Ndlela Leyi Vakulu Va Kombisaka Lizrandzru Ni Timpswalu Ha Yone Ka Lava Yentxiki Xidoho Lexikulu

1. Ku nga ha yentxeka yini ntsrhaku ka loko mhunu a yentxe xidoho lexikulu?

KA XIDONDZRO lexi khalutiki hi vone xileleto lexi mupostola Pawulo a xi nyikiki bandla dzra le Korinte mayelanu ni wanuna lweyi a yentxiki xidoho lexikulu. Mudohi lwiyani a nga tisolanga xileswo a susiwile bandleni. Kambe hi lani tsralwa dzri kombisiki ha kone, mhunu lweyi a yentxiki xidoho lexikulu a nga pfuniwa loko a tisola. (Rom. 2:4) Xana vakulu va nga mu pfunisa kuyini mhunu kuva a tisola?

2-3. Hi fanela ku yentxa yini loko hi tiva leswaku makwezru a yentxe xidoho lexikulu nakone ha yini?

² Loko vakulu va nga swi tivi leswaku makwezru wa kukazri a hambe xidoho lexikulu, a va nge swi koti ku mu pfuna. Kutani loko hi tiva leswaku makwezru wa kukazri a hambe xidoho lexikulu lexi nga yentxaka a susiwa bandleni, i yini leswi hi fanelaka ku swi yentxa? Hi fanela ku kutxa mhunu lweyo akuva a djuletela mpfunu wa vakulu.—Eza. 1:18; Mint. 20:28; 1 Pet. 5:2.

³ Kambe loko mudohi a yala ku ya bula ni vakulu ke? Ka xiyimu lexo hi fanela ku ya bula ni vakulu akuva mudohi a kuma mpfunu lowu vilelekaka. Leyo i ndlela ya ku kombisa lizrandzru hikusa a hi djuli ku mu luza makwezru. Loko mudohi a nga txintxi kambe a ha tama a doha a ta hona wuxaka byake na Yehovha, leswo swi nga ha tlhela swi ntxhimisa bandla. Xileswo hi fanela ku ya bula ni vakulu nambiloko ku yentxa leswo swi kazrata hikusa ha mu zrandzra Yehovha nakone ha mu zrandzra makwezru.—Amaps. 27:14

NDLELA LEYI VAKULU VA MU PFUNAKA HA YONE MHUNU LWEYI A YENTXIKI XIDOHO LEXIKULU

4. He wini nkongometo wa vakulu loko va bulisanani mhunu lweyi a dohiki?

⁴ Loko mhunu wa kukazri a yentxe xidoho a ndzreni ka bandla, a huvo ya vakulu yi hlawula vakulu lava fanelekaka akuva va vumba xihubyana akuva va bulisana ni mhunu lweyi a dohiki.a Vavanuna lava va fanela kuva lava dzringaniselaka va tlhela va titsrongohata. Va yentxa hinkwaswu leswi vilelekaka akuva va pfuna mudohi leswaku a tisola kambe va swi tiva leswaku a va nge sindzrisi mhunu leswaku a txintxa. (Deut. 30:19) Kambe vakulu va swi tiva leswaku a hi vhanu hinkwavu lava taka yangula ha hombe va va va tisola ku fana na hosi Davhida. (2 Sam. 12:13) Vadohi van’wana va hlawula ku va va nga mu yingiseti Yehovha. (Gen. 4:6-8) Nambitanu a nkongometo wa vakulu i ku pfuna mudohi leswaku a tisola. I yini leswi vakulu va fanelaka ku swi dzrimuka loko va bulisana ni mhunu lweyi a dohiki?

5. Xana a vakulu va fanela ku yangulisa kuyini loko va bulisana ni lweyi a dohiki? (2 Timotewu 2:24-26) (Tlhela u vona ni mufoto.)

⁵ Vakulu va vona mudohi swanga xihambana lexi lahlekiki xa Yehovha. (Luk. 15:4, 6) Kutani loko vakulu va bula ni mhunu lweyi a dohiki a va mu khomi ingiki hi loko o kala a nga pfuni ntxhumu kambe va bula na yene hi ndlela ya lizrandzru. Loko vakulu va bulisana ni mhunu lweyi a dohiki a vo swi yentxela ku hetisisa nawu kumbe ku mu hamba swivutiso ni ku kola dzrungula ledzri vilelekaka ntsena, a matsrhan’wini ya leswo va tikazratela ku kombisa matsrhamela lawa ku khaneliwaka ha wone ka 2 Timotewu 2:24-26. (Dondzra.) A vakulu va tama va zrula va tlhela va kombisa wunene akuva va kota ku khumba mbilu ya mhunu lweyi a dohiki.

6. Xana vakulu va nga tilulamisela hi ndlela yini timbilu tavu loko va ya bulisana ni lweyi a dohiki? (Varoma 2:4)

⁶ Vakulu va lulamisela timbilu tavu. Va zama ku yetisela ndlela leyi Yehovha a va khomaka ha yone vhanu lava dohiki, nakone va dzrimuka leswi Pawulo a swi hlayiki loko a te: “Xikwembu Nkulukumba a ku lehisela mbilu leswaku a ku pfuna kuva u tisola.” (Dondzra Varoma 2:4.) A vakulu va fanela ku dzrimuka leswaku ka xin’wana ni xin’wana i vabyisi lava kongomisiwaka ha Yehovha. (Eza. 11:3, 4; Mat. 18:18-20) Na xihubyana xa vakulu xi nga si na bulisana ni mhunu lweyi a dohiki, xi zranga hi ku khongota ni ku yanakanyisisa hi nkongometo lowukulu ku nga ku pfuna mudohi leswaku a tisola. Va ta hamba wusetxhi a Bibeleni ni ka mabuku lama seketeliwiki a Bibeleni va tlhela va khongota va kombela wutlhazri. Vakulu va nga ha yanakanyisisa hi leswi va fanelaka ku swi tiva mayelanu ni leswi mudohi a khalutiki hi ka swone a nkameni lowu khalutiki. Swi nga ha yentxeka leswi a khalutiki hi ka swone swi kutxetele mapimisela yake, swiyentxo swake ni mahanyela yake.—Amapr. 20:5.

7-8. Xana vakulu va nga ku yetisela hi ndlela yini ku lehisa mbilu ka Yehovha loko va bulisana ni mhunu lweyi a dohiki?

⁷ Vakulu va yetisela ku lehisa mbilu ka Yehovha. Vone va dzrimuka ndlela leyi Yehovha a va khomiki ha yone vadohi a nkameni lowu khalutiki. Hi xikombiso, Yehovha a mu lehisele mbilu Khayini a yanakanyisise na yene nakone a mu be ndleve mayelanu ni mihandzru ya ku bava leyi a a ta kumana na yone loko a yentxa xidoho a tlhela a mu byela leswaku a a ta mu tovokisa loko a mu yingiseta. (Gen. 4:6, 7) Yehovha a tlhele a tsratsriya Davhida hi ku tizrisa muprofeta Natani lweyi a tizrisiki xikombiso lexi khumbiki mbilu ya hosi. (2 Sam. 12:1-7) Nakone Yehovha a ‘Zrumele vaprofeta vakwe’ siku ‘dzrin’wana ni dzrin’wana’ akuva va pfuna Vaisrayele lava a va tsrhamela ku yentxa mintxhumu ya ku biha. (Yer. 7:24, 25) Yehovha a nga khondlanga mavoko a yimela leswaku vhanu va tisola ku li kone a va pfunaka. A matsrhan’wini ya leswo, Yehovha a teke gwansu dzra ku va pfuna nambileswi a va yentxa swa ku biha. Yehovha a a tama a va tsratsriya leswaku va tisola.

⁸ Vakulu va zama ku yetisela xikombiso xa Yehovha loko va pfuna mhunu akuva a tisola hi lani 2 Timotewu 4:2 yi hlayaka ha kone, vone va yanakanyisisa na yene na va mu ‘lehisela ngopfu swinene mbilu’. A ntlhamuxelo wa kukazri wu hlaya leswi mayelanu ni matsrhamela ya nkulu wa bandla: “Minkama hinkwayu a fanela ku tikhoma, a tsratsriya mudohi akuva a va ni ku navela ka ku yentxa leswinene kambe na a mu lehisela mbilu. Loko nkulu a pfumelela ku lawuliwa hi mahlundzru kumbe ku kwata a nga yentxa leswaku vamakwavu va hambuka a lipfumelweni.”

9-10. Xana vakulu va nga mu pfuna hi ndlela yini mhunu lweyi a dohiki kuva a yanakanyisisa hi swidoho swake?

⁹ Vakulu va zama ku twisisa leswaku a nga va a li yini leswi yentxiki leswaku mhunu a doha. Hi xikombiso, xana a wunghanu byake na Yehovha byi ya byi tsrana? Xana ha kutsrongokutsrongo a ye a tsrhika ku hamba dondzro ya ximhunu ni ku ya nsin’wini? Xana a a sungule ku khongota swa mpfumawulo ntsena na swi nga sukeli mbilwini kumbe kuva a nga ha khongoti nkama ni nkama? Xana a tsrhike ku lwisana ni ku navela ka ku biha? I vamani lava a tolovelaka ku heta nkama na vone nakone a hungata hi mintxhumu ya muxaka muni? Xana swiboho swoleswo swi nga va swi ma kutxetelise kuyini mayanakanyela yake? Xana awa pfumela leswaku swin’we swa swiboho swake swa mu khumba Papayi wake Yehovha?

¹⁰ Vakulu va nga ha susa mudohi va tlhela mu hamba swivutiso leswi taka mu pfuna ku yanakanyisisa hi leswi nga ha vaka swi tsranise wuxaka byake na Yehovha ni ku mu yentxa a doha. Kambe swi le livaleni leswaku leswo va ta swi yentxa hi ndlela ya lizrandzru nakone vakulu va nge ti mu hamba swivutiso swa ximhunu leswi kalaka swi nga vileleki kumbe leswi nga xihundla xake. (Amapr. 20:5) Va nga ha tlhela va tizrisa swikombiso akuva va mu pfuna ku vona leswaku leswi a swi yentxiki swi bihile, hi lani Natani a swi yentxiki ha kone ka Davhida. Hi ndlela leyo, swi nga yentxeka ka mabulu ya ku sungula a xiya wukulu bya wubihi lebyi a byi yentxiki, kumbexana a va a tisola.

11. Xana Yesu a va khomisi kuyini vadohi?

¹¹ A vakulu va tikazratela ku yetisela Yesu. Loko a bulisane na Sawulo wa le Tarsu, Yesu a hambe xivutiso xa ku xonga akuva a kombisa leswi Sawulo a a li xiswone. A te: “Sawulo, Sawulo, u ni xanisela yini?” Hi ndlela leyo a pfune Sawulo ku vona leswaku leswi a a swi yentxa a swi bihile. (Min. 9:3-6) Loko swi ta mhakeni ya “wansati lweyi . . . Yezabele,” Yesu a te: “Ni mu nyike nkama wa kuva a tisola.”—Mpful. 2:20, 21.

12-13. Xana vakulu va nga nyika mudohi a nkama wa kuva a tisola hi ndlela yini? (Tlhela u vona ni mufoto.)

¹² Hi ku yetisela Yesu, a vakulu a va gigiseki loko va teka xiboho kumbe va yanakanya leswaku a mudohi a nge ti tisola. Swi nga yentxeka van’we va tekela ku tisola ka mabulu ya ku sungula lawa va nga ha vaka na wone ni vakulu kasi van’wana va teka nkama. Xileswo, a vakulu va nga ha tlhela va kumana ni mudohi hi makhambi man’wana. Swi nga ha yentxeka ka mabulu ya ku sungula, mudohi a sungula ku yanakanyisisa hi ndlela leyi swidoho swake swi bihiki ha yone ni hi mabulu lawa a viki na wone ni vakulu a va a sungula ku tsrhindzrekela ka Yehovha hi xikhongoto. (Amaps. 32:5; 38:18) Xileswo, ka mabulu man’wana a taka va na wone ni vakulu swi nga yentxeka a tiyimiseli ku txintxa ku tlula ya ku sungula.

¹³ Akuva va pfuna mudohi leswaku a tisola, a vakulu va kombisa wunene nakone va kombisa leswaku va zron’weka ha yene. Va khongota va kombela leswaku Yehovha a tovokisa minzamu yavu nakone va dumba leswaku mudohi a nga ha swi twisisa leswaku a hoxile a va a tisola.—2 Tim. 2:25, 26.

14. Xana a lidzrumu dzri ya ka mani loko mudohi a tisola nakone ha yini?

¹⁴ Loko mudohi a tisola, hinkwezru ha nyonxa! (Luk. 15:7, 10) Nambileswi vakulu va tikazratelaka ku pfuna mudohi leswaku a tisola, xana a lidzrumu dzri fanela ku ya kwavu? Dzrimuka leswi Pawulo a swi tsraliki mayelanu ni vadohi loko a ku: “Xikwembu Nkulukumba a nga va pfumelela akuva va tisola.” (2 Tim. 2:25) Ntlhamuxelo wa kukazri wa ndzrimana leyi wu hlaya leswi: “Lweyi a fanelaka ku dzrumisiwa hi kola ka ku txintxa loku mudohi a ku yentxaka i Yehovha ntsena, hi yene lweyi a pfunaka vakriste lava hambiki ku txintxa mayanakanyela yavu ni swiyentxo swavu. Pawulo a xaxameta mabindzru ya ku tisola koloko. A li: “A mudohi a kota ku wu tiva ha hombe ntiyiso, a tilaya a va a huluka a ntlhan’wini wa Diyavulosi.”—2 Tim. 2:26.

15. Xana vakulu va nga tama va mu pfuna hi ndlela yini mudohi lweyi a tisoliki?

¹⁵ Loko mudohi a tisola, a xihubyana xa vakulu xi ta kunguhata mayendzro ya wubyisi akuva mudohi a tama a yamukela mpfunu lowu a wu vilelaka leswaku a lwa ni mindzringo ya Sathana ni ku yentxa leswi nga swinene. (Heb. 12:12, 13) I ntiyiso leswaku vakulu va nge ti txhuka va byeletela vambeni leswi yentxekiki. Kambe, xana swa vileleka akuva bandla dzri tiva swa kukazri?

“VA KAWUKI MAHLWENI KA VHANU HINKWAVU”

16. Hi ku ya hi 1 Timotewu 5:20, xana i va mani “vhanu hinkwavu” lava Pawulo a vulavuliki ha vone?

¹⁶ Dondzra 1 Timotewu 5:20. Pawulo a tsralele Timotewu mazritu lawa akuva a mu tlhamuxela ndlela leyi a fanela ku va khoma ha yone “lava hanyaka hi xidoho”. Xana Pawulo a a djula ku hlaya leswaku lava yentxaka xidoho va fanela ku kawukiwa a mahlweni ka bandla hinkwadzru? Im-him, a a nga djuli ku hlaya swone. A matsrhan’wini ya leswo, a vulavula hi lava swi nga yentxekaka va xi tivile xidoho xa kone, swi nga yentxeka vhanu lavo va ve timboni ta swiyentxo swa ku biha swa mudohi kumbe va li van’we ka lava mudohi a va byeliki leswaku a yentxe xidoho. Hi ndlela ya wutlhazri a vakulu va ta tivisa leswaku a mudohi a kawukiwile.

17. Loko xidoho xa kukazri xi tiviwile kumbe xa ha ta tiviwa hi vhanu vanyingi a bandleni, he xini xitiviso lexi xi nga ha tivisiwaka nakone ha yini?

¹⁷ Ka swiyimu swin’wana swi nga yentxeka na xidoho xi tiviwa bandleni kumbe xa ha ta tiviwa. Ka swiyimu swa ku fana ni leswo “vhanu hinkwavu” ku nga ha hlayiwa bandla hinkwadzru. Xileswo, nkulu wa kukazri a nga ha tivisa bandla hinkwadzru ka leswaku makwezru wa kukazri a soliwile. Ha yini swi yentxiwa hi ndlela leyo? Pawulo a hlamula xivutiso lexo a ku: “Akuva a tava xibasopiso ka lava n’wana” leswaku va nga weli ka xidoho.

18. Xana vakulu va ta yi tamela hi ndlela yini mhaka leyi yi khumbaka n’wana lweyi a babatisiwiki? (Tlhela u vona ni mufoto.)

¹⁸ Ku yentxiwa yini loko mumpshwa lweyi a babatisiwiki lweyi a nga hansi ka 18 wa malembe a yentxa xidoho lexikulu? A huvo ya vakulu yi hlawula vakulu vabidzri akuva va ya bulisana ni n’wana lweyo kun’we ni vapswele vake.b Vakulu va ta vutisa vapswele va n’wana lweyo leswaku he wani magwansu lawa va ma yentxiki akuva va pfuna n’wana lweyo leswaku a hamba ku txintxa loku vilelekaka. Loko n’wana lweyo a yingisete vapswele a va a hamba ku txintxa, a vakulu lavabidzri va nga ha vona swi yampswa ku va mhaka leyo yi gama kolanu. Hi ndlela leyo, vapswele va nga ha ya mahlweni va pfuna n’wana lweyo nakone a swa ha vileli kuva xihubyana xa vakulu xi tlhangana ni n’wana lweyo kun’we ni vapswele hikusa Yehovha a nyike vapswele wutiyanguleli bya ku kawuka n’wanavu hi ndlela ya lizrandzru. (Deut. 6:6, 7; Amapr. 6:20; 22:6; Efe. 6:2-4) A vakulu va ta tama va kambela ku vona leswaku vapswele va ha tama va nyikela mpfunu lowu n’wanavu a wu vilelaka. Kambe swi li yini loko n’wana yelweyo lweyi a babatisiwiki a tama a yentxa swa ku biha a tlhela a yala ku ntxintxa? Ka xiyimu lexo a xihubyana xa vakulu xi ta tlhangana ni n’wana lweyo kun’we ni vapswele vake lava nga vakriste kumbe mhunu mumbeni lweyi a mu hlayisaka.

“YEHOVHA I XIKWEMBU NKULUKUMBA LWEYI A NGA NI NTWELAWUSIWANA NGOPFU SWINENE NI TIMPSWALU”

19. Xana vakulu va mu yetisela hi ndlela yini Yehovha loko va bulisana ni mhunu lweyi a dohiki?

¹⁹ Loko vakulu va li ka xihubyana va ni wutiyanguleli ka Yehovha bya ku yentxa leswaku a bandla dzri tsrhama na dzri basile. (1 Kor. 5:7) Kambe, hi tlhelo dzrin’wana va swi djula ngopfu leswaku mudohi a tisola loko swi koteka. Minkama hinkwayu va ni vonela ledzrinene xileswo va dumba leswaku swi nga yentxeka mudohi a txintxa swiyentxo swake. Kambe ha yini? Hikusa va djula ku yetisela Yehovha “lweyi a nga ni ntwelawusiwana ngopfu swinene ni timpswalu”. (Yak. 5:11) Vona ndlela leyi mupostola Yohane lweyi a a kulile hi ntanga a kombisiki ha yone lizrandzru ni ntwelawusiwana ka vamakwezru va xinuna ni va xisati. A tsrale leswi: “Vatsrongwana vanga, ni mi tsralela mintxhumu leyi akuva mi nga yentxi xidoho. Nambitanu, loko mhunu wa kukazri a txhuka a doha, hi ni mupfuni lweyi a nga kun’we na Papayi, ku nga Yesu Kriste mhunu lweyi a lulamiki.”—1 Yoh. 2:1.

20. I yini leswi hi taka swi vona ka nhlokomhaka ya wugamu ya nxaxamelo lowu?

²⁰ Lexi vavisaka, hi leswaku minkama yin’wana a mukriste lweyi a hambiki xidoho awa yala ku tisola. Loko xiyimu xi li hi ndlela leyo a fanela ku susiwa a bandleni. I yini leswi vakulu va swi yentxaka ka swiyimu leswi? Hi ta vona wutsrhokotsrhoko mayelana ni mhaka leyi ka nhlokomhaka ya wugamu ka xihondzro lexi.