Tindlela Ta Ku Zrezra Madzrungula Lamanene

YESU a siyele valandzreli vakwe xikombiso xa ku xi landzrela hi ku va muzrezri lwa hisekaka wa madzrungula lamanene. A a yela vhanu a ya bula navu ni ku va dondzrisa a makaya kwavu ni le mimbangwini ya mani na mani. (Mt 9:35; 13:36; Lk 8:1) Yesu a vulavule ni vhanu hi ku kongoma, a dondzrise vadondzrisiwa vakwe na va li wuswavu a tlhela a vulavula ni switsrhungu leswikulu. (Mr 4:10-13; 6:35-44; Yh 3:2-21) A a londzrovota mikhandlu leyinene akuva a vulavula mazritu lama kutxaka ni lama nyikaka dumbo. (Lk 4:16-19) Nambi loko a djula ku wisa kumbe ku beliwa hi moya, a a nga tsrhiki mukhandlu wa ku nyikela wumboni wu khaluta. (Mr 6:30-34; Yh 4:4-34) Loko hi dondzra wudzrunguli lebyi huhutiwiki bya wutizreli bya Yesu, xana a swi hi kutxi ku mu yetisela? Hakunene ha kutxeka, hi lani swi viki ha kone ka vapostola.​—Mt 4:19, 20; Lk 5:27, 28; Yh 1:43-45.

² Vona mikhandlu leyi pfulekeliki vakriste namunhla ya ku hlengemela ka ntizro lowu sunguliwiki ha Yesu Kriste kolomu ka 2.000 wa malembe lama khalutiki.

KU ZREZRA HI YINDLU NI YINDLU

³ Swanga Timboni ta Yehovha, ha dzri tiva lisima dzra ku zrezra madzrungula lamanene ya Mfumu hi ndlela leyi hlelekiki hi muti ni muti. Hi zrezra ngopfu hi ndlela leyi lakakuva hi tiviwa ha yone. Handle ka leswo, mabindzru lamanene lama kumiwaka ma tiyisekisa wutlhazri bya ku tizrisa yentxela ledzro akuva ku zrezreliwa vhanu va ntsrandzra-vahlayi hi nkama wutsrongo. (Mt 11:19; 24:14) Ku zrezra hi yindlu ni yindlu ku tikombise ku li ndlela leyinene ya kuva hi kombisa lizrandzru ka Yehovha ni ka wa le kwezru.​—Mt 22:34-40.

⁴ Ku zrezra hi yindlu ni yindlu a swi sunguliwanga hi Timboni ta Yehovha ta nan’waka. Mupostola Pawulo a hlaye leswaku a a dondzrisa a mitini. Loko a vulavula ni vakulu va le Efesa mayelanu ni wutizreli byakwe a te: ‘A ku sukela sikwini dzra ku sungula ledzri ndzri nga tlhasa ha dzrone Asia, . . . a ndzri n’wi fihlelanga ntxhumu wa leswi faneliki ku n’wi pfuna, ndzri nga txhavi ku n’wi dzrungulela swone, ni ku n’wi dondzrisa . . . ni le tindlwini kumbe hi yindlu ni yindlu.’ Hi ndlela leyo ni timbeni, Pawulo a nyikele wumboni ‘ka va-Yuda ni va-Grika a ku ndzrulukela kumbe ku tisola ku Xikwembu Nkulukumba ni ku pfumela ku Hosi yezru Yesu Kriste.’ (Min 20:18, 20, 21) A nkameni wolowo, a vafumi va Roma a va hlohlotela ku gandzreliwa ka swithombe, nakone vanyingi, a va li ‘vatxhavi va swikwembu’. A swi li swa xihatla kuva vhanu va djula ‘Xikwembu Nkulukumba lwa nga hamba misava ni hinkwaswu’ Lweyi a a ‘leleta vhanu hinkwavu a mimbangwini hinkwayu, leswaku va ndzruluka’.​—Min 17:22-31.

⁵ Namunhla, xivileleko xa ku tlhasisela vhanu madzrungula lamanene i xa xihatla ngopfu swinene. A wugamu bya xiyimu lexi xa ku biha byi kusuhi swinene. Ku vona xivileleko lexo swi hi kutxa ku yengesela mintamu yezru. Ku sukela khale, a yi si va kone ndlela ya ku yapswa ya ku kuma vhanu lava nga ni ndlala ya xihlayelamfuzri ku tlula ku zrezra hi muti ni muti. Mazrezrela lawa ma ha li ya manene ngopfu ku fana ni le masikwini ya Yesu ni vapostola.​—Mr 13:10.

⁶ Xana wa kumeka hi xitalu ka ku zrezra hi yindlu ni yindlu? Loko u kumeka, tiyiseka leswaku Yehovha a nyonxa ngopfu ha wene. (Ezk 9:11; Min 20:35) Swi nga yentxeka swi nga ku nabyaleli ku zrezra hi yindlu ni yindlu. N’waninkama u ni swikazratu a nyameni kumbe u zrezrela ka nsimu leyi vhanu va ku tala va nga swi yamukelikiki. Kumbexana a mfumu wa tsimbisa. Swi nga yentxeka u li mhunu wa tingana nakone swi ku bindzrela ku sungula mabulu ni vhanu lava u nga va tivikiki. Hi kola ka leswo, nkama ni nkama loko u hlengemela a ku zrezreni hi yindlu ni yindlu swi ku yentxa u hlatiyela. U nga heli ntamu. (Eks 4:10-12) A xiyimu xaku, a xi hambananga ni xa vamakwenu a mimbangwini yimbeni ya ku tala.

⁷ Yesu a dumbise leswi ka vadondzrisiwa vakwe: ‘Lavisani, mine ndzri na n’wine hi masiku hinkwawu, ku kondzra ku hela minkama.’ (Mt 28:20) Xidumbiso lexi xa hi tiyisa ka ntizro lowu wa ku yentxa vadondzrisiwa. Hi titwa ku fana na mupostola Pawulo lwa tiki: “Ka hinkwaswu ni ni ntamu hi kola ka lweyi a ni tiyisaka.” (Flp 4:13, NM) Londzrovota hi ku helela a malulamiselo ya bandla ya ku nyikela wumboni hi muti ni muti. Loko u tizra ni vambeni, u ta kutxiwa u tlhela u pfuniwa. Khongota u kombela mpfuno leswaku u hlula swikazratu swini na swini leswi u nga ha tlhangavetanaka na swone, nakone tihite swinene swanga muzrezri wa madzrungula lamanene ya Mfumu.​—1Yh 5:14.

⁸ Loko u vulavula ni vhanu van’wana mayelanu ni madzrungula lamanene, u ta va ni mukhandlu wa ku va byela ku ‘lavisela loku u nga na kone’. (1Pe 3:15) U ta ya u vona ku hambana loku ku nga kone ka lava va nga ni ku lavisela ka Mfumu wa Xikwembu ni ka lava va nge ke na kone. (Eza 65:13, 14) U ta nyonxa hi ku tiva leswaku u xi yingisetile xileleto xa Yesu lexi liki ‘ku vaninga kwenu a ku vaningise xiswoswo’ nakone u nga ha va ni mukhandlu wa ku pfuna vambeni ku tiva Yehovha ni xihlayelamfuzri lexi yisaka wuton’wini lebyi nga helikiki.​—Mt 5:16; Yh 17:3; 1Tm 4:16.

⁹ Ku yentxiwa malulamiselo ya ntizro wa ku zrezra hi muti ni muti hi ku hela ka vhiki ni le makazri ka vhiki. A mimbangwini leyi swi kazrataka ku kuma vhanu loko byi xile, mabandla man’wana ma yentxa malulamiselo ya ku zrezra ni madambu. Vhanu va nga ha yamukela vayeni hi ku nabyala a nhlikanhini kumbe ni madambu ku tlula loko ka ha li mixo.

KU DJULISISA LAVA SWI VA FANELAKA

¹⁰ Yesu a lelete vadondzrisiwa vakwe ku djulisisa lava swi va fanelaka. (Mt 10:11) A wutizrelini byakwe, Yesu a nga gamelanga ka ku djuletela vhanu lava a swi va fanela hi muti ni muti ntsena. Nakunene, a a londzrovota mikhandlu hinkwayu leyi a yi mu pfulekela leswaku a nyikela wumboni hi tindlela ta ku hambana-hambana, ku patsra ni hi xitxhuketa. (Lk 8:1; Yh 4:7-15) Vapostola na vone va zrezrele vhanu a mimbangwini ya ku siyana-siyana.​—Min 17:17; 28:16, 23, 30, 31.

¹¹ Hi lani ku fanaka namunhla, nkongometo wezru i ku yentxa hi lani hi nga kotaka ha kone akuva hi tlhasisela hinkwavu dzrungula dzra Mfumu. Leswo swi tlhamuxela ku yetisela ndlela leyi Yesu ni vapostola vakwe va yi tizrisiki ka ntizro wa ku yentxa vadondzrisiwa, ni ku fambisana ni ku txintxa ka minkama ni swiyimu swa vhanu va le nsin’wini yezru. (1Ko 7:31) Hi xikombiso vazrezri va dzri vonile bindzru dzra ku va va yendzrela vhanu a mimbangwini ya ku xavisela kone. Ku nyikela wumboni a xitaratwini swi tikombe na swi ni mabindzru a matikweni ya ku tala, ku fana ni ku zrezrela a swizrambeni, lomu mimovha yi bekiwaka kone kumbe kun’wana ni kun’wana lomu vhanu va nga kumiwaka kone. Mabandla mambeni ma tizrisa mimeza ni swikarinyana a nsin’wini yavu. Handle ka leswo, zrwavi dzri nga ha hamba malulamiselo ya ku nyikela wumboni bya ku hlawuleka a madoropeni lomu ku taliki hi vhanu, hi ku tizrisa vamakwezru va mabandla ya ku siyana-siyana. Swanga mihandzru, lava va nga kumiwiki a makaya loko vazrezri va va yendzrela va nga ha kumiwa a mimbangwini yimbeni va va va zrezreliwa madzrungula lamanene.

¹² Loko hi kuma vhanu lava kombisaka ku nyonxela a dzrungula dzra Bibele ka nsimu ya mani na mani hi nga va hanana buku kumbe xibukwana lexi fanelekaka. Akuva u txutxela ku nyonxela, u nga nyikela a nhlayu yaku ya telefone ka mhunu lwa kombisiki ku nyonxela ni ku hamba malulamiselo ya ku hamba mpinda; mu kongomise ka jw.org, kumbe u mu komba mbangu wa le kusuhi lomu mintlhanganu ya bandla yi khomeliwaka kone. U ta swi vona leswaku ku nyikela wumboni ka mimbangu ya mani na mani i ndlela leyi nyonxisaka ya ku yentxa leswi yengeselekiki a ntizrweni waku.

¹³ Nambitanu, a ntizro lowu yaveliwiki vakriste namunhla a wu heleli ka ku zrezra madzrungula lamanene ntsena. Loko u djula ku humelela a ku pfuneni ka vambeni leswaku va yamukela a xihlayelamfuzri lexi yisaka a wuton’wini, u fanela ku hamba timpinda makhambi ya ku tala ka lava va kombisiki ku nyonxela akuva va kula va va vakriste lava wupfiki.

KU HAMBA TIMPINDA

¹⁴ Yesu a byele vadondzrisiwa vakwe a ku: ‘N’wi ta va timboni tanga . . . ku ya tlhasa a wugan’wini bya misava.’ (Min 1:8) Kambe a tlhele a va byela leswi: ‘Fambani mi ya dondzrisa vamatiko hinkwawu, . . . n’wi va dondzrisa ku bekisa hinkwaswu leswi ndzri n’wi leletiki swone.’ (Mt 28:19, 20) Ku hamba timpinda swi nga va xihlovo xa ku nyonxa a ntizrweni wa Yehovha. Vhanu lava kombisiki ku nyonxela madzrungula lamanene loko u bule na vone hi khambi dzra ku sungula, va nga nyonxa ngopfu loko va tlhela va ku vona. Loko u va byela leswi yengeselekiki mayelanu ni dzrungula dzra Bibele, u nga ha tiyisa lipfumelo dzravu ka Xikwembu Nkulukumba ni ku va pfuna ku twisisa xivileleko xavu xa moya. (Mt 5:3) Loko u tilulamisela ha hombe ni ku hamba mpinda hi nkama lowu va wu djulaka, u nga kota ku sungula dondzro ya Bibele ya le kaya. Loko u hamba timpinda, hi ntolovelo u fanela ku va ni nkongometo wa ku sungula xidondzro xa Bibele. Handle ka kuva hi byala mbewu ya xihlayelamfuzri, hi tlhela hi yi txhelela.​—1Ko 3:6.

¹⁵ Vambeni swi nga ha va kazratela ku hamba timpinda. Kumbexana swa ku nabyalela ku va ni mabulu ya ku goma ya madzrungula lamanene nakone wa ma zrandzra mazrezrela lawo. Kambe loko u pimisa hi ku tlhelela ka n’winyi wa muti akuva u bula hi dzrungula dzra Bibele, swi nga ha ku txhavisa. Kambe ku tilulamisela ha hombe swi nga ku tiyisa. Tizrisa swidzringanyeto leswi nyikeliwaka ka ntlhanganu wa le makazri ka vhiki. U nga ha tlhela u zramba muzrezri lweyi a wupfiki leswaku u tizra na yene a nsin’wini.

KU FAMBISA SWIDONDZRO SWA BIBELE SWA LE KAYA

¹⁶ Loko a vulavula ni mu prozelita wa muyuda lweyi a a dondzra Zritu dzra Xikwembu Nkulukumba, Filipi lweyi wa mu evhangeli a mu vutise a ku: ‘Xana ke u tiva leswi u swi hlayaka xana?’ Wanuna a hlamula a ku: ‘Xana ndzri ta swi kotisa kuyini, loko ku nge na mhunu lwa taka ndzri kombisa ndlela?’ A dzrungula dzra Bibele ka Amintiṛo ndzrima 8 dzri hi byela leswaku Filipi a sungule hi Tsralwa ledzri wanuna lwiyani a a li ku dzri dondzreni, ‘a mu dondzrisa a evhangeli dzra Yesu’. (Min 8:26-36) A hi swi tivi leswaku Filipi a hete nkama muni ni wanuna lwiyani, kambe a mu tlhamuxele madzrungula lamanene lakakuva a ndzruluka mupfumeli a tlhela a kombela ku babatisiwa. A ndzruluke mudondzrisiwa wa Yesu Kriste.

¹⁷ Vhanu vanyingi namunhla a va dzri tivi ha hombe Bibele, xileswo swi nga ha djula ku hamba timpinda makhambi manyingi ni ku fambisa xidondzro lexi yentiki ku dzringana mavhiki, tihweti, lembe kumbe ku tlula akuva a kombisa lipfumelo kutani a faneleka akuva a babatisiwa. Kambe ku zron’weka ni ku lehisa mbilu loko u pfuna lava timbilu tinene leswaku va va vadondzrisiwa swi ni mabindzru, swanga hi lani Yesu a hlayiki ha kone a ku: “Ku nyika swi tisa ku nyonxa lokukulu ku tlula ku yamukela.”​—Min 20:35, NM.

¹⁸ Handle ka ku ganaganeka u ta djula ku fambisa xidondzro xa Bibele xa le kaya hi ku tizrisa buku ledzri hambeliwiki swoleswo. Loko u tizrisa swileleto leswi u swi kumaka ka ntlhanganu wa xikazri ka vhiki, kumbe ku tizra ni vadondzrisi lava nga ni wuswikoti a bandleni u nga swi kota ku fambisa swidondzro leswi kombisaka nhluvuku, xileswo u pfuna vambeni ku va vadondzrisiwa va Yesu Kriste.

¹⁹ Loko u djula mpfuno akuva u sungula ni ku fambisa xidondzro xa Bibele xa le kaya, titwe na u ntsrhunxekile ku bula ni mun’we wa valanguseli kumbe Mboni kuloni leyi yi humelelaka ka ntizro lowo wa ku fambisa xidondzro xa Bibele. A swidzringanyeto leswi nga ka Xibukwana Xa Ntlhanganu Wa Wutomi Ni Wutizreli leswi kombisiwaka a ntlhanganwini swi ta ku pfuna. Dumba Yehovha u tlhela u mu byela ku navela kwaku hi xikhongoto. (1Yh 3:22) Hi ndlela leyo, loko swi koteka, vana ni kungu dzra ku fambisa dondzro ya Bibele ya le kaya, handle ka xidondzro lexi u nga ha xi fambisaka ni ndangu waku. Hi ku fambisa swidondzro swa Bibele, u ta kulisa ku nyonxa kwaku a wutizrelini byaku.

KONGOMISA LAVA NYONXELAKA A NHLENGELETANWINI YA YEHOVHA

²⁰ Loko hi pfuna vhanu ku tiva Yehovha Xikwembu Nkulukumba ni ku va vadondzrisiwa va Yesu Kriste, va ndzruluka xiyenge xa bandla. Swidondzro swa Bibele swi ta yentxa nhluvuku hi tlhelo dzra moya swi tlhela swi wupfa loko swi tiva nhlengeletanu ya Yehovha ni ku tizrisana na yone. I swa lisima ku swi dondzrisa ku yentxa leswo. Ma-vídeo ni broxura ledzri liki I Vamani Lava Yentxaka Ku Zrandzra Ka Yehovha Namunhla? swi yentxeliwe ku hetisisa nkongometo lowo. Dzrungula dzrimbeni dzri nga ka ndzrima 4 ya broxura ledzri dzri nga pfuna.

²¹ Na wa ha sungula xidondzro xa Bibele, tekela ku xi pfuna ku vona leswaku Yehovha a le ku tizriseni ka nhlengeletanu yakwe leswaku a hetisisa ntizro wa ku zrezra a misaveni hinkwayu namunhla. Xi tlhamuxele lisima dzra ku tizrisa mabuku lama pfunisaka ku dondzra Bibele, u tlhela u xi tlhamuxela ndlela leyi ma hambiwaka ni ku nyikeliwa ha yone a misaveni hinkwayu hi ku tizrisa a vatizri va ku tizrandzrela lava tinyiketeliki ka Xikwembu Nkulukumba. Zramba xidondzro xaku xa Bibele akuva mi famba kun’we a mintlhanganwini a Ndlwini ya Mfumu. Xi tlhamuxele leswi mintlhanganu yi fambisaka xiswone ni ku tlhela u xi kombisa ka vanghanu vaku a ndlwini ya Mfumu. Tlhela u xi pfuna ku tolovelana ni Timboni ta Yehovha timbeni ka tinhlengeletanu ta miganga ni ka tinhlengeletanu letikulu. Ka mintlhanganu leyi ni swiyentxakalu swimbeni, yentxa xidondzro xaku xi tivonela hi ya xone ndlela leyi vhanu va Yehovha va kombisaka lizrandzru ha yone swanga mfungu wa vakriste va xihlayelamfuzri. (Yh 13:35) Loko lweyi a ha dondzraka ntiyiso a ya a nyonxela nhlengeletanu ya Yehovha, a ta ya a tsrhindzrekela kusuhi na Yene.

TIZRISA MABUKU LAMA SEKETELIWIKI BIBELENI

²² Vakriste va dzana dzra ku sungula a va li vazrezri lava hisekaka va Zritu dzra Xikwembu Nkulukumba. Va kopiyare Matsralwa leswaku va ma tizrisa a wuton’wini byavu ni le ku dondzreni a bandleni. Va tlhele va leleta vambeni leswaku va dondzra ntiyiso wa Zritu dzra Xikwembu Nkulukumba. Makopiya yavu ya ku tsraliwa hi voko a ma li matsrongo hi ntsrengo nakone a va ma bekela lisima swinene. (Kl 4:16; 2Tm 2:15; 3:14-17; 4:13; 1Pe 1:1) Namunhla, Timboni ta Yehovha ti tizrisa ndlela ya nan’waka leswaku ti gandlisa madzana ya mamilhawu ya Mabibele ni mabuku lama pfunisaka ku dondzra Bibele. Swipfunisi leswo swi patsra mabroxura, mabuku, ni marevhixta hi madzana ya tindzrimi.

²³ Loko u li ku zrezreni ka madzrungula lamanene, u nga dzrivali ku tizrisa mabuku ya ku pfunisa ku dondzra Bibele lama humexiwaka hi nhlengeletanu ya Yehovha. Ku tiva ndlela leyi wene u pfunekiki ha yone hi ku dondzra ni ku yanakanyisisa hi mabuku ya Timboni ta Yehovha swi ta ku kutxa ku ma nyika vambeni.​—Hb 13:15, 16.

²⁴ Ku ya ku yengeseleka vhanu lava zrandzraka ku handzra dzrungula hi ku tizrisa internet. Xileswo, handle ka mabuku lama gandlisiwaka, lama seketeliwiki a Bibeleni, a pajina dzrezru dzra internet dzra le nawini, dzra jw.org, i xitizro lexinene xa ku hangalasa madzrungula lamanene. Vhanu a misaveni hinkwayu va nga tizrisa makomputadori akuva va dondzra kumbe ku yingiseta magravhasawu ya Bibele ni mabuku lama seketeliwiki a Bibeleni hi madzana ya tindzrimi. Lava va nga swi zrandzrikiki ku bula na hine kumbe lava tsrhamaka lomu swi kazrataka ku kumana ni Timboni ta Yehovha, va nga kambisisa leswi hi swi kholwaka hi ku tizrisa a jw.org a xihundleni na va li makaya kwavu.

²⁵ Xileswo, minkama hinkwayu loko hi pfulekeliwa hi mukhandlu hi va komba a pajina dzrezru dzra jw.org. Loko a n’winyi wa muti a hi vutisa hi ta lipfumelo dzrezru, hi nga tizrisa telefone dzrezru kumbe komputadori leswaku hi tekela ku mu komba nhlamulo kolanu. Loko hi kuma mhunu lweyi a vulavulaka lidzrimi dzrimbeni, ku patsra ni lidzrimi dzra mavoko, hi nga mu kongomisa ka pajina dzrezru dzra internet akuva a kuma Bibele ni mabuku lama seketeliwiki a Bibeleni hi lidzrimi dzrakwe. Vazrezri vanyingi va kotisa ku tizrisa dzrin’wana dzra ma-vídeo lama kumekaka ka pajina dzrezru dzra internet akuva va sungula mabulu ya Bibele.

KU ZREZRA HI XITXHUKETA

²⁶ Yesu a byele lava a va mu yingiseta a ku: ‘N’wine, n’wi ku vaninga ka misava. . . . A ku vaninga kwenu a ku vaningise xiswoswo a mahlweni ka vhanu va ku tala va ta kota ku vona mintizro yenu leya ku xonga, va ta twalisa Tatana wenu lweyi a nga matilweni.’ (Mt 5:14-16) A vadondzrisiwa lavayani va kombise matsrhamela ya Xikwembu Nkulukumba hi ku yetisela Yesu, lweyi a hlayiki leswi mayelanu na yene: ‘Ndzri livaningo dzra misava.’ Yesu a bekele vakriste xikombiso hi ku tsrhika ‘livaningo dzra wutomi’ dzri vaninga leswaku a pfuna hinkwavu lava a va ta mu yingiseta.​—Yh 8:12.

²⁷ Hi ku fanana, mupostola Pawulo a hi bekele xikombiso leswaku hi xi landzrela. (1Ko 4:16; 11:1) Loko a li a Atena, siku ni siku a a zrezrela hinkwavu lava a a va kuma a bazara. (Min 17:17) Vakriste va le Filipi va xi landzrelile xikombiso xakwe. A ve hi xivangelo lexo Pawulo a va tsraleliki leswaku a va hanya ‘a makazri ka lixaka ledzri dzra ku somboloka dzra ku bola’, lani vone a va vaninga ‘swanga hi swivaningo a misaveni’. (Flp 2:15) Namunhla, hi nga tsrhika xihlayelamfuzri xa Mfumu xi vaninga hi mazritu ni swiyentxo swezru hi ku londzrovota mukhandlu wini na wini wa ku byela van’wana madzrungula lamanene. Nakunene, Xikombiso xezru lexinene swanga vhanu lava lulamiki va tlhela va dumbeka, xi nga kombisa leswaku hi hambanile ni misava. Nambitanu, loko hi byela vambeni madzrungula lamanene, va ta kota ku tiva leswaku ha yini hi hambanile.

²⁸ Ntalu wa vhanu va Yehovha va byela madzrungula lamanene lava va va kumaka a mintizrweni, a xikole, ka swa ku famba ha swone swa mani na mani kumbe kumbeni loko va tihambela mintizro yavu ya siku ni siku. Loko hi li a ku yendzreni, hi nga ha va ni mukhandlu wa ku bula ni vayendzri-kulozri. Mun’wana ni mun’wana wezru a fanela ku xiya mikhandlu ya ku londzrovota mabulu leswaku a nyikela wumboni. Hi fanela ku tsrhama na hi lulamele ku bula ni vambeni ka mukhandlu wini na wini lowu hi pfulekeliki.

²⁹ Hi ta susumeteleka ku yentxa leswo loko hi dzrimuka leswaku hi dzrumisa muvumbi wezru ni ku phatimisa vito dzrakwe. Ku yengesela kolanu, hi nga ha kota ku pfuna vhanu va timbilu tinene ku tiva Yehovha akuva na vone va mu tizrela ni ku kuma dumbo dzra wutomi lebyi nga helikiki, lebyi kumiwaka hi ku kombisa lipfumelo ka Yesu Kriste. Yehovha a nyonxisiwa hi minzamu leyo nakone a yi teka yi li leyi xwengiki.​—Hb 12:28; Mpf 7:9, 10.

NSIMU

³⁰ I ku zrandzra ka Yehovha kuva a madzrungula lamanene ma zrezriwa a misaveni hinkwayu, a madoropeni ni le ntlhaveni. Akuva leswo swi koteka, a mabandla ni vhanu lava tizrelaka a mimbangwini ya le kule va nyikiwa nsimu hi hofisi dzra zrwavi. (1Ko 14:40) Leswi swi fambisana ni lulamiselo ledzri kongomisiwiki ha Xikwembu Nkulukumba hi dzana dzra ku sungula. (2Ko 10:13; Ga 2:9) Leswi a ntizro wa Mfumu wu kulaka hi xihatla a masikwini lawa ya wugamu, swa koteka kuva ku hetisisiwa swinyingi loko a nsimu ya bandla yi hleliwa hi ndlela leyinene.

³¹ A lulamiselo ledzri dzri zrangeliwa hi mulanguseli wa ntizro. A nandzra wa wutizreli a nga yentxa ntizro wa ku yavela nsimu. Ku ni mixaka yibidzri ya nsimu: Nsimu ya ntlawa ni nsimu ya mhunu. Lomu nsimu yi nga yitsrongo, a valaviseli va ntizro va fanela ku lulamisela nsimu leyi a vazrezri va ntlawa lowo va taka zrezra ka yone. Hi tlhelo dzrimbeni, lomu nsimu yi nga yikulu, muzrezri mun’wana ni mun’wana a nga tikumela nsimu yakwe.

³² Muzrezri lweyi a nga ni nsimu yakwe a ta va ni ka ku zrezrela kone minkama yimbeni loko ku nga bekisiwanga ntlhanganu wa ntizro wa nsimu kumbe loko ku ya kumana ni ntlawa swi nga mu pfuni. Hi xikombiso, vazrezri vambeni va yaveliwa nsimu kusuhi ni lomu va tizrelaka kone, xileswo va zrezrela kone hi nkama wa ku wisa kumbe loko va huma ntizrweni. Mindangu yimbeni yi yaveliwa nsimu a kusuhi ni le kaya nakone yi zrezra kone hi madambu ya kukazri. Ku va ni nsimu ya ximhunu leyi nga kusuhi swi nga pfuna muzrezri ku londzrovota swinene nkama lowu a wu bekiseliki ku ya nsin’wini. I ntiyiso leswaku a nsimu ya ximhunu yi nga ha zrezriwa hi ntlawa. Loko u navela ku va ni nsimu yaku u nga ha kombela ka nandzra wa nsimu.

³³ Kumbe i nsimu ya ntlawa leyi yaveliwiki mulanguseli wa ntlawa kumbe i nsimu ya ximhunu leyi nyikiwiki muzrezri, lweyi a nyikiwiki nsimu a fanela ku yentxa keswi a nga swi kotaka leswaku a bula ni mhunu wa kukazri ka miti hinkwayu. A malulamiselo ya ku tizra nsimu hinkwayu ma fanela ku fambisana ni milawu ya ku sizrelela dzrungula leyi tizrisiwaka. Mulanguseli wa ntlawa kumbe muzrezri mun’wana ni mun’wana lweyi a yaveliwaka nsimu a fanela ku lwela ku yi pfala a ndzreni ka mune wa tihweti. Loko u za u pfala a nsimu leyi u yaveliwiki yone u fanela ku tivisa nandzra wa nsimu. Hi ku ya hi swiyimu, a mulaviseli wa ntlawa kumbe muzrezri a nga ha hlawula ku tlhelisa nsimu ka nandzra wa nsimu kumbe ku tlhela a yi tizra.

³⁴ Loko hinkwavu a bandleni va tizrisana, a nsimu yi nga kota ku pfaliwa hi ku helela. Hi nga tlhela hi vhikela kuva vazrezri vabidzri kumbe ku tlula va tizra a nsimu ya yin’we hi nkama wun’we, leswi nga hlundzrulaka vinyi va miti. Xileswo hi ta kombisa xitxhavu ka vamakwezru ni vhanu va le nsin’wini yezru.

KU TIZRISANA A KU ZREZRELENI KA VHANU VA TINDZRIMI HINKWATU

³⁵ Vhanu hinkwavu va fanela ku tiva Yehovha Xikwembu Nkulukumba, N’wana wakwe ni Mfumu. (Mpf 14:6, 7) Hinkwezru hi nyonxela ku pfuna vhanu va tindzrimi hinkwatu ku vitana vito dzra Yehovha leswaku va huluxiwa ni ku yambala wumhunu bya wukriste. (Ro 10:12, 13; Kl 3:10, 11) He swini swikazratu swimbeni leswi humelelaka a ku zrezreni ka madzrungula lamanene a nsin’wini ya tindzrimi ta ku hambana-hambana? Swi nga tlhantlhiwa hi ndlela yini leyi nga pfunaka lavanyingi ku twa dzrungula dzra Mfumu hi lidzrimi ledzri va dzri twisisaka ku yapswa?​—Ro 10:14.

³⁶ A bandla dzrin’wana ni dzrin’wana dzri yaveliwa nsimu hi ku ya hi lidzrimi. Xileswo, a mabandla ya tindzrimi ta ku hambana-hambana ma zrezra xikan’we a mimbangwini leyi ku khaneliwaka tindzrimi ta ku hambana-hambana. Ka swiyimu leswo, i swinene kuva a vazrezri va bandla ha dzrin’we va lwela ku zrezrela vhanu lava khanelaka lidzrimi dzravu. Swi hi ndlela leyi fanaka ni loko ku hambiwa tsima dzra ku nyikela swizrambu. Nambitanu, loko vazrezri va nyikela wumboni hi xitxhuketa kumbe va zrezra hi xikarinyana, va nga bula ni mun’wana ni mun’wana va tlhela va nyikela mabuku hi lidzrimi dzrini na dzrini.

³⁷ Minkama yimbeni, mabandla lama khanelaka lidzrimi dzrimbeni a ma swi koti ku tizra nsimu hinkwayu leyi nga kule. Loko mhaka yi li leyo, a valaviseli va ntizro va mabandla lama patsrekaka va fanela ku bulisana leswaku va kuma ndlela leyinene ya ku pfala nsimu leyo hi ku helela. Ku yentxa leswo swi ta nyika hinkwavu mukhandlu wa ku twa madzrungula ya Mfumu swi tlhela swi sivela ku yentxa ntizro lowu kutani wu yentxiwiki.​—Pr 15:22.

³⁸ Hi fanela ku yentxa yini loko lweyi a hi pfulelaka xipfalu a nga vulavuli lidzrimi dzrezru? A hi fanelanga hi pimisa leswaku a ta yendzreliwa hi vazrezri lava vulavulaka lidzrimi dzrakwe. Vazrezri van’wana va dondzre ku va ni mabulu ya ku goma hi lidzrimi dzrimbeni akuva va zrezrela vhanu lava khanelaka lidzrimi ledzri va talisaka ku dzri twa a nsin’wini yavu. Hi nga ha komba mhunu yelweyo ndlela ya ku dondzra kumbe ku xixa mabuku ka pajina dzrezru dzra internet dzra jw.org hi lidzrimi dzrakwe, kumbe hi mu dumbisa ku mu heketela.

³⁹ Loko mhunu lweyo a nyonxela ha kakunene hi fanela ku zama ku mu djulela mhunu lweyi a fanelekaka akuva a mu pfuna hi lidzrimi ledzri a dzri twisisaka. Hi nga ha tlhela hi mu byela mbangu wa le kusuhi lomu mintlhanganu yi khomeliwaka kone hi lidzrimi dzrakwe. Loko a navela ku yendzreliwa hi mhunu lweyi a vulavulaka lidzrimi dzrakwe, hi nga ha mu komba ndlela ya ku tsrala ka jw.org leswaku a nga kumisiwa kuyini. Hi ndlela leyo a zrwavi dzri ta djuletela muzrezri, ntlawa, kumbe bandla ledzri nga kusuhi akuva dzri mu pfuna.

⁴⁰ Hi fanela ku ya mahlweni hi yendzrela mhunu lweyi a kombisiki ku nyonxela, ku tlhasela lani a hi byelaka leswaku a yendzreliwe hi mumbeni lweyi a vulavulaka lidzrimi dzrakwe. Ka swiyimu swimbeni, a zrwavi dzri ta byela vakulu leswaku a dzri kumanga mhunu lwa vulavulaka lidzrimi dzra mhunu yelweyo. Loko leswo swi yentxeka, hi fanela ku ya mahlweni hi yentxa leswi hi nga swi kotaka akuva hi txutxela ku nyonxela ka n’winyi wa muti. Loko swi koteka hi nga ha dondzra na yene Bibele, kumbexana hi ku pfuniwa hi buku dzra lidzrimi dzrakwe. Loko hi tizrisa swifaniso hi ndlela leyinene ni ku va hi mu kombela ku dondzra matsralwa lama tsrhahiwiki, a ta twisisa tindondzro ta kukazri ta masungulo ta Bibele. A xizro xa ndangu wakwe lexi xi dzri tivakanyana lidzrimi dzrakwe ni lidzrimi dzra mbangu wolowo xi nga ha nyonxela ku mu ndzrulutelela.

⁴¹ Akuva hi kongomisa mhunu lwa nyonxelaka ka nhlengeletanu ya Xikwembu Nkulukumba, hi fanela ku mu zramba a mintlhanganwini yezru, nambi loko a nga swi twisisi ha hombe leswi hlayiwaka. Loko ku dondzriwa tindzrimana, hi nga mu pfuna ku ti kuma a Bibeleni hi lidzrimi dzrakwe loko dzri kumeka. Ku tlhangana ni vambeni a bandleni swi nga mu yaka swi tlhela swi mu pfuna ku kula hi tlhelo dzra moya.

⁴² Ntlawa lowu wa ha ku sungulaka: Ntlawa lowu wu vumbiwa hi nhlayu ya kukazri ya vazrezri lava zrezraka hi lidzrimi ledzri hambaniki ni dzra bandla, nambi loko ku nge na nkulu lweyi a fanelekaka kumbe nandzra wa wutizreli lweyi a nga fambisaka ntlhanganu vhiki ni vhiki hi lidzrimi ledzro. A hofisi dzra zrwavi dzri nga pfumela leswaku a bandla dzri hlengemela ni ntlawa lowu wa ha ku sungulaka loko ku hetisisa timfanelo leti landzrelaka:

1. 1) Loko ku ni ntlawa lowu twisisekaka wa vhanu lava khanelaka lidzrimi ledzri hambaniki ni dzra bandla.

2. 2) Loko ku ni vazrezri va ku hlawanyana lava tivaka lidzrimi ledzro kumbe va navelaka ku dzri dondzra.

3. 3) Loko a huvo ya vakulu yi tibekisele ku zrangela a ku hleleni ka ntizro wa ku zrezra hi lidzrimi ledzro.

Loko a huvo ya vakulu yi navela ku sungula ntlawa, vakulu va fanela ku vutisa mulaviseli wa muganga. Swi nga yentxeka a tiva mabandla mambeni lawa ma zrezrelaka vhanu hi lidzrimi ledzro nakone a nga ha nyikela dzrungula dzra lisima ledzri nga pfunaka ku vona bandla ledzri swi yapswaka ku va ntlawa lowo wu va ka dzrone. Ntsrhaku ka loko bandla ledzri taka vonelela ntlawa dzri kumekile, a vakulu va ta zrumela papela a hofisini dzra zrwavi va kombela ku pfumeleliwa hi nawu kuva bandla dzravu a li dzrone dzri vonelelaka ntlawa.

⁴³ Mintlawa: A hofisi dzra zrwavi dzri nga pfumelela bandla leswaku dzri va ni ntlawa loko dzri hetisisa timfanelo leti landzrelaka:

1. 1) Loko ku ni vhanu vanyingi lava nyonxelaka nakone swi tikomba leswaku a nsimu ya lava vulavulaka lidzrimi ledzro yi ta kula.

2. 2) Loko ku ni vazrezri va ku hlawanyana lava vulavulaka lidzrimi ledzro kumbe va nga ku dzri dondzreni.

3. 3) Loko ku ni nkulu lweyi a fanelekaka kumbe nandzra wa wutizreli lweyi a tibekiseliki ku zrangela ni ku fambisa nambi ku nga va ntlhanganu wun’we hi vhiki, ku fana ni wukaneli bya le livaleni kumbe Dondzro ya Xihondzro Xa Ku Zrindzra hi lidzrimi ledzro.

Loko timfanelo leti ti landzriwa hi ndlela leyi dzringaniseliwiki huvo ya vakulu yi ta zrumela papela ledzri nga ni dzrungula hinkwadzru a hofisini dzra zrwavi, dzra ku kombela leswaku dzri tiveka hi nawu swanga bandla ledzri nga ni ntlawa. Nkulu kumbe nandzra wa wutizreli lweyi a zrangelaka ntlawa lowo a ta vitaniwa “mulaviseli wa ntlawa” kumbe “nandzra wa ntlawa” lweyi a nga ni wutiyanguleli bya ku lavisela ntlawa.

⁴⁴ Loko ntlawa wu simekiwile, huvo ya vakulu va bandla ledzri nga ni ntlawa yi ta hlela swiyenge swimbeni swa ntlhanganu leswi nga yengeseliwaka ka ntlawa ni leswaku a mintlhanganu yi nga khomiwa kangani hi hweti. Ku nga ha tlhela ku hleliwa mintlhanganu ya ntizro wa nsimu wa ntlawa. Hinkwavu a ntlawini va tizra a hansi ka wulaviseli bya huvo ya vakulu leyi yamukeliki ntlawa. Vakulu va ta nyikela swileleto leswi dzringaniselekiki ni ku tlhela va zrangela a ku laviseleni ka swivileleko swa ntlawa. Loko mulaviseli wa muganga a tizra ni ntlawa hi vhiki dzra ku kheteka a bandleni ledzri nga ni ntlawa, a ta nyikela dzrungula dzra ku goma mayelanu ni nhluvuku wa ntlawa ka hofisi dzra zrwavi ku patsra ni swivileleko leswi nga ha vaka kone. Hi ku famba ka nkama, swi nga ha yentxeka a ntlawa wu va bandla. Loko hinkwavu lava patsrekaka va tizrisa swileleto swa le tilweni, Yehovha a ta nyonxa.​—1Ko 1:10; 3:5, 6.

KU ZREZRA HI NTLAWA

⁴⁵ Vakriste lava tinyiketeliki va ni wutiyanguleli bya ku byela vambeni madzrungula lamanene. Ku ni tindlela ta ku tala ta ku yentxa leswi, kambe ku tala kwezru hi zrandzra ku ya nsin’wini ni vambeni. (Lk 10:1) Xileswo, a mabandla ma tlhangana akuva ma ya nsin’wini hi ku hela ka vhiki kumbe a makazri ka dzrone. A maferiyadu na wone i mikhandlu yinene ya ku nyikela wumboni hi ntlawa, swanga hi leswi vamakwezru va ku tala va nga yikiki ntizrweni. Xihubyana xa Ntizro xa Bandla xi ta hlela mintlhanganu ya nsimu hi minkama ni mimbangu leyi fanelekaka akuva ku zrezriwa, a nga ha va nhlikanhini kumbe a madambyeni.

⁴⁶ Ku zrezra hi ntlawa swi pfuna vazrezri akuva va zrezra hi wumun’we ni kuva va ‘tiyisana’. (Ro 1:12, TLM) Vazrezri lavampshwa va nga tizra ni vazrezri lava va nga ni nkama wa ku leha na va zrezra akuva va wupfisiwa. A migangeni yin’wana, swi nga va swinene kuva vazrezri va tizra na va li vabidzri kumbe ku tlula hi kola ka swivangelo swa nsizrelelo. Nambi loko u kunguhata ku tizra wuswaku a nsin’wini, ku tlhangana ni ntlawa swi nga kutxa hinkwavu lava patsrekaka. Ku tiva leswaku ku ni vambeni va zrezraka a mugangeni wun’we na hine swi nga hi tiyisa. Maphayona ni vambeni a va fanelanga va titwa va sindzriseka ku hlengemela ka mintlhanganu hinkwayu ya nsimu leyi lulamiseliwaka hi bandla, ngopfu-ngopfu loko yi hambiwa siku ni siku. Nambitanu, swi nga yentxeka swi koteka kuva va va kone ka yin’wana ya mintlhanganu vhiki ni vhiki.

⁴⁷ Ingiki hinkwezru hi nga landzrela xikombiso lexi siyiwiki ha Yesu ni vapostola! Hi nga tiyiseka leswaku Yehovha, a ta hi tovokisa loko hi hlengemela hi nkhinkhi ka ntizro lowu huluxaka wutomi, wa ku zrezra madzrungula lamanene ya Mfumu.​—Lk 9:57-62.