Mintlhanganu Leyi Yi Hi ‘Susumetaka A Lizrandzrwini Ni Swiyentxweni Leswinene’

VHANU va Yehovha va buya na va hlengeletana hi ndlela leyi hlelekiki hi madzana ya malembe. A Israyeleni wa khale, vavanuna hinkwavu a va ya a Yerusalema va ya hamba minkhuvu yizrazru leyikulu. (Dt 16:16) Hi dzana dzra ku sungula, vakriste a va hlengemela kun’we minkama hinkwayu, hi ntolovelo a kaya ka mhunu wa kukazri. (Flm 1, 2) Namunhla, na hine ha yi nyonxela mintlhanganu, tinhlengeletanu ta miganga ni ta swifundzra. Ha yini vatizreli va Xikwembu Nkulukumba va hlengeletana? Xivangelo xa ku sungula hi leswaku i xiyenge xa lisima xa wugandzreli byezru.​—Ps 95:6; Kl 3:16.

² Mintlhanganu yi tlhela yi pfuna lava hlengemelaka ka yone. Mayelanu ni fexta dzra mintsronga dzra wu 7, va-Israyele va byeliwe leswi: ‘Hlengeleta tiko, vavanuna ni vavasati, ni swivananyana ni muluveli waku lwa nga mitini yaku, akuva va swi yingela, va dondzra, va txhava Yehovha, Xikwembu Nkulukumba wenu, va khinyela ku yentxa mazritu hinkwawu ya nawu lowu.’ (Dt 31:12) Swi le livaleni leswaku a xivangelo-nkulu xa ku hlengeletana kwezru i kuva hi ‘dondzrisiwa ha Yehovha’. (Eza 54:13) Mintlhanganu yi tlhela yi hi nyika mukhandlu wa ku tivana, ku txhavelelana ni wa ku tiyisiwa hi ku tlhangana ni vambeni.

MINTLHANGANU YA BANDLA

³ Vadondzrisiwa lava hlengeletaniki kun’we ntsrhaku ka Pentekoxta dzra 33 N.Y. va tinyiketele ka leswi a swi dondzrisiwa hi vapostola, nakone ‘ifa va khinyela hi mbilu yin’we a tempeleni hi masiku hinkwawu’. (Min 2:42, 46) Hi ku famba ka nkama, loko vakriste va tlhangana leswaku va gandzrela, a va dondzra matsralwa lama huhuteliwiki, ku patsra ni mapapela lama tsraliwiki hi vapostola ni vakriste vambeni lava nga vadondzrisiwa. (1Ko 1:1, 2; Kl 4:16; 1Te 1:1; Yk 1:1) A va hamba ni swikhongoto swa bandla. (Min 4:24-29; 20:36) Minkama yimbeni, a va dzrungula mimfambu ya nsimu ya vazrumiwa. (Min 11:5-18; 14:27, 28) A ku tlhela ku kambisisiwa tindondzro ta Bibele ni ku hetiseka ka wuprofeta lebyi huhuteliwiki. A ku dondzrisiwa ni mahanyela ya wukriste lama yamukelekaka ni ya ku txhava Xikwembu Nkulukumba. Hinkwavu a va kutxiwa ku va vazrezri lava hisekaka va madzrungula lamanene.​—Ro 10:9, 10; 1Ko 11:23-26; 15:58; Ef 5:1-33.

⁴ A masikwini yezru, mintlhanganu yi yentxiwa hi ndlela leyi fanaka ni leyi simekiwiki a minkameni ya vapostola. Hi yingiseta xitsratsriyo lexi huhuteliwiki, lexi nga ka Ba-Heberu 10:24, 25: ‘Hi va hi yanakanyana, hi susumetana a lizrandzrwini ni swiyentxweni leswinene; hi nga tsrhiki ku hlengeletana, swanga hi leswi van’wana va swi toloveliki, kambe hi khongotelana; ngopfu naswone hikusa n’wi vona leswaku a siku dzri tsrhindzrekelaka kusuhi.’ A masikwini lawa ya wugamu lama kazrataka, hi djula ku tiyisiwa hi ndlela leyi yengeselekiki, loku hi ku kumaka hi ku tlhangana kun’we nkama ni nkama akuva hi tsrhama na hi tiyile hi le moyeni ni le mahanyeleni ya wukriste. (Ro 1:11, 12) Swanga vakriste, hi hanya a makazri ka lixaka dzra ku somboloka. Hi bakanye ku navela ka misava ni wutomi bya ku pfumala xitxhavu ka Xikwembu Nkulukumba. (Fil 2:15, 16; Ti 2:12-14) Ku hlaya ntiyiso, xana a hi ta ya kwini ka ku yapswa ku tlula ku titlhanganisa ni vhanu va Yehovha? (Ps 84:10) Nakone i yini a xi ta hi pfuna ku yapswa ku tlula ku dondzra hi tlhela hi kambisisa Zritu dzra Xikwembu Nkulukumba? Kambisisa mintlhanganu ya ku hambana-hambana leyi lulamiseliwiki ku hi pfuna.

MINTLHANGANU YA KU HELA KA VHIKI

⁵ A xiyenge xa ku sungula xa ntlhanganu wa ku hela ka vhiki i wukaneli bya Bibele lebyi kongomisiwaka ka vhanu hinkwavu, lani vambeni va kone vo ko sungula ku hlengemela. Wukaneli bya le livaleni byi ni lisima swinene hikusa byi yaneta xivileleko xa moya xa vazrezri va bandla ni lava vo ko sungula ku hlengemela.​—Min 18:4; 19:9, 10.

⁶ Kriste Yesu, vapostola vakwe ni vatizri-kulobye va fambise mintlhanganu ya le livaleni ya ku fana ni leyi bandla dzra vhanu va Yehovha dzri tikholisaka ha yone namunhla. A ku na ku ganaganeka ka leswaku Yesu a ve xikaneli xa le livaleni lexikulu ku tlula hinkwaswu a misaveni. Ku hlayiwe leswi ha yene: ‘A ku ngi va na mhunu lweyi a samaka a vulavula swanga hi mhunu lweyo, ni siku ni dzrin’we.’ (Yh 7:46) Yesu a a vulavula hi ndlela leyi kholwisaka, a hlamalisa vayingiseti vakwe. (Mt 7:28, 29) Lava va yingisetiki mazritu yakwe va pfuneke hi tindlela tinyingi. (Mt 13:16, 17) A vapostola va landzrele xikombiso xakwe. Ka Amintiṛo 2:14-36, hi kuma wukaneli lebyi kholwisaka swinene bya Petrosi, lebyi a byi bekiki hi Pentekoxta dzra 33 N.Y. Madzana-dzana ya vhanu ma susumeteleke ku teka xiboho hi kola ka leswi ma swi twiki. Hi ku famba ka nkama, vambeni va ndzruluke vapfumeli ntsrhaku ka ku yingela wukaneli bya Pawulo a Atena.​—Min 17:22-34.

⁷ Hi ku fanana, a masikwini yezru mamilhawu ya vhanu ma pfuneka hi wukaneli bya le livaleni bya vhiki ni vhiki a mabandleni, ni lebyi nyikeliwaka a tinhlengeletanwini ta miganga ni ta swifundzra. Wukaneli lebyo byi hi pfuna ku tsrhama na hi tiva tindondzro ta wukriste ni ku va hi tiya a ntizrweni wa Mfumu. Loko hi zramba mani na mani kun’we ni lava nyonxelaka, hi nga kota ku hetisisa swinyingi a ku pfuneni ka vhanu akuva va tiva tindondzro ta Bibele ta masungulu.

⁸ Ka wukaneli bya le livaleni ku buliwa hi timhaka ta ku hambana-hambana. Wukaneli lebyo byi vulavula hi tindondzro ta Bibele ni wuprofeta, minsinya ya milawu ya Matsralwa ni swilayu leswi khumbaka wutomi bya ndangu ni wukati, swikazratu swa vampshwa ni mahanyela ya wukriste. Wukaneli byimbeni byi khanela hi mintizro ya ku hlamalisa ya Yehovha. Byimbeni byi khanela hi leswi namunhla hi dondzraka swone ka swikombiso swa lipfumelo, xivindzri ni ku dumbeka ka vhanu va le minkameni ya Bibele.

⁹ Akuva hi pfuneka hi ku helela hi wukaneli bya le livaleni, hi fanela ku zreyisisa ndleve, hi pfula Matsralwa lama hlayiwaka hi xikaneli hi tlhela hi landzrelelisa loko xi ma dondzra ni ku ma tlhamuxela. (Lk 8:18) Loko hi tiyiseka hi mintxhumu leyi ku khaneliwaka ha yone, hi ta kota ku tiyimisela ku womelelana na yone ni ku yi tizrisa.​—1Te 5:21.

¹⁰ Loko ku ni swikaneli, handle ka ku ganaganeka a bandla dzri ta va ni wukaneli bya le livaleni vhiki ni vhiki. Hi ntolovelo leswo swi yentxiwa hi ku zramba swikaneli swa mabandla ya le kusuhi. Loko ku ni swikaneli switsrongo, wukaneli lebyi byi nyikeliwa loko swi koteka.

¹¹ Xiyenge xa wubidzri xa ntlhanganu wa ku hela ka vhiki i Dondzro ya Xihondzro Xa Ku Zrindzra, ku nga bulu dzra swivutiso ni tinhlamulo ledzri seketeliwiki ka tinhloko-mhaka leti humexiwaka ka Xihondzro Xa Ku Zrindzra. Hi ku tizrisa Xihondzro Xa Ku Zrindzra, Yehovha a hi nyika swakuda swa moya hi nkama wa kone.

¹² Tinhloko-mhaka ta xidondzro minkama ya ku tala ti kombisa matizrisela ya minsinya ya milawu ya Bibele ka wutomi bya siku ni siku. Ti tiyisa vakriste akuva va lwa ni ‘moya wa misava’ ni mahanyela lama nga basangakiki. (1Ko 2:12) Hi ku tizrisa Xihondzro Xa Ku Zrindzra, a tindondzro ta Bibele ni wuprofeta byi ya byi hi vaningela, leswi yentxaka hinkwezru hi tsrhama na hi twisisa xihlayelamfuzri ni ku tsrhama a ndleleni ya valulami. (Ps 97:11; Pr 4:18) Ku va kone ni ku hlengemela ka Dondzro ya Xihondzro Xa Ku Zrindzra swi nga hi pfuna leswaku hi nyonxa hi dumbo dzra misava leyimpshwa ya ku lulama ya Yehovha. (Ro 12:12; 2Pe 3:13) Ku tlhangana kwezru ka wukriste ku hi pfuna ku txutxela mihandzru ya moya ni ku kulisa ku navela kwezru ka ku tizrela Yehovha hi nkhinkhi. (Ga 5:22, 23) Hi pfuniwa ku tiyisela mindzringo ni ku yaka ‘wupfundzri lebyinene lebyi nga masungulu’ ya nkama lowu taka akuva hi ‘tikhomela vutomi lebyi nga byone’.​—1Tm 6:19; 1Pe 1:6, 7.

¹³ Xana hi nga pfunekisa kuyini hi ku helela hi lulamiselo ledzri dzra swakuda swa moya? Hi fanela ku lulamisela dondzro na ka ha li nkama, wuswezru kumbe hi ndangu, hi vona matsralwa lama tsrhahiwiki hi tlhela hi hlamula hi mazritu yezru loko ntlhanganu wu famba. Leswi swi ta yentxa leswaku a xihlayelamfuzri xi nhingena a timbilwini tezru nakone vambeni va ta pfuneka loko va twa mazritu yezru ya lipfumelo. Hi ku yingiseta ha hombe tinhlamulo ta vambeni, hi ta susa londzrovoto ka dondzro vhiki dzrin’wana ni dzrin’wana.

MINTLHANGANU YA LE MAKAZRI KA VHIKI

¹⁴ A bandla dzri tlhangana vhiki ni vhiki a Ndlwini ya Mfumu leswaku dzri hamba ntlhanganu lowu liki: Wutomi Ni Wutizreli Byezru Bya Wukriste. Ntlhanganu lowu wa swiyenge swizrazru wu yentxeliwe ku hi pfuna ku kuma ‘ntamu wa ku yanakanya’ swanga vatizreli va Xikwembu Nkulukumba. (2Ko 3:5, 6) A xiyimiso xa kone ni dzrungula swi nyikeliwa hweti ni hweti ka Xibukwana Xa Ntlhanganu Wa Wutomi Ni Wutizreli Byezru Bya Wukriste. A Xibukwana Xa Ntlhanganu Wa Wutomi Ni Wutizreli xi tlhela xi va ni swikombiso swa ku bula hi Bibele leswi nga tizrisiwaka a nsin’wini.

¹⁵ A xiyenge xa ku sungula xa ntlhanganu lowu, lexi liki Wukosi Byi Nga Bibeleni, xi hi pfuna ku twisisa mongo wa dzrungula dzra kukazri dzra Bibele ni ku vona ndlela leyi hi nga dzri tizrisaka ha yone. A xiyenge lexi xi patsra wukaneli, ku dondzra ka Bibele ni bulu ledzri seketeliwiki ka ku dondzra ka Bibele ka vhiki ni vhiki. Ka Xibukwana Xa Ntlhanganu Wa Wutomi Ni Wutizreli ku ni mifoto ni switoloveto leswi hi pfunaka ku twisisa dzrungula dzra Bibele. Ku kambisisa koloko ka Bibele hi wuyenti ka hi pfuna a wuton’wini byezru ni ka ndlela leyi hi dondzrisaka ha yone ‘akuva mhunu wa Xikwembu Nkulukumba ava lwa hetisekiki, a bekiseliwa mintizro leminene hinkwayu’.​—2Tm 3:16, 17.

¹⁶ A xiyenge xa wubidzri xa ntlhanganu, lexi liki Tihite Ntizrweni Wa Nsimu, xi yentxeliwe ku nyika hinkwavu mukhandlu wa ku dondzra ku zrezra ni ku yampswisa wuswikoti byavu bya ku zrezra ni ku dondzrisa. Handle ka swiyenge leswi nyikiwaka swidondzrana, ku tlhela ku kambisisiwa ma-vídeo lama nyikelaka swikombiso swa ku bula hi Bibele. Xiyenge lexi xa ntlhanganu xi hi pfuna ku va ni ‘lidzrimi dzra mudondzrisiwa’ leswaku hi ta kota ku pfuna ‘lwa heliki mbilu’.​—Eza 50:4.

¹⁷ A xiyenge xa wuzrazru, lexi liki Ku Hanya Swanga Vakriste, xi kombisa matizrisela ya minsinya ya milawu ya Bibele a wuton’wini byezru bya siku ni siku. (Ps 119:105) A xiyenge lexi xi khomiwe hi Dondzro Ya Bibele Ya Bandla. Xiyenge lexi xi famba hi swivutiso ni tinhlamulo, ku fana ni Dondzro ya Xihondzro Xa Ku Zrindzra.

¹⁸ Hweti ni hweti loko Xibukwana Xa Ntlhanganu Wa Wutomi Ni Wutizreli Byezru Bya Wukriste xi tlhasa, mutlhanganisi wa huvo ya vakulu, kumbe nkulu lweyi a mu pfunisaka, a kambisisa swiyenge ha xin’we ava a swi yavela vabeki va swone. Vhiki ni vhiki, nkulu lweyi a dondzrisaka hi ndlela leyinene, lweyi a pfumeleliwiki hi huvo ya vakulu a tizra swanga mufambisi wa ntlhanganu. Ntizro wakwe wu patsra ku tiyisekisa leswaku ntlhanganu wu sungula ni ku hela hi nkama, ni ku kulungela a tlhela a khwavela lava nga ni swiyenge swa swidondzrana.

¹⁹ Loko hi va ni xihena xa ku lulamisela, hi hlalela hi tlhela hi hlengemela hi ku yangula ka Ntlhanganu Wa Wutomi Ni Wutizreli, hi kuma wutivi bya Matsralwa, hi twisisa minsinya ya milawu ya Bibele, hi zrezra madzrungula lamanene hi ku tiyiseka hi tlhela hi kuma wuswikoti bya ku hamba vadondzrisiwa. Lava va hlalelaka mintlhanganu na va nga li Timboni leti babatisiwiki na vone va pfuneka hi wunghanu lebyi kufumelaka ni mabulu ya moya lama yakaka. Akuva hi kota ku lulamisela ntlhanganu lowu ni yimbeni ha hombe hi nga tizrisa Watchtower Library, JW Library^®, BIBLIYOTEKA Dzra Watchtower Ka Internet^™, ni bibliyoteka dzra Yindlu ya Mfumu. A bibliyoteka dzra Yindlu ya Mfumu dzri ni mabuku ya Timboni ta Yehovha, Índice das Publicações da Torre de Vigia kumbe Nkongomiso Wo Endla Ndzavisiso Wa Timbhoni Ta Yehovha, ku patsra ni Mabibele lama ndzruluteliwiki hi tindlela timbeni, concordância, xitlhamuxela-mazritu ni mabuku mambeni lama pfunaka. Bibliyoteka ledzri dzri nga tizrisiwa ha mani na mani na mintlhanganu yi nge si na sungula ni loko yi helile.

MINTLHANGANU YA NTIZRO WA NSIMU

²⁰ Mintlawa ya nsimu yi ta hamba mintlhanganu ya xihatla hi makhambi ya ku hlawa a makazri ka vhiki ni hi ku hela ka vhiki leswaku yi ya nsin’wini. Mintlhanganu leyi yi talisa ku yentxeliwa a makaya kumbe a mimbangwini yimbeni leyi fanekelaka. A Yindlu ya Mfumu na yone yi nga tizrisiwa leswaku ku tlhanganiwa kone. Loko mintlawa ya nsimu yi tlhangana a mimbangwini ya ku hambana-hambana na yi li yitsrongo swi nabyalisela vazrezri ku tlhasa lomu ntlhanganu wu hambeliwaka kone ni ku hatla va sungula nsimu. Vazrezri va nga yaviwa hi ku kahlula va tlhela va ya nsin’wini handle ka ku da nkama. Mulaviseli wa ntlawa a nga ha tlhela a kota ku pfuna hi ku nabyala swizro swa ntlawa wakwe. Nambi leswi swi pfunaka ku tlhangana hi mintlawa yitsrongo, ku nga ha va ni swiyimu leswi djulaka kuva mintlawa leyo yi tlhangana kun’we. Hi xikombiso, loko vazrezri lava yaka nsin’wini a makazri ka vhiki va li vatsrongo swinene, swi nga pfuna kuva ku tlhanganisiwa swintlawana leswo kumbe kuva hinkwavu va kumana a Ndlwini ya Mfumu kumbe kumbeni lani ku fanelekaka. Xileswo, vazrezri va ta kuma nkama wa ku tizra na yene. Bandla dzri nga ha tlhela dzri vona leswaku swa pfuna ku tlhangana a Ndlwini ya Mfumu hi maferiyadu. Kumbe a bandla dzri nga ha tlhela dzri hlawula ku hamba ntlhanganu wa nsimu a ntsrhaku ka Dondzro ya Xihondzro Xa Ku Zrindzra.

²¹ Loko mintlawa yi tlhangana wuswayone, mulaviseli wa ntlawa hi yene a taka zrangela hi ku fambisa ntlhanganu wa ntizro wa nsimu. Makhambi mambeni, mulaviseli wa ntlawa wa nsimu, a nga ha yavela mupfunisi wakwe kumbe makwezru mumbeni lwa fanelekaka ku fambisa ntlhanganu. Mufambisi a fanela ku tilulamisela ha hombe akuva a bula hi mintxhumu leyi tizraka ni leyi pfunaka a ntizrweni wa nsimu. Ku yentxiwa malulamiselo ya nsimu kutani mun’we ka ntlawa a hamba xikhongoto. Hi ku hatlisa a ntlawa wu hangalaka wu ya nsin’wini. Mintlhanganu leyo yi fanela ku heta 5 ku ya ka 7 wa maminutu kambe yi nga ha gomisiwa loko yi yentxiwa ntsrhaku ka ntlhanganu wa bandla. Yi fanela ku tiyisa, yi kombisa leswi nga yentxiwaka a nsin’wini, yi tlhela yi kongomisa lava yaka ntizrweni wa ku zrezra. Lavampshwa kumbe lava djulaka mpfuno va fanela ku tizra ni vazrezri lava wupfiki leswaku va dondzrisiwa.

MALULAMISELO YA MINTLHANGANU A MABANDLENI LAMAMPSHWA KUMBE LAMATSRONGO

²² Loko vadondzrisiwa va ya va tala, nhlayu ya mabandla yi ya yi kula. Hi ntolovelo a xikombelo xa ku vumbiwa ka bandla ledzrimpshwa xi hambiwa hi mulaviseli wa muganga. Nambitanu, ka swiyimu swimbeni, mintlawa leyi nga yitsrongo yi nga ha swi vona swi yapswa ku titlhanganisa ni bandla ledzri nga kusuhi.

²³ Minkama yimbeni, swi nga yentxeka mabandla lama nga matsrongo ma vumbiwa ntsena hi vamakwezru va xisati. Loko swi li tanu, makwezru wa xisati lweyi a hambaka xikhongoto a bandleni kumbe a fambisaka mintlhanganu a fanela ku tifuneketa nhloko, hi lani Matsralwa ma kongomisaka ha kone. (1Ko 11:3-16) Ka swiyimu swinyingi, a yentxa hi ku tsrhama, a langusa ntlawa. Vamakwezru va xisati a va beki wukaneli a mintlhanganwini. Kambe, va dondzra dzrungula ledzri nyikeliwaka hi nhlengeletanu na va dzri tlhamuxela; makhambi mambeni va nga bulisana ha dzrone kumbe va yentxa hi ku hamba nkombiso. Hofisi dzra zrwavi dzri kombela makwezru mun’we wa xisati leswaku a yamukela mapapela ni ku fambisa mintlhanganu. Hi ku famba ka nkama, loko vamakwezru va xinuna va faneleka, hi vone va taka hamba va yentxa mintizro leyo.

TINHLENGELETANU TA MUGANGA

²⁴ Lembe ni lembe, ku yentxiwa malulamiselo ya leswaku mabandla lawa ma nga ka muganga wun’we ma va ni tinhlengeletanu tibidzri ta muganga lani ha yin’we yi khomiwaka hi siku dzrin’we. Swiyentxakalo leswo swa ku nyonxisa swi nyika hinkwavu lava nga kone a mukhandlu wa ku ‘yanamisa’ timbilu tavu ka xinakulobye xa wukriste. (2Ko 6:11-13) Leswaku yi yanelisa swivileleko swa kukazri swa ku hlawuleka, a nhlengeletanu ya Yehovha yi lulamisela tinhloko-mhaka ta le Matsralweni ni swiyenge swa ku hambana-hambana swa minongonoko leyi. Dzrungula ledzri dzri nyikeliwa hi tindlela ta ku fana ni wukaneli, minkombiso, ni ku bulisana. Ndondzro leyo yi tlhasaka hi nkama yi yaka hinkwavu lava va yi hlalelaka. Tinhlengeletanu leto ti nyika vadondzrisiwa lavampshwa mukhandlu wa ku babatisiwa swanga xikombiso xa ku tinyiketela kwavu ka Yehovha.

TINHLENGELETANU TA XIFUNDZRA

²⁵ Kan’we hi lembe ku khomiwa tinhlengeletanu letikulu. Hi ntolovelo i tinhlengeletanu ta swifundzra ta masiku mazrazru, lani ku tlhanganisiwaka mabandla ya miganga ya ku siyana-siyana. Mazrwavi lamatsrongo ma nga ha vona swi pfuna kuva mabandla hinkwawu lawa ma laviseliwaka hi zrwavi ledzro ma tlhangana mbangu wun’we. Ka matiko mambeni, malulamiselo ya mintlhanganu leyo ma nga ha yentxiwa hi ku ya hi swiyimu kumbe hi ku ya hi nkongomiso lowu pfaka ka nhlengeletanu. Makhambi mambeni, a matikweni mambeni ku yentxiwa tinhlengeletanu letikulu ta matiko kumbe ta ku hlawuleka leti hlaleliwaka hi makhulu-khulu ya Timboni leti pfaka ka matiko ya ku hambana-hambana. Ku sukela a malembeni ntsrhaku, vanyingi va twe madzrungula lamanene ya Mfumu hi kola ka ku haxiwa ka mintlhanganu leyo leyikulu ya Timboni ta Yehovha.

²⁶ Ka vhanu lava tinyiketeliki ka Yehovha, a tinhlengeletanu letikulu i mikhandlu leyi nyonxisaka ya ku gandzrela Yehovha na va nyonxile. Yi yentxa leswaku xihlayelamfuzri xi ya xi vaninga. Ka tinhlengeletanu timbeni ku humexiwa mabuku mampshwa akuva mhunu a titizrisela wone, ku dondzra ha wone a bandleni kumbe ku ma tizrisela a nsin’wini. Tinhlengeletanu letikulu ti tlhela ti va ni babatiso. Tinhlengeletanu letikulu ti ni lisima dzrikulu a ku pfuniseni ka leswaku vhanu va kula hi tlhelo dzra moya. Ti yentxa swi voneka leswaku vhanu va Yehovha hakunene va vumba ndangu wun’we wa vakriste lava tinyiketeliki a misaveni hinkwayu, lava tivekaka hi mfungu lowu hlawulekisaka vadondzrisiwa va Yesu Kriste.​—Yh 13:35.

²⁷ Loko hi hlalela mintlhanganu ya bandla, tinhlengeletanu ta miganga ni tinhlengeletanu letikulu ta vhanu va Yehovha, ha tiyisiwa akuva hi yentxa ku zrandzra ka Yehovha. Hi tlhela hi sizreleliwa ka minkutxetelo ya misava leyi nga bekaka nghozini lipfumelo dzrezru dzra wukriste. Mintlhanganu leyi hinkwayu yi phatimisa ni ku dzrumisa Yehovha. (Ps 35:18; Pr 14:28) Ha mu tlangela Yehovha hi leswi a hi nyikaka mikhandlu leyi ya moya leyi pepisaka vhanu vakwe lava tinyiketeliki a minkameni leyi ya wugamu.

XILALELO XA HOSI

²⁸ Kan’we hi lembe, hi siku ledzri Yesu Kriste a fiki ha dzrone, mabandla ya Timboni ta Yehovha a misaveni hinkwayu ma tlangela Xidzrimuxo xa Lifu dzra Kriste, kumbe Xilalelo xa Hosi. (1Ko 11:20, 23, 24) Lowu i ntlhanganu wa lisima swinene wa lembe ka vhanu va Yehovha. Hi leletiwa hi ku kongoma leswaku hi tlangela Xidzrimuxo.​—Lk 22:19.

²⁹ A siku dzra Xidzrimuxo dzri fambisana ni siku dzra Paska dzra le Bibeleni ledzri kombisiwaka a Matsralweni. (Eks 12:2, 6; Mt 26:17, 20, 26) A Paska a ku li nkhuvu wa lembe ni lembe wa va-Israyele, lowu fambisanaka ni ku huma kwavu a Egipta hi 1513 M.N.Y. Hi nkama wolowo, Yehovha a hlawule siku dzra wu-14 dzra hweti yavu ya ku sungula leswaku va da xihambana xa Paska ha dzrone ni kuva va huma a wukazraweni bya Egipta. (Eks 12:1-51) Siku ledzri dzri kumeka hi ku konta 13 wa masiku ku sukela a ku thwaseni ka n’weti wumpshwa wu fungaka ku sungula ka nguva ya malanga a Yerusalema. Hi ntolovelo a xidzrimuxo xi yentxiwa hi n’weti wa ku tala lowu fungaka ku sungula ka malanga a Yerusalema.

³⁰ Mazritu ya Yesu ha byakwe lama nga ka Mattheo 26:26-28 ma kombisa ndlela leyi Xidzrimuxo xi yentxiwaka ha yone. A hi nkhuvu wa swihilahila kambe i nkhuvu wa swakuda swa ku fananisa leswi diwaka hi lava taka seketela Yesu Kriste ka Mfumu wakwe wa le matilweni. (Lk 22:28-30) Vakriste lavan’wana hinkwavu lava tinyiketeliki ni vhanu lava swi nyonxelaka va kutxiwa ku va kone ka Xilalelo Xa Hosi swanga vahlaleli. Ku va kone kwavu, ku kombisa leswaku va dzri tlangela lulamiselo ledzri Yehovha a dzri yentxiki leswaku a pfuna vhanu hinkwavu hi ku tizrisa N’wanakwe, Yesu Kriste. Na Xidzrimuxo xi nge si na tlhasa, ku nyikeliwa wukaneli bya le livaleni bya ku hlawuleka akuva byi pfuxa ku nyonxela xiyentxakalo lexi ni ku yengesela ku zron’weka hi ku dondzra Bibele.

³¹ Timboni ta Yehovha hi ku nyonxa lokukulu ti hlunyela mikhandlu ya ku tlhangana kun’we, lani ‘hi yanakanyanaka, hi susumetanaka lizrandzrwini ni swiyentxweni leswinene’. (Hb 10:24) A nandzra wa ku dumbeka ni ku tlhazriha a tsrhama na a lulamele ku hi bekisela mintlhanganu leyo hi ku ya hi xivileleko xezru xa moya. Malandzra hinkwawu ya Yehovha kun’we ni vhanu lava swi nyonxelaka va kutxiwa ku londzrovota hi ku helela a malulamiselo ya ku tlhangana nkama ni nkama. Loko hi tlangela hi mbilu hinkwayu malulamiselo lawa Yehovha a hi nyikaka hi ku tizrisa nhlengeletanu yakwe, swi yentxa malandzra ya Xikwembu Nkulukumba ma va ni wumun’we. Xa lisima ngopfu, hi dzrumisa ni ku phatimisa Yehovha.​—Ps 111:1.