Buku Dzra Ku Sungula Dzra Samuwele
20 Hiloko Davhida a tsrutsruma a Nayoti a Rama, a ya kumana na Yonathani, a mu vutisa a ku: “Ni yentxe yini? He xini xihoxo xanga kumbe xidoho lexi ni xi yentxeliki papayi waku akuva a djula ku ni dlaya?”* 2 Yonathani a hlamula a ku: “A swi nge yentxeki leswo! A u nge ti dlayiwa. Papayi a nge yentxi ntxhumu nambi ko va wa wukulu kumbe wa wutsrongo na a nge si na ni byela. Ha yini a a ta ni tlhotela leswo? A swi nge yentxeki leswo.” 3 Kambe Davhida a phikelela a va a hlambanya a ku: “Nakunene leswi papayi waku a swi tivaka leswaku wa ni nyonxela, swi nga yentxeka a te: ‘Swa yampswa Yonathani a nga yi tivi mhaka leyi akuva a nga vaviseki.’ Kambe ni funga ha Yehovha Xikwembu Nkulukumba lweyi a hanyaka, ni tlhela ni funga hi wene swanga hi leswi u hanyaka, leswaku ni kusuhi ni ku fa!”
4 Hiloko Yonathani a byela Davhida a ku: “Ni ta yentxa hinkwaswu leswi u taka swi hlaya.” 5 Davhida a byela Yonathani a ku: “Mundzruku i siku dzra Nkhuvu wa ku huma ka n’weti, kutani na dumba leswaku a hosi yi yimeli kuva ni ta tsrhama na yone akuva hi da; kambe ni tsrhiki ni famba, ni ta ya tumbela a nhoveni ku ya tlhasa mundlwana a wusikwini. 6 Loko papayi waku a djula ku tiva leswaku ni kwini, u ku: ‘Davhida a ni kombele hi ku phindhaphindha leswaku ni mu pfumelela kuva a kahlula a ya Betlehema a doropeni dzrake, akuva a ya va ni hinkwavu va ndangu wake loko ku hambiwa gandzrelo dzra lembe.’ 7 Loko a ku ‘swi lulamile’, swi ta va na swi hlaya leswaku mine nandzra waku ni sizrelelekile. Kambe loko a hlundzruka u ta vhela u swi tiva leswaku nakunene a djula ku ni yentxela swa ku biha. 8 Ni kombisi lizrandzru dzra ku dumbeka, mine nandzra waku, hikusa hi hambe xipfumelelanu a mahlweni ka Yehovha. Kambe loko a li leswaku ku ni lexi ni honiki xone u nga ni nyikeli ka papayi waku, ni dlayi wene.”
9 Hiloko Yonathani a ku: “U nga swi hlayi leswo! Loko no tiva leswaku nakunene papayi a djula ku ku yentxela swa ku biha, ni ta ku byela akuva u tivonela.” 10 Kutani Davhida a vutisa Yonathani a ku: “Loko papayi waku o yangula hi ndlela ya ku hlundzruka ni ta byeliwa hi mani?” 11 Yonathani a byela Davhida a ku: “A hi ye nhoveni.” Xileswo, ha wubidzri va ya nhoveni. 12 Yonathani a byela Davhida a ku: “Ingiki Yehovha Xikwembu Nkulukumba wa Israyele a nga va mboni ya leswaku mundzruku kumbe mundlwana ni ta xiyisisa papayi hi nkama lowu, loko ni xiya leswaku a nga djuli ku ku yentxa swa ku biha ni ta ku byela. 13 Kambe loko papayi o djula ku ku yentxa swa ku biha kutani ni nga ku tivisi ni va ni nga ku tsrhiki u famba hi ku zrula, ingiki Yehovha a nga ni khatisa a tlhela a yentxa hi lani ku tlulisaka, ni navela leswaku Yehovha a nga va na wene hi lani a viki na papayi ha kone. 14 Nakone ingiki u nga ni kombisa lizrandzru dzra Yehovha dzra ku dumbeka, swoswi na ha hanyaka ni loko kutani ni file. 15 U nga txhuki u tsrhika ku kombisa lizrandzru dzra ku dumbeka ka va ndangu wanga, nambiloko Yehovha a helisa valala vaku hinkwavu a misaveni.” 16 Hiloko Yonathani a hamba xipfumelelanu ni va ndangu wa Davhida a ku: “Yehovha a ta va khatisa valala va Davhida.” 17 Hi ndlela leyo, Yonathani a yentxa leswaku Davhida a tlhela a funga hi lizrandzru ledzri a nga na dzrone ha yene, hikusa a a mu zrandzra hi lani yene a tizrandzraka ha kone.*
18 Yonathani a ku: “Mundzruku i siku dzra nkhuvu wa ku huma ka n’weti nakone swi ta xiyeka leswaku a u kone, hikusa ka mbangu waku ku ta va ku nga na mhunu. 19 A na ha hlayi mundlwana, swi ta xiyeka ngopfu, xileswo buya a mbangwini lowu, ku nga lani u samiki u tumbela kone,* kumeka kusuhi ni zribye ledzri. 20 Kutani ni ta txopa kazrazru hi wugubu ka tlhelo dzrin’we dzra zribye ledzri, ni yentxa ingiki hi loko no txopa ntxhumu. 21 Loko ni zruma mutizri wanga, ni ta ku: ‘Famba u ya teka minseve.’ Loko ni mu byela ni ku: ‘A minseve yi le ka tlhelo ledzro lanu, buya nayu,’ lanu ke, u nga tlhela, hikusa ni funga ha Yehovha Xikwembu Nkulukumba lweyi a hanyaka, leswaku leswo swi ta va na swi tlhamuxela leswaku u nga kazrateki a u le nghozini. 22 Kambe loko ni mu byela ni ku ‘a minseve yi halahaya’, lanu ke, tifambeli hikusa Yehovha a to va na o ku byela leswaku u famba. 23 Mayelanu ni xidumbiso lexi hi xi hambiki, ingiki Yehovha a nga va mboni a makazri ka hine vabidzri hi lani ku nga helikiki.”
24 Xileswo Davhida a tumbela nhoveni. Loko ku tlhasa nkama wa nkhuvu wa ku huma ka n’weti, hosi Sawulo a tsrhama akuva a da. 25 A tsrhame khumbini, hi lani a a tolovela ku yentxa ha kone. Yonathani a tsrhama mahlweni kwake, kasi Abinere a tsrhama tlhelweni kwake, kambe ka mbangu wa Davhida a ku nga na mhunu. 26 Sawulo a nga hlayanga ntxhumu hi siku ledzro, hikusa a a tibyela leswi: ‘Swi nga yentxeka ku yentxeke ntxhumu wa kukazri lowu wu mu nyamisiki. Ina, swi nga yentxeka a nyamile.’ 27 Hi siku ledzri landzrelaka siku dzra ku huma ka n’weti, ku nga siku dzra wubidzri dzra nkhuvu, a mbangwini wa Davhida ku tame ku nga vi na mhunu. Kutani Sawulo a vutisa n’wanake Yonathani a ku: “Ha yini n’wana wa Yese a nga tanga ku deni tolo ni namunhla?” 28 Yonathani a hlamula a ku: “Davhida a ni kombele hi ku phindhaphindha leswaku ni mu pfumelela kuva a ya Betlehema. 29 A te: ‘Na ku kombela, ni tsrhiki ni famba, makwezru a ni vitanile hikusa a ndangu wanga wu ta nyikela gandzrelo a doropeni. Xileswo loko ni yamukeleka kwaku ni tsrhiki ni famba ni ya vona vamakwezru.’ Hi leswo swi yentxiki leswaku a nga ti a ta da na wene, we hosi.” 30 Hiloko Sawulo a hlundzrukela Yonathani a ku: “Xiphunta ndzriwena, n’wana wa ntunga, u pimisa leswaku a ni swi tivi leswaku u hlawule ku yima ni n’wana wa Yese? Leswo swi ta txhela tingana wene ni mamana waku. 31 Loko n’wana wa Yese a ha hanya misaveni, wene ni mfumu waku a mi nge ti tiya. Zruma mhunu swoswi a mu landzra hikusa a fanela ku dlayiwa.”*
32 Kambe Yonathani a vutisa papayi wake Sawulo a ku: “Kasi ha yini a fanela ku dlayiwa? E hona yini?” 33 Kolanu Sawulo a mu txukumetela hi tlhazri akuva a mu dlaya, kutani Yonathani a swi xiya leswaku nakunene papayi wake a djula ku dlaya Davhida. 34 Hi ku hlundzruka, Yonathani a tekela ku suka a menzeni nakone a nga danga ntxhumu hi siku ledzro dzra wubidzri dzra nkhuvu wa ku huma ka n’weti, hikusa a a vavisekile hi mhaka ya Davhida ni hi leswi papayi wake a mu danisiki.
35 Hi mundzruku ka kone, Yonathani a ya nhoveni akuva a ya kumana na Davhida na a ni mumpshwa wa kukazri lweyi a nga mutizri wake. 36 Yonathani a byela mutizri lweyo a ku: “Tsrutsruma u ya teka minseve loko ni txopa.” A mutizri lweyo a famba hi ku tsrutsruma, kutani Yonathani a txopa; a nseve wu khaluta mutizri wu ya wa ka kule. 37 Loko mutizri lweyo a tlhasa mbangwini lowu nseve lowo wu weliki ka wone, Yonathani a mu yangula hi zritu ledzri tlakukiki a ku: “Kasi a nseve a wu welanga halahaya?” 38 A ya mahlweni a huwelela a ku: “Kahlula u ya wu teka! U nga hlweli!” Kutani a mutizri a teka minseve a va a tlhelela kwake. 39 A mutizri a a nga swi tivi leswaku ku yentxeka yini; a swo tiviwa ha Yonathani na Davhida ntsena. 40 Hiloko Yonathani a teka matlhazri yake a nyiketa mutizri wake a va a mu byela a ku: “Famba na wone a doropeni.”
41 Loko mutizri a fambile, Davhida a huma lomu a a tumbele kone kolahayani kusuhi ka tlhelo dzra le nyingitimu. Kutani a khinsama kazrazru a khumba hansi hi mombo, ntsrhaku ka leswo va n’quntana va va va dzrilelana, kambe Davhida hi yene a dzriliki ngopfu. 42 Yonathani a byela Davhida a ku: “Famba hi ku zrula, swanga hi leswi hi hlambanyiki hi vito dzra Yehovha hi ku: ‘Ingiki Yehovha a nga va mboni hi lani ku nga helikiki a makazri ka mine na wene ni le makazri ka vananga* ni vanaku.’”*
Ntsrhaku ka leswo, Davhida a tifambela a va Yonathani a tlhelela doropeni.