Buku Dzra Wubidzri Dzra Samuwele
22 Hi siku ledzri Yehovha a huluxiki Davhida ka valala vake hinkwavu ni le ka Sawulo, Davhida a yimbelelele Yehovha lisimu ledzri. 2 A te:
“Yehovha i zribye dzranga, khokholo dzranga ni Muhuluxi wanga.
3 Xikwembu Nkulukumba wanga i zribye dzranga, ni tumbela kwake;
I xitlhangu xanga nakone i muhuluxi wanga lweyi a nga ni ntamu,* mbangu wanga wa ku tumbela ka wone lowu sizrelelekiki,*
Mbangu lowu ni tsrutsrumelaka ka wone, muhuluxi wanga; wa ni huluxa ka madzolonga.
4 Ni vitana Yehovha lweyi a faneliwaka hi ku dzrumisiwa,
Nakone ni ta huluxiwa ka valala vanga.
5 A lifu dzri ni pfalelile hi matlhelo hinkwawu ku fana ni magandlati* ya lwandle;
A vhanu lava yentxaka swa ku biha, lava taliki ku fana ni mati ya ndhambhi, va ni txhavisile.
7 Nkama na ni le ku kazratekeni ni vitane Yehovha;
Ni vitane Xikwembu Nkulukumba wanga.
Kutani na a li tempeleni dzrake a yingele zritu dzranga;
Ni swidzrilo swanga swa ku kombela mpfunu swi tlhasile a tindleveni take.
8 A misava yi sungule ku zruzrumela ni ku tsrekatsreka;
Ni leswi swi tiyisaka matilo swi tsrekatsrekile
Swi tsrekatsrekile hikusa Xikwembu Nkulukumba a a hlundzrukile.
9 A tinhompfu take ti mpukuke ximusi,
A non’wini kwake ku huma ndzrilo lowu helisaka;
A humese makhala ya ndzrilo.
10 A byekete matilo a va a xika;
A minkondzrweni yake a ku ni matlavi ya ku txhavisa.
11 A khwele ka kerubimi a buya hi ku haha;
A voneke na a li timpapeni ta xivumbiwa xa moya.
12 A tihambele munyama wu va ntsrhuti wake,
A ku ni mati ya ku mphuma ni matlavi ya ku mphuma.
13 Ka ku phatima loku a ku li mahlweni kwake a ku pfuzra makhala ya ndzrilo.
14 Kutani Yehovha a sungula ku dzrindzra na a le tilweni;
Lweyi a nga le Henhlahenhla a yentxa leswaku a zritu dzrake dzri yingeliwa.
15 A txopa valala vake hi minseve a va hangalasa;
A va ba hi tilo va hela mapimu.
16 Ku sungula ku voneka hansi ka lwandle;*
Leswi swi tiyisaka misava swi sungula ku voneka hi mhaka ya ku kawuka ka Yehovha
Ni hi mhaka ya moya lowukulu lowu wu humaka tinhompfini take.
17 A gwimbe voko na a le henhla;
A ni khoma a ni tsravula a nsingeni.*
18 A ni huluxa ka nala wanga lweyi a nga ni ntamu,
Ni ka lava a va ni nyenya, lava a va ni ntamu ku ni tlula.
19 Va ni hlasele hi siku ledzri a ni le nghozini,
Kambe Yehovha a ni seketelile.
20 A ni yise mbangwini lowu wu sizrelelikiki;
A ni huluxile hikusa a a ni zrandzra.
21 Yehovha a ni hakela hi ku ya hi mintizro yanga ya ku lulama;
A ni hakela hi ku ya hi ku basa kwanga.*
22 Hikusa na yi yingiseta milawu ya Yehovha,
A ni ngi ngi yentxa xihoxo xa ku tsrhika Xikwembu Nkulukumba wanga.
23 Minkama hinkwayu na yi dzrimuka milawu leyi a yi bekiki;
A ni nge ti hambuka ka milawu yake.
24 A mahlweni kwake ni ta tama ni va lweyi a pfumalaka nandzru,
Nakone a ni nge ti yentxa xihoxo.
25 Ingiki Yehovha a nga ni hakela hi kola ka mintizro yanga ya ku lulama,
Ni hi kola ka leswi ni kalaka ni nga na nandzru kwake.
26 Wa dumbeka ka lweyi a dumbekaka;
Lweyi a nga nhenha nakone a kalaka a nga na nandzru, a u mu voni nandzru;
27 U basile ka lweyi a basiki;
Kambe ka lweyi a nga mukanganyisi u kombisa leswaku u tlhazrihile.*
28 Hikusa u huluxa lava va titsrongahataka,
Kambe lava va tikulisaka a u va yamukeli futsrhi wa va tsrongohata.
29 Hikusa wene Yehovha u livaningu dzranga;
Hi wene Yehovha lweyi a ni vaningelaka a munyameni.
30 Hi mpfunu waku ni nga kota ku hlasela ntlawa wa vaphangi;
Hi ntamu wa Xikwembu Nkulukumba, ni nga khwela muru wa wukulu.*
31 Hinkwaswu leswi Xikwembu Nkulukumba wa ntiyiso a swi yentxaka swi hetisekile;
Leswi Yehovha a swi hlayaka swi xwengile.*
Xikwembu Nkulukumba i xisizrelelo ka hinkwavu lava va tumbelaka kwake.
32 Hikusa i mani Xikwembu Nkulukumba loko ku nga li Yehovha?
Nakone i mani zribye, loko ku nga li Xikwembu Nkulukumba wezru?
33 Xikwembu Nkulukumba wa ntiyiso i khokholo dzranga,
Hinkwaswu leswi ni swi yentxaka a ta swi yentxa swi va leswi hetisekiki.
34 A yentxa milenge yanga yi fana ni ya mhunti
A ni yimisa ni ku hwee, a mimbangwini leyi tlakukiki.
35 A toloveta mavoko yanga ku lwa yimpi;
A mavoko yanga ma nga gotsrha wugubu ledzri hambiwiki hi kobri.
36 U ni nyika xitlhangu xaku xa ku huluxa,
Nakone a ku titsrongahata kwaku ka ni tlakuxa.
37 U ni basisela ndlela;
A minkondzro yanga a yi* nge ti zretemuka.
38 Ni ta hlongolisa valala vanga ni va helisa;
A ni nge ti tlhela na va nge si na helisiwa.
39 Ni ta va helisa ni va pshwandlasa, lakakuva va nga ha sekeleki;
Ni ta va kandzretela.
40 U ta ni nyika ntamu leswaku ni ya ku lweni;
U ta yentxa leswaku ni kota ku hlula valala vanga.
41 U ta yentxa leswaku valala vanga va tsrutsruma loko va ni vona;*
Ni ta helisa* lava va ni nyenyaka.
42 Va dzrila va kombela mpfunu kambe a ku na lweyi a va huluxaka;
Nambi Yehovha va mu dzrilela kambe a nga va hlamuli.
43 Ni ta va sila va fana ni ntsrhuzri;
Ni va pfotlotela, ni va pswanyetela ku fana ni loko ku pswanyeteliwa ntsrokolo a tindleleni.
44 U ta ni huluxa ka leswi vhanu va le tikweni dzranga va ni solasolaka ha swone.
U ta ni sizrelela akuva ni va muzrangeli wa matiko;
Ni ta tizreliwa hi vhanu va ku a ni va tivi.
45 A vhanu va matiko va ta ni tela na va tikhondlile hi ku txhava;
Leswi va taka swi yingela mayelanu na mine swi ta va yentxa va hamba va ni yingiseta.
46 A vhanu va matiko man’wana va ta khomiwa hi wutoya;
Va ta huma a makhokholweni yavu na va zruzrumela.
47 Yehovha awa hanya! A Zribye dzranga a dzri dzrumisiwe!
A a twalisiwe Xikwembu Nkulukumba wanga, zribye ledzri dzri ni huluxaka.
48 Xikwembu Nkulukumba wa ntiyiso a ni khatisela valala vanga;
A yentxa leswaku vhanu va tibeka hansi kwanga.
49 U ni huluxa ka valala vanga.
U ni tlakuxa ni va henhla ka lava va ni hlaselaka;
Wa ni huluxa ka lweyi a nga ni tihanyi.
50 Hi leswo swi taka yentxa leswaku ni ku twalisa xikazri ka matiko, we Yehovha,
Nakone ni ta yimbelela* ni dzrumisa vito dzraku;