki hi tinhenha tizrazru ta Davhida.
18 Abixayi makwavu wa Yowabu, n’wana wa Zeruya, a a li muzrangeli wa ntlawa lowun’wana wa masotxha mazrazru ya ntamu. A dlaye 300 wa vavanuna hi tlhazri dzrake; a a ni ndhuma ngopfu ku fana ni tinhenha letiyani ta tizrazru ta ku sungula. 19 Nambileswi a a li yene lweyi a a khuziwa ngopfu ku tlula lava vabidzri va ntlawa wake nakone a a li muzrangeli wavu, hi wunhenha a a nga tlhasi ka lava va vazrazru va ku sungula.
20 Benaya n’wana wa Yehoyada, a a li wanuna wa xixixi,* lweyi a yentxiki mintxhumu yinyingi ya ku hlamalisa a Kabizeyele. A dlaye vana vabidzri va Ariyele, wa Mumowabu; nakone hi siku dzra kukazri na ku ni xitsrhwatsrhwa a nghene xihloveni a dlaya nghonyama. 21 Handle ka leswo, a dlaye Muegipta wa kukazri lweyi a a li xihotlovila. Nambileswi Muegipta lweyo a a ni tlhazri, Benaya a mu dumele na o va ni nhonga ntsena. A mu wutlele tlhazri a va a mu dlaya hi dzrone. 22 Leyi ku ve mintxhumu ya ku hlamalisa leyi Benaya n’wana wa Yehoyada a yi yentxiki. A a ni ndhuma ngopfu ku fana ni tinhenha letiyani ta tizrazru. 23 Nambileswi a a khuziwa ngopfu ku tlula lava va 30, hi wunhenha a a nga tlhasi ka lava va vazrazru va ku sungula. Nambitasu, Davhida a mu hlawule akuva a va mun’we wa masotxha lawa a ma mu sizrelela.
24 Asahele, makwavu wa Yowabu, a a li mun’we wa masotxha lawa ya 30:* Elikhanani n’wana wa Dodo, wa le Betlehema; 25 Xamimahi wa Muharodi; Elika wa Muharodi; 26 Helezi wa Mupeleti; Ira n’wana wa Ikikexi, wa Mutekowa; 27 Abiyezeri wa Muanatoti; Mebunayi wa Muhuxahi; 28 Zalmoni wa Muahohi; Maharayi wa Munetofa; 29 Helebi n’wana wa Bahana, wa Munetofa; Itayi n’wana wa Rebayi, wa le Gibeya wa va ka Benjamini; 30 Benaya wa Mupiratoni; Hidayi wa le minkoveni ya Gaxi; 31 Abi-aliboni wa Muarbati;* Azmavheti wa Mubahurimi; 32 Eliyaba wa Muxalabimi; vana va Yaxeni; Yonathani; 33 Xamimahi wa Muharari; Akhiyamu n’wana wa Xarari, wa Muharari; 34 Elifeleti n’wana wa Akhasibayi, n’wana wa Makati; Eliyamu n’wana wa Ahitofele, wa Mugilo; 35 Heziro wa Mukarmeli; Paharayi wa Muarabiya; 36 Igali n’wana wa Natani, wa le Zoba; Bani wa Mugadi; 37 Zeleki wa Muamoni; Naharayi wa Muberoti, mutameli wa matlhazri ya Yowabu n’wana wa Zeruya; 38 Ira wa Muitirite; Garebi, wa Muitirite; 39 na Uriya wa Muheti. A masotxha hinkwawu a ma li 37 wa wone.