Hinkwaswu Hi Mhaka Ya Ku Hleka!

Van’hwanyana vabidzri a va famba xikan’we va khaluta hi bazara, a doropeni dzra Baguio, a Filipinas. Va vone xikarinyana xa mabuku, kambe a va tsrhindzrekelanga ka xone. Makwezru lweyi a a yime kusuhi ni xikarinyana xolexo a va hlekele hi ndlela ya ku xonga swinene. Van’hwanyana lavo va tame va tifambela, kambe va hlamalisiwe swinene hi mahleko ya Helen.

Ntsrhakunyana, na va li ka xibomba va muka, van’hwanyana lavo va vone pajina dzrezru dzra jw.org ka Yindlu ya Wugandzreli. Kutani va dzrimuke leswaku maletela lawayani hi lawa va ma voniki ka xikarinyana. Ha wubidzri byavu va xike xibombeni kutani va ya lavisa xiyimiso xa mintlhanganu ya mabandla ya ku siyanasiyana lexi kumekaka a xipfalwini xa Yindlu ya Wugandzreli.

Vavasati volavo va kumekile ka yin’we ya mintlhanganu va yi voniki ka xiyimiso. Xana i mani va mu kumiki loko va nghene ka Yindlu ya Wugandzreli? I Helen! Va tekele ku mu tiva, va dzrimuka leswaku hi lwiya a va hlekeliki. Helen a li: “Loko va tsrhindzreke kusuhi na mine ni txhavile, hikusa a ni nga swi tivi leswaku ha yini a va ni tsrhindzrekelela, a ni nga swi tivi leswaku ha yini va buya ka mine.” Kambe vavasati lavo va tlhamuxele Helen leswi yentxekiki.

Van’hwanyana lavo va yi nyonxelile mintlhanganu ni ndlela leyi vamakwezru va hanyisanaka ha yone. Va titwe na va li kaya. Loko va vone van’wana na va basisa Yindlu ya Wugandzreli ntsrhaku ka mintlhanganu, va kombele ku va na vone va pfunisa. Mun’we wa vavasati volavo a zruzrile a ya ka tiko dzrimbeni, kambe lweyi mun’wana a sungule ku hlalela mintlhanganu nakone a sungule ku fambiseliwa xidondzro xa Bibele. Hikwaswu leswi hi mhaka ya ku hleka!