Agoxto

A psalma ledzri dzri khanela hi tinhla tibidzri ta lisima: 1) Lava lulamiki va lavisana ni swikazratu. 2) Yehovha awa hi tizrula ka swikazratu swezru. Kambe a swi yentxisa kuyini leswo? Yin’we ya tindlela i ku hi pfuna ku va ni langutela ledzrinene hi wutomi hansi ka xiyimu lexi xa misava. Yehovha a dumbisa leswaku hi ta nyonxa loko hi li kazri hi mu tizrela. Nambitanu, a nga hlayi swone leswaku hi nga ti kumana ni swikazratu wuton’wini. (Eza. 66:14) Yehovha a hi kutxa ku beka miyanakanyu yezru ka wumundzruku lani hi taka va ni wutomi lebyi nga helikiki ku nga wutomi lebyi ku sukela khale a hi navelelaka byone. (2 Kor. 4:16-18) Yehovha a ta tama a hi pfuna ku mu tizrela siku dzrin’wana ni dzrin’wana (Aŝiḍ. 3:22-24) Hi nga dondzra yini ka swikobiso swa malandzra ya ku dumbeka ya Yehovha ya le minkameni ya khale ni ya le masikwini yezru? Hi nga kumana ni swikazratu leswi a hi nga swi yimelanga. Kambe loko hi dumba Yehovha, minkama hinkwayu a ta hi seketela.—Amaps. 55:22. Xihondzro Xa Ku Zrindzra 04/2023 pp. 14-15 §§ 3-4

Hi nga dondzra ka xikombiso xa Yosefa na Mariya, lava a va lulamele ku yingiseta wuhosi nambiloko ku yentxa leswo swi nga nabyali. (Luk. 2:1-6) Vona leswi swi va humeleliki nkama lowu Mariya a a ni nyimba. Aguxtu, mufumi wa Muroma, a humese nawu lowu a wu sindzrisa leswaku vhanu va tlhelela lomu va pswaliwiki kone akuva va ya hamba recensiamento kumbe ku tsralisiwa. Yosefa na Mariya a va fanela ku yendzra va ya a Betlehema ku nga mpfhuka wa kolomu ka 150 wa makilometru na u famba ka mbangu wa maganga ni minkova. A liyendzro ledzro a dzri nga ti va nabyalela, ngopfungopfu ka Mariya lweyi kutani a a ni nyimba ya 9 wa tihweti. Loko a e txhuka a sunguliwa hi ku lun’wa ke? Swi nga yentxeka a va kazrateka hi lihanyu dzra Mariya ni dzra n’wana lweyi a a tava Mesiya. Loko a ve swi djula a va tava va tizrisi xivangelo lexo akuva va tiyimelela ha xone leswaku va nga yingiseti nawu wa wuhosi. Yosefa na Mariya a va nga tsrhameli ku pimisa hi swikazratu swavu kambe a va yingiseta wuhosi. Nakone Yehovha a tovokise ku yingiseta kwavu. Mariya a tlhase ha hombe a Betlehema, a n’wana lweyi a mu pswaliki a a ni lihanyu ledzrinene nakone a tlhele a pfunisa leswaku ku hetiseka wuprofeta bya Bibele!—Mik. 5:2. Xihondzro Xa Ku Zrindzra 10/2023 p. 8 § 9; p. 9 §§ 11-12

Kambe u nga yentxa yini loko u khomiwa hi ku txhava nkama lowu u djulaka ku hlamula a mintlhanganwini? U nga vona swi pfuna ku tilulamisela ha hombe. (Amapr. 21:5) Loko u swi tiva ha hombe leswi taka dondzriwa a mintlhanganwini, swi ta ku nabyalela ku nyikela tinhlamulo. Xidzringanyeto xin’wana i ku nyikela tinhlamulo ta ku goma. (Amapr. 15:23; 17:27) Ku nyikela nhlamulo ya ku goma swi ta ku pfuna kuva u nga txhavi ngopfu. Loko u nyikela nhlamulo ya ku goma hi mazritu yaku, swi komba leswaku u tilulamisele ha hombe nakone u swi twisisi ha hombe leswi dondzriwaka. Kambe u nga yentxa yini loko u tizrise swidzringanyeto hinkwaswu leswi kambe wa ha tama u va ni ku txhava loko u djula ku nyikela nhlamulu? U nga tiyiseka leswaku Yehovha a ku nyika lisima ku tikazrata hinkwaku loku u ku yentxaka. (Luk. 21:1-4) Ku yentxa leswi u nga swi kotaka, a swi tlhamuxeli ku yentxa swa ku tlula leswi u nga swi kotaka. (Filp. 4:5) Kutani ti bekeli makungu lawa u taka kota ku ma tlhasela nakone khongota ka Yehovha a ku pfuna ku va ni mbilu yaku zrula. Kumbexana ntxhumu wa ku sungula lowu u nga wu yentxaka i ku tikazratela ku nyikela tinhlamulo ta ku goma. Xihondzro Xa Ku Zrindzra 04/2023 p. 21 §§ 6-8

Mupostola Pawulo a hi fananise ni masotxha lama tsrhamaka na ma lulamele yimpi. A yimpini, minkama hinkwayu masotxha ma fanela ku tsrhama na ma lulamile akuva ma lwa. Swi hi lani ku fanaka ni kwezru, akuva hi tsrhama na hi lulamele siku dzra Yehovha hi fanela ku tsrhama na hi yambale a xisizrelelo xa xifuva ku nga lipfumelo ni lizrandzru ni ku tlhela hi yambala kapaseti ku nga dumbo. A xisizrelelo xa xifuva a xi sizrelela mbilu ya musotxha. A lipfumelo ni lizrandzru swi sizrelela mbilu yezru ya ku fanekisela. Matsrhamela lawo ma ta hi pfuna ku tama hi tizrela Xikwembu Nkulukumba ni ku tama hi landzra Yesu. Lipfumelo dzri hi yentxa hi tiyiseka leswaku Yehovha a ta hakela lava mu djulaka hi mbilu hinkwayu. (Heb. 11:6) Lipfumelo dzri tlhela dzri hi kutxa ku tama hi dumbeka ka Muzrangeli wezru Yesu, nambiloko hi kumana ni swikazratu. Akuva hi tiyisa lipfumelo dzrezru ni ku tama hi tiyisela, swi djula hi dondzra hi swikombiso swa vamakwezru lava tamaka va dumbeka nambiloko va kanetiwa kumbe loko va kumana ni swikazratu swa timali. Hi nga tlhela hi fambela kule ni moya wa ku zrandzra mintxhumu leyi vonekaka, hi ku yetisela swikombiso swa vamakwezru lava titekeliki xiboho xa ku hanya hi mintxhumu yitsrongo akuva va zrangisa swivileleko swa Mfumu. Xihondzro Xa Ku Zrindzra 06/2023 p. 10 §§ 8-9

Khongota u kombela ku tikhoma. Ku tikhoma i wuswikoti bya ku lawula matitwela ni swiyentxo swezru. Hi vilela ku tikhoma akuva hi kota ku tlhasela makungu yezru ngopfungopfu ka mintxhumu leyi kazrataka kumbe leyi hi kalaka hi nge na kone ku navela ka ku yi yentxa. Dzrimuka leswaku ku tikhoma i xiyenge xa mihandzru ya moya. Kutani khongota ka Yehovha u kombela leswaku a ku pfuna hi moya wake lowa ku xwenga akuva u txutxela tsrhamela ledzri dzra lisima. (Luk. 11:13; Gal. 5:22, 23) U nga yimeli swiyimu leswi hetisekiki. Ka misava leyi hi hanyaka ku yone, a hi nge yimeli leswaku mintxhumu hinkwayu yi va leyi hetisekiki. Loko hi yimela leswaku mintxhumu hinkwayu yi famba hi ndlela leyi hetisekiki, swi nga yentxeka hi nga ti za hi tlhaseleli makungu yezru. Sungula hi kutsrongokutsrongo. Swi nga yentxeka u nge na nsusumeto wunene hi leswi swi tikombaka ingiki kungu dzraku dzra kazrata ku dzri tlhasela. Ka xiyimu lexo, ha yini u nga dzringisi ku tlhasela kungu dzraku hi kutsrongokutsrongo? Loko u djula ku txutxela tsrhamela dzra kukazri, swi ngo yini u sungula hi ku dzri kombisa ka mintxhumu leyitsrongo ya siku ni siku? Kumbe loko kungu dzraku ku li ku dondzra Bibele siku ni siku, swi ngo yini u sungula hi ku ti bekela nkamanyana wutsrongo siku ni siku akuva u dondzra? Xihondzro Xa Ku Zrindzra 05/2023 p. 29 §§ 11-13

Hi ku pfuniwa hi Yehovha ni nhlengeletanu yake a hi ngi kiyeleliwa hi swakuda swa moya a masikwini lawa. Swakuda leswi swa moya swi pfuna hinkwezru ku tama hi famba ka ‘ndlela ya vuxwengi’. (Eza. 35:8; 48:17; 60:17) Hi nga hlaya leswaku nkama hinkwawu lowu mhunu a yamukelaka xidondzro xa Bibele a pfulekeliwa hi mukhandlu wa ku famba ka ‘ndlela ya vuxwengi’. Van’wana va famba nkamanyana ka ndlela leyi va gama va yi tsrhika. Van’wana va tiyimiseli ku tama va famba ku ko va tlhasa wugan’wini. Kambe wugamu bya kone he byini? Ka lava nga ni dumbo dzra ku ya hanya a tilweni, a wugamu byavu i ‘paradeyisi dzra Xikwembu Nkulukumba’ a matilweni. (Mpful. 2:7) Kasi ka lava nga ni dumbu dzra ku hanya lani misaveni a wugamu i ku hela ka 1.000 wa malembe ya ku fuma ka Kriste loko vhanu hinkwavu va ta va lava hetisekiki. Loko ku li leswaku wene u famba ka ‘ndlela ya vuxwengi’, u nga lavise ntsrhaku nakone u nga yi tsrhike ndlela leyi ku ko ku tlhasa wugamu, a misaveni leyimpshwa! Xihondzro Xa Ku Zrindzra 05/2023 p. 17 § 15; p. 19 §§ 16-18

Loko u yanakanyisisa hi hinkwaswu leswi Yehovha a ku yentxeliki swone u ta susumeteleka ku mu tlangela ni ku nyikela wutomi byaku kwake. (Amaps. 116:12-14) A Bibele dzri swi beka livaleni leswaku Yehovha i munyiki wa “nyiko yin’wana ni yin’wana leyinene kun’we ni xihiwa xin’wana ni xin’wana lexi hetisekiki”. (Yak. 1:17) Nyiko ya yikulu ka hinkwatu i xitlhavelo xa N’wanake, Yesu. Yanakanya hi leswi: Xitizrulo xi yentxe leswaku swi koteka akuva hi va ni wuxaka bya le kusuhi na Yehovha. Handle ka leswo, Yehovha a hi nyika mukhandlu wa ku hanya hi lani ku nga helikiki. (1 Yoh. 4:9, 10) Ku tinyiketela i yin’we ya tindlela ta ku kombisa ku tlangela ku nga li ntsena xitizrulo kambe ni matovoko hinkwawu a hi nyikaka wone.—Deut. 16:17; 2 Kor. 5:15. Xihondzro Xa Ku Zrindzra 03/2024 p. 5 § 8

Loko hi ya hi vona ndlela ya ku biha leyi vhanu va tikhomaka ha yone ka misava leyi, hi titwa ku fana ni wanuna wa ku lulama Loti. Yene “a a kazrateka hi ku vona ni ku yingela mintxhumu ya ku biha”, hikusa a a swi tiva ha hombe leswaku Papapyi wezru wa le matilweni awa ma nyenya mahanyela lawa. (2 Pet. 2:7, 8) Ku txhava ni ku zrandzra Xikwembu Nkulukumba swi pfune Loti ku fambela kule ni mahanyela ya ku biha ya vhanu lava a va mu zrendzrelile. Na hine hi tsrhama makazri ka vhanu lava kalaka va nga hloniphi milawu ya mahanyela ya Yehovha. Nambi tanu hi nga swi kota ku tama hi va ni mahanyela lama basiki loko hi tama hi zrandzra Xikwembu Nkulukumba ni ku dondzra ku mu txhava hi ndlela leyi nga yone. Akuva hi kota ku yentxa leswo, hi ni mpfunu wa Yehovha. A tizrisa buku dzra Amaproverbia akuva a hi kutxa. Vakriste hinkwavu, vavanuna, vavasati, vampshwa ni lava kuliki va nga dondzra swinyingi ka buku ledzri. Loko hi txhava Yehovha, hi ta tivonela ka mahanyela ya ku biha. Xihondzro Xa Ku Zrindzra 06/2023 p. 20 §§ 1-2; p. 21 § 5

Swi nga yentxeka u langusana ni nkaneto lowu pfaka hi ka maxaka yaku, kumbexana u titsrone swa kukazri hi ku djula ku zrangisa Mfumu wa Xikwembu Nkulukumba. (Mat. 6:33) Loko swi li tanu, u nga tiyiseka leswaku Yehovha awa swi vona leswi u swi yentxaka hi konta yake. (Heb. 6:10) Swi nga yentxeka u swi xiyile leswaku mazritu lawa Yesu a ma hlayiki i ntiyiso, lama liki: “A nga kone lweyi a siyiki yindlu kumbe vamakwavu va xinuna, kumbe vamakwavu va xisati, kumbe mamana, kumbe papayi, kumbe vana, kumbe masimu hi kola kwanga kumbe hi kola ka madzrungula lamanene lweyi a nkameni lowu a kalaka a nge ti kuma tiyindlu, vamakwavu va xinuna, vamakwavu va xisati, vamamana, vana, ni masimu hi lani ku phindiwiki ka 100, na a xanisiwa—kutani a nkameni lowu taka a kuma wutomi lebyi nga gamikiki.” (Mar. 10:29, 30) Nakunene, matovoko lawa u ma kumiki i manyingi ku tlula leswi u titsroniki swone.—Amaps. 37:4. Xihondzro Xa Ku Zrindzra 03/2024 p. 9 § 5

Loko vakriste va le Yudeya va ve ni ndlala leyikulu, vamakwezru va le ka bandla dzra Antiyokiya “va kunguhat[e] ku zrumela xipfunu ka vamakwezru lava tsrhamaka Yudeya, mun’wana ni mun’wana a nyikela hi lani a nga kotaka ha kone.” (Mint. 11:27-30) Nambi leswi vamakwavu lava a va kumana ni ndlala a va hanya kule, a Yudeya, a vakriste va le Antiyokiya a va tiyimisele ku va pfuna. (1 Yoh. 3:17, 18) Na hine namunhla hi nga kombisa wunene loko vamakwezru va humeleliwa hi timhangu, hi ku va hi hantla hi va pfuna. Hi nga bula ni vakulu hi va hi tinyikela akuva hi patsreka ka mintizro ya kukazri. Hi nga tlhela hi nyikela swihanano ka ntizro wa misava hinkwayu ni ku tlhela hi khongotelela lava weliwiki hi timhangu. Vamakwezru va xinuna ni vaxisati na vone va nga ha vilela mpfunu akuva va kuma swa ku tihanyisa. Loko hosi yezru Yesu Kriste a ta ta akuva a yavanyisa vhanu, hi djula a kuma leswaku hi vhanu lava kombisaka ntwelawusiwana akuva a ta hi zramba leswaku hi “yamukela Mfumu”.—Mat. 25:34-40. Xihondzro Xa Ku Zrindzra 07/2023 p. 4 §§ 9-10; p. 6 § 12

Yesu a yetisele xikombiso xa Yehovha xa ku yanakanyela. A zrumeliwe misaveni akuva a ta ta zrezrela ntsena “tihamba leti lahlekiki ta yindlu ya Israyele” kambe a kombise ku yanakanyela hi kuva a zrezrela ni vhanu van’wana. Hi xikombiso, siku dzrin’wana wansati wa kukazri lweyi a a nga li Muisrayele a khinsamile a kombela leswaku Yesu a daha n’wanake lweyi a “a xaniseka ngopfu hi leswi a a ni demona”. Hi ntwela wusiwana, Yesu a yentxe leswi wansati lweyi a mu kombeliki swone a va a daha n’wanake. (Mat. 15:21-28) Vona xikombiso xin’wana. Na a ha ku sungula ntizro wake, Yesu a hlaye leswi: “Kambe lweyi a [ni] yalaka . . . na mine ni ta mu yala.” (Mat. 10:33) Kambe Yesu a nga mu yalanga Petro nambi leswi Petro a yaliki Yesu makhambi mazrazru. Yesu a a swi tiva leswaku Petro a tisolile nakone a a li wanuna wa ku dumbeka. Ntsrhaku ka ku va Yesu a pfuxiwile a ku feni a humelele ka Petro nakone swi nga ha yentxeka a mu byele leswaku a a mu zrandzra ni leswaku a a mu dzrivalelile. (Luk. 24:33, 34) Yehovha Xikwembu Nkulukumba na Yesu Kriste va yanakanyelana. Hine ke? Yehovha a yimele leswaku na hine hi yanakanyelana. Xihondzro Xa Ku Zrindzra 07/2023 p. 21 §§ 6-7

Kutani, hi nga va byela yini lava kalaka va nga kholwi ka leswaku swidumbiso swa Yehovha mayelanu ni Paradeyisi swi ta hetiseka? Xa ku sungula, i Yehovha ha byake lweyi a dumbisaka. Buku dzra Mpfuletelo dzri li: “Lweyi a tsrhamiki xiluvelweni a ku: ‘Lavisa! Ni yentxa mintxhumu hinkwayu yi va leyimpshwa.’” Yehovha a ni wutlhazri ni ntamu nakone awa swi navela ku hetisisa leswi a swi dumbisaka. Xa wubidzri, ka vonela dzra Yehovha leswi a swi dumbisaka swi fana ni loko a swi hetisisile, hi leswi yentxaka a hlaya leswi: “A mazritu lawa ma dumbeka nakone i ya ntiyiso. . . . A mazritu lawo ma hetisekile!” Xa wuzrazru, a xi kone lexi nga sivelaka Yehovha akuva a hetisisa leswi a swi sunguliki, xileswo a te: “Hi mine Alfa na Omega.” (Mpful 21:6) Hi wugamu swi ta ti komba leswaku i Sathana lweyi a nga ni madzrimi nakone a kalaka a nga swi koti ku hetisisa leswi a swi dumbisaka, ku nga li Yehovha. Kutani, loko mhunu a hlaya leswi: “Swa nyonxisa kambe a ni kholwi leswaku swi ta yentxeka,” dondzra ni ku tlhamuxela Mpfuletelo 21:5, 6, u va u yanakanyisisa ni mhunu lweyo hi leswaku leswo swi fana ni loko Yehovha a sinare papela dzra xitiyisekiso xa leswaku leswi a swi dumbisiki a ta swi hetisisa.—Eza. 65:16. Xihondzro Xa Ku Zrindzra 11/2023 p. 7 §§ 18-19

Loko Abrahamu a ni 75 wa malembe nakone a nge si va na vana, xana a ku vonile ku hetiseka ka xidumbiso lexo? Hi ndlela ya kukazri, ina. A ntsrhaku ka loko a tsremakanye nambu wa Efrata ni loko a zrindzrile ku dzringana 25 wa malembe, Abrahamu a vone ku pswaliwa ka n’wanake Ezaki. Nakunene ledzri ku ve hlolana dzrikulu. A ntsrhaku ka loko ku khalute 60 wa malembe a vone ku pswaliwa ka vatukulu vake Esawu na Yakobe. (Heb. 6:15) Kambe Abrahamu a nga zanga a vona vatukulu vake va ndzruluka tiko ledzrikulu ni ku va va nghena a tikweni dzra xidumbiso. Nambitanu, wanuna lweyi wa ku dumbeka a ve ni wunghanu ni mutumbuluxi. (Yak. 2:23) Loko Abrahamu a ta pfuxiwa a ta nyonxa hi ku tiva leswaku tinxaka hinkwatu ta la misaveni ti tovokisiwile hi kola ka lipfumelo dzrake ni leswi a lehisiki mbilu. (Gen. 22:18) Hi dondzra yini? Swi nga yentxeka u nga ku voni ku hetiseka ka swidumbiso hinkwaswu swa Yehovha swoswi. Kambe loko u lehisa mbilu ku fana na Abrahamu, Yehovha a ta ku tovokisa swoswi a tlhela a ku tovokisa a nkameni lowu taka.—Mar. 10:29, 30. Xihondzro Xa Ku Zrindzra 08/2023 p. 24 § 14

Yetisela swiboho leswinene swa Uziya. Nkama na Uziya a ha li mumpshwa a a titsrongahata. A dondzre “ku txhava Xikwembu Nkulukumba wa ntiyiso”. Uziya a fe na a ni 66 wa malembe nakone Yehovha a mu tovokise ngopfu. (2 Makr. 26:1-4, TNM.) Uziya a helise matiko manyingi ya valala nakone a yentxi swa ku a tiko dzra Yerusalema dzri sizreleleka. (2 Makr. 26:6-15) Handle ka ku ganaganeka, Uziya a nyonxe ngopfu hi kola ka leswi a kotiki ku swi yentxa hi mpfunu wa Yehovha. (Ekles. 3:12, 13) Hosi Uziya a a toloveli ku zrumisa mayelanu ni leswi a swi djula ku yentxiwa. Xana lesw swi mu yentxe a yanakanya swaku a nga yentxa xin’wana ni xin’wana lexi a xi djulaka? Siku dzrin’wana, Uziya a ngheni tempeleni ya Yehovha nakone a ve ni xixixi xa ku hisa magandzrelo alitarini, ku nga ntxhumu lowu a tihosi a ti nga na mfanelo wa ku wu yentxa. (2 Makr. 26:16-18) Muprista lwenkulu Azariya a zame ku mu kawuka, kambe Uziya a hlundzruke ngopfu hi kola ka leswo. Lexi vavisaka hi leswaku, Uziya a nga tamanga a dumbeka ka Yehovha nakone a game a khatisiwa hi nhlokonho (2 Makr. 26:19-21) Loko a a titsrongahatile i na swi nga zanga swi mu humelelile hinkwaswu leswo! Xihondzro Xa Ku Zrindzra 09/2023 p. 10 §§ 9-10

Kambe nambi ntsrhaku ka loko kutani a li mukriste lweyi a totiwiki, mupostola Petro a a fanela ku lwisana ni ku tsrana ka kukazri. Hi lembe dzra wu 36 N.Y., Yesu a zrumele Petro akuva a ya ka Korneliyu, lweyi a a nga li mukriste. Hi kolanu Korneliyu a totiwiki hi moya wa ku xwenga, nakone swi ve livaleni kolanu leswaku “Xikwembu Nkulukumba a nga na xihlawuhlawu” ni leswaku a vamatiko, kumbe lava a va nge Vayuda, a va ta va ni tovoko dzra ku hamba xiyenge xa bandla dzra wukriste. (Mint. 10:34, 44, 45) Ntsrhaku ka leswo, Petro a sungule ku da ni vamatiko ku nga ntxhumu lowu a a ngi ngi sama a wu yentxa a wuton’wini byake. Kambe a vakriste van’wana va Vayuda a va ha yanakanya leswaku a Vayuda ni Vamatiko a va nga fanelanga ku da xikan’we. Nakone loko van’we va Vakriste lava a va ni mayanakanyela lawa va ye a Antiyokiya, Petro a yime ku da ni vamakwavu lava a va nge vayuda, kumbexana swi yentxeke hi leswi a a txhava ku khunguvanyisa vamakwavu lava a va li Vayuda. Pawulo a xiye leswaku Petro a a ndzruluka mukanganyisi, xileswo a mu kawukile a mahlweni ka vhanu hinkwavu. (Gal. 2:13, 14) Nambitanu, Petro a nga kazralanga ku tama a yampswisa. Xihondzro Xa Ku Zrindzra 09/2023 p. 22 § 8

Swi nga yentxeka u xiya leswaku ku ni lomu u fanelaka kuva u yampswisa kambe u nga swi pfumeleli kuva leswo swi ku heta ntamu, hikusa “hosi yi ni timpswalu” nakone yi ta ku pfuna akuva u yentxa ku txintxa loku vilelekaka. (1 Pet. 2:3) Mupostola Petro a hi tiyisekisa leswi: “Xikwembu Nkulukumba . . . A ta mi tiyisa.” A ku sunguleni Petro a a yanakanya leswaku a nga faneleki kuva kusuhi na Yesu. (Luk. 5:8) Kambe hi mpfunu wa lizrandzru lowu Yehovha na Yesu va mu nyikiki Petro a tiyiselile ni ku tama a va mulandzreli wa Kriste. A mabindzru hi leswaku Yesu a pfumelele leswaku Petro a nghena “a Mfun’wini lowu nga helikiki wa Hosi yezru tlhelo muhuluxi Yesu Kriste”. (2 Pet. 1:11) Ledzri ku ve hakelo dzrikulu swinene. Loko ku fana na Petro na wene u tiyisela ni ku pfumela ku dondzrisiwa ha Yehovha, na wene u ta yamukela hakelo dzra wutomi lebyi nga helikiki, hi ndlela leyo u ta tlhasela kungu dzra lipfumelo dzraku ku nga ku huluxiwa.—1 Pet. 1:9. Xihondzro Xa Ku Zrindzra 09/2023 p. 31 §§ 16-17

A tabernakeleni a ku ni gqeke, ku nga mbangu lowu a wu pfulekile ni ku tlhela wu yakeliwa lihlampfu kumbe muru lani a vaprista a va kota ku hambela kone a mintizro yavu. A altari dzra kobre ledzri a ku hiseliwa ka dzrone magandzrelo a dzri kumeka ka gqeke ledzri, ku patsra ni basiya dzra kobre ledzri a dzri txheliwa mati akuva vaprista va kota ku tibasisa leswaku va yentxa ntizro wavu wa ku xwenga. (Eks. 30:17-20; 40:6-8) Namunhla a ntlawa lowu saliki wa vatotiwa wu tizra hi ku dumbeka kola misaveni kumbe ka gqeke dzra le ndzreni ka tempele dzra moya. A basiya ledzrikulu dzra mati, ledzi a dzri kumeka ka gqeke dzra tempele i xidzrimuxo xa lisima ku Vakriste lava totiwiki, xa leswaku ku fana ni Vakriste hinkwavu, na vone va fanela ku tama va va lava basiki hi tlhelo dzra nyama ni hi tlhelo dzra moya. Kambe xana lava va “xitsrhungu lexikulu”, lava na vone va seketelaka vatotiwa, vone va mu gandzrela kwini Yehovha? Mupostola Yohane a vone xitsrhungu lexikulu na “xi yime mahlweni ka xiluvelo”. Ka tempele dzra xivizri leswo swi yimela a gqeke dzra le handle, lani “va mu yentxelaka ntizro wa ku xwenga a tempeleni dzrake”. (Mpful. 7:9, 13-15) Na hine hi dzri nyika lisima ngopfu tovoko ledzri Yehovha a hi nyikiki dzrone dzra ku mu gandzrela ka tempele dzrake! Xihondzro Xa Ku Zrindzra 10/2023 p. 28 §§ 15-16

Ndlela yin’wana leyi Yehovha a hi nyikaka ntamu ha yone i ku tizrisa vakulu. (Eza. 32:1, 2) Kutani, loko u hlatiyela, byela vakulu leswi ku hlatiyelisaka. U nga pimisi kabidzri akuva u yamukela mpfunu lowu vakulu va ku nyikaka wone. Yehovha a nga ku tiyisa hi ku tizrisa vakulu. Dumbo dzrezru ledzri seketeliwiki a Bibeleni dzra ku hanya hi la ku nga helikiki, ku nga ha va a matilweni kumbe a paradeyisini dzra ku xonga la misaveni, dzri nga tlhela dzri hi nyika ntamu wa ku tama hi tizrela Yehovha. (Rom. 4:3, 18, 19) Dumbo ledzro dzri hi pfuna ku tiyiselela swikazratu, ku zrezra madzrungula lamanene ni ku hetisisa xiyavelo xin’wana ni xin’wana lexi hi nga ha vaka na xone a bandleni. (1 Tes. 1:3) Dumbo ledzro hi dzrone dzri tiyisiki mupostola Pawulo. Yene a “kamiwile”, a “pfilunganyeka”, a “xanisiwa” a tlhela a “tlatlalatiwa”. Nakone minkama yimbeni a ve kusuhi ni ku fa. (2 Kor. 4:8-10) Pawulo a kume ntamu lowu a a wu vilela akuva a tiyisela hikusa a a yanakanyisisa ngopfu hi dumbo dzrake. (2 Kor. 4:16-18) Pawulo a a beka miyanakanyu ka dumbo dzrake dzra ku ya hanya matilweni hi la ku nga helikiki. Pawulo a a yanakanyisisa hi dumbo ledzro, xileswo a a titwa na “a pfuxetiwa siku ni siku”. Xihondzro Xa Ku Zrindzra 10/2023 pp. 15-16 §§ 14-17

Loko u khongota, kambisisa leswaku xana ku nga va nkama lowunene wa leswaku Yehovha a hlamula xikombelo xaku’ Minkama yimbeni hi nga ha vona leswaku swikhongoto swezru swi fanela ku hlamuliwa hi ku kahlula. Kambe, Yehovha a tiva nkama lowunene wa ku hi hlamula. (Heb. 4:16) Loko swikhongoto swezru swi nga tekeli ku hlamuliwa, hi nga ha pimisa leswaku nhlamulo ya Yehovha i im-him, kambe swi nga yentxeka nkama wo kala wu nga sitlhasa. Hi xikombiso, makwezru lweyi a khongotiki a kombela kuva a hanyisiwa ka mavabyi yake kambe mavabyi yake a ma nga yampswi. Loko Yehovha a e mu daha hi ndlela ya hlolana, n’waninkama Sathana a a tava a hlaye leswaku makwezru lweyi a o tama a tizrela Yehovha hi leswi a mu dahiki. (Yb. 1:9-11; 2:4) Kambe Yehovha a bekise nkama lowu a taka helisa mavabyi hinkwawu ha wone. (Eza. 33:24; Mpful. 21:3, 4) Na nkama lowo wu nga si tlhasa, a hi nge yimeli leswaku Yehovha a hi daha hi hlolana. Kutani makwezru a a fanela ku kombela Yehovha a mu tiyisa ni ku mu nyika ku zrula ka miyanakanyu, akuva a tiyiselela mavabyi ni ku tama a tizrela Yehovha hi ku dumbeka. Xihondzro Xa Ku Zrindzra 11/2023 p. 24 § 13

Samisoni a yentxe xihoxo xikulu, kambe a nga tsrhikanga ku tama a tizrela Yehovha. A djuleteli mikhandlu ya ku yentxa leswi Yehovha a a swi djula kumbe ku lwa ni Vafilista. (Abaṭ. 16:28-30) Samisoni a khongote ka Yehovha a ku: ‘Ndzri hanane ntamu swoswi, ndzri tidzrihisela xikan’we ku Vafilista.’ Yehovha a xi hlamulile xikombelo xa Samisoni, a tlhele a mu nyika ntamu lowu tlulaka lowu tolovelekiki, hi ndlela ya hlolana. Xileswo hi siku ledzri, Samisoni a kote ku dlaya Vafilista vanyingi ku tlula lava a va dlayiki masiku ntsrhaku. Nambileswi Samisoni a viki ka xiyimu lexi xa ku vavisa, a nga tsrhikanga ku tikazratela ku yentxa ku zrandzra ka Yehovha. Na hine hi nga yentxa leswi fanaka. Loko hi txhuka hi yentxa xihoxo xa kukazri nakone hi nyikiwa xilayu kumbe hi luzekeliwa hi wutiyanguleli bya kukazri, a hi fanelanga hi tsrhika ku tizrela Yehovha. Dzrimuka leswaku Yehovha a nga ti txhuka a hi tsrhikile. (Amaps. 103:8, 9) Nambiloko hi pfa hi yentxa swihoxo hi nga tama hi tizrisiwa ha Yehovha ku fana na Samisoni. Xihondzro Xa Ku Zrindzra 09/2023 p. 6 §§ 15-16

Ku tiyisela ku ku yentxa u yamukeleka ka Yehovha. Leswo a swi hlayi swone leswaku loko u lavisana ni tinxanisa kumbe swikazratu, Yehovha awa nyonxa hi swone. Kambe a nyonxa ha wene. Ku tiyisela kwaku hi kone ku ku yentxaka u yamukeleka ka Xikwembu Nkulukumba, ledzro i tovoko dzrikulu! (Amaps. 5:12) Dzrimuka leswaku abrahamu a tiyiselile nambileswi a kumaniki ni swikazratu swinyingi, nakone Yehovha a nyonxe ngopfu hi leswo. Yehovha a a mu vona swanga mughanu wake nakone a hlaye leswaku i wanuna lweyi a lulamiki. (Gen. 15:6; Rom. 4:13, 22) Ku nga ha yentxeka leswi fanaka ha hine. A ku yamukeleka kwezru ka Yehovha a ku yi hi leswi hi kotaka ku swi yentxa a ntizrweni wake kumbe wutiyanguleli lebyi hi nga na byone. Yehovha a hi yamukela hikusa hi tiyisela hi lipfumelo. Hi nga swi kota ku tiyisela swi nge na mhaka ntanga yezru, swiyimu swezru kumbe wuswikoti lebyi hi nga na byone. Xana ku ni xikazratu lexi u xi tiyiselelaka swoswi? Loko swi li tanu, dzrimuka leswaku u nyonxisa Yehovha. Nkama lowu hi xiyaka leswaku ha yamukeliwa hi Yehovha, a dumbo dzrezru dzra leswaku a ta hetisisa hinkwaswu leswi a swi dumbisiki dzri ta ya dzri tiya. Xihondzro Xa Ku Zrindzra 12/2023 p. 11 §§ 13-14

Wanuna lwa nga mukriste a fanela ku dondzra ku vulavula hi ndlela leyi nga yinene. Wanuna lweyi a kotaka ku bulisana ha hombe ni vambeni a yingiseta ha hombe nakone awa swi kota ku twisisa miyanakanyu ni matitwela ya vambeni. (Amapr. 20:5) Nakone awa swi kota ku xiya ndlela leyi mhunu a titwaka ha yone loko a txintxa mpfumawulo wa zritu, ku txintxa ka wuso ni ndlela leyi a txhukatxhukisaka mizri ha yone. U nge swi koti ku dondzra hinkwaswu leswo loko u nga tinyiki nkama wa ku va ni vambeni. Loko u talisa ku bula ni vhanu hi ku tizrisa email, mamensaji kumbe ka maredi sosiyali swi nga ha ku kazratela ku bulisana ni vhanu hi xivizri. Kutani, dzringisa ku bulisana ni vhanu hi xivizri ku nga li hi ka matelefone. (2 Yoh. 12) Mukriste lweyi a wupfiki a fanela ku tiva ku tihlayisa ni ku hlayisa ndangu wake. (1 Tim. 5:8) I swinene ku dondzra ntxhumu wa kukazri lowu taka ku pfuna ku kuma ntizro. (Mint. 18:2, 3; 20:34; Efe. 4:28) Tikazratele ku tizra hi nkhikhi akuva u heta ntizro lowu u nyikiwiki wone, loko u yentxa leswo u ta va ni ndhuma leyinene. Nakone, swi ta ku pfuna ku tama u tizra ku dzringana nkama wa ku leha. Xihondzro Xa Ku Zrindzra 12/2023 p. 27 §§ 12-13

A Bibeleni xiga lexi liki “siku dzra Yehovha” xi tlhamuxela nkama lowu Yehovha a taka yavanyisa valala vake ni ku huluxa vhanu vake. Leswi swa ke swi yentxeka a nkameni lowu khalutiki. (Eza. 13:1, 6; Ezek. 13:5; Tsef. 1:8) A masikwini yezru a “siku dzra Yehovha” dzri ta sungula loko vazrangeli va politika va ta hlasela Babilona lwenkulu nakone dzri ta ya gama hi yimpi ya Armagedoni. Akuva hi huluka ka “siku” ledzri, hi fanela ku tilulamisela na ke he swoswi. Yesu a dondzrise leswaku hi fanela ku tsrhama na hi lulamele nhlomulo lowukulu. Leswi tlhamuxelaka leswaku i ntxhumu lowu hi fanelaka ku tama hi wu yentxa. (Mat. 24:21; Luk. 12:40) Ka papela dzra ku sungula ledzri mupostola Pawulo a dzri tsraleliki Vatesalonika, a tizrise swikombiso swinyingi akuva a pfuna vakriste ku tsrhama na va lulamele siku ledzrikulu dzra wuyavanyisi bya Yehovha. Pawulo a a swi tiva leswaku a siku dzra Yehovha a dzri nge ti tlhasa hi nkama luwani. (2 Tes. 2:1-3) Nambitanu, a kutxe vamakwavu ku tsrhama na va lulamele siku ledzro swanga hi loko dzri li kusuhi. Xihondzro Xa Ku Zrindzra 06/2023 p. 8 §§ 1-2

A ku heleni ka lembe dzra 1970 ku sungule ku yakiwa predu ledzri a dzri ni 60 wa maandari a doropeni dzra Tóquio a Japão. Vhanu a va lavisa muyaku luwani na va tala hi ku hlamala. A va tivutisa leswaku a muyaku luwani a wu ta swi kota ku tiyisela ka ku tsrekatsreka ka misava loku a ku tolovela ku yentxeka ka doropa ledzriyani. Xana a xi li xini xihundla xa mayakela? A vayaki va kunguhate muyaku lowu a wu ta tiya kambe hi hala tlhelo swi koteka kuva wu tiyisela loko ku va ni ku tsrekatsreka ka misava. Vakriste va fana ni predu ledzri dzra ku leha. Hi ndlela yini? A mukriste a fanela ku dzringanisela a makazri ka ku yima a tiya ni ku va lwa nabyaliki. A fanela ku yima a nga tsrekatsreki loko a yimelela ni ku yingiseta milawu ni minsinya ya milawu ya Yehovha. Yene a “lulamela ku yingiseta” ni kuva a nga pfumeleli ntxhumu xi mu yentxa a txintxa mavonela. Hi tlhelo dzrin’wana a fanela ku tiyimisela ku “yanakanyela” kumbe ku nabyala, nkama wini ni wini lowu swi vilelekaka. (Yak. 3:17) Mukriste lweyi a tikazratelaka ku dzringanisela a nga te levisa kambe hi tlhelo dzrin’wana a nga ti pfumelela xin’wana ni xin’wana. Xihondzro Xa Ku Zrindzra 07/2023 p. 14 §§ 1-2

Sathana a mu dzringile akuva a tsrhika ku yingiseta Yehovha. (Mat. 4:1-11) Sathana a a tiyimisele ku yentxa leswaku Yesu a doha akuva a nga ha swi koti ku hakela xitizrulo. Ka wutizreli byake bya lani misaveni, Yesu a khalute hi ka swiyimu swin’wana swa ku kazrata. Valala vake va mu xanisile nakone va zame ku mu dlaya. (Luk. 4:28, 29; 13:31) Handle ka leswo, swi djule kuva a lavisana ni ku kala ku hetiseka ka vadondzrisiwa vake. (Mar. 9:33, 34) Loko a yavanyisiwile, Yesu a biwile a tlhela a zrukiwa. Hi wugamu a dlayiwe hi ndlela ya tihanyi ni ya ku vavisa ngopfu swinene. (Heb. 12:1-3) Swi djule kuva a tiyiselela mindzringo ya wugamu a wuton’wini byake wuswake na a nga sizreleliwi hi Yehovha. (Mat. 27:46) Handle ka ku ganaganeka Yesu a xaniseke ngopfu, akuva a nyikela wutomi byake hi nkonta yezru. Loko hi yanakanyisisa hi ku tikazrata hinkwaku loku Yesu a ku yentxiki hi mhaka yezru, hi ya hi mu zrandzra ngopfu swinene. Xihondzro Xa Ku Zrindzra 01/2024 pp. 10-11 §§ 7-9

Ku lehisa mbilu swi hi pfuna ku va ni wuxaka lebyinene ni van’wana. Swi tlhela swi hi pfuna ku yingiseta ha hombe nkama lowu van’wana va vulavulaka. (Yak. 1:19) Handle ka leswo, ku lehisa mbilu ku hi pfuna ku va ni ku zrula ni van’wana. Loko hi lehisa mbilu nambi loko ku ni leswi swi hi kazrataka, a hi nge ti yangula hi ndlela ya mahlundzru kumbe ku hlaya mintxhumu leyi nga vavisaka van’wana, nambi loko van’wana va zama ku hi khunguvanyisa a hi nge ti yentxa ntxhumu hi ku hlundzruka. A matsrhan’wini ya kuva hi dzringisa ku tidzrihisela, hi ta ya ‘mahlweni hi byatsrhana nakone hi dzrivalelana hi ku ntsrhunxeka’. (Kol. 3:12, 13) A ku lehisa mbilu ku nga tlhela ku hi pfuna loko hi djula ku teka swiboho. A matsrhan’wini ya ku yentxa mintxhumu hi magugu kumbe na hi nga pimisanga, hi fanela ku tinyika nkama wa ku yanakanyisisa hi tindlela leti hi nga na tone akuva hi ta teka xiboho lexinene. Hi xikombiso, loko hi le ku djuleteleni ka ntizro hi nga ha hetelela hi pfumela wun’wana ni wun’wana. Kambe loko hi li vhanu lava lehisaka mbilu hi ta yanakanyisa hi leswaku swi ta wu khumbisa kuyini ndangu wezru ni wuxaka byezru na Yehovha. Loko hi li vhanu va ku lehisa mbilu hi ta swi kota ku teka swiboho leswinene. Xihondzro Xa Ku Zrindzra 08/2023 p. 22 §§ 8-9

Loko u hela ntamu hi kola ka ku kala ku hetiseka kwaku, yanakanyisisa hi xidumbiso lexi u xi yentxeliki Yehovha nkama lowu u nga tinyiketela kwake, swi ta ku pfuna ku tama u tiyimisela ku lwisana ni mindzringo. Hi ndlela yini? Loko u tinyiketela ka Yehovha, u va na u tiyala. Leswi hlayaka leswaku u nga ti pfumelela ntxhumu ni wun’we lowu nga ha khunguvanyisaka Yehovha. (Mat. 16:24) Xileswo, loko u lavisana ni ndzringo a swi nga ti djula u heta nkama wunyingi na u yanakanya hi leswi u taka swi yentxa. Hikusa u ta va u swi tiva leswaku u fanela ku yentxa yini, ku nga ku tama u dumbeka ka Yehovha. U ta tiyimisela ku tama u nyonxisa Yehovha. Hi ku yentxa leswo, u ta va na u fana na Yobe. Nambileswi a a lavisana ni swikazratu swinyingi, yene a te: ‘Ni nga ka ni nga suki ku lulameni kwanga!’—Yb. 27:5, BX. Xihondzro Xa Ku Zrindzra 03/2024 p. 9 §§ 6-7

Yehovha i “Xikwembu Nkulukumba wa lizrandzru”! (2 Kor. 13:11) Yene a zron’weka ha hine hi ku kongoma. Ha tiyiseka leswaku ha ‘tsrandzreliwa makazri hi lizrezre’. (Amaps. 32:10) Loko hi yanakanyisisa hi ndlela leyi Yehovha a hi zrandzraka ha yone, a ya a va wa ha kakunene kwezru nakone hi titwa hi li kusuhi na yene. Hi nga tsrhindzrekela kwake hi xikhongoto na hi nga txhavi ntxhumu hi tlhela hi mu byela hi ndlela leyi hi dzri vilelaka ha yone lizrandzru dzrake. Hi nga mu byela hinkwaswu leswi swi hi kazrataka, na hi tiyiseka leswaku a ta hi pfuna. (Amaps. 145:18, 19) Ku fana ni leswi a ndzrilo wu hi kufumetaka hi siku dzra xizrami, a lizrandzru dzra Yehovha na dzrone dzra hi kufumeta. A lidzrandzru dzra Yehovha dzri ni ntamu swinene. Xileswo, yamukela lizrandzru dzra ku kufumela dzra Yehovha a wuton’wini byaku. Ingiki hinkwezru hi nga tlangela lizrandzru dzrake hi ku hlaya mazrito lawa: ‘Ndzri zrandzra Yehovha’!—Amaps. 116:1. Xihondzro Xa Ku Zrindzra 01/2024 p. 31 §§ 19-20

Yesu a nge byela vhanu leswaku vito dzra Xikwembu Nkulukumba i Yehovha ntsena. A Vayuda lava Yesu a va dondzrisiki a va dzri tiva vito dzra Xikwembu Nkulukumba, kambe Yesu a ve wa ku sungula “lweyi a mu tlhamuxelaka”. (Yoh. 1:17, 18) Hi xikombiso, matsralwa ya Xiheberu a ma hlaya leswaku Yehovha a ni timpswalu ni ntwelawusiwana. (Eks. 34:5-7) Yesu a swi beke livaleni leswo ka xikombiso xa n’wana lweyi a sukiki kaya. Loko hi dondzra hi kuma leswaku papayi muni a vone n’wanake “na a ha li kule” kutani a tsrutsruma a ya tlhangana na yene a mu xingazra, nakone a mu dzrivalela hi ku ntsrhunxeka. Kutani leswi swi swi beka livaleni leswaku Yehovha a ni ntwelawusiwana nakone awa dzrivalela. (Luk. 15:11-32) Yesu a hi kombe ndlela leyi Papayi wake a tsrhamisisiki xiswone. Xihondzro Xa Ku Zrindzra 02/2024 p. 10 §§ 8-9

Yehovha awa hi txhavelela ni ku hi nyika ntamu loko hi li ndzreni ka swikazratu. Xana hi nga mu yetiselisa kuyini Yehovha hi va hi kombisa ntwelawusiwana ni ku txhavelela van’wana? Yin’we ya tindlela i kuva hi txutxela matsrhamela lawa ma taka hi pfuna ku txhavelela van’wana. He wani man’we ya matsrhamela wolawo?I yini lexi taka hi pfuna kuva siku dzrin’wana ni dzrin’wana hi tama hi “txhavelela” vambeni ni ku va zrandzra? (1 Tes. 4:18) Hi fanela ku txutxela man’we ya matsrhamela lawa: Ku twela vambeni, lizrandzru dzra wumakwezru ni wunene. (Kol. 3:12; 1 Pet. 3:8) Xana matsrhamela lawa ma ta hi pfuna hi ndlela yini? Loko hi kombisa ntwelawusiwana ka vamakwezru hi tlhela hi zron’weka hakunene, hi ta va ni ku navela lokukulu ka ku va txhavelela loko va kumana ni swikazratu. Hi lani Yesu a hlayiki ha kone a ku: “A nomu wu vulavula leswi taliki mbilwini. Mhunu lwenene a humesa mintxhumu leyinene a wukosini byake.” (Mat. 12:34, 35) Ku txhavelela vamakwezru lava lavisanaka ni swiyimu swa ku kazrata i ndlela ya lisima leyi kombisaka leswaku ha va zrandzra. Xihondzro Xa Ku Zrindzra 11/2023 p. 10 §§ 10-11

Loko hi djula ku twisisa wuprofeta bya Bibele hi fanela ku djuletela mpfunu. Yanakanya hi xiyimu lexi: A hi nge u yendzrela ka mbangu lowu u kalaka u nga wu tivi kambe u ni munghanu lweyi a wu tivaka ha hombe mbangu lowo, yene a swi tiva ha hombe leswaku mi kwini ni leswaku loko mi tizrisa ndlela ya kukazri mi ta ya humelela kwini. Handle ka ku ganaganeka, munghanu lweyo a nga yentxa leswaku liyendzro dzraku dzri nabyala. Hi ndlela leyi fanaka, Yehovha a fana ni munghanu lweyo. A swi tiva ha hombe leswaku hi kwini ni leswaku ku ta yentxeka yini a nkameni lowu taka. Kutani loko hi djula ku byi twisisa ha hombe wuprofeta bya Bibele hi fanela ku va vhanu lava titsrongahataka ni ku kombela mpfunu wa Yehovha. (Dan. 2:28; 2 Pet. 1:19, 20) Swanga hi leswi vapswali va navelelaka vanavu leswinene, Yehovha na yene a hi navelela wumundzruku lebyinene. (Yer. 29:11) Ku hambana ni vapswali va nyama, Yehovha a swi tiva hi ku helela leswi taka yentxeka a nkameni lowu taka nakone awa tiyiseka. Hi leswi yentxiki Yehovha a tsrala wuprofeta a Bibeleni. Hi ndlela leyo, na hine hi nga kota ku tiva mintxhumu ya lisima leyi taka yentxeka a nkameni lowu taka.—Eza. 46:10. Xihondzro Xa Ku Zrindzra 08/2023 p. 8 §§ 3-4