Djaha ledzri lavisaka vhanu lava nghenaka ka Yindlu ya Wugandzreli

LESWI VAMPSWHA VA SWI VUTISAKA

Ha Yini Swi Li Swa Lisima Ku Ya Mintlhanganwini A Ndlwini Ya Wugandzreli?

Kabidzri hi vhiki,Timboni ta Yehovha ti khoma mintlhanganu a mbangwini wa wugandzreli lowu vitaniwaka Yindlu ya Wugandzreli. Ku yentxeka yini ka mintlhanganu yezru? Ha yini swi li swa lisima kwaku akuva u hlalela mintlhanganu leyi?

Ku yentxeka yini ka Yindlu ya Wugandzreli?

Yindlu ya Wugandzreli i mbangu lowu vhanu va tlhanganaka hi nkongometo wa ku dondzra leswi Bibele dzri nga hi pfunisaka xiswone siku ni siku. Ka mintlhanganu leyo wene:

u ta dondzra ntiyiso mayelanu na Xikwembu Nkulukumba.
u ta twisisa leswaku ha yini swiyentxakalu swa masiku yezru swi humelela.
u ta dondzra ndlela ya ku va mhunu munene.
u ta kuma vanghanu lavanene.

A wu swi tiva? Mimbangu ya Wugandzreli ya Timboni ta Yehovha yi vitaniwa Yindlu ya Wugandzreli, hikusa kone ku khaneliwa ngopfu hi Mfumu wa Xikwembu Nkulukumba.—Matewu 6:9, 10; 24:14; Luka 4:43.

Ha yini swi li swinene ku va kone ka mitlhanganu leyi?

Leswi u swi dondzraka kone swi ta ku pfuna. Minsinya ya milawu ya Bibele leyi dondzriwaka hi Timboni ta Yehovha, yi ta ku pfuna ku ‘kuma wutlhazri.’ (Amaproverbia 4:5) Leswi swi kombisa leswaku a Bibele dzri nga ku pfuna ku yentxa swiboho swa wutlhazri. Dzrone dzri nga tlhela dzri ku pfuna ku kuma tinhlamulo ta swivutiso swa lisima a wuton’wini:

Leti i tin’we ta tinhlokomhaka ta wukaneli lebyi bekiwaka hi ku hela ka vhiki:

Ha Yini Hi Djula Mpfunu Wa Bibele?
Loko Hi Langusana Ni Swikazratu, Hi Nga Wu Kuma Kwini Mpfunu?
I Yini Leswi Mfumu Wa Xikwembu Nkulukumba Wu Hi Yentxelaka Swone?

“Siku dzrin’wana lweyi ni dondzraka na yene xikole a ye mintlhanganwini. A tsrhami ni ndangu wezru hi tlhela hi mu voleka mabuku. Ntsrhaku ,a ni byele leswaku a hlamalisiwe hi tinhlamulo leti vamakwezru va ti nyikeliki. A tlhele a hlaya leswaku a kezreke ledzri a a ya ka dzrone a va nga li na swone swa ku dondzra ku fana ni leswi hi nga na swone.”—Brenda

A wu swi tiva? A Ndlwini ya Wugandzreli a ku fambisiwi xiparatwana xa minhlengo.

U ta tiyisiwa hi vamakwezru. Bibele dzri ni swivangelo leswi yentxaka vakriste va tlhangana ku va ’va khongotelana’ (Ba-Heberu 10:24, 25) Ku titlhanganisa ni vhanu lava zrandzraka Xikwembu Nkulukumba, swa tiyisana ka misava leyi taliki hi wutiyanakanyi.

“Ni nga ha titwa na ni kazralile ni tlhela ni kwata ntsrhaku ka siku, kambe vamakwezru a Ndlwini ya Mfumu va ni yentxa ni titwa ni li wa lisima. Loko ni tlhelela kaya ni titwa na ni nyonxile ni tlhela ni lulamela ku lwa ni swikazratu leswi ni nga tlhanganaka na swone ka siku ledzri landzrelaka.”—Elisa.

A wu swi tiva? Ku ni ku tlula 120.000 wa mabandla ya Timboni ta Yehovha a misaveni hinkwayu, lama kumeka ku tluka 60.000 ka Tiyindlu ta Wugandzreli. Kolomu ka 1.500 wa Tiyindlu ta Wugandzreli ta yakiwa lembe dzrin’wana ni dzrin’wana akuva vhanu va hlengela kone loko nhlayu yi ya yi kula.a

I yini leswi vampswha vambeni va swi hlayaka

“Loko na ha ya xikole, mun’we wa lweyi a ni dondzra na yene a yile makhambi ma nge mangani a mintlhanganwini yezru na mine. A hlamale ngopfu loko a vona vhanu va tintanga hinkwatu va dondzra xikan’we Bibele. Ntsrhakunyana, mutholi wanga na yene a yile mintlhanganwini yezru nakone a nyonxisiwile hi ku vona ndlela leyi hi tizrisaka Bibele ha yone. Loko ni vone ndlela leyi a yi zrandzriki ha yone mintlhanganu, swi yentxe na mine ni yi zrandzra ngopfu swinene!”—Jessica.

“Ni vona leswaku ku ya mintlhanganwini swi ni pfuna ku lwisana ni swikazratu ni ku hlatiyela. Hi dondzra ku va vhanu lava nyonxiki hakunene, ku va vhanu lavanene ni swin’wana. Minkama hinkwayu loko ni huma mintlhanganwini ni titwa na ni pepile ni tlhela ni nyonxa.”—Timothy.

“Wanuna lweyi ni mu zrambiki akuva a ya mintlhanganwini a te: ‘Mine ni buye akuva ni ta komba leswaku leswi u kholwaka ka swone i madzrimi. Kambe ni swi vonile leswaku lweyi a a hoxile a ku li mine!’ Yene a tlhele a hlamalisiwa hi ndlela leyi Timboni ta Yehovha ti mu yamukeliki ha yone. Yene a te:‘ Na ha li ku mi tiva swoswi, kambe ndlela leyi mi ni yamukeliki ha yone ingi a ho tivana hi malembe!’”—Jacob.

“Ku ve ni minkama ni pimisiki leswi: ‘Neti mintlhanganu yi hela no famba. Kambe loko mintlhanganu yi famba, matitwela wolawo ma sukile. Hikusa loko mintlhanganu yi hela a ni bula ni vamakwezru ni tlhela ni nga ha dzrimuki leswaku a ni djula ku kahlula ni muka ha mhaka muni. Loko a ku nga li mintlhanganu a ni nga ti va ni vanghanu lavanene!”—Madison

a Akuva u kuma a Yindlu ya Wugandzreli, yendzrela pajina dzra jw.org, ka “Mitlhanganu Ya Bandla Ya Timboni Ta Yehovha” u deketa lani ku liki “Kuma Mbangu Kusuhi Na Wene”.