I Mani Xikwembu Nkulukumba?

1. Ha yini hi fanela ku gandzrela Xikwembu Nkulukumba?

Xikwembu xa ntiyiso, hi xone Mutumbuluxi wa mintxhumu hinkwayu. A xi vanga na masungulu nakone a xi nge ti va na wugamu ni siku ni dzrin’we. (Amapsalma 90:2) Hi xone Xihlovo xa madzrungula lamanene lama kumiwaka a Bibeleni. (1 Timoteo 1:11) Hi fanela ku gandzrela Xikwembu Nkulukumba ntsena hikusa hi yene a hi nyikiki wutomi.​—Dondzra Apfuletelo 4:11.

2. Xikwembu Nkulukumba a tsrhamisise kuyini?

A ku na mhunu lwa samiki a vona Xikwembu Nkulukumba hikusa yene i Moya. Leswi swi djula ku hlaya leswaku yene i muxaka wa wutomi lebyi tlakukiki ku tlula swivumbiwa swa nyama leswi hanyaka la misaveni. (Yohan 1:18; 4:24) Nambitanu, leswaku Xikwembu Nkulukumba a tsrhamisise kuyini hi swi vona hi mintxhumu leyi a nga yi hamba. Hi xikombiso, ku hambana-hambana ka mihandzru ni swiluva ku hi komba leswaku a ni lizrandzru ni wutlhazri. Leswi tilo dzri nga kulisa xiswone swi hi komba leswaku a ni ntamu wa wukulu.​—Dondzra Ba-le-Roma 1:20.

Mfuzri hi nga tiva swinyingi hi leswi Xikwembu Nkulukumba a nga xiswone loko hi dondzra Bibele. Hi xikombiso, Bibele dzri hi byela leswi Xikwembu Nkulukumba a swi zrandzraka ni leswi a kalaka a nga swi zrandzri, leswi a va khomisaka xiswone vhanu ni leswi a swi yentxaka a swiyin’wini swa ku hambana-hambana.​—Dondzra Amapsalma 103:7-10.

3. Xana Xikwembu Nkulukumba a ni vito?

Yesu a te: ‘Tatana wezru lwa nga matilwini. A vito dzraku a dzri hlawuliwe.’ (Mattheo 6:9) Xikwembu Nkulukumba a ni mavitanela manyingi, kambe a ni vito dzrin’we ntsena. Lidzrimi ni lidzrimi dzri ni mahlayela ya dzrone ya vito ledzri. Hi xizronga dzri tala ku hlayiwa leswaku i “Yehovha.” Kambe vambeni va li hi “Jehovha”.​—Dondzra Amapsalma 83:18.

Vito dzra Xikwembu Nkulukumba dzri susiwile a mabibeleni manyingi, dzri siviwa hi mavitanela ya ku “Hosi” kumbe “Xikwembu Nkulukumba”. Kambe hi nkama lowu ku nga tsraliwa Bibele ha wone, vito dzra Xikwembu Nkulukumba a dzri kumeka kolomu ka 7.000 wa mimbangu. Yesu a tivise vito dzra Xikwembu Nkulukumba loko a dondzrisa vhanu hi Xikwembu Nkulukumba.​—Dondzra Yohan 17:26.

Hlalela vídeo Xana Xikwembu Nkulukumba A Ni Vito?

4. Xana Yehovha a ni mhaka na hine ke?

Xana leswi vhanu vanyingi va xanisekaka swi komba leswaku Yehovha i Xikwembu lexi ngeke na mhaka na hine? Vhanu vambeni va li Xikwembu Nkulukumba a hi yentxa hi xaniseka akuva a hi dzringa, kambe leswo a hi ntiyiso.​—Dondzra Yakob 1:13.

Xikwembu Nkulukumba a bekele mhunu lisima hi ku mu nyika ntsrhunxeko wa ku tihlawulela. Xana a swi nyonxisi ku tihlawulela hi ku ntsrhunxeka ku tizrela Xikwembu Nkulukumba? (Yehošua 24:15) Kambe vanyingi va hlawula ku yentxela vambeni swa ku biha. Hi leswo swi yentxaka vanyingi va xaniseka. Yehovha awa vaviseka hi ku vona wubihi byolebyo.​—Dondzra Genesis 6:5, 6.

Yehovha i Xikwembu lexi nga ni mhaka na hine. A djula leswaku hi hanya hi ku nyonxa. Ku nga li khale a ta helisa ku xaniseka ni lava ku vangaka. Na ku nga si tlhasa nkama lowo, a ni xivangelo lexi twalaka xa kuva a pfumelela ku xaniseka hi nkamanyana. Ka Dondzro ya wu-8, hi ta dondzra xivangelo xa kone.​—Dondzra 2 Petros 2:9; 3:7, 13.

5. Hi nga tsrhindzrekelisa kuyini ka Xikwembu Nkulukumba?

Yehovha a hi zramba kuva hi tsrhindzrekela ka yene hi ku khanela naye hi xikhongoto. A hi yingiseta ha mun’we-mun’we. (Amapsalma 65:2; 145:18) Awa dzrivalelana. Awa swi vona loko hi dzringisa ku mu nyonxisa, nambi loko hi pfa hi phazama. Xileswo, nambi leswi hi kalaka hi nga hetisekanga, kunene hi nga swi kota ku va ni wuxaka byikulu na Xikwembu Nkulukumba.​—Dondzra Amapsalma 103:12-14; Yakob 4:8.

Leswi Yehovha a hi nyikiki wutomi, hi fanela ku mu zrandzra ngopfu ku tlula mhunu wini na wini. (Marka 12:30) Loko u ya u kombisa leswaku wa mu zrandzra Xikwembu Nkulukumba hi ku dondzra leswi yengetelekiki ha yene u tlhela u yentxa leswi a ku kombelaka swone, u ta ya u va kusuhi na yene.​—Dondzra 1 Timoteo 2:4; 1 Yohan 5:3.