Buku Dzra Ku Sungula Dzra Samuwele
21 Hi ku famba ka nkama, Davhida a ya a Nobe ka muprista Ahimeleki. Loko va kumana, Ahimeleki a sungula ku zruzrumela hi ku txhava, a mu vutisa a ku: “Ke yentxeka yini a ku za u ta na u li wuswaku?” 2 Davhida a byela muprista Ahimeleki a ku: “A hosi yi ni zrume kuva ni yentxa swa kukazri, kambe yi te: ‘U nga byeli mhunu mayelanu ni leswi ni ku zrumaka swone nambileswi u fanelaka ku swi yentxisa xiswone.’ Xileswo ni bule ni masotxha yanga leswaku hi ta kumana ka mbangu wa kukazri. 3 U nga va na u ni swa kukazri swa ku diwa? Nikombela u ni nyika ntlhanu wa mapawu kumbe swin’wana leswi nga kone.” 4 Kambe a muprista a byela Davhida a ku: “A mapawu lawa ni nga na wone a hi lawa ma tolovelekiki, hi lawa ya ku xwenga, mi nga ma da loko a li leswaku a masotxha yaku a ma yetlelanga ni vavasati.”* 5 Davhida a byela muprista a ku: “Tiyiseka leswaku hi fambeli kule ni vavasati ku fana ni makhambi mambeni loko hi ya ku lweni. Loko masotxha ma tikazratela ku va lawa ma xwengiki na mo hetisisa xiyavelo lexi tolovelekiki, hi nga ku yini hi le ka xiyavelo lexi xa namunhla!” 6 Hiloko a muprista a mu nyika mapawu ya ku xwenga, hikusa a ko va ni mapawu ya magandzrelo, lawa ma susiwiki a mahlweni ka Yehovha ma siviwa hi mapawu lawa a ma ha ku hambiwa, hi siku ledzri a ku txintxiwa hi dzrone mapawu.
7 Hi siku ledzro, mun’we wa malandzra ya Sawulo a a li kolanu hikusa a a sindzriseke ku va mahlweni ka Yehovha. A vito dzrake a a li Dowegi, wa mu Edomu, muzrangeli wa vabyisi va swifuyu swa Sawulo.
8 Hiloko Davhida a byela Ahimeleki a ku: “A u na tlhazri kumbe xipada lani? A ni tanga ni xipada nambi ku li switizro swanga, hikusa a hosi ye ni zruma swa kola na kola.” 9 A muprista a mu hlamula a ku: “Ku ni xipada xa Goliyati wa Mufilista lweyi u mu dlayiki a Nkoveni* wa Elahi, xi kola ntsrhaku ka efodi xi tsrondzriyeliwe hi panu. Loko u swi djula ku xi teka xi teki, hikusa lani ho va ni xolexo ntsena.” Kutani Davhida a ku: “Ni nyikani xipada xolexo, hikusa a ku na xin’wana xa ku fana na xone.”
10 Hi siku dzroledzro, Davhida a suka, a ya mahlweni a tsrutsruma Sawulo. Hi wugamu, a ya tlhasa mugangeni wa Akixi Hosi ya Gati. 11 A malandzra ya Akixi ma mu byela ma ku: “Lweyi a hi Davhida, hosi ya tiko dzra Israyele? A hi yene lweyi va kiniki na va yimbelela mayelanu na yene va ku:
‘Sawulo a dlaye magidi,
Davhida a dlaye makume ya magidi’?”
12 Loko Davhida a pimisa hi leswi va swi hlayiki, a txhava Akixi Hosi ya Gati, ngopfu swinene. 13 Xileswo a tiyentxa nhlanyi a makazri kwavu,* a yentxetela mintxhumu ingiki hi loko a li nhlanyi. A a khwayetela swipfalu, a tsrhika ni mazri ma xiririka hi malepfu. 14 Hi wugamu, Akixi a byela malandzra yake a ku: “A mi swi voni leswaku wanuna lweyi awa hlanya! Ha yini mi mu tisa kwanga? 15 Me twa leswaku a tinhlanyi leti ni nga na tone a ti ni xegi a ku za mi ni tisela yin’wana? Ha yini mi tsrhike mhunu lweyi a nghena kaya kwanga?”