Xana A Bandla Dzri Nga Yetisela Hi Ndlela Yini Vonela Dzra Yehovha Mayelanu Ni Lava Yentxiki Xidoho Lexikulu?

1. I yini leswi Yehovha a swi navelelaka vhanu hinkwavu?

YEHOVHA a vumbe vhanu na va ni ntsrhunxeko wa ku tihlawulela. Siku ni siku wa yi tizrisa nyiko leyi loko u teka swiboho. Xiboho xa lisima lexi mun’wana ni mun’wana a nga xi tekaka, i ku tinyiketela ka Yehovha ni ku hamba xiyenge xa ndangu wa vagandzreli vake. Yehovha a zrandzra leswaku hinkwavu va yentxa leswo. Ha yini? Hikusa a zrandzra vhanu nakone a va navelela leswinene. A djula leswaku hi tikholisa hi wunghanu na yene ni kuva hi hanya hi lani ku nga helikiki.—Deut. 30:19, 20; Gal. 6:7, 8.

2. Xana Yehovha a titwisa kuyini hi vadohi lava kalaka va nga tisoli? (1 Yohane 2:1)

² Nambitanu, Yehovha a nga sindzrisi mhunu kuva a mu tizrela. A pfumelela leswaku mun’wana ni mun’wana a hlawula leswi a taka swi yentxa. Kambe swi li yini loko mukriste lwa babatisiwiki a tsrhika ku landzra milawu ya Xikwembu Nkulukumba a yentxa xidoho lexikulu? Loko a nga tisoli, a fanela ku susiwa bandleni. (1 Kor. 5:13) Nambitanu, Yehovha a yimela leswaku mudohi a tlhelela kwake. Ku hlaya ntiyiso, hi leswi yentxiki Yehovha a vona lisima dzra ku nyikela xitizrulo, ku yentxela leswaku lava tisolaka va dzrivaleliwa swidoho swavu. (Dondzra 1 Yohane 2:1.) Xikwembu Nkulukumba wezru, hi ndlela ya lizrandzru a tsratsriya vadohi kuva va tisola.—Zek. 1:3; Rom. 2:4; Yak. 4:8.

3. Hi ta bula ha yini ka nhlokomhaka leyi?

³ Yehovha a djula hi va ni vonela dzrake hi xidoho ni lava xi yentxaka. Nhlokomhaka leyi yi ta tlhamuxela ndlela leyi hi nga swi yentxaka ha yone leswo. Nkama lowu u dondzraka nhlokomhaka leyi vona 1) ndlela leyi xidoho lexikulu xi lulamisiwiki ha yone a bandleni dzra le Korinte a dzaneni dzra ku sungula, 2) nkongomiso lowu mupostola Pawulo a wu nyikeliki loko mudohi a tisolile ni 3) leswi wudzrunguli lebyi bya le Bibeleni byi hi byelaka swone mayelanu ni vonela dzra Yehovha a mhakeni ya kuva mukriste a yentxa xidoho lexikulu.

NDLELA LEYI SWIDOHO LESWIKULU A SWI LULAMISIWA HA YONE A A DZANENI DZRA KU SUNGULA

4. He xini xiyentxakalu lexi humeleliki a bandleni dzra le Korinte a dzaneni dzra ku sungula? (1 Vakorinte 5:1, 2)

⁴ Dondzra 1 Vakorinte 5:1, 2. Ka liyendzro dzrake dzra wuzrazru swanga muzrumiwa, Pawulo a yingele madzrungula lawa a ma nga nyonxisi a bandleni ledzrimpshwa dzra le Korinte. Makwezru lweyi a a li ka bandla ledzro a a yentxa swa tinkuku ni nsati wa papayi wake. Xiyentxo lexo a xi txhavisa lakakuva ‘nambi vamatiko a va nga swi yentxi’. A bandla dzri yanakanye leswaku a ndlela leyi makwezru lwiyani a a hanya ha yone a yi nga bihanga, xileswo a ku nge na xivangelo xa kuva a susiwa bandleni. Swi nga yentxeka van’wana va pimise leswaku Xikwembu Nkulukumba a lehisa ngopfu mbilu nakone a va twisisa ha hombe vhanu va ku kala ku hetiseka. Kambe Yehovha a nga va pfumeleli vadohi makazri ka vhanu vake. Hi kola ka xiyentxo lexo xa tingana, van’we va lava a va nga mu gandzreli Yehovha swi nga yentxeka va txhavile va khanela ku biha hi vhanu va Yehovha. Nakone a a ta va na a kutxetela vakriste van’wana lava a va hlengemela na yene. Kutani, i yini leswi Pawulo a swi byeliki bandla kuva dzri swi yentxa?

5. I yini leswi Pawulo a swi byeliki bandla dzra le Korinte leswaku dzri swi yentxa nakone swi tlhamuxela yini leswo? (1 Vakorinte 5:13) (Tlhela u vona ni mufoto.)

⁵ Dondzra 1 Vakorinte 5:13. Hi ku huhuteliwa hi moya wa ku xwenga, Pawulo a tsrale papela na a hlaya leswaku mudohi lweyi a kalaka a nga tisoli a fanela kuva a susiwa bandleni. Xana vakriste va ku dumbeka a va fanela ku hanyisana na yene hi ndlela yini? Pawulo a te “mi tsrhika ku titlhanganisa” na yene. Xana leswo swi tlhamuxela yini? Pawulo a a tlhamuxela leswaku xileleto lexo a xi patsra kuva “nambi ku da mi nga di na yene mhunu wa ku tasu”. (1 Kor. 5:11) Loko u tsrhama u da swakuda ni mhunu wa kukazri, swi nga ha yentxeka mi sungula mabulu lama nyonxisaka. Swi le livaleni leswaku Pawulo a a djula ku hlaya leswaku a bandla a dzri nga fanelanga ku hamba wuxaka ni wanuna lwiyani. Leswo a swi ta sizrelela bandla ka nkutxetelo wa ku biha. (1 Kor. 5:5-7) Handle ka leswo, loko va nga titlhanganisi na yene a swi ta mu yentxa a twisisa ndlela leyi a titsravukanisiki ngopfu ha yone ni tindlela ta Yehovha nakone a a ta titwa tingana ni ku susumeteleka kuva a tisola.

6. Xana papela ledzri Pawulo a dzri zrumeleliki bandla dzri mu khumbise kuyini mudohi?

⁶ Ntsrhaku ka loko a zrumele papela ka vakriste va le Korinte, Pawulo a sungule hi ku tivutisa leswaku a bandla a dzri ta yangulisa ku yini. Hi ku famba ka nkama, Tito a mu tiseli dzrungula ledzri mu nyonxisiki ngopfu swinene. A bandla dzri yangule ha hombe ka papela dzra Pawulo. (2 Kor. 7:6, 7) Va landzre minkongomiso yake. Handle ka leswo, ntsrhaku ka tiwheti ta kukazri na Pawulo a zrumele papela ledzro, a mudohi a tisolile ka mahanyela yake yaku biha! A a txintxe mahanyela ni swiyentxo swake nakone a a sungule ni ku landzra milawu ya Yehovha ya ku lulama. (2 Kor. 7:8-11) Kutani swoswi Pawulo a a ta byela bandla leswaku dzri yentxa yini?

NDLELA LEYI BANDLA A DZRI FANELA KU MU KHOMA HA YONE MHUNU LWA TISOLIKI

7. Ku va mhunu lweyi a dohiki a susiwe bandleni swi tise mihandzru yini leyinene? (2 Vakorinte 2:5-8)

⁷ Dondzra 2 Vakorinte 2:5-8. Pawulo a xiye leswaku ‘a xilayu lexi vanyingi vavu va mu nyikiki xone mhunu yelweyo a xi yanela’. Hi mazritu man’wana a xilayu kutani a xi wu hetisisile ntizro wa xone kwake. A wu li wini ntizro wa xone? Ku mu yentxa a tisola.—Heb. 12:11.

8. I yini leswi Pawulo a swi byeliki bandla leswaku dzri swi yentxa hi ku landzrela?

⁸ A kongomise bandla hi ku dzri byela a ku: ‘Mi fanela ku mu dzrivalela hi mbilu hinkwayu mi tlhela mi mu txhavelela’ mi va ‘mi mu komba leswaku ma mu zrandzra’. Xiya leswaku Pawulo a a nga djuli leswaku a bandla dzri gamela ka ku yamukela ntsena mhunu lweyi a a tlheleliki bandleni, Pawulo a a djula leswaku va tiyisa mhunu lwa tisoliki hi mazritu yavu ni hi swiyentxo. Va mu tiyisekisa leswaku va mu dzrivalele hi mbilu hinkwayu ni leswaku va mu zrandzra. Xileswo a va ta swi beka livaleni leswaku awa yamukeleka hi leswi a tlheleliki bandleni.

9. Ha yini van’we swi nga yentxeka va ganaganekile hi ku dzrivalela mudohi lweyi a tisoliki?

⁹ Xana van’we bandleni a va nga titwi ha hombe ku yamukela mudohi lwa tisoliki? A wudzrunguli a byi hi byeli ntxhumu hi mhaka leyi, kambe swi nga ha va swi yentxekile. Hi wugamu, a swiyentxo swake swi nga ha va swi tise swikazratu a bandleni hinkwadzru nakone swi nga yentxeka swi txhele gome vhanu va kukazri. Van’wana swi nga yentxeka va swi vone swi nga faneli kuva wanuna lweyo a yamukeliwa swanga makwezru, hi leswi va tikazratiki ngopfu akuva va tsrhama na va basile mahanyeleni. (Dzringanisa na Luka 15:28-30.) Nambitanu, ha yini a swi li swa lisima kuva bandla dzri mu kombisa lizrandzru dzra ntiyiso makwavu lwa tlheleliki?

10-11. I yini leswi nga yentxekaka loko vakulu va yala ku dzrivalela mudohi lweyi a tisoliki?

¹⁰ Yanakanya leswaku a ku tava ku yentxeke yini loko vakulu a ve yala ku mu tlhelisela bandleni mhunu lweyi a a tisole na swi sukela mbilwini, kumbe ntsrhaku ka loko a tlhelelile a bandla dzri yala ku mu kombisa lizrandzru? A a ta ‘vaviseka ngopfu a za a godola,’ a vhela a tibyela leswaku a swi nge he koteki kuva a tlhelela bandleni a tizrela Yehovha. A a ta tlhela a tsrhika ku yentxa minzamu ya ku lulamisa wuxaka byake na Xikwembu Nkulukumba.

¹¹ Lexi vavisaka, loko vamakwezru a bandleni a ve yala ku dzrivalela mudohi lwa tisoliki, a va ta beka wuxaka byavu na Yehovha a nghozini. Ha yini? Hikusa a va ta va na va nga kombisi ku dzrivalela loku Yehovha a ku kombisaka vadohi lava tisolaka, a va ta va na va kombisa nsele ni ku pfumala ntwelawusiwana ku nga matsrhamela ya Sathana ni ku va switizro leswi Diyavulosi a swi tizriselaka ku hohlota wumoya bya wanuna lweyo.—2 Kor. 2:10, 11; Efe. 4:27.

12. Xana a bandla dzri nga yetisela Yehovha hi ndlela yini?

¹² Kutani a bandla dzra le Korinte a dzri ta mu yetiselisa kuyini Yehovha ku nga li Sathana? Hi ku landzra ndlela leyi Yehovha a va khomaka ha yone vadohi lava tisoliki. Xiya leswi van’we va vatsrali va Bibele va swi hlayiki mayelanu na Yehovha. Davhida a te: ‘U munene, u lweyi a dzrivalelaka.’ (Amaps. 86:5) Mikiya a tsrale a ku: “I mani lweyi a nga Xikwembu Nkulukumba ku fana na wene, lweyi a dzrivalelaka xihoxo ni ku tlula ka nawu?” (Mik. 7:18) Nakone Ezaya a te: ‘A mubihi a a tsrhike ndlela yakwe, ni lwe wa ku somboloka a a tsrhiki miyanakanyu yakwe, a a buyele ku Yehovha lweyi a taka mu yentxela lizrezre, ni le ka Xikwembu Nkulukumba wezru, hikusa a ta dzrivalela ku nge ha mpimu.’—Eza. 55:7.

13. Ha yini swi fanela kuva mudohi lweyi a tisoliki a tlhelelisiwa bandleni? (Vona bokisi ledzri liki: “Wanuna Wa Kukazri Wa Le Korinte A Tlhelelisiwe Loko Swi Te Yini?”)

¹³ Akuva va yetisela Yehovha, vamakwezru va bandla dzra le Korinte swi djule va yamukela wanuna lweyi a tisoliki ni kuva va tiyisekisa lizrandzru dzravu ha yene. Hi ku landzra nkongomiso wa Pawulo wa ku yamukela mudohi lwa a tisoliki, a bandla dzri kombise leswaku dzra ‘yingiseta ka mintxhumu hinkwayu’. (2 Kor. 2:9) I ntiyiso, leswaku a ku khaluta tihwetinyana na a susiwile a bandleni kambe a xilayu lexi a xi kumiki xi mu yentxi a tisola. Xileswo, a ku nge na xivileleko xa ku va vakulu va ha teka nkama akuva va mu tlhelisela bandleni.

NDLELA LEYI HI NGA YETISELAKA HA YONE WULULAMI NI TIMPSWALU TA YEHOVHA

14-15. Hi dondzra yini ka ndlela leyi mhaka ya le Korinte wa khale yi lulamisiwiki ha yone? (2 Petro 3:9) (Tlhela u vona ni mufoto.)

¹⁴ A wudzrunguli mayelanu ni ndlela leyi mhaka leyi yi nga lulamisiwa ha yone ka bandla dzra khale dzra le Korinte yi tsraliwe ni ku bekisiwa a kuva yi hi “dondzrisa”. (Rom. 15:4) A wudzrunguli lebyi, byi hi dondzrisa leswaku Yehovha a nga pfumeleli swidoho leswikulu a makazri ka vhanu vake. Van’wana va nga ha yanakanya leswaku leswi Yehovha a nga ni timpswalu letikulu a a ta pfumelela leswaku mudohi lweyi a kalaka a nga tisoli a tama a lumba bandla. Kambe leyo a hi yone ndlela leyi Yehovha a kombisaka timpswalu ha yone. Nambileswi Yehovha a nga ni timpswalu letikulu, a nga pfumeleli mahanyela hinkwawu. A minsinya ya milawu yake mayelanu ni leswi bihiki ni leswinene a yi txintxi. (Yud. 4) Ku hlaya ntiyiso, a ku nga ti va timpswalu hikusa a swi ta beka nghozini bandla hinkwadzru.—Amapr. 13:20; 1 Kor. 15:33.

¹⁵ Nambitanu, hi dondzra leswaku Yehovha a nga djuli leswaku ni mun’we a helisiwa. A djula ku huluxa vhanu hi la swi nga kotekaka ha kone. A va kombisa timpswalu vhanu lava yentxaka ku txintxa hi mbilu hinkwayu lava djulaka ku lulamisa wuxaka byavu na yene. (Ezek. 33:11; dondzra 2 Petro 3:9.) Hi lani wanuna wa le Korinte a yentxiki ha kone akuva a tisola ni ku txintxa mahanyela yake ya ku biha, Yehovha a tizrise muapostola Pawulo akuva a tlhamuxela bandla leswaku wanuna lwiyani a a fanele ku dzrivaleliwa ni ku yamukeliwa.

16. U titwisa kuyini hi ndlela leyi mhaka ya le Korinte yi lulamisiwiki ha yone?

¹⁶ Akuva hi pfuxetanyana ndlela leyi mhaka leyi yi lulamisiwiki ha yone a Korinte, swi hi pfune ku vona ndlela leyi Yehovha a dzri kombisaka ha yone lizrandzru, wunene ni wululami. (Amaps. 33:5) Xana a u susumeteleki ku nyika Yehovha lidzrumu ledzri yengetelekiki? Ku tlula hinkwaswu, hinkwezru hi vadohi nakone hi vilela kuva a hi dzrivalela. Mun’wana ni mun’wana wezru a ni xivangelo xa ku kombisa ku tlangela hi xitizrulo, lexi yentxaka leswaku swi koteka kuva hi dzrivaleliwa. Swi tiyisana ngopfu ku tiva leswaku Yehovha awa va zrandzra vhanu vake hakakunene nakone a va navelela leswinene!

17. Hi ta vona yini ka xidondzro lexi landzrelaka?

¹⁷ Kutani, hi nga kuyini mayelanu ni ndlela leyi swidoho swi nga khomiwaka ha yone namunhla? Xana vakulu va bandla va nga ku yetiselisa kuyini ku navela ka Yehovha ka leswaku mudohi a tisola? A bandla dzri fanela ku yangulisa kuyini loko vakulu va boha ku susa kumbe ku tlhelisela mhunu a bandleni? Tinhlamulo ta swivutiso leswi hi ta ti vona ka xidondzro lexi landzrelaka.