Buku Dzra Ku Sungula Dzra Samuwele
18 Ntsrhaku ka kuva Davhida na Sawulo va ve ni mabulu lawo, Yonathani na Davhida va sungule ku va vanghanu lavakulu.* Yonathani a sungula ku zrandzra Davhida hi lani yene a tizrandzraka ha kone.* 2 Ku sukela ka siku ledzro ku ya a mahlweni Sawulo a tsrhame na Davhida nakone a nga mu pfumelelanga kuva a muka ka papayi wake. 3 Yonathani a a zrandzra Davhida hi lani yene a a tizrandzra ha kone* lakakuva yene na Davhida va hamba xipfumelelanu. 4 Yonathani a susa xiyambalu xake lexi xi kalaka xi nga na mavoko a nyika Davhida, a mu nyika ni xiyambalu xake xa yimpi, xipada, wugubu ni bandhi. 5 Davhida a sungula ku famba a lwa tiyimpi nakone kun’wana ni kun’wana lomu Sawulo a a mu zrumela kone, a swi mu fambela ha hombe. Leswo swi yentxe leswaku Sawulo a mu beka swanga muzrangeli wa masotxha, kutani swi nyonxisa vhanu hinkwavu ku patsra ni malandzra ya Sawulo.
6 Loko Davhida ni masotxha va buya hi ku dlayeni ka Vafilista, vavasati va le madoropeni hinkwawu ya le Israyele, va huma na va nyonxile va tlhangaveta Hosi Sawulo, va yimbelela ni ku kina na va txhaya madandana ni switxhayatxhayana leswi nga ni tingoti. 7 Vavasati a va kulungela na va yimbelela va ku:
“Sawulo a dlaye magidi,
Davhida a dlaye makume ya magidi.”
8 Sawulo a nga swi zrandzranga leswi vavasati a va swi hlaya loko va yimbelela. Xileswo a hlundzruka ngopfu swinene, a va a ku: “Va li Davhida a dlaye makume ya magidi kambe mine va li ne dlaya magidi ntsena. Ko kiyela va mu nyika wuhosi!” 9 Ku sukela ka siku dzroledzro Sawulo a a nga ha mu dumbi Davhida.
10 Hi mundzruku ka kone, Xikwembu Nkulukumba a pfumelele leswaku moya wa ku biha wu txhavisa Sawulo, kutani Sawulo a sungula ku yentxetela mintxhumu ya ku kala yi nga tolovelekanga a kaya kwake nkama lowu Davhida a txhayaka xitende* hi lani a a tolovela ku yentxa ha kone. Sawulo a a tamele tlhazri, 11 kutani a dzri txukumetela na a tibyela leswi: ‘Ni ta tlhava Davhida ni mu patsra ni khumbi!’ Kambe swi ze swi ku makhambi mabidzri na Davhida a huluka. 12 Xileswo, Sawulo a txhava Davhida hikusa Yehovha a a li na yene kambe a a sukile ka Sawulo. 13 Hi mhaka ya leswo, Sawulo a susa Davhida kusuhi na yene, a mu beka leswaku a va muzrangeli wa 1.000 wa vhanu, kutani Davhida a hamba a zrangela masotxha a yimpini.* 14 Hinkwaswu leswi Davhida a a swi yentxa swi tame swi mu fambela ha hombe nakone Yehovha a a li na yene. 15 Loko Sawulo a xiya leswaku Davhida swi mu fambela ha hombe, a mu txhava. 16 Kambe a vhanu hinkwavu va le Israyele ni va le Yuda a va mu zrandzra Davhida hikusa a a va zrangela loko va ya a yimpini.
17 Hi ku famba ka nkama Sawulo a byela Davhida a ku: “Ni ta ku nyika Merabi, n’wananga lwenkulu akuva a va nsati waku. Kambe tama u ni komba leswaku u ni xixixi hikuva u lwa tiyimpi ta Yehovha.” Hikusa Sawulo a a tibyela leswi: ‘A ni djuli leswaku a fa hi mavoko yanga, ni djula leswaku a dlayiwa hi Vafilista.’ 18 Hiloko Davhida a byela Sawulo a ku: “No va mani mine nakone a ndangu wa papayi wanga, ku nga maxaka yanga, i vamani a Israyele akuva ni nga va mukon’wana wa hosi?” 19 Kambe loko ku tlhasa nkama wa kuva Davhida a nyikiwa Merabi n’wana wa Sawulo, akuva a va nkatake, Merabi kutani a a nyikeliwe ka Adriyele wa Mumehola.
20 Mikali n’wana wa Sawulo a a zrandzra Davhida, kutani Sawulo a nyonxa loko a byeliwa ndzrava leyo. 21 Xileswo, Sawulo a tibyela leswi: ‘Ni ta mu nyika Mikali akuva a tizra swanga ntlhamu, a mu yentxa a wela mavokweni ya Vafilista.’ Hiloko Sawulo a byela Davhida hi khambi dzra wubidzri a ku: “Namunhla u ta va mukon’wana wanga.”* 22 Handle ka leswo, Sawulo a byela malandzra yake a ku: “Bulani na Davhida na mi li wuswenu mi mu byela mi ku: ‘A hosi ya ku nyonxela ni malandzra hinkwawu ya yone ma ku zrandzra. Xileswo pfumela kuva mukon’wana wa hosi.’” 23 Loko malandzra ya Sawulo ma byela Davhida mhaka leyo, Davhida a ku: “Mi pimisa leswaku mhunu wa ku fana na mine, lweyi a nga xisiwana nakone a dzrelekaka, swi nga nabyala akuva a va mukon’wana wa hosi?” 24 Xileswo, a malandzra ya hosi Sawulo ma ya mu byela leswi Davhida a swi hlayiki.
25 Kutani Sawulo a ku: “Byelani Davhida mi ku: ‘A hosi yo djula u yi nyika 100 wa minsuvu ya Vafilista swanga lovolo akuva yi tidzrihisela ka valala va yone.’” Sawulo a a zama ku yentxa leswaku Davhida a dlayiwa hi Vafilista. 26 A malandzra yake ma ya byela Davhida mazritu lawo, kutani a mhaka ya kuva mukon’wana wa hosi yi nyonxisa Davhida. Na ku nge si na hela nkama lowu a nyikiwiki wone, 27 Davhida ni vavanuna vake va ye dlaya 200 wa Vafilista. Kutani Davhida a teka minsuvu hinkwayu a yi yisa ka hosi, akuva a ta va mukon’wana wa yone. Hi ndlela leyo, Sawulo a mu nyika n’wanake Mikali akuva a va nkatake. 28 Sawulo a xiya leswaku Yehovha a na Davhida ni leswaku n’wanake Mikali awa mu zrandzra Davhida. 29 Leswo swi yentxe leswaku Sawulo a ya a mu txhava ngopfu Davhida nakone Sawulo a sungule ku vona Davhida swanga nala wake, wutomi byake hinkwabyu.
30 A tihosana ta Vafilista a ti huma ti ya a ku lweni, kambe loko leswo swi yentxeka, Davhida a swi mu fambela ha hombe a yimpini ku tlula malandzra hinkwawu ya Sawulo; xileswo a vito dzrake a dzri hloniphiwa ngopfu swinene.