Loko Xikwembu Nkulukumba A Yavanyisa​—Xana Minkama Hinkwayu A Zranga Hi Ku Ba Ndleve Vhanu?

XANA yi yentxa yini ntlhazri ya maxela loko yi pompola hi mutxhini, yi vona leswaku ku ta xidzedze lexikulu lexi taka wela muganga lowu taliki hi vhanu? Leswi yi zron’wekaka hi wuhlayiseki byavu, yi tizra yi nga txhayi, yi va basopisa na nkama wa ha dzringana.

Hi la ku fanaka, swoswi Yehovha a basopisa vayaki hinkwavu va misava ka “xidzedze” lexi dlayaka swinene ku tlula timhangu hinkwatu leti vangiwaka hi maxela. Xana a swi yentxisa kuyini? Nakone i yini xi hi kholwisaka leswaku a nyika vhanu nkama wa kuva va yentxa xa kukazri? Akuva hi hlamula swivutiso leswo, a hi zrangeni hi ku vona swikombiso swa minkama leyi khalutiki leswi ka swone Yehovha a zrangiki hi ku basopisa vhanu.

SWIKOMBISO SWA KU BA NDLEVE VHANU

A minkameni ya Bibele, hi makhambi ya ku siyana-siyana Yehovha a tivise vhanu leswaku a a ta tisa “swidzedze”, kumbe yavanyiso, a henhla ka lava a va tlula swileleto swakwe hi maxivomu. (Pr 10:25; Yr 30:23) Kambe ka xiyimu xin’wana ni xin’wana, a zrange hi ku tivisa vhanu va kone na we he nkama, a tlhela a va byela leswaku va nga txintxisa kuyini hi ku twanana ni ku zrandzra kwakwe. (2Th 17:12-15; Neh 9:29, 30) Akuva a va kutxa ku yingiseta, hakanyingi a tizrise malandzra yakwe ya ku dumbeka ya kola misaveni akuva ma tivisa leswaku ku yavanyisa kwakwe a ku li kusuhi, ma tlhela ma kombisa leswaku mhaka leyi i ya xihatla.​—Am 3:7.

Nowa a ve mun’we wa malandzra wolawo ya ku dumbeka. Hi xixixi, a hete malembe ya ku tala na a basopisa vhanu lava a va hanya hi ndlela ya ku biha ni ya tihanyi a masikwini yakwe leswaku ku ta ndhambhi a misaveni hinkwayu. (Gn 6:9-13, 17) Handle ka leswo, a va byele leswi a va fanela ku swi yentxa akuva va ta huluka. A va byele hi ku phindha-phindha, lakakuva a game a vitaniwa ‘muzrezri wa ku lulama’.​—2Pe 2:5.

Nambi leswi Nowa a tikazratiki hi ku tlhasisa xitiviso lexi humaka ka Xikwembu Nkulukumba ka vhanu lava hanyiki na Ndhambhi ya ha li kule, va xi be hi makatla. A va zanga va kombisa lipfumelo ni dzritsrongo. Khombo dzra kone, va file loko Ndhambhi ‘yi tlhasa yi va heta hinkwavu’. (Mt 24:39; Hb 11:7) Loko va li kusuhi ni ku suva, a nga kone ni mun’we wavu a a ta hlaya leswaku Xikwembu Nkulukumba a nga mu tivisanga.

Minkama yimbeni, Yehovha a tivise vhanu na ke sala nkamanyana akuva ku tlhasa “xidzedze” xa yavanyiso dzrakwe. Nambitanu, a yentxe leswaku vhanu va kone va va ni nkama lowu yanelaka wa ku yentxa xa kukazri. Hi xikombiso, loko a djule ku tisa Makhombo ya Khume a Egipta wa khale, a zrange hi ku nyikela switiviso na we he nkama. Xikombiso xa leswi ku ve loko Yehovha a zrume Moxe na Aroni leswaku va ya tivisa Faro hi khombo dzra wu-7, a nga xihangu lexi honetelaka. Leswi xihangu a xi ta va mundzruku ka kone, xana Yehovha a va nyike nkama lowu yaneliki leswaku va kuma ka ku tumbela kone akuva va huluka ku neliwa? Bibele dzri li: ‘Lwa txhaviki zritu dzra Yehovha ku malandzra ya Faro a ku tsrutsrumelisa malandzra yakwe ni tihomu takwe a ndlwini. Kambe lwa nga tsrotsrangakiki zritu dzra Yehovha, a ku tsrhika malandzra yakwe ni tihomu takwe a nhoveni.’ (Eks 9:18-21) Swa tikomba, ke, leswaku Yehovha a va nyike nkama lowu a wu yanela leswaku va tilulamisela. Lava va hatliki va yingiseta va huluke khombo ledzro ledzri honetelaka swinene.

Faro ni malandzra yakwe va tlhele va basopisi- wa na we he nkama hi khombo dzra wu-10. Nambitanu, va yentxe swa wumphunta hi ku tidlaya tindleve. (Eks 4:22, 23) Xiswoswo, va feliwe hi vanavu va mativula. Vona ku vavisa ka swone! (Eks 11:4-10; 12:29) Xana xi kone lexi anhaka va xi yentxekile na nkama we he kone? Ina! Moxe a hatle a tivisa va-Israyele hi khombo ledzro dzra wu-10, a tlhela a va tlhamuxela leswi a va fanela ku swi yentxa akuva va huluxa mindangu yavu. (Eks 12:21-28) Xana i vhanu vangani lava yingisetiki xitiviso lexo? Ku pimaniseliwa leswaku 3.000.000 wa vhanu va huluke yavanyiso ledzro dzra Xikwembu Nkulukumba, va va va huma a Egipta—ku nga nhlayu leyi patsraka va-Israyele ni ‘xitsrhungu xa vhanu hinkwavu’ va lixaka dzra va-Egipta ni van’wana lava a nga li va-Israyele.—Eks 12:38.

Hi laha hi swi voniki ha kone ka swikombiso leswi, Yehovha minkama hinkwayu a nyike vhanu nkama lowu yaneliki leswaku va landzra leswi va basopisiwaka ka swone. (Dt 32:4) A a yentxela yini swoswo? Mupostola Petro a tlhamuxele leswaku Yehovha a nga ‘zrandzri leswaku ni mun’we a lahleka, a ka ku zrandzra leswaku hinkwavu va ta va va ndzruluka’. (2Pe 3:9) Ina, Xikwembu Nkulukumba a a zron’weka hi vhanu lavaya. A a djula leswaku va tisola va tlhela va txintxa mahanyela yavu na yavanyiso dzri nga si na tlhasa.​—Eza 48:17, 18; Ro 2:4.

PFUMELA KU BIWA NDLEVE HI YEHOVHA NAMUNHLA

Hi la ku fanaka, namunhla vhanu va fanela ku hatla va yingiseta xitsratsriyo lexi swoswi xi twalisiwaka a misaveni hinkwayu. Na a ha li lani misaveni, Yesu a tivise leswaku xiyimu lexi xa mintxhumu xi ta gamela ku helisiwa a nhlomulweni lowukulu. (Mt 24:21) Mayelanu ni yavanyiso ledzro dzri taka, a profete mintxhumu ya ku tala leyi valandzreli vakwe a va ta yi vona ni ku yi hanya loko nkama wu ya wu tsrhindzrekela. Yesu a khanele hi mintxhumu leyi kutani hi yi vonaka na yi yentxeka namunhla a misaveni hinkwayu.​—Mt 24:3-12; Lk 21:10-13.

Hi ku fambisana ni wuprofeta lebyo, swoswi Yehovha a tsratsriya vhanu hinkwavu leswaku va pfumela ku mu tizrela ni ku mu yingiseta. Ku navela kwakwe i kuva vhanu hinkwavu lava yingisetaka va tikholisa hi wutomi bya ku yampswa swoswi, va tlhela va kuma matovoko lama taka a misaveni yakwe leyimpswha ya ku zrula. (2Pe 3:13) Akuva a kutxa vhanu leswaku va va ni lipfumelo ka swidumbiso swakwe, Yehovha a va byela madzrungula lama huluxaka, ku nga ‘evhangeli dzra Mfumu’ ledzri Yesu a profetiki leswaku dzri ta ‘zrezriwa misaveni hinkwayu, byi va vumboni ku hinkwawu matiko’. (Mt 24:14) Xikwembu Nkulukumba a lulamisele vagandzreli vakwe va ntiyiso akuva va beka ‘wumboni’, kumbe va zrezra madzrungula ya Xikwembu Nkulukumba, a matikweni lawa ma tlhasaka 240. Yehovha a djula leswaku vhanu va ku tala swinene va khomelela xitsratsriyo xakwe, va va va huluka “xidzedze” xa yavanyiso dzrakwe dzra ku lulama.​—Tsf 1:14, 15; 2:2, 3.

Kutani ke, a hi nge vutisi leswaku Yehovha a ta va nyika vhanu nkama lowu yanelaka akuva va yentxa xa kukazri na a nga si tisa yavanyiso. Wumboni byi komba leswaku minkama hinkwayu a basopisa vhanu na we he nkama. Kambe xivutiso xa lisima hi lexi: Xana vhanu va ta yingiseta leswi Xikwembu Nkulukumba a va baka ndleve ka swone na we he nkama? Ingi hinkwezru malandzra ya Xikwembu Nkulukumba hi nga ya mahlweni hi pfuna ntalu wa vhanu hi la hi nga kotaka ha kone leswaku va ta huluka loko xiyimu lexi xa mintxhumu xi helisiwa!