Julhu

Ka hinkwaswu leswi Yesu a swi yentxiki ku patsra ni mahlolana, a a yetisela hi ku helela mayanakanyela ni matitwela ya Papayi wake. (Yoh. 14:9) Hi nga dondzra yini ka mahlolana ya Yesu? Loko a li lani misaveni a kombise ndlela leyi a a va zrandzra ha yone vhanu hi ku va yentxela mahlolana akuva a va phula ka swikazratu swavu. Ka xiyentxakalu xa kukazri, vavanuna vabidzri lava fiki matihlo, va kombele Yesu akuva a va pfuna. (Mat. 20:30-34) Yesu hi “timpswalu” a dahe vavanuna lavo. Ka ndzrimana leyi, a zritu dzra Xigrika ledzri ndzruluteliwiki dzri va “timpswalu” dzri kombisa matitwela ya le ndzreni ku nga ku khumbeka hi leswi a swi vonaka. Ku va ni timpswalu, a nga xikombiso xa lizrandzru, ku susumetele Yesu ku phamela lava nga ni ndlala ni ku daha wanuna lweyi a a ni nhlokonho. (Mat. 15:32; Mar. 1:41) Hi nga tiyiseka leswaku Yehovha, Xikwembu Nkulukumba wa ‘lizrezre’ ni n’wanake, Yesu, va hi zrandzra ngopfu nakone va vaviseka loko va hi vona hi hlupheka. (Luk. 1:78; 1 Pet. 5:7) A hi na ku ganaganeka ka leswaku Yehovha kun’we na Yesu va swi djula ngopfu ku helisa swikazratu leswi vangelaka vhanu ku hlupheka! Xihondzro Xa Ku Zrindzra 04/2023 p. 3 §§ 4-5

Hi fanela ku yentxa hinkwaswu leswi hi nga swi kotaka akuva hi tingawula mayanakanyela ya misava leyi ya Sathana. Loko hi dondzra Bibele hi va na hi tata mimpimiso yezru hi mintxhumu leyi basiki ni leyinene. Ku ya mintlhanganwini ni ku zrezreni swi ta hi pfuna ku sizrelela miyanakanyu yezru. Lanu ke, Yehovha a ta hetisisa xidumbiso xake xa kuva a nga pfumeleli leswaku hi weliwa hi ndzringo lowu hi nga tiki wu kota. (1 Kor. 10:12, 13) Ka masiku lawa ya wunghanu lawa xiyimu xi yaka xi bindzra, mun’wana ni mun’wana wezru a fanela ku tikazratela ku khongota akuva a tama a dumbeka ka Yehovha. Yehovha a djula leswaku hi ‘txhulula timbilu tezru a mahlweni kwakwe’ hi xikhongoto. (Amaps. 62:8) Nakone tlangela ni ku dzrumisa Yehovha hi hinkwaswu leswi a ku yentxelaka swone, mu kombele leswaku a ku nyika xixixi xa ku zrezra. Minkama hinkwayu khongota u mu kombela a ku pfuna akuva u lavisana ni swikazratu ni ku tiyiselela mindzringo leyi yi nga ha humelelaka. U nga pfumeleli mhunu kumbe ntxhumu ni wun’we wu ku sivela ku khongota ka Yehovha nkama ni nkama. Xihondzro Xa Ku Zrindzra 05/2023 p. 7 §§ 17-18

Ha yini hi hlalela mintlhanganu? Xivangelo nkulu hi leswaku hi djula ku dzrumisa Yehovha. (Amaps. 26:12; 111:1) Xivangelo xin’wana hi leswaku hi djula ku kutxanana ka xiyimu lexi xa ku kazrata lexi hi hanyaka ku xone. (1 Tes. 5:11) Loko hi tlakula voko hi nyikela nhlamulo hi va na hi yentxa mintxhumu leyibidzri. Kambe nkama lowu hi djulaka ku hlamula, hi nga ha va ni swikazratu. Hi xikombiso, hi nga ha txhava ku hlamula, kumbe hi nga ha djula ku hlamula hi makhambi manyingi kambe hi nga nyiketiwi hi lani a hi djula ha kone. I yini lexi nga hi pfunaka ku lwisana ni swikazratu leswi? Mupostola Pawulo a hlaye leswaku a va fanela ku tikazratela ku “tiyisanana”. Kutani, loko hi xiya leswaku tinhlamulo tezru leti nabyaliki ta va kutxa vamakwezru, swi hi yentxa hi navela ku tama hi hlamula. Nambiloko hi nga kumi mukhandlu wa ku hlamula hi lani a hi navela ha kone, ha nyonxa hi ku va vamakwezru van’wana va kume mukhandlu wa ku hlamula.—1 Pet. 3:8. Xihondzro Xa Ku Zrindzra 04/2023 p. 20 §§ 1-3

Xitiviso xa hosi! Vayuda hinkwavu lava nga swikazrawa a Babilona ku dzringana 70 wa malembe kutani va nga tlhelela a tikweni dzra Israyele. (Ezr. 1:2-4) Swi le livaleni leswaku i Yehovha lweyi a yentxiki leswaku leswo swi koteka hikusa Vababilona a va nga na xihena xa ku ntsrhunxa swikazrawa. (Eza. 14:4, 17) Xileswo, hosi leyimpshwa yi pfumelele leswaku Vayuda va tlhelela. A muyuda mun’wana ni mun’wana ngopfungopfu tinhloko ta mindangu a a fanela ku teka xiboho mayelanu ni leswaku va ta huma a Babilona kumbe va ta tama va tsrhama kone. A swi nga nabyali ku teka xiboho lexo. Vayuda vanyingi a va duhwalile xileswo a swi nge ti va nabyalela ku teka liyendzro ledzro. Hi tlhelo dzrin’wana, vanyingi va pswaleliwe a Babilona. Ledzri a ku li dzrone tiko ledzri a va dzri tiva ntsena. Kwavu Israyele a ku li tiko dzra vapapayi ni vavhovho vavu. Kasi Vayuda van’wana a va ganyile a Babilona. Xileswo, a swi nga ti va nabyalela ku siya tiyindlu tavu ta ku tsrhamiseka ni mabindzru yavu kutani va ya sungula wutomi lebyimpshwa a mbangwini lowu va kalaka va nga wu tivi. Xihondzro Xa Ku Zrindzra 05/2023 p. 14 §§ 1-2

A Zritu dzra Xikwembu Nkulukumba dzri hi kutxa ku tama hi kombisa ku tiyisela, wunene ni lizrandzru. A buku dzra Luka 21:19 dzri li: “Loko mi tiyisela mi ta huluxa wutomi byenu.” Vakolosa 3:12 yi li: “Yambalani . . . wunene.” 1 Vatesalonika 4:9, 10 yi li: “Hikusa Xikwembu Nkulukumba a mi dondzrisile ku zrandzranana. . . . Kambe vamakwezru, hi mi tsratsriya leswaku mi ya mahlweni mi swi yentxa hi lani ku yengeselekiki.” Mazritu lawo ma tsraleliwe vadondzrisiwa lava kutani a va kombisa ku tiyisela, wunene ni lizrandzru. Nambitanu a va fanela ku ya mahlweni va kombisa matsrhamela lawo. Na hine hi fanela ku yentxa leswi fanaka. Akuva u pfuneka, vona ndlela leyi vakriste va ku sungula va ma kombisiki ha yone matsrhamela lawo. U ta tlhela u vona ndlela leyi u nga va yetiselaka ha yone vadondzrisiwa lavo, hi ndlela leyo, kombisa leswaku u lulamile akuva u lavisana ni nhlomulo lowukulu. Kutani loko nhlomulo lowukulu wu sungula, u tava na u dondzrile ndlela leyi u nga tiyiselaka ha yone nakone u tava na u tiyimiselile ku tiyisela. Xihondzro Xa Ku Zrindzra 07/2023 p. 3 §§ 4, 8

Swi nge na mhaka leswaku hi vatotiwa kumbe hi va “tihamba tin’wana”, hinkwezru hi fanela ku tama hi famba ka ‘ndlela ya vuxwengi’. Leswo swi ta hi pfuna ku tama hi gandzrela Yehovha swoswi ni nkameni lowu taka loko hi ta yamukela matovoko lawa Mfumu wa Xikwembu Nkulukumba wu taka hi tisela wone. (Yoh. 10:16) Ku sukela hi lembe dzra 1919 N.Y. makhulukhulu ya vhanu, vavanuna, vavasati ni vatsrongwana va huma ka Babilona Lwenkulu kumbe ka wugandzreli bya madzrimi kutani va famba ka xitaratu xa ku fanekisela. Yehovha a dumbise ku helisa ntxhumu wun’wana ni wun’wana lowu a wu ta sivela Vayuda kuva va huma a Babilona. (Eza. 57:14) Xana ku nga va ku humelele ntxhumu lowu fanaka a masikwini yezru ka ‘ndlela ya vuxwengi’? Ina. Malembe manyingi na ku ngi si na tlhasa lembe dzra 1919, Yehovha a tizrise vavanuna va ku dumbeka akuva a yentxa leswaku swi koteka leswaku van’wana va huma a Babilona Lwenkulu. (Dzringanisa na Ezaya 40:3.) Vavanuna lava va lulamisele ndlela akuva vhanu vanyingi va timbilu letinene va huma ka wugandzreli bya madzrimi akuva va tipatsra ni vhanu va Yehovha leswaku va gandzrela Yehovha. Xihondzro Xa Ku Zrindzra 05/2023 pp. 15-16 §§ 8-9

Yehovha a nga djuli hi yentxa ntxhumu hi ku sindzriseka, kambe hi fanela ku swi yentxa hi ku swi zrandzra. (2 Kor. 9:7) Kutani loko u nga na ku navela ka ku tlhaselela kungu dzra kukazri, xana u fanela ku tikazrata akuva u dzri tlhaselela? Vona xikombiso xa Pawulo. A li: “Ni ba mizri wanga ni wu kongomisa swanga xikazrawa.” (1 Kor. 9:25-27) Pawulo a a tikazratela ku yentxa leswinene nambi loko minkama yin’wana a nga na nsusumeto wa ku yentxa leswo. Xana Yehovha a a swi vonisa kuyini leswi Pawulo a a swi yentxa? A nyonxe ngopfu hi wutizreli bya Pawulo! Nakone a tovokise ku tikazrata kwake. (2 Tim. 4:7, 8) Hi ndlela leyi fanaka, Yehovha a nyonxa ngopfu swinene loko a hi vona hi tikazratela ku tlhaselela kungu dzra kukazri nambiloko hi nge na nsusumeto wa ku yentxa leswo. Awa nyonxa hikusa awa swi tiva leswaku hi tikazratela ku yentxa leswo ku nge hi leswaku ho swi zrandzra kambe hi kola ka lizrandzru ledzri hi nga na dzrone ha yene. Yehovha a ta tovokisa ku tikazrata kwezru hi lani a yentxiki ha kone ka Pawulo. (Amaps. 126:5) Kutani loko hi xiya leswaku Yehovha awa hi tovokisa hi ya hi va ni nsusumeto lowunene. Xihondzro Xa Ku Zrindzra 05/2023 p. 29 §§ 9-10

Mupostola Pawulo a va fananise ni vhanu lava yetleliki. Vone a va wu voni nkama loko wu khaluta nakone a va swi voni leswi yentxekaka. Xileswo, va tama va nga yentxi ntxhumu hikusa a va swi xiyi loko ku yentxeka ntxhumu wa kukazri wa lisima. Vhanu vanyingi namunhla va yetlelile hi tlhelo dzra moya. (Rom. 11:8) Vone a va kholwi leswaku hi hanya ka masiku ya wugamu ni leswaku a nhlomulu lowukulu ku nge khale wu ta tlhasa. (2 Pet. 3:3, 4) Kambe kwezru i swa lisima kuva siku dzrin’wana ni dzrin’wana hi tsrhama na hi pfukile. (1 Tes. 5:6) Nambitanu, hi fanela ku tama hi tsrhama na hi tiyile. Ha yini? Leswo i swa lisima akuva hi nga patsreki ka timhaka ta politika ni ka mpfilumpfilu ya misava leyi. Loko siku dzra Yehovha dzri ya dzri tsrhindzrekela hi ta ya hi kutxeteliwa ku yima ni tlhelo dzra kukazri ka timhaka leti. Kambe leswo a swi fanelanga swi hi kazrata ngopfu. A moya wa Yehovha wu ta hi pfuna kuva hi teka swiboho swa wutlhazri a mhakeni leyo.—Luk. 12:11, 12. Xihondzro Xa Ku Zrindzra 06/2023 p. 10 §§ 6-7

Loko u twa vito dzra Samisoni i yini leswi ku telaka miyanakanywini? Kumbexana u dzrimuka leswaku a a li wanuna lweyi a a ni ntamu ngopfu swinene, lowo i ntiyiso. Nakone i ntiyiso leswaku a teke swiboho leswi nga liki swinene nakone a tsrhovele ku vava hikola ka leswo. Nambitanu, Yehovha a xiyisise mintxhumu leyinene leyi Samisoni a yi yentxiki. Nakone Xikwembu Nkulukumba a tsrale xikombiso xa Samisoni ka Bibele akuva xi hi pfuna. Yehovha a tizrise Samisoni akuva a yentxa mintxhumu ya ku hlamalisa ni kuva a tlhela a pfuna Vaisrayele. Ntsrhaku ka malembe manyingi na Samisoni a file, Yehovha a huhutele mupostola Pawulo akuva a patsra vito dzra Samisoni ka nxaxamelo wa mavito ya vhanu lava kombisiki lipfumelo ledzri tlulaka ledzri tolovelekiki. (Heb. 11:32-34) Xikombiso xa Samisoni xi nga hi pfuna, a dumbe Yehovha nambiloko a lavisana ni swiyimu swa ku kazrataka. Xikombiso xa Samisoni xi nga hi tiyisa hi nga dondzra swin’wana ka xikombiso xake. Xihondzro Xa Ku Zrindzra 09/2023 p. 2 §§ 1-2

Hi nga tiyisa ku tiyisela kwezru hi kuva minkama hinkwayu hi khongota ka Yehovha ni kuva hi mu byela hinkwaswu leswi hi kazrataka. (1 Tes. 5:17) Swi nga yentxeka u nga lavisani ni xikazratu lexikulu swoswi, kambe xana u tolovela ku khongota ka Yehovha u kombela mpfunu loko u titwa na u khunguvanyekile, u hlundzrukile kumbe u nga xi tivi xa ku xi yentxa. Loko u tolovela ku khongota ka Yehovha loko u kumana ni swikazratu leswitsrongo swa siku ni siku, handle ka ku ganaganeka u ta swi kota ku khongota u kombela mpfunu loko u kumana ni swikazratu leswikulu a nkameni lowu taka. U ta tiyiseka leswaku minkama hinkwayu Yehovha a yi tiva ha hombe ndlela ya ku ku pfuna hi leswi u swi vileleka. U nga tiyiseka leswaku Yehovha awa wu tiva nkama lowu u wu vilelaka ha wone mpfunu ni ndlela ya ku ku pfuna. (Amaps. 27:1, 3) Loko hi kota ku tiyiselela swikazratu na ke he swoswi, swi ta hi nabyalela ku tiyisela hi nkama wa nhlomulo lowukulu. (Rom. 5:3) Hi swi tivisa kuyini? Vamakwezru vanyingi va gungule leswaku loko va kumana ni ndzringo lowu nga ha dzringaka lipfumelo va titwa na va tiyile akuva va kota ku lavisana ni mindzringo yin’wana leyi nga ha taka. Loko va kumana ni ndzringo va va va tiyisela, lipfumelo dzravu dzra leswaku Yehovha minkama hinkwayu a lulamele ku va pfuna dzri ya dzri yengeseleka. Kutani a lipfumelo dzri va pfuna kuva va lavisana ni mindzringo leyi ya ha taka.—Yak. 1:2-4. Xihondzro Xa Ku Zrindzra 07/2023 p. 3 §§ 7-8

A ku titsrongohata ni wunene bya Yehovha swi yentxa leswaku a va lweyi a yanakanyelaka. Hi xikombiso, loko Yehovha a djule ku helisa vhanu va ku biha a Sodoma a kombise leswaku awa titsrongohata. Hi ku tizrisa tintsrumi take, Yehovha a kombele leswaku Loti a tsrutsrumela tinhaveni kambe leswi a a txhava a nga pfumelanga ku ya ka mbangu wolowo. Kutani a kombele leswaku yene ni ndangu wake va tsrutsrumela ka muganga lowu vitaniwaka Zowar, xidoropana xa xitsrongo lexi Yehovha a a tiyimisele ku xi helisa. Yehovha a a tava a swi kotile ku byela Loti leswaku a landzrelelisisa minkongomiso yake, kambe a matsrhan’wini ya leswo, a xi yingelile xikombelo xa Loti nakone a bohe kuva a nga xi helisi xidoropana lexiyani. (Gen. 19:18-22) Hi ku famba ka malembe, Yehovha a kombise ntwelawusiwana ka vhanu lava a va tsrhama a doropeni dzra Ninivha. A zrumele muprofeta Yonasi akuva a ya tivisa vhanu va Ninivha leswaku vone kun’we ni doropa dzravu a va ta helisiwa. Kambe loko vhanu va Ninivha va tisolile, Yehovha a va twele wusiwana a va a nga ha dzri helisi doropa dzravu.—Yon. 3:1, 10; 4:10, 11. Xihondzro Xa Ku Zrindzra 07/2023 p. 21 § 5

Hi nga dondzra yini ka xikombiso xa Yehowaxi? Nsinya lowu timitsru ta wone ti kalaka ti nga tiyanga wu djula ku seketeliwa. Loko wo kala wu nga seketeliwi a moya wu nga ha wu ba wu wa. Ku yentxeke leswi fanaka hi Yehowaxi. A a seketeliwa hi Yehoyada, kambe ntsrhaku ka loko Yehoyada a file a kumane ni nkutxetelo wa madukwa, a hetelele a wa hi tlhelo dzra moya kutani a nga ha dumbeki ka Yehovha. Mhaka leyi yi hi komba leswaku a hi fanelanga hi yingiseta Yehovha hi leswi maxaka yezru kumbe vamakwezru a bandleni va hi bekelaka xikombiso va tlhela va hi kutxa ku yentxa leswo. Loko hi djula ku va ni wuxaka lebyi tiyiki na Yehovha hi fanela ku tiyisa lizrandzru ni xitxhavu leswi hi nga na swone ha Yene hi ku va hi dondzra Bibele, hi yanakanyisisa hi tlhela hi khongota. (Yer. 17:7, 8; Kol. 2:6, 7) Ku hlaya ntiyiso, leswi Yehovha a hi kombelaka ku va hi swi yentxa a swi kazrati. Leswi a djulaka ku va hi swi yentxa swi katsrakanyiwe ka Eklesiasta 12:13, leyi yi liki: ‘Txhava Xikwembu Nkulukumba, u bekisa swileleto swakwe; hikusa hi yone mfanelo ya mhunu hinkwayu.’ Loko hi txhava Yehovha hi ta swi kota ku lavisana ni mindzringo kumbe swikazratu leswi hi nga ha kumanaka na swone nkameni lowu taka. A ku na mhunu kumbe ntxhumu lowu wu nga honisaka wuxaka byezru na Yehovha. Xihondzro Xa Ku Zrindzra 06/2023 p. 19 §§ 17-19

Loko ndzrimana 5 yi sungula yi li: “Lweyi a tsrhamiki xiluvelweni a ku.” (Mpful. 21:5a) Mazritu lawa i man’we ka makhambi mazrazru lani Yehovha a khaneliki hi ku kongoma ka buku dzra Mpfuletelo. A ku vanga ntsrumi kumbe Yesu Kriste lweyi a nyikeliki xitiyisekiso lexi, kambe, ku ve Yehovha hi ku kongoma! Leswo swi hi yentxa hi tiyiseka hi ku helela ka mazritu lama landzrelaka ya ndzrimana 5. Ha yini? Hikusa Yehovha ‘a nga hembi’. (Tit. 1:2) Kutani hi nga kholwa ka mazritu ya Mpfuletelo 21:5, 6. A hi kambisiseni zritu ledzri liki “Lavisa!” A zritu dzra xigriki ledzri ndzruluteliwiki dzri va “lavisa!” dzri tizrisiwa makhambi manyingi ka buku dzra Mpfuletelo. I yini leswi Xikwembu Nkulukumba a gamiki a swi hlaya? A te: “Ni yentxa mintxhumu hinkwayu yi va leyimpshwa.” Yehovha a ta ku yentxa ku txintxa koloko a nkameni lowu taka, nakone awa tiyiseka leswaku a ta swi hetisisa swidumbiso swake, xileswo a vulavula swanga hi loko swi le ku yentxekeni.—Eza. 46:10. Xihondzro Xa Ku Zrindzra 11/2023 pp. 3-4 §§ 7-8

Mupostola Petro a a ha tama a lwisana ni ku tsrana ka kukazri loku a a li na kone. Vona swikombiso swi nge swingani. Loko Yesu a hlaye leswaku a a fanela ku xanisiwa ni ku tlhela a dlayiwa akuva a hetisisa wuprofeta bya Bibele, Petro a mu kawukile ni ku mu byela leswaku leswo a swi nge ti yentxeka. (Mar. 8:31-33) Nakone makhambi man’wana Petro ni vapostola van’wana a va holovisana hi leswaku hi mani lwenkulu kwavu. (Mar. 9:33, 34) Ka wusiku bya wugamu na Yesu a nga si na dlayiwa, Petro a tsreme ndleve ya wanuna wa kukazri. (Yoh. 18:10) Nakone ka wusiku byolebyo, Petro a khomiwe hi ku txhava swi za swi ku makhambi mazrazru na a yala leswaku i munghanu wa Yesu. (Mar. 14:66-72) Leswo swi mu yentxe a dzrila hi xiviti. Yesu a nga mu helelanga mbilu mupostola wake wa ku zrandzreka. Ntsrhaku ka loko Yesu a pfuxiwile, a nyike Petro mukhandlu wa ku kombisa leswaku a ha mu zrandzra. A mu nyike xiyavelo leximpshwa xa kuva a mu tizrela hi ku titsrongahata ni ku va mubyisi wa tihamba take. (Yoh. 21:15-17) Petro a yentxe hi lani Yesu a mu byeliki ha kone. Petro a a li kone a Yerusalema hi siku dzra Pentekoxta nakone a ve mun’we wa lava totiwiki hi moya lowa ku xwenga ka ntlawa wa ku sungula. Xihondzro Xa Ku Zrindzra 09/2023 p. 22 §§ 6-7

Mupostola Petro a byele vakulu a ku: “Byisani ntlhambi wa Xikwembu Nkulukumba.” (1 Pet. 5:1-4) Loko u li nkulu wa bandla, ha swi tiva leswaku wa va zrandzra vamakwezru nakone u djula ku va bekisa, kambe minkama yin’wana u nga ha khomeka ngopfu kumbe u titwa na wu kazralile lakakuva u vona na u nge ti swi kota ku hetisisa xiyavelo xaku. Loko swi li hi ndlela leyo, i yini u nga swi yentxaka? Byela Yehovha ndlela leyi u titwaka ha yone. Petro a tsrale leswi: “Loko mhunu wa kukazri a tizrela, a a tiseketeli ka ntamu lowu Xikwembu Nkulukumba a wu nyikelaka.” (1 Pet. 4:11) Swi nga yentxeka vamakwezru va langusana ni swikazratu swa ku a swi nge kotiki kuva swi lulamisiwa hi ku helela na ha ha hanya ka xiyimu lexi xa misava, kambe dzrimuka leswaku a “mubyisi lwenkulu”, Yesu Kriste, a nga va pfuna ngopfu ku tlula wene n’winyi. Leswo a nga swi yentxa ka misava leyi hi hanyaka ka yone namunhla ni le misaveni leyimpshwa. Lexi Yehovha a xi djulaka ngopfu ka vakulu i kuva va zrandzra vamakwezru ntsena, va va byisa ni kuva va va “xikombiso ka ntlhambi”. Xihondzro Xa Ku Zrindzra 09/2023 pp. 29-30 §§ 13-14

Hi fanela ku tivonela ku yanakanya ku fana ni vhanu va misava. Loko hi yanakanya ku fana ni vhanu lava kalaka va nga yi nyiki lisima milawu ya Yehovha hi nga hetelela hi ku wongeka. (1 Kor. 3:19) “A wutlhazri bya misava” minkama yinyingi byi yentxa vhanu va nga mu yingiseti Xikwembu Nkulukumba. Vakriste van’wana a Pergamosi ni Tiyatira a va kutxeteliwa hi vhanu lava a va hanya na vone lava a va tikhoma hi ndlela ya ku biha ni ku gandzrela swifaniso. Yesu a kawuke mabandla wolawu hikusa a ma pfumelela ku tikhoma hi ndlela ya ku biha hi tlhelo dzra tinkuku. (Mpful. 2:14, 20) Namunhla a nkutxetelo wa ku pfumela mayanakanyela ya misava i wukulu. Maxaka yezru ni vhanu lava hi tivaka swi nga ha yentxeka va dzringisa ku hi kholwisa leswaku hi kazratisa mintxhumu ni leswaku a ku na mhaka loko hi pfa hi nga wu yingiseti nawu wa kukazri wa Yehovha. Vone va nga ha hlaya leswaku a swi bihaga ku pfa hi landzra ku navela kwezru ni leswaku a minsinya ya milawu ya Bibele yi khaluteliwe hi nkama. Minkama yin’wana hi nga ha yanakanya leswaku minkongomiso ya Yehovha a yi khanyanga ha hombe. Swi nga yentxeka hi dzringeka ku ‘tlula leswi tsraliwiki’.—1 Kor. 4:6. Xihondzro Xa Ku Zrindzra 07/2023 p. 16 §§ 10-11

Mariya a a vilela ku tiyisiwa akuva a hetisisa xiyavelo lexi Yehovha a mu nyikiki xone. Yanakanya ndlela leyi a kazratekiki ya yone ntsrhaku ka loko ntsrumi Gabriyele yi mu nyike xiyavelo lexiyani xa ku kazrata. Phela Mariya a a nga txhatanga, kambe a a ta va ni nyimba. A a nge na mfambu wa ku wundla vana, kambe a fanela ku wundla n’wana lweyi a a ta va Mesiya. Nakone leswi a a ngi ngi sama a yetlela ni wanuna, a swi ta mu kazratela kuva a tlhamuxela Yosefa lweyi a a tibekisele ku tekana na yene. (Luk. 1:26-33) Xana Mariya a swi kotise kuyini ku hetisisa xiyavelo lexiyani xa ku kazrata? A djuletele mpfunu wa vambeni. Hi xikombiso, a kombele tsrumi liyani akuva yi mu byela leswi yengetelikiki mayelanu ni xiyavelo xake. (Luk. 1:34) Ntsrhakunyana ka leswo, a teke liyendzro a ya “a tikweni dzra tinhava” dzra le Yuda akuva a ya pfuxela xaka dzrake Elizabeti. Liyendzro ledzro dzri mu pfune ngopfu. Elizabeti a kulungele Mariya nakone hi ku huhuteliwa hi moya wa Yehovha a hlaye wuprofeta bya kukazri mayelanu ni n’wana lweyi Mariya a a ta va na yene. (Luk. 1:39-45) Mariya a hlaye leswaku Yehovha “a yentxe mintxhumu leyikulu ngopfu swinene hi voko dzrake”. (Luk. 1:46-51) Yehovha a tizrise Gabriyele na Elizabeti akuva va tiyisa Mariya. Xihondzro Xa Ku Zrindzra 10/2023 pp. 14-15 §§ 10-12

Vakriste va nhlayu leyi hikiwiki, va totiwa hi moya wa ku xwenga nakone hi kola ka leswo va ni wuxaka bya ku hlawuleka na Yehovha. Lava 144.000 va ta tizra swanga vaprista na Yesu a matilweni. (Mpful. 14:1) A mbangu wa ku Xwenga wa tabernakele a wu yimela xiyimu xavu swanga vana va moya lava hlawuliwiki ha Xikwembu Nkulukumba kola misaveni. (Rom. 8:15-17) A mbangu wa ku Xwengisisa wa tabernakele wu yimela matilo, ku nga mbangu lowu Yehovha a tsrhamaka ka wone. “Kortina” ledzri a dzri hambanisa a mbangu wa ku Xwenga ni wa ku Xwengisisa ngopfu a dzri yimela mizri wa Yesu. Na a ha li kola misaveni nakone a ha ni mizri wa nyama a a nge na ku swi kota nu nghena a matilweni ni kuva a va muprista lwenkulu ka tempele dzra moya. Loko a nyikele mizri wake swanga xitlhavelo xa vhanu hinkwavu, Yesu a pfule ndlela akuva vaprista hinkwavu lava totiwiki va kota ku ya hanya matilweni. Ku fana na Yesu, a vatotiwa na vone swi ta djula va tsrhika mizri wavu wa nyama akuva va yamukela a hakelo dzravu a matilweni.—Heb. 10:19, 20; 1 Kor. 15:50. Xihondzro Xa Ku Zrindzra 10/2023 p. 28 § 13

Gidiyoni a hlamule hi ndlela ya ku zrula loko a soliwe hi vavanuna va le Efrayimi. (Abaṭ. 8:1-3) Yene a nga hlundzrukanga. A kombise leswaku a a ni ku titsrongahata loku sukelaka a miyanakanywini hi kuva a yingiseta leswi vavanuna lavayani a va djula ku swi hlaya. Hi ku yentxa leswo, a pfunisile leswaku ku va ni ku zrula. I swinene kuva vakulu va yetisela xikombiso xa Gidiyoni loko va soliwa, hi kuva va yingiseta ha hombe ni ku tlhela va yangula hi ndlela ya ku zrula. (Yak. 3:13) Ku yentxa leswo swi ta pfuna leswaku ku va ni ku zrula a bandleni. Loko a kulungeliwile hi leswi a huluxiki vhanu a mavokweni ya Vamidiyani, Gidiyoni a yise lidzrumu hinkwadzru ka Yehovha. (Abaṭ. 8:22, 23) Xana vakulu va nga xi yetisela hi ndlela yini xikombiso xa Gidiyoni? Va nga yisa lidzrumu ka Yehovha hi kola ka hinkwaswu leswi va swi yentxaka. (1 Kor. 4:6, 7) Hi xikombiso, loko nkulu a kulungeliwa hi kola ka wuswikoti byake bya ku dondzrisa a nga ha tlhamuxela leswaku o kota ku swi yentxa ha hombe ntsena hi leswi a pfuniwaka hi Zritu dzra Xikwembu Nkulukumba kumbe hi leswi a dondzrisiwaka hi nhlengeletanu ya Yehovha. I swinene kuva vakulu va pfa va tikambela akuva va nga kokeli yingiso kwavu. Xihondzro Xa Ku Zrindzra 06/2023 p. 4 §§ 7-8

Loko swikhongoto swezru swi nga hlamuliwi, hi nga ha tivutisa leswi: ‘Xana leswi ni khongotaka ha swone na swi vilela hakunene?’ Minkama yinyingi hi yanakanya leswaku ha swi tiva leswi a nga swinene ku hine, kambe ku hlaya ntiyiso swi nga yentxeka mintxhumu yoleyo hi nga yi vileli. Loko a li leswaku hi khongota hi mhaka ya kukazri leyi yi hi kazrataka, swi nga yentxeka ku ni ndlela ya ku yampswa ya ku tlhantlha xikazratu lexo ku tlula leyi hi yi kombelaka. Nakone swin’wana swa leswi hi swi kombelaka swi nga yentxeka swi nga yelani ni ku zrandzra ka Yehovha. (1 Yoh. 5:14) Dzrimuka xikombiso xa vapswele lava kombeliki kuva Yehovha a pfuna n’wanavu kuva a nga tsrhiki ntiyiso. Lexo a xi tikomba ku li xikombelo lexinene. Kambe Yehovha a nge te sindzrisa ni mun’we kwezru ku va a mu tizrela, a djula leswaku hinkwezru, ku patsra ni vanezru, hi hlawula ku mu tizrela. (Deut. 10:12, 13; 30:19, 20) Xileswo a swi ta yampswa loko a ve khongota ka Yehovha va kombela leswaku a khumba mbilu ya n’wanavu akuva a kota ku zrandzra Yehovha ni kuva munghanu wake.—Amapr. 22:6; Efe. 6:4. Xihondzro Xa Ku Zrindzra 11/2023 p. 21 § 5; p. 23 § 12

Ha yini ku txhavelela van’wana ku li ndlela ya lisima ya ku kombisa lizrandzru dzrezru hi van’wana? Hi ku ya hi ntlhamuxelo wa kukazri wa Bibele, zritu ledzri Pawulo a dzri tizrisiki swanga ku “txhavelela”, dzri tlhamuxela ku “tiyisa mhunu loko a kumana ni mindzringo ya ku kazrata”. Hi ndlela leyo, loko hi txhavelela mupfumelikulozri loko a kumana ni swikazratu hi mu pfuna ku tama a yima ni ku tama a famba a ndleleni ya Xikwembu Nkulukumba. Minkama hinkwayu leyi hi vaka ni vamakwezru a ku dzrileni kwavu hi va na hi kombisa ndlela leyi hi va zrandzraka ha yone. (2 Kor. 7:6, 7, 13) Ku ni ku yelana makazri ka ntwelawusiwana ni ku txhavelela van’wana. Hi ndlela yini? Mhunu lweyi a nga ni ntwelawusiwana a susumeteleka ku txhavelela van’wana ni ku va pfuna loko va kumana ni swikazratu. Leswi liki, ku sungula hi va twelawusiwana ntsrhaku hi va txhavelela. Vona ndlela leyi Pawulo a wu yelanisiki ha yone ntwelawusiwana ni ntxhavelelo lowu Yehovha a hi nyikaka wone. Pawulo a tlhamuxela Yehovha swanga “Papayi lweyi a taliki hi timpswalu nakone a nga Xikwembu Nkulukumba wa ntxhavelelo hinkwawu”.—2 Kor. 1:3. Xihondzro Xa Ku Zrindzra 11/2023 pp. 9-10 §§ 8-10

Hinkwavu lava va nga valandzreli va Yesu va nga ha va ni mahlomulo. Vona xikombiso xa mupostola Pawulo. A hlaye leswi ka vakriste va le Tesalonika: “Nkama lowu a hi li na n’wine, a hi mi byela na swi nga si na yentxeka leswaku hi ta kumana ni mahlomulo, nakone hi swoswo swi yentxekiki.” (1 Tes. 3:4) A tlhele a hlaya leswi ka vakriste va le Korinte: “Vamakwezru, hi djula mi swi tiva leswaku hi kumane ni mahlomulo . . . lakakuva hi nga ha dumbi leswaku hi ta huluka.” (2 Kor. 1:8; 11:23-27) Ni namunhla, vakriste hinkwavu va nga ha kumana ni mahlomulo lama fanaka. (2 Tim. 3:12) Nkama lowu u kombisaka lipfumelo ka Yesu ni ku mu landzrela, vanghanu kumbe maxaka yaku va nga ha ku khoma hi ndlela ya ku biha. Xana ku tiyimisela kwaku ka ku va lwa dumbekiki ku ku vangela swikazratu a ntizrweni? (Heb. 13:18) Xana u ke u xanisiwa hi wuhosi hi kola ka ntizro wa ku zrezra? A swi na mhaka leswaku he wani mahlomulo lawa hi nga ha kumanaka na wone, kambe Pawulo a hlaye leswaku hi fanela ku nyonxa. Xihondzro Xa Ku Zrindzra 12/2023 pp. 10-11 §§ 9-10

Yakobe a tiyisele swikazratu swinyingi. Vana vabidzri va Yakobe, ku nga Simiyoni na Levhi, va ntxhimise ku nge ntsena vito dzra ndangu wavu kambe ni vito dzra Yehovha. Handle ka leswo, Rakele, nsati lweyi Yakobe a a mu zrandzra ngopfu, a file loko a phuluka n’wanavu wa wubidzri. Nakone nambileswi a a duhwalile, Yakobe a sindzriseke ku zruzrela Egipta hi kola ka ndlala leyikulu leyi a yi li kone. (Gen. 35:16-19; 37:28; 45:9-11, 28) Nambileswi a kumaniki ni mintxhumu yinyingi, Yakobe a nga luzekeliwa hi lipfumelo dzrake ka Yehovha ni ka swidumbiso swake. Nakone Yehovha a swi beke livaleni ka Yakobe leswaku a a mu yamukela. Hi xikombiso, Yehovha minkama hinkwayu a tovokise Yakobe. Yanakanya ndlela leyi Yakobe a nyonxiki ha yone loko a kume n᾿wanake Yosefa, lweyi a a pimisa leswaku a a fe khale swinene! Wuxaka bya le kusuhi lebyi Yakobe a a li na byone na Yehovha byi mu pfune ku lwisana ni swikazratu hinkwaswu leswi a a kumana na swone. (Gen. 30:43; 32:9, 10; 46:28-30) Loko na hine hi va ni wuxaka bya le kusuhi na Yehovha hi ta swi kota ku lwisana ni swikazratu leswi a hi nga swi yimelanga. Xihondzro Xa Ku Zrindzra 04/2023 p. 15 §§ 6-7

Amapsalma 23 i lisimu ledzri kombisaka ku dumba lizrandzru ni ku zron’weka ka Yehovha. Davhida mutsrali wa psalma ledzri a tlhamuxela wuxaka byikulu lebyi a byi li kone makazri kwake ni Mubyisi wake, Yehovha. Davhida a a titwa a sizrelelekile loko a tsrhika Yehovha a mu kongomisa, nakone a a mu dumba hi ku helela. Davhida a a swi tiva leswaku Yehovha a a ta mu komba lizrandzru masiku hinkwawu. I yini lexi mu yentxiki a tiyiseka hi ku helela? “A ndzri pfumali ntxhumu”. Davhida a a titwa a hlayisekile hikusa minkama hinkwayu Yehovha a a mu nyika leswi a swi vilelaka. Nakone, Davhida a a swi tiva leswaku Yehovha i munghanu wake ni leswaku awa mu yamukela. Hi leswo swi mu yentxiki a tiyiseka leswaku ku nge na mhaka leswi a swi ta mu humelela a nkameni lowu taka, Yehovha a a ta tama a mu hlayisa a tlhela a mu nyika hinkwswu leswi a a ta swivilela. Leswi Davhida a a tiyiseka leswaku Yehovha awa mu zrandzra nakone awa mu hlayisa, swi mu pfune kuva a nga vileli ha ntxhumu kambe minkama hinkwayu a nyonxa a tlhela a yaneliseka.—Amaps. 16:11. Xihondzro Xa Ku Zrindzra 01/2024 p. 29 §§ 12-13

Ku sukela ka yimpi ya wubidzri ya misava, vhanu va Yehovha a matikweni manyingi va tikholisa hi ku zrula ni ntsrhunxeko nkama lowu va zrezraka. Handle ka ku ganaganeka ntizro wu ya wu kula. Namunhla, Huvo Leyi Zrangelaka yi tama yi landzra nkongomiso wa Yehovha. Vone va djula leswaku minkongomiso leyi va yi nyikaka vamakwezru yi va pfuna ku vona mintxhumu hi ndlela ya Yehovha, va tlhela va tizrisa valaviseli va miganga ni vakulu akuva va kongomisa ni ku tiyisa a mabandla. Vakulu lava vatotiwiki va le “vokweni dzra xinene dzra Kriste.” (Mpful. 2:1) I ntiyiso leswaku vakulu hinkwavu a va hetisekanga nakone va yentxa swihoxo. Moxe na Yoxuwa a va pfa va phazama ku fana ni vapostola. (Atinhl. 20:12; Yehoš. 9:14, 15; Rom. 3:23) Kambe, swa tikomba leswaku Yesu a kongomisa nandzra wa ku dumbeka ni vakulu lava hlawuliwiki, nakone a ta tama a yentxa leswo. Kutani hi ni swivangelo swinyingi swa kuva hi dumba nkongomiso lowu hi wu kumaka ka vavanuna lava a va hlawuliki kuva va zrangela. Xihondzro Xa Ku Zrindzra 02/2024 pp. 23-24 §§ 13-14

Ni namunhla, na hine hi nga dzrumisa Yehovha hi ku khanela hi ndlela leyi kombisaka ku tlangela ni lizrandzru. Loko hi ya nsin’wini hi nga dzrimuka leswaku nkongomento nkulu lowu hi nga na wone, i wa ku kokela vhanu ka Yehovha, ni ku va pfuna ku vona Yehovha swanga Papayi wezru lwa nga ni lizrandzru. (Yak. 4:8) I tovoko ku hine ku komba vhanu a Bibeleni ka leswaku Yehovha i Xikwembu Nkulukumba lwa nga ni lizrandzru, wululami, wutlhazri, ntamu ni matsrhamela man’wana ya ku xonga. Ndlela yin’wana ya ku dzrumisa Yehovha ni ku mu nyonxisa ha yone hi loko hi yentxa hinkwaswu leswi hi nga swi kotaka akuva hi mu yetisela. Loko hi yentxa leswo, vhanu vanyingi va nga swi xiya leswaku hi hambanile ni vhanu van’wana. (Mat. 5:14-16) Loko hi hanyisanaka na vone siku ni siku, swi nga yentxeka hi va ni mukhandlu wa ku va tlhamuxela leswaku ha yini hi hambanile ni vhanu van’wana. Nakone vhanu va timbilu letinene, va ta djula ku dondzra mayelanu na Xikwembu Nkulukumba wezru. Loko hi dzrumisa Yehovha hi tindlela leti, a nyonxa ngopfu swinene.—1 Tim. 2:3, 4. Xihondzro Xa Ku Zrindzra 02/2024 p. 10 § 7

Akuva u va mukriste lweyi a wupfiki, u fanela ku dondzra mintizro ya kukazri. Mintizro leyo yi ta ku pfuna kuva u hetisisa wutiyanguleli byaku a bandleleni, ku kuma ntizro akuva u kota ku hlayisa ndangu waku nakone swi ta ku pfuna ku hanyisana ha hombe ni vhanu van’wana. Hi xikombiso, dondzra ni ku tsrala ha hombe. A Bibele dzri hlaya leswaku wanuna lwa nyonxiki ni lwa humelelaka ka hinkwaswu leswi a swi yentxaka hi lweyi a dondzraka Zritu dzra Xikwembu Nkulukumba siku ni siku ni ku yanakanyisisa ha dzrone. (Amaps. 1:1-3) Ku dondzra Bibele siku ni siku, swi ta yentxa leswaku a ma tiva ha hombe mayanakanyela ya Yehovha nakone leswo swi ta mu pfuna ku yanakanya a tlhela a dondzra ku tizrisa minsinya ya milawu ya Yehovha hi ndlela leyinene. (Amapr. 1:3, 4) A bandla dzri vivelela vamakwezru va xinuna lava dondzrisaka ha hombe akuva va nyikela tidondzro ni switsratsriyo leswi seketeliwiki a Bibeleni. Loko u kota ku dondzra ni ku tsrala hi ndlela leyinene, u ta kota ku lulamisela ha hombe wukaneli ni tinhlamulu leti taka tiyisa lipfumelo dzra vamakwezru nakone u ta kota ku tsrala tinhla ta lisima leti ta ka ku pfuna ku tiyisa lipfumelo dzraku ni ku tiyisa vambeni. Xihondzro Xa Ku Zrindzra 12/2023 pp. 26-27 §§ 9-11

Loko u txhava, yanakanyisisa hi leswi Yehovha a ta ka swi yentxa a nkameni lowu taka loko Sathana a helisiwa. Ka Kongresu ledzri viki kone hi 2014, ku ve ni nkombiso lowu kombisiki ndangu wa kukazri a wu yanakanyisisa hi ndlela leyi wutomi byi ta ka va ha yone a paradeyisi, nakone va yanakanyi hi buku dzra 2 Timotewu 3:1-5 na dzri ni mazritu lama khanelaka hi misava leyimpshwa. Yene a te: “Kambe tiva leswaku, a misaveni leyimpshwa ku ta tlhasa minkama ya ku nyonxisa leyi swi nyonxisaka ku hanya ka yone, hikusa vhanu va tava lava zrandzraka vhanu vambeni, va va lava zrandzraka ntiyiso, lava dzringaniselaka, lava titsrongahataka, vagandzreli va Xikwembu Nkulukumba, lava yingisetaka vapswele, lava tivaka ku tlangela, lava dumbekaka, lava zrandzraka ngopfu mindangu yavu, lava djulaka ntwananu, lava khanelaka leswinene hi vambeni, lava tikhomaka, lava zruliki, lava nga ni lizrandzru ni wunene, lava dumbekaka, lava nabyaliki, lava nga ni miyanakanyu ya ku titsrongahata, lava zrandzraka Xikwembu Nkulukumba matsrhan’weni ya ku zrandzra ku tinyonxisa, lava nga ni mahanyelo lamanene. Xileswo tsrhama kusuhi ni vhanu lavo.” Xana u same u bula ni va ndangu waku kumbe vamakwezru mayelanu ni ndlela leyi wutomi byi taka va xiswone a misaveni leyimpshwa? Xihondzro Xa Ku Zrindzra 01/2024 p. 6 §§ 13-14

Swa txhavelela ku tiva leswi Amapsalma 149:4 [BX] yi hlayaka swone! Yone yi li: ‘A Hosi [Yehovha] yi titsrhavela hi vhanu va yone.’ Kambe minkama yin’wana vambeni va nga ha heleliwa hi ntamu va va va yanakanya leswi: ‘Xana mine hi tshima ni wa lisima ka Yehovha?’ Malandzra manyingi ya Yehovha nambi ya le minkameni ya khale, minkama yin’wana ma langutane ni matitwela ya ku fana ni lawo. (1 Sam. 1:6-10; Yb. 29:2, 4; Amaps. 51:11) A Bibele dzri swi beka livaleni leswaku vhanu va ku kala ku hetiseka va nga swi kota ku nyonxisa Yehovha ni ku yamukeleka kwake. Hi ndlela yini? Hi fanela ku kombisa leswaku hi ni lipfumelo ka Yesu Kriste hi tlhela hi babatisiwa. (Yoh. 3:16) Hi ndlela leyo hi kombisa leswaku hi tisolile ka swidoho swezru ni leswaku hi dumbisa Yehovha ku yentxa ku zrandzra kwake. (Mint. 2:38; 3:19) Yehovha awa nyonxa loko hi tikazratela ku yentxa leswo akuva hi tsrhindzrekela kwake. Nakone loko hi yentxa hinkwaswu leswi hi nga swi kotaka akuva hi hetisisa xidumbiso lexi hi xi yentxiki, Yehovha a ta hi yamukela a tlhela a hi vona swanga vanghanu vake lavakulu.—Amaps. 25:14. Xihondzro Xa Ku Zrindzra 03/2024 p. 26 §§ 1-2

Hi nga yetisela xikombiso xa vapostola xa ku tama hi zrezra nambiloko wuhosi byi tsrimbisa ku yentxa leswo. Na hine hi nga tiyiseka leswaku Yehovha a ta hi pfuna akuva hi hetisisa wutizreli byezru. Xileswo, hi fanela ku khongota hi kombela xixixi ni wutlhazri. Kombela mpfunu wa Yehovha akuva u kota ku lavisana ni swikazratu. Vanyingi vezru hi langusana ni swiyimu swa ku kazrata ku nge ntsena hi tlhelo dzra nyama kambe ni hi tlhelo dzra matitwela. Van’wana va luzekeliwe hi vazrandzriwa vavu, van’wana va kumana ni swikazratu a ndangwini, ku kanetiwa kumbe swiyimu swin’wana leswi bindzraka. Leswi pfisaka hi leswaku a swiyimu swa ku fana ni ntungu kun’we ni tiyimpi swi yentxa leswaku xiyimu xi tama xi bindzra. Kutani ke, pfulela Yehovha mbilu yaku, mu byele hinkwaswu leswi u kumanaka na swone, yentxa ingiki u bulisana ni munghanu lweyi a nga kola a tlhelweni kwaku. U nga tiyiseka leswaku Yehovha a ta ku nyika leswi ‘djuliwaka hi mbilu yaku’. (Amaps. 37:3, 5) Lexi taka hi pfuna ku tama hi lehisa mbilu ‘loko hi kumana ni swikazratu’ i ku va hi nga “tsrhiki ku khongota”. (Rom. 12:12) Yehovha a swi tiva ha hombe swiyimu leswi malandzra yake ma kumanaka na swone. Yene ‘a yingela ku dzrila kwavu’.—Amaps. 145:18, 19. Xihondzro Xa Ku Zrindzra 05/2023 pp. 5-6 §§ 12-15

Loko hi djula ku teka xiboho xa lisima swinene, hi fanela ku tivutisa leswaku he swini leswi a nga ku zrandzra ka Yehovha hi tlhela hi hanya hi ku pfumelelana na swone. (Efe. 5:17) Nkama lowu hi kumaka minsinya ya milawu ya Bibele leyi tizraka ka xiyimu xezru, swo fana ni loko hi kume leswi Yehovha a swi pimisaka hi mhaka leyo. Xileswo, loko hi tizrisa minsinya ya milawu ya Bibele hi kota ku teka swiboho leswinene. “Sathana”, a djula leswaku hi khomeka hi mintxhumu ya misava leyi lakakuva hi nga ha wu kumi nkama wa ku gandzrela Yehovha. (1 Yoh. 5:19) Na a nga swi xiyi, mukriste a nga ha sungula ku beka miyanakanyu yake ka mali, ka tidondzro kumbe ntizro a matsrhan’wini ya ku djuletela mikhandlu ya ku tizrela Yehovha hi ndlela leyi yengetelekiki. Loko leswo swi yentxeka swi nga kombisa leswaku a sungule ku yanakanya ku fana ni misava. I ntiyiso leswaku mali, tidondzro, ntizro kumbe mintxhumu leyi vonekaka a swi bihanga, kambe leswo a swi fanelanga swi va mbangwini wa ku sungula a wuton’wini byezru. Xihondzro Xa Ku Zrindzra 03/2024 p. 24 §§ 16-17