Buku Dzra Wubidzri Dzra Samuwele
21 A masikwini ya Davhida ku ve ni ndlala leyi tekiki malembe mazrazru ya ku landzrelelana. Xileswo, Davhida a kombela nkongomiso ka Yehovha, a va Yehovha a mu byela a ku: “Sawulo ni ndangu wake va ni nandzru wa ngati hikusa Sawulo a dlaye Vagibiyoni.” 2 Hi ndlela leyo, hosi Davhida a vitana Vagibiyoni a bulisana na vone. (A Vagibiyoni a va nga li Vaisrayele kambe a va li Vaamoni lava va tsretsreleliwiki hi Vaisrayele. A Vaisrayele va yentxe leswo hi leswi a va va hlambanyelile leswaku va nge ti va dlaya. Kambe Sawulo hi kola ka ku hisekela Vaisrayele ni Vayuda, a zame ku helisa Vagibiyoni.) 3 Davhida a va vutisa a ku: “Mi navela leswaku ni mi yentxela yini? Ni nga mi hakelisa kuyini akuva hi susa nandzru lowu a Israyele, akuva mi kombela Yehovha leswaku a tovokisa tiko dzrake?” 4 A Vagibiyoni va hlamula va ku: “A woru ni prata a swi nge yaneli ku hakela leswi Sawulo ni va ndangu wake va hi yentxiki swone nakone a hi na mfanelo ya ku dlaya mhunu a Israyele.” Xileswo Davhida a ku: “Ni ta yentxa xin’wana ni xin’wana lexi mi taka ni kombela xone.” 5 A Vagibiyoni va byela hosi Davhida va ku: “A wanuna lweyi a zamiki ku hi helisa nakone a kunguhatiki kuva ku nga ha sali mhunu wa lixaka dzrezru a Israyele, 6 hi nyiki 7 wa vanake. Hi ta hayeka mintsrumbu yavu* a Gibeya wa Sawulo, muhlawuliwa wa Yehovha, akuva Yehovha a yi vona.” Hiloko hosi yi ku: “Ni ta mi nyika vone.”
7 Nambitanu, Davhida a tsretsrelele Mefiboxeti, n’wana wa Yonathani, n’wana wa Sawulo, hi mhaka ya xipfumelelanu lexi Davhida na Yonathani n’wana wa Sawulo va xi hambiki a mahlweni ka Yehovha. 8 Hiloko hosi Davhida a teka Arimoni na Mefiboxeti, ku nga vana vabidzri lava Rizpa n’wana wa Ayiya a va pswaleliki Sawulo, ni ntlhanu wa vana va Mikali,* n’wana wa Sawulo, lava a va pswaleliki Adriyele, n’wana wa Barzilayi, lweyi wa Mumehola, 9 a va nyikela ka Vagibiyoni. Kutani Vagibiyoni va va dlaya va va va teka mintsrumbu yavu va yi hayeka ka timhandzri a nhaveni akuva Yehovha a yi vona. Hinkwavu va 7 va fe hi nkama wun’we; va dlayiwe ka masiku ya ku sungula ya ntsrhovelo, a ku sunguleni ka ntsrhovelo wa sevhada. 10 Rizpa, n’wana wa Ayiya, a teka mpahla leyi a yi yambaliwa hi lava va feliwiki* a yi yandlala henhla ka zribye a va a tsrhamisa, ku sukela a ku sunguleni ka ntsrhovelo ku ya tlhasa loko va neliwa hi mpfula; a nhlikanhini a a yentxa hinkwaswu akuva a tinyanyana ti nga wupami a henhla ka mintsrumbu yavu. Nambi wusikwini a a nga pfumeleli swihazri swa nhova swi tsrhindzrekelela mintsrumbu yavu.
11 Davhida a byeliwa leswi Rizpa, n’wana wa Ayiya, nsati lwentsrongo wa Sawulo a swi yentxiki. 12 Xileswo, Davhida a ya teka mazrambu ya Sawulo ni ya Yonathani n’wana wa Sawulo, lawa a ma ni vazrangeli* va le Yabexi-giliyadi. Va yive mintsrumbu yavu a Beti-xani, lani a Vafilista a va va hayeke kone siku ledzri va dlayiki Sawulo ha dzrone a Gilbowa. 13 A buye ni mazrambu ya Sawulo ni ya Yonathani nakone va hlengelete ni mazrambu ya lavan’wana lava va dlayiwiki* hi Vagibiyoni. 14 Kutani va lahla mazrambu ya Sawulo ni ya n’wanake Yonathani a Zela, a tikweni dzra Benjamini, a sizreni dzra Kixi papayi wa Sawulo. Ntsrhaku ka loko ku yentxiwe hinkwaswu leswi hosi Davhida a leletiki kuva swi yentxiwa, Xikwembu Nkulukumba a yingela swikombelo swavu mayelanu ni tiko.
15 Ku tlhele ku va ni yimpi a xikazri ka Vafilista ni Vaisrayele. Xileswo, Davhida ni masotxha yake va ya lwa ni Vafilista, kambe Davhida a kazrala. 16 Wanuna wa kukazri lweyi a vitaniwaka Ixibi-benobi, wa lixaka dzra Varefayimi, lweyi a a ni xipada xa nyuwana ni tlhazri ledzri a dzri hambiwe hi kobri nakone a dzri bindzra 3 wa makilu ni hamfu,* a a li kusuhi ni ku dlaya Davhida. 17 Hi ku kahlula, Abixayi n’wana wa Zeruya a lamulela Davhida, a tlhava Mufilista a mu dlaya. Hiloko a masotxha ya Davhida ma hamba xipfumelelanu na yene ma ku: “We hosi u nga ha txhuki u famba na hine a yimpini, hikusa u nga txhuka u fa hi gama hi sala na hi nga ha na livaningu a Israyele!”
18 Ntsrhaku ka leswo, ku tlhele ku lwiwa ni Vafilista a Gobi. Ka khambi ledzro Sibekayi wa Muhuxahi, a dlaye Safi wa lixaka dzra Varefayimi.
19 Ku tlhele ku lwiwa ni Vafilista a Gobi, kutani Elikhanani n’wana wa Yahare-oregimi wa le Betlehema a dlaye Goliyati wa Mugati, lweyi a mphinyu wa tlhazri dzrake a wu fana ni mhandzri leyi tizrisiwaka hi vahambi va tipanu.
20 Ku tlhele ku va ni yimpi kambe ka khambi ledzri yi ve a Gati. A ku ni wanuna wa kukazri lweyi a a li xihotlovila, a a ni 6 wa tintiho ka voko ha dzrin’we ni 6 wa tintiho ka nkondzro ha wun’we; hinkwatu a ti li 24 wa tone. Na yene a a li wa lixaka dzra Varefayimi. 21 A a tlhontlha Vaisrayele, leswi yentxiki Yonathani n’wana wa Ximeyi, makwavu wa Davhida, a mu dlaya.
22 Hinkwavu lava va mune a va li va lixaka dzra Varefayimi a Gati. Va dlayiwe ha Davhida ni masotxha yake.