XIDONDZRO 04

I Mani Xikwembu Nkulukumba?

Buku Ledzri Gandlisiwiki

Ku sukela khale vhanu va gandzrela swikwembu swinyingi, kambe Bibele dzri vulavula hi Xikwembu xin’we lexi nga ‘nkulu ku tlula swikwembu hinkwaswu’. (2 Makronika 2:5) I mani Xikwembu lexi? Nakone ha yini xi li xikulu ku tlula swikwembu hinkwaswu leswi vhanu va swi gandzrelaka? Ka xidondzro lexi, vona ndlela leyi Xikwembu Nkulukumba a hi byelaka ha yone leswaku hi yene mani.

1. I mani vito dzra Xikwembu Nkulukumba? Hi swi tivisa kuyini leswaku a djula hi dzri tiva?

A Bibeleni, Xikwembu NKulukumba awa hi byela leswaku hi yene mani. A li: ‘Hi mine Yehovha, hi dzrone vito dzranga.’ (Dondzra Ezaya 42:5, 8.) Leswaku Yehovha i mahlayela ya xizronga ya vito dzra xiheberu, a nga lidzrimi ledzri Bibele dzri zrangiki dzri tsraliwa ha dzrone. Vito ledzri dzri tikomba na dzri tlhamuxela leswaku: ‘A yentxa swi va kone.’ Yehovha a djula hi tiva vito dzrake. (Eksoda 3:15) Hi swi tivisa kuyini leswo? A Bibeleni, a vito dzrake dzri kumeka 7.000 wa makhambi ni ku tlula!a Leswaku “xikwembu” kumbe “hosi” swi nga hlaya mani na mani lweyi a gandzreliwaka. Vito ledzri liki Yehovha dzri lumba Xikwembu xa ntiyiso a ‘tilweni a henhla, ni le misaveni a hansi’.—Deuteronoma 4:39.

2. Xana Bibele dzri hi byela yini hi Yehovha?

Bibele dzri li ka swikwembu hinkwaswu leswi vhanu va swi gandzrelaka, ko va Yehovha ntsena a nga Xikwembu Nkulukumba wa ntiyiso. Ha yini? Ku ni swivangelo swinyingi. Yehovha a ni wuhosi lebyi tlakukiki. Yene wuswake, a ‘tlakukile henhla ka misava’. (Dondzra Amapsalma 83:18.) Hi yene ‘wa ntamu hinkwawu’, leswi liki, a ni ntamu wa ku yentxa xin’wana ni xin’wana lexi a xi djulaka. Hi yene ‘lwa nga tumbuluxa hinkwaswu’—matilo ni misava ni hinkwaswu swi nga ka yone. (Apfuletelo 4:8, 11) Ku hambana ni mhunu mun’wana ni mun’wana, Yehovha a ve kone minkama hinkwayu nakone a ta va kone hi la ku nga helikiki.—Amapsalma 90:2.

KELISISA

Vona ku hambana loku nga kone a makazri ka tindlela ta ku vitana Xikwembu Nkulukumba ni vito dzrake ledzri ku ngeke na dzrin’wana dzri nga fanisiwaka na dzrone. Gama u vona leswaku ha yini a ku tivise vito dzrake.

Wanuna lweyi a langusisaka matilweni a wusikwini. Vito dzra Yehovha ledzri tsraliwiki ka mufoto wa n’weti.

3. Xikwembu Nkulukumba hi nga mu vitana hi tindlela tinyingi kambe a ni vito dzrin’we

Akuva u vona ku hambana loku nga kone a makazri ka ndlela ya ku vitana mhunu hi mavitanela mambeni ni ku mu vitana hi vito dzrake, vonani VHIDIYU, mi gama mi bulisana hi xivutiso lexi landzrelaka.

VHIDIYU: Vito Dzrin’we, Mavitanela Manyingi (0:41)

Hi kwini ku hambana loku nga kone loko u vitana mhunu u ku “Hosi” ni loko u tizrisa vito dzrake?

Bibele dzra pfumela leswaku vhanu va gandzrela swikwembu swinyingi ni tihosi tinyingi. Dondzrani Amapsalma 136:1-3, mi gama mi bulisana hi xivutiso lexi landzrelaka:

I mani ‘Xikwembu Nkulukumba wa swikwembu’ ni “Hosi ya tihosi”?

4. Yehovha a djula u tiva vito dzrake u tlhela u dzri tizrisa

U swi tivisa kuyini leswaku Yehovha a djula u tiva vito dzrake? Vonani VHIDIYU, mi gama mi bulisana hi swivutiso leswi landzrelaka:

VHIDIYU: Xana Xikwembu Nkulukumba A Ni Vito?—Xitlephu (3:11)

Leswi kombisiwaka ka vhidiyu ledzri liki ‘Xana Xikwembu Nkulukumba A Ni Vito?—Xitlephu.’ Wanuna lweyi a kambisisa vito dzra Xikwembu Nkulukumba, ku nga Yehovha, ka buku dzra Amapsalma 83:18 ka wundzruluteli bya King James bya 1611.

Hi mavonela yaku, xana Yehovha a djula leswaku vito dzrake dzri tiviwa? Ha yini?

Yehovha a djula leswaku vhanu va tizrisa vito dzrake. Dondzrani Ba-le-Roma 10:13, mi gama mi bulisana hi swivutiso leswi:

Hi dzrini lisima dzra ku tizrisa vito dzra Yehovha?
U titwisa kuyini loko mhunu wa kukazri a ku dzrimuka, a tlhela a tizrisa vito dzraku?
U vona leswaku Yehovha a titwisa kuyini loko u tizrisa vito dzrake?

5. Yehovha a djula leswaku u va munghanu wake

Wansati wa kukazri wa le Cambódia lwa vitaniwaka Soten a te ku tiva vito dzra Xikwembu Nkulukumba swi mu pfune ku kuma “ku nyonxa lokukulu a misaveni”. Vonani VHIDIYU, mi gama mi bulisana hi xivutiso lexi.

VHIDIYU: Ni Djuletela Xikwembu Nkulukumba Wa Ntiyiso (8:18)

Leswi kombisiwaka ka vhidiyu ledzri liki ‘Ni Djuletela Xikwembu Nkulukumba Wa Ntiyiso.’ Soten a tsrhamisiki hansi ka nsinya a nhoveni, a langusaka tilweni nakone a khongotaka ka Xikwembu xa ntiyiso. 2. Leswi kombisiwaka ka vhidiyu ledzri liki ‘Ni Djuletela Xikwembu Nkulukumba Wa Ntiyiso.’ Herold a dondzrisaka Soten leswaku vito dzra Xikwembu Nkulukumba i Yehovha.

Hi ku ya hi vhidiyu, xana swi mu khumbise kuyini Soten ku tiva vito dzra Xikwembu Nkulukumba?

Na u nga si va munghanu wa mhunu wa kukazri, u talisa ku sungula hi ku tiva vito dzrake. Dondzrani Yakob 4:8a, mi gama mi bulisana hi swivutiso leswi:

Yehovha a ku zramba akuva u yentxa yini?
Ku tiva ni ku tizrisa vito dzra Xikwembu Nkulukumba swi ku pfuna hi ndlela yini akuva u va munghanu wake?

VAN’WE VA LI: “Xikwembu hi xo xa xin’we nambiloko hi xi vitana hi tindlela ta ku siyanasiyana.”

Xana wa kholwa leswaku vito dzra Xikwembu Nkulukumba i Yehovha?
U nga swi tlhamuxelisa kuyini leswaku Xikwembu Nkulukumba a djula hi tizrisa vito dzrake?

NKATSRAKANYU

Yehovha i vito dzra Xikwembu xin’we xa ntiyiso. A djula leswaku hi dzri tiva vito ledzro, hi tlhela hi dzri tizrisa akuva hi va kusuhi na yene.

Mpfuxeto

Yehovha a hambane hi ndlela yini ni swikwembu hinkwaswu leswi vhanu va swi gandzrelaka?
Ha yini hi fanela ku tizrisa vito dzra Xikwembu Nkulukumba?
I yini xi kombisaka leswaku Yehovha a djula leswaku wene u va munghanu wake?

Xidondzro lexi xi hele hi:

Lwela leswi

Loko u vulavula hi Xikwembu Nkulukumba, tizrisa vito dzrake ledzri liki Yehovha.

Swin’wana:

Swin‘wana Leswi U Nga Swi Yentxaka

HANDZRISISA

Kambisisa ntlhanu wa swivangelo leswi twisisekaka leswi kombaka leswaku Xikwembu Nkulukumba a kone.

“Xana Xikwembu Xi Kone?” (Leswi kumekaka ka jw.org)

Kambisisa leswaku ha yini swi twisiseka ku kholwa leswaku Xikwembu Nkulukumba a nga na masungulu nambi magamu.

“Hi Mani Lweyi A Tumbuluxiki Xikwembu Nkulukumba?” (Xihondzro Xa Ku Zrindzra, 1 ka Agoxto wa 2014)

Dondzra leswi hi yentxaka hi fanela ku tizrisa vito dzra Xikwembu Nkulukumba, nambileswi hi kalaka hi nga swi koti ku dzri hlaya ku fana ni vhanu va khale.

“Xana I Mani Yehovha?” (Leswi kumekaka ka jw.org)

Xana a swi na mhaka leswaku hi mu vitanisa kuyini Xikwembu Nkulukumba? Vona leswi hi yentxaka hi kholwa leswaku o va ni vito dzrin’we ntsena.

“Xana Xikwembu Nkulukumba A Ni Mavito Mangani?” (Leswi kumekaka ka jw.org)

a Akuva u kuma swimbeni mayelanu ni ntlhamuxelo wa vito dzra Xikwembu Nkulukumba ni leswaku ha yini dzri susiwile ka mabibele mambeni, vona xiyengetelo A4 Bibele—Matsalwa Yo Kwetsima Ya Misava Leyintshwa.