Xana Wa Swi Tiva Leswi Djulekaka Akuva U Yaneliseka?

1. I yini leswi ku yaneliseka swi tlhamuxelaka swone nakone i yini leswi kalaka swi nga tlhamuxeli swone?

XANA wa yaneliseka hi leswi u nga na swone? Mhunu lweyi a yanelisekiki a kuma ku nyonxa ni ku zrula hi ku beka miyanakanyu ka mintxhumu leyi a nga na yone. A nga xukuvali kumbe ku kwata hi kola ka leswi a swi pfumalaka. Nambitanu ku yaneliseka a swi tlhamuxeli swone leswaku a hi fanelanga ku kazrateka hi ndlela leyi hi hanyaka ha yone. Hi xikombiso, mukriste a djuletela mikhandlu ya ku yentxela Yehovha leswi yengetelekiki. (Rom. 12:1; 1 Tim. 3:1) Nambitanu, a nga heleliwi hi ku nyonxa loko a nga hantli a kuma swiyavelo leswi a swi navelaka.

2. Ha yini swi ni khombo ku kala hi nga yaneliseki hi leswi hi nga na swone?

² Loko hi nga yaneliseki hi leswi hi nga na swone, hi nga ha sungula ku teka swiboho leswi bihiki. Lava kalaka va nga yaneliseki hi leswi va nga na swone va nga ha tizra nkama wunyingi ngopfu akuva va kota ku xava mintxhumu ya ku ni ku yi vilela a va yi vileli. Lexi vavisaka, vakriste van’wana va yive mali ni mintxhumu yin’wana leyi a va yi navela. Swi nga yentxeka va tibyele leswi: ‘Swa ni fanela’, ‘ni yime nkama lowu ndzringaniki’, kumbe ‘hi ku famba ka nkama ni ta yi tlhelisa mali’. Kambe ku yiva ka muxaka wun’wana ni wun’wana ka mu khunguvanyisa Yehovha nakone ku ntxhimisa ni vito dzrake. (Amapr. 30:9) Van’wana va hela ntamu swinene loko va nga swi yamukeli swiyavelo lakakuva va tsrhika ni ku tizrela Yehovha. (Gal. 6:9) Xana swi nga kotekisa kuyini ku va nandzra wa Yehovha lweyi a tinyiketeliki kwake a yentxa leswo? Swi nga yentxeka hi loko hakutsrongokutsrongo a nga ha dondzri ku yaneliseka hi leswi a nga na swone.

3. He yini dondzro ya lisima leyi hi yi kumaka ka Vafilipiya 4:11, 12?

³ Hinkwezru hi nga dondzra ku yaneliseka hi leswi hi nga na swone. Mupostola Pawulo a tsrale leswaku a ‘dondzre ku yaneliseka hi leswi a a a li na swone ka swiyimu hinkwaswu’. (Dondzra Vafilipiya 4:11, 12.) A tsrale mazritu lawa nkama lowu a a li djele. Nambitanu a a nga heleliwanga hi ku nyonxa, a a dondzre xihundla xa ku yaneliseka. Loko hi lwela ku yaneliseka, a mazritu ni mfambu wa Pawulo swi nga hi tiyisekisa leswaku hi nga swi kota ku dondzra xihundla xa ku yaneliseka. Kambe a hi fanelanga ku tibyela leswaku minkama hinkwayu hi ta nyonxa kumbe ku yaneliseka hi swiyimu swezru. A matsrhan’wini ya leswo, hi fanela ku dondzra ku yaneliseka. Hi ndlela yini? Ka nhlokomhaka leyi, hi ta vona matsrhamela lawa ma taka hi pfuna kuva lava yanelisekiki.

DONDZRA KU TLANGELA HI LESWI U NGA NA SWONE

4. Xana ku tlangela swi hi pfuna kuva hi yaneliseka hi ndlela yini? (1 Vatesalonika 5:18)

⁴ Mhunu lweyi a nga ni moya wa ku tlangela swa mu nabyalela ku yaneliseka. (Dondzra 1 Vatesalonika 5:18.) Hi xikombiso, loko hi tlangela leswi hi nga na swone na swi sukela mbilwini, swi ta hi nabyalela ku va hi nga pimisi ngopfu hi leswi hi kalaka hi nga li na swone. Loko hi tlangela hi swiyavelo leswi hi nga na swone a ntizrweni wa Yehovha hi ta yentxa hinkwaswu leswi hi nga swi kotaka ka xiyavelo lexo a matsrhan’wini ya ku tsrhamela ku pimisa hi ku kuma xiyavelo leximpshwa. A swi hlamalisi leswi Matsralwa ma hi kutxaka ku tlangela Yehovha loko hi khongota! Ku va ni moya wa ku tlangela swi hi pfuna ku va ni ku “zrula ka Xikwembu Nkulukumba loku tlulaka ku twisisa hinkwaku”.—Filp. 4:6, 7.

5. He swini swivangelo leswi Vaisrayele a va li na swone swa kuva va tlangela? (Tlhela u vona ni mufoto.)

⁵ Yanakanya hi leswi yentxekeliki Vaisrayele. Hi makhambi ya ku siyanasiyana va ngurangurele Yehovha va hlaya leswaku a va nga ha swi kumi swakuda leswi a va swi da a Egipta. (Tinhl. 11:4-6) I ntiyiso leswaku a wutomi a byi nga nabyali a mananga. Kambe i yini lexi a xi ta va pfuna leswaku va yaneliseka? A va fanela ku tlangela leswi Yehovha a va yentxeliki swone. A va fanela ku dzrimuka leswaku na va ha li swikazrawa a Egipta va tlhela va xanisiwa, Yehovha a va huluxile hi ku va a tisela Vaegipta 10 wa makhombo. Loko Vaisrayele va ntsrhunxiwile, “va phange mintxhumu ya Vaegipta” ku nga prata, woru ni mpahla. (Eks. 12:35, 36) Loko Vaisrayele va hlongolisiwile hi Vaegipta, hi ndlela ya hlolana Yehovha a pfule ndlela ka lwandle dzra ku pshwuka akuva a va huluxa. Nakone nkama lowu a va li mananga, Yehovha a a va nyika mana akuva va da siku ni siku. Kutani ha yini Vaisrayele a va tsrhamela ku khala hi swakuda? Vaisrayele a va nga yanelisekanga ku nga li hi leswaku a va nga li na swone swakuda leswi a va swi vilela kambe hi leswi a va nga swi tlangeli leswi a va li na swone.

6. He tini tin’we ta tindlela ta ku kombisa ku tlangela?

⁶ Xana u nga dondzra ku tlangela hi ndlela yini? Siku ni siku tibekele nkama wa kuva u pimisa hi mintxhumu leyinene ya moya leyi ku nyonxisiki. U nga ha tsrala mintxhumu yibidzri kumbe yizrazru leyi u yi tlangelaka. (Aŝiḍ. 3:22, 23) Xa wubidzri, kombisa ku tlangela. Vana wa ku sungula ku tlangela van’wana hi leswi va ku yentxelaka swone. Ku tlula hinkwaswu, tlangela Yehovha siku ni siku. (Amaps. 75:1) Xa wuzrazru, hlawula vanghanu lava kombisaka ku tlangela. Loko vanghanu vezru va nga kombisi ku tlangela nakone va tsrhamela ku khala, na hine hi ta fana na vone. Kambe loko vanghanu vezru va kombisa ku tlangela na hine hi ta kutxeka ku tlangela. (Det. 1:26-28; 2 Tim. 3:1, 2, 5) Loko hi djuletela mikhandlu ya ku kombisa ku tlangela, hi nge ti kazrateka ngopfu hi swikazratu swezru ni hi mintxhumu leyi hi yi djulaka kambe hi kalaka hi nge na yone.

7. Xana Aci a dondzre ku tlangela hi ndlela yini nakone ma ve wani mabindzru ya kone?

⁷ Vona leswi yentxekeliki Aci lweyi a tsrhamaka a Indonésia. Yene a li: “Hi nkama wa COVID-19, ni sungule ku fananisa swiyimu swanga ni swa vamakwezru. Hi kola ka leswo ni titwe na ni nga yanelisekanga.” (Gal. 6:4) I yini lexi mu pfuniki ku txintxa mayanakanyela yake? Aci a li: “Ni sungule ku xiyisisa mintxhumu hinkwayu leyinene leyi Yehovha a a ni nyika yone siku ni siku nakone ni yanakanyisise hi mintxhumu hinkwayu leyi ni nga na yone ni ku hamba xiyenge xa nhlengeletanu ya Xikwembu Nkulukumba. Hi ku landzrela ni tlangele Yehovha hi hinkwaswu leswo. Leswo swi ni pfune kuva ni yaneliseka.” Loko u titwa na u nga nyonxanga hi kola ka swiyimu swaku, u nga yentxa leswi Aci a swi yentxiki akuva u yaneliseka.

BEKA MIYANAKANYU KA XIYAVELO XAKU NAKONE TITSRONGAHATI

8. He wini ntlhamu lowu Baruki a weliki ka wone?

⁸ Baruki lweyi a a li matsralana wa muprofeta Yeremiya a ke a wela ntlhan’wini wa ku kala a nga yaneliseki hi swiyimu swake a wuton’wini. Baruki a a ni xiyavelo xa ku kazrata. A a fanela ku pfuna Yeremiya ku byela Vaisrayele lava a va nga tlangeli leswi a swi ta va humelela hi ku va va tsrhike ku yingiseta Yehovha. Kambe a matsrhan’wini ya ku va a beka miyanakanyu ka leswi Yehovha a a djula leswaku a yentxa swone, Baruki a sungule ku yanakanya ngopfu hi leswi yene a a djula ku swi yentxa. Hi ku tizrisa Yeremiya, Yehovha a byele Baruki a ku: ‘Wene, xana u tidjulela leswikulu? U nga swi djuli.’ (Yer. 45:3-5) Hi mazritu man’wana, Yehovha a a byela Baruki a ku: “Yaneliseka hi leswi u nga na swone swoswi.” Baruki a xi yamukelile xilayu nakone a tame a yamukeleka ka Yehovha.

9. Hi dondzra yini ka 1 Vakorinte 4:6, 7? (Tlhela u vona ni mifoto.)

⁹ Minkama yin’wana mukriste a nga ha pimisa leswaku a ni mfanelo ya ku yamukela xiyavelo xa kukazri. A nga ha titwa hi ndlela leyo hi leswi a nga ni wuswikoti, a nga ni nkhinkhi nakone a nga ni malembe manyingi na a tizrela Yehovha. Kambe van’wana va nga ha yamukela xiyavelo lexi yene a a navela ku xi kuma. I yini lexi nga mu pfuna ka kuva a nga kwati? A nga yanakanyisisa hi leswi Pawulo a swi tsraliki ka 1 Vakorinte4:6, 7. (Dondzra.) Xiyavelo xin’wana ni xin’wana lexi hi xi yamukelaka ni wuswikoti hinkwabyu lebyi hi nga na byone swi pfa hi ka Yehovha. Yehovha a nga hi nyiki swiyavelo hi leswaku he hlawuleka ku tlula van’wana. Kambe Yehovha a hi nyika swone hikusa awa hi zrandzra nakone a ni wunene lebyikulu.—Rom. 12:3, 6; Efe. 2:8, 9.

10. Hi nga dondzra ku titsrongahata hi ndlela yini?

¹⁰ Hi nga dondzra ku titsrongahata hi ku yanakanyisisa hi xikombiso lexi Yesu a hi siyeliki xone. Yesu a hlampswe minkondzro ya vapostola vake nambileswi a a swi tiva leswaku i N’wana wa Xikwembu Nkulukumba nakone a a ni wulawuli lebyikulu. Yohane a tsrale a ku: ‘Yesu hi ku tiva leswaku Papayi a beke mintxhumu hinkwayu a mavokweni yake ni leswaku a a pfa hi ka Xikwembu Nkulukumba nakone a a ya ka Xikwembu Nkulukumba . . . kutani a sungula ku hlampswa minkondzro ya vadondzrisiwa.’ (Yoh. 13:3-5) Yesu a a ta va a hlaye leswaku vapostola hi vone a va fanela ku hlampswa minkondzro yake. Kambe Yesu a nga zanga a va ni mapimisela lawo. Nakone nambileswi a nga N’wana wa Xikwembu Nkulukumba a nga zanga a hlaya leswaku a a faneliwa hi yindlu ya ku tsrhamiseka, ku va ni mali yinyingi kumbe wutomi bya ku nabyala. (Luk. 9:58) A a titsrongahata nakone a a yanelisekile. Yesu a hi siyele xikombiso lexinene.—Yoh. 13:15.

11. I yini leswi pfuniki Dennis ku yaneliseka?

¹¹ Makwezru wa kukazri wa le Holanda lweyi a vitaniwaka Dennis, a dzringise ku landzra xikombiso xa Yesu kambe a swi mu nabyalelanga. Yene a li: “Loko mhunu mun’wana a kuma xiyavelo lexi ni xi djulaka minkama yin’wana na kwata hikusa ni pimisa leswaku hi mine a ni fanela ku xi yamukela. Loko leswo swi yentxeka, ni dondzra tinhlokomhaka leti khanelaka hi ku titsrongahata. Ka aplikativhu dzra JW Library^® ni funge matsralwa lawa ma khanelaka hi ku titsrongahata akuva ni hantla ni ma kuma akuva ni ma dondzra. Ni tlhele ni xixa wukaneli lebyi khanelaka hi ku titsrongahata ka telefoni dzranga nakone ni byi yingiseta hi ku phindhaphindha.a Ni dondzre leswaku ntizro hinkwawu lowu hi wu yentxelaka Yehovha wu fanela ku mu dzrumisa ku nga li kuva hi tidjulela ndhuma. Hi kola ka wunene lebyi Yehovha a nga na byone a pfumelela mun’wana ni mun’wana wezru leswaku a mu yentxela xa kukazri, kambe hi yene a yentxaka leswaku ntizro wu humelela.” Loko u nga nyonxanga hi leswi u kalaka u nga yamukelanga xiyavelo lexi u xi djulaka, tikazratele ku dondzra ku titsrongahata, leswo swi ta tiyisa wuxaka byaku na Yehovha nakone swi ta ku pfuna kuva u yaneliseka.—Yak. 4:6, 8.

YANAKANYISISA HI SWIDUMBISO SWA YEHOVHA

12. He swini swidumbiso mayelanu ni wumundzruku leswi hi pfunaka ku yaneliseka? (Ezaya 65:21-25)

¹² Hi ya hi yaneliseka loko hi yanakanya hi wumundzruku bya ku hlamalisa lebyi hi byi yimeliki. Ka buku dzra Ezaya, Yehovha a hi byela leswaku awa swi twisisa leswaku hi ni swikazratu swinyingi kambe a tlhela a dumbisa leswaku a ta swi helisa hinkwaswu. (Dondzra Ezaya 65:21-25.) Hi ta tsrhama ka tiyindlu ta ku xonga ta ku tlhela ti sizreleleka, hi ta va ni ntizro lowu nyonxisaka nakone hi ta tlhela hi da swakuda swa ku nandzrika leswi nyikanaka lihanyu. A hi nge he ti txhuka hi kazrateka hi swikazratu swezru ni swa vanezru. (Eza. 32:17, 18; Ezek. 34:25) Hi nga tiyiseka hi ku helela leswaku swidumbiso leswo hinkwaswu swi ta hetiseka!

13. He swini swikazratu leswi hi kumanaka na swone nakone ku pimisa hi dumbo dzrezru swi hi pfunisa kuyini?

¹³ Ku tlula nkama wini na wini, swoswi hi fanela ku beka miyanakanyu ka dumbo dzrezru. Ha yini? Hikusa hi hanya “a masikwini ya wugamu” nakone hinkwezru hi kumana ni swikazratu leswi ‘swi kazrataka ku langusana na swone’. (2 Tim. 3:1) Siku ni siku Yehovha a hi pfuna ku tiyisela, a hi nyika nkongomiso, ntamu ni nseketelo lowu hi wu vilelaka. (Amaps. 145:14) Handle ka leswo, dumbo dzrezru dzri hi nyika ntamu loko hi kumana ni swikazratu. Swi nga yentxeka u tizra ngopfu akuva u xavela ndangu waku swakuda, mpahla ni mbangu wa ku tsrhama ka wone. Xana leswo swi tlhamuxela leswaku minkama hinkwayu u ta va xisiwana? Nikutsrongo! Yehovha a ku dumbise ku ku nyika leswi u swi vilelaka ni swa ku tlula leswo a paradeyisini. (Amaps. 9:18; 72:12-14) Swi nga yentxeka u twa ku vavisa siku ni siku, u va ni mavabyi ya ku hlatiyela kumbe mavabyi mambeni lawa ma kazrataka. Kambe xana u ta titwa hi ndlela leyo hi lani ku nga helikiki? Im-him. Ku nge he ti va ni mavabyi nakone a ku nge he ti va ni lifu ka misava leyimpshwa ya Xikwembu Nkulukumba. (Mpful. 21:3, 4) Dumbo ledzri dzri hi pfuna ku va hi nga kwati kumbe ku hlundzruka hi leswi hi kumanaka na swone swoswi. Hi nga swi kota ku tama hi yaneliseka nambiloko hi langusana ni ku kala wululami, ku feliwa hi lava hi va zrandzraka, ku tiyiselela mavabyi kumbe xikazratu xin’wana ni xin’wana. Ha yini? Hikusa swi nge na mhaka ni swikazratu leswi hi kumanaka na swone swoswi, ha swi tiva leswaku a ‘nhlomulo i wa nkamanyana’ nakone a misaveni leyimpshwa a hi nge he ti xaniseka.—2 Kor. 4:17, 18.

14. Hi nga tiyisa dumbo dzrezru hi ndlela yini?

¹⁴ Swanga hi leswi dumbo dzrezru dzra le nkameni lowu taka dzri hi pfunaka ku yaneliseka, i yini lexi hi pfunaka ku tiyiseka leswaku swidumbiso swa Yehovha swi ta hetiseka? Ku fana ni mhunu lweyi a bekaka mawokolo akuva a vona mintxhumu leyi nga kule hi ndlela leyi khanyiki, na hine hi fanela ku yentxa xa kukazri akuva hi tiyisa dumbo dzrezru leswaku hi tivona na hi li paradeyisini. Hi xikombiso, loko hi titwa na hi kazrateka ngopfu hi leswi swi kazrataka ku kuma mali leyi dzringaniki akuva hi kota ku hanya, hi nga yanakanya ndlela leyi wutomi byi taka va ha yone a nkameni lowu taka loko mali kumbe wusiwana swi nga ha li kone. Loko hi kazrateka hi leswi hi kalaka hi nge si yamukela xiyavelo xa kukazri, hi nga yanakanya hi ndlela leyi mintxhumu leyo yi kalaka yi nge na lisima ha yone loko hi yi fananisa ni ndlela leyi wutomi byi taka va xiswone loko hi ta va na hi hetisekile nakone hi tizrela Yehovha hi lani ku nga helikiki. (1 Tim. 6:19) Swoswi hi kazrateka ngopfu hi ndlela leyi mintxhumu yi nga xiswone lakakuva swi nga hi kazratela ku pimisa hi swidumbiso swa nkama lowu taka. Kambe loko hi ya hi pimisa hi swidumbiso swa ku hlamalisa leswi Yehovha a hi dumbisiki swone swi ta hi nabyalela ku pimisa ha swone a matsrhan’wini ya ku pimisa hi swikazratu swezru.

15. Xana u dondzre yini ka mfambu wa Christa?

¹⁵ Hi nga dondzra ka mfambu wa Christa nsati wa Dennis, lweyi hi buliki hi yene ku sunguleni. Yene a li: “Ni ni mavabyi lawa ma yentxaka leswaku swizro swanga swi nga tiyi, a ni swi koti ku famba xileswo ni tizrisa xikarinyana xa maroda nakone swi djula ku va ni heta nkama wunyingi na ni li mubedeni. Ni twa ku vavisa siku ni siku. Swoswinyana dokodela wanga a ni byele leswaku swi nge ti yampswa. Kambe kolanu ni tibyele leswi: ‘Dokodela wanga a nga voni wumundzruku hi ndlela leyi mine ni byi vonaka ha yone.’ Ku beka miyanakanyu ka dumbo dzranga swi ni yentxa ni va ni ku zrula. Namunhla swi djula kuva ni tiyiselela swikazratu swinyingi kambe a misaveni leyimpshwa ni ta tikholisa hi wutomi lebyi nga helikiki.”

‘A KU NA LEXI VA XI PFUMALAKA LAVA MU TXHAVAKA’

16. Ha yini Hosi Davhida a tsrale leswaku lava va txhavaka Yehovha ‘a ku na lexi va xi pfumalaka’?

¹⁶ Nambiloko hi yanelisekile ha ha ta kumana ni swikazratu. Hosi Davhida a feliwe hi vana vazrazru. Van’we va mu lumbete leswaku a yentxe mintxhumu leyi a kalaka a nga yi yentxanga, vanghanu vake va mu kanganyisile nakone hosi ya kukazri yi zame ku mu dlaya nakone yi yentxe leswo ku dzringana malembe manyingi. Nambileswi a kumaniki ni swikazratu leswo, Davhida a a yanelisekile. Mayelanu na Yehovha a te: ‘Hikusa a ku na lexi va xi pfumalaka lava mu txhavaka.’ (Amaps. 34:9, 10) Ha yini Davhida a hlaye leswo? Hikusa a a swi tiva leswaku nambileswi Yehovha a kalaka a nga swi siveli swikazratu swi humelela a wuton’wini, minkama hinkwayu a a ta mu nyika leswi a a swi vilela. (Amaps. 145:16) Kutani ku fana na Davhida, na hine Yehovha a ta hi pfuna ku tama hi dumbeka loko hi kumana ni mindzringo. Hi nga kuma ku zrula ni ku nyonxa nambiloko hi kumana ni mindzringo.

17. Ha yini u tiyimisele ku tiva xihundla xa ku yaneliseka hi leswi u nga na swone?

¹⁷ Yehovha a djula leswaku u yaneliseka. (Amaps. 131:1, 2) Xileswo, tikazrateli kuva u tiva xihundla xa ku yaneliseka hi leswi u nga na swone. Loko u tikazratela ku kombisa leswaku u mhunu lweyi a tlangelaka, u beka miyanakanyu ka leswi u nga na swone swoswi, u titsrongahata u tlhela u tiyisa dumbo dzraku u nga hlaya na u tiyisekile u ku: Ni yanelisekile.—Amaps. 16:5, 6.