Xana Vito Dzra Yehovha Dzri Tlhamuxela Yini Kwaku?

1-2. Hi swi tivisa kuyini leswaku a vito dzra Yehovha i dzra lisima ka Yesu?

A VITO dzra Yehovha i dzra lisima ngopfu swinene ka Yesu. Yesu hi yene mulwelinkulu wa vito dzra Papayi wake. Hi lani hi swi voniki ha kone ka xidondzro lexi khalutiki, a a tiyimisele ku fa akuva a xwengisa vito dzra Papayi wake ni ku kombisa leswaku tindlela ta Papayi wake hinkwatu i tinene. (Mar. 14:​36; Heb. 10:​7-9) Nakone ntsrhaku ka ku fuma kwake ka 1.000 wa malembe, Yesu a ta tiyimisela ku nyikela wuhosi byake hinkwabyu akuva ku xwengisiwa vito dzra Yehovha. (1 Kor. 15:​26-​28) A lizrandzru ledzri Yesu a nga na dzrone hi vito dzra Xikwembu Nkulukumba dzri tlhela dzri kombisa wuxaka lebyi a nga na byone na Yene. Handle ka ku ganaganeka, leswo swi kombisa leswaku Yesu a zrandzra lweyi a yimelaka vito ledzro.

² Yesu a te misaveni hi vito dzra Papayi wake. (Yoh. 5:​43; 12:​13) A dondzrise valandzreli vake mayelanu ni vito dzra Papayi wake. (Yoh. 17:​6, 26) A dondzrise ni ku yentxa mahlolana hi vito dzra Yehovha. (Yoh. 10:​25) Hi ndlela leyo, Yesu a kombele leswaku Yehovha a vonelela vadondzrisiwa vake “hi mhaka ya vito” dzrake. (Yoh. 17:​11) Swi le livaleni leswaku a vito dzra Xikwembu Nkulukumba a dzri li dzra lisima ngopfu swinene ka Yesu ku tlula ntxhumu wun’wana ni wun’wana. Kutani, xana mhunu a nga hlayisa kuyini leswaku i mukriste nakasi a nga dzri tivi kumbe ku dzri tizrisa vito dzra Yehovha?

3. Hi ta vona yini ka xidondzro lexi?

³ Swanga vakriste va ntiyiso, hi yetisela xikombiso xa Yesu hi ku kombisa lizrandzru ni xihlonipho ka vito dzra Yehovha. (1 Pet. 2:​21) Ka xidondzro lexi, hi ta vona leswaku ha yini vhanu lava zrezraka “madzrungula lamanene ya Mfumu” va tiviwa hi vito dzra Yehovha. (Mat. 24:​14) Hi ta tlhela hi vona leswi a vito dzra Yehovha dzri fanelaka ku tlhamuxela swone ka mun’wana ni mun’wana wezru.

“VHANU LAVA TAKA VITANIWA HI VITO DZRAKE”

4. a) He wini ntizro lowu Yesu a wu nyikiki vadondzrisiwa vake na a nga si na tlhelela matilweni? b) He xini xivutiso lexi hi taka xi hlamula?

⁴ Na ku sale kutsrongo akuva a tlhelela matilweni, Yesu a byele vadondzrisiwa vake a ku: “Mi ta yamukela ntamu loko moya wa ku xwenga wu ta henhla kwenu, nakone mi ta va timboni tanga a Yerusalema, a Yudeya hinkwaku ni Samariya, ku ya tlhasa mimbangwini ya le kule swinene ya misava.” (Mint. 1:⁠8) Xileswo, a madzrungula lamanene a ma nga ti zrezriwa ntsena a Israyele. Hi ku famba ka nkama, a vhanu a va ta va ni mukhandlu wa ku va vadondzrisiwa va Yesu. (Mat. 28:​19, 20) Hi ku landzrela Yesu a te: “Mi ta va timboni tanga.” Xana a vadondzrisiwa va Yesu a swi ta djula va tiva vito dzra Yehovha kumbe a vo to va timboni ta Yesu ntsena? Swiyentxakalu leswi tlhamuxeliwaka ka Mintizro ndzrima 15 swi hi pfuna ku hlamula xivutiso lexo.

5. Xana vapostola ni vakulu lava a va li Yerusalema, va swi kombise hi ndlela yini leswaku a vhanu hinkwavu va fanela ku tiva vito dzra Yehovha? (Tlhela u vona ni mufoto.)

⁵ Hi 49 N.Y., a vapostola ni vakulu va le Yerusalema va tlhanganile akuva va vonisana hi leswi vhanu Vamatiko a va fanela ku swi yentxa akuva va yamukeliwa swanga vakriste. Loko va game mabulu lawa va viki na wone, Yakobe makwavu wa Yesu a te: “[Petro] a hi tlhamuxele ha hombe ndlela leyi Xikwembu Nkulukumba a va dzrimukiki ha yone vhanu va matiko ni leswaku a makazri kwavu a sungule ku hlawula vhanu lava taka vitaniwa hi vito dzrake.” Xana Yakobe a a khanela hi vito dzra mani? Loko a tsrhaha mazritu ya muprofeta Amosi, yene a yengesele a ku: “Akuva vhanu lava saliki va djula Yehovha hi timbilu tavu hinkwatu, kun’we ni vhanu va matiko hinkwawu, vhanu lava vitaniwaka hi vito dzranga, ku hlaya Yehovha.” (Mint. 15:​14-​18) Vadondzrisiwa lavampshwa a va nga ti dondzra hi vito dzra Yehovha ntsena kambe a va ta tlhela va ‘vitaniwa hi vito dzrake’. Leswo swi tlhamuxela leswaku hinkwavu a va ta dondzrisa vhanu mayelanu ni vito dzra Xikwembu Nkulukumba va tlhela va tiviwa ha dzrone.

6-7. a) Xana Yesu a a tela yini a misaveni? b) He xini xivangelo xin’wana xa lisima lexi a xi patsreka ka ku ta kwake a misaveni?

⁶ A vito ledzri liki Yesu dzri tlhamuxela leswaku “Yehovha I Muhuluxi”, nakone a tikombise a li mhunu lweyi a tizrisiwaka hi Yehovha akuva a huluxa wutomi bya lava kombisaka lipfumelo. Yesu a te misaveni akuva a nyikela wutomi byake hi kola ka vhanu. (Mat. 20:​28) Hi leswi a hakeliki xitizrulo, Yesu a yentxe swi koteka kuva vhanu va huluxiwa va tlhela va kuma wutomi lebyi nga helikiki.—Yoh. 3:16.

⁷ Kambe ha yini vhanu a va vilela xitizrulo? Hi kola ka leswi yentxekiki a xizrambeni xa le Edeni. Hi lani swi kombisiwiki ha kone ka nhlokomhaka leyi khalutiki, vapswele vezru Adamu na Evha va pfukele Yehovha, xileswo va luzekeliwe hi ndjombo ya ku hanya hi lani ku nga helikiki. (Gen. 3:​6, 24) Kambe a ka ha ni swin’wana swa lisima ku tlula ku tizrula vhanu ka xidoho. A vito dzra Yehovha dzri hehliwile, Sathana a hembele Yehovha. (Gen. 3:​4, 5) Hi ndlela leyo, vhanu a va fanela ku tiva leswaku Yehovha i Papayi lweyi a nga ni lizrandzru nakone a nga yentxanga ni ntxhumu ni wun’we lowu bihiki. Swanga hi leswi Yesu a a yimela Yehovha a tlhela a tiviwa hi vito dzrake, hi yene lweyi a a faneleka kuva a basisa vito dzra Papayi wake.

8. I yini leswi lava a va pfumela ka Kriste a va fanela ku swi tiva?

⁸ Hinkwavu lava nga kombisa lipfumelo ka Yesu, Vayuda ni vhanu Vamatiko a va fanela ku tiva leswaku i Yehovha lweyi a va huluxiki. (Yoh. 17:3) Handle ka leswo, ku fana na Yesu, a va ta tiviwa hi vito dzra Yehovha. Kutani a va fanela ku twisisa lisima dzra ku xwengisa vito dzra Yehovha. A va fanela ku yentxa leswo akuva va huluxiwa. (Mint. 2:​21, 22) Xileswo, valandzreli hinkwavu va Yesu a va fanela ku dondzra ha yene na Yehovha. Kutani a hi hlamali loko Yesu a game xikhongoto xake lexi kumekaka ka buku dzra Yohane ndzrima 17 hi mazritu lawa: “Ni va tivise vito dzraku nakone ni ta tama ni dzri tivisa, akuva va zrandzra van’wana ku fana ni leswi wene u ni zrandzraka, ku yentxela leswaku mine na vone hi va ni wumun’we.”—Yoh. 17:26.

‘HI N’WINE TIMBONI TANGA’

9. Hi nga swi kombisa hi ndlela yini leswaku a vito dzra Yehovha i dzra lisima kwezru?

⁹ Valandzreli hinkwavu va ntiyiso va Yesu va fanela ku zron’wekela ku xwengisa vito dzra Yehovha. (Mat. 6:​9, 10) Va fanela ku teka vito dzra Yehovha swanga ledzri tlakukiki ku tlula dzrin’wana ni dzrin’wana. Va yentxa leswo hi ku swi kombisa hi mintizro. Kambe hi nga yentxa yini akuva hi xwengisa vito dzra Yehovha ni ku kombisa leswaku leswi Sathana a swi hlayiki i madzrimi?

10. He yini mhaka leyi ku vulavuliwaka ha yone ka tindzrima 42 ku ya ka 44 ka buku dzra Ezaya leyi nga fanisiwaka ni wuyavanyisi bya kukazri a tribunali? (Ezaya 43:9; 44:7-9) (Tlhela u vona ni mufoto.)

¹⁰ A lisima dzra ku xwengisa vito dzra Yehovha dzri kombisiwa ka tindzrima 42 ku ya ka 44 ka buku dzra Ezaya. Ka tindzrima leti, Yehovha a tlhontlha hinkwavu lava kalaka va nga mu gandzreli akuva va kombisa leswaku swikwembu leswi va swi gandzrelaka hakakunene i swa ntiyiso. Ku fana ni leswi loko ku landzriwa mhaka ya kukazri a tribunali ku vilelekaka timboni ta kukazri, Yehovha a kombela leswaku ku hlayiwa swa kukazri hi swikwembu leswo akuva ku nyikeliwa wumboni. Kambe ni mun’we wavu a nga hlayaka leswaku swikwembu leswo i swa ntiyiso!—Dondzra Ezaya 43:9; 44:7-9.

11. Ka Ezaya 43:10-12, i yini leswi Yehovha a swi hlayaka hi vhanu vake?

¹¹ Dondzra Ezaya 43:10-12, BX. Yehovha a hlaya leswi mayelanu ni vhanu vake: ‘Hi n’wine timboni tanga, . . . Xikwembu Nkulukumba hi mine.’ Yehovha a kombela kuva ku hlamuliwa xivutiso lexi nge: ‘Xana a kone Xikwembu Nkulukumba a handle kwanga xana?’ (Eza. 44:8) Kutani hi ni mukhandlu wa ku hlamula xivutiso lexo. Hi nyikela wumboni bya leswaku Yehovha i Xikwembu Nkulukumba wa ntiyiso hi mazritu yezru ni hi mintizro. A vito dzrake dzri tlakuke ku tlula mavito hinkwawu. Hi mahanyela yezru hi kombisa leswaku ha mu zrandzra Yehovha ni leswaku ha dumbeka kwake nambiloko Sathana a zama ku hi sivela hi tindlela hinkwatu. Hi ku yentxa leswo hi ni mukhandlu wa ku pfunisa a ku xwengiseni ka vito dzra Yehovha.

12. Xana wuprofeta lebyi nga ka Ezaya 40:3, 5 byi hetiseke hi ndlela yini?

¹² Loko hi basisa vito dzra Yehovha hi va na hi yetisela xikombiso xa Yesu. Ezaya a tlhele a profeta leswaku a ku ta va ni lweyi a a ta lulamisela ‘ndlela ya Yehovha’. (Eza. 40:3) Xana mazritu lawa ma hetiseke hi ndlela yini? Yohane Mubabatisi a lulamisele Yesu ndlela. Kambe ndlela leyi a yi lulamiseliki a yi li ya Yehovha, hikusa Yesu a te hi vito dzra Yehovha a tlhela a vulavula hi vito dzrake. (Mat. 3:3; Mar. 1:2-4; Luk. 3:3-6) A wuprofeta byolebyo byi tlhele byi ku: ‘Ku ta pfuleteliwa ku phatima ka Yehovha.’ (Eza. 40:5) Xana swi ve hi ndlela yini? Loko Yesu a te misaveni a yimele Yehovha hi ndlela leyi hetisekiki ku fana ni loko Yehovha a te misaveni ha wuswake.—Yoh. 12:45.

13. Hi nga yetisela Yesu hi ndlela yini?

¹³ Ku fana na Yesu, hine hi Timboni ta Yehovha. Hi vitaniwa hi vito dzrake nakone hi byela hinkwavu mayelanu ni mintizro yake ya ku hlamalisa. Kambe akuva hi va Timboni letinene ta Yehovha, hi fanela ku tlhela hi byela vhanu hi hinkwaswu leswi Yesu a swi yentxiki akuva a basisa vito dzra Yehovha. (Mint. 1:8) A nga kone lweyi a samiki a nyikela wumboni ha Yehovha ku tlula Yesu nakone hine hi landzra xikombiso xake. (Mpful. 1:5) He tini tindlela tin’wana leti hi nga kombisaka ha tone leswaku vito dzra Yehovha i dzra lisima?

TINDLELA TIN’WANA LETI HI NGA KOMBISAKA HA TONE LESWAKU VITO DZRA YEHOVHA I DZRA LISIMA

14. Hi lani swi tsraliwiki ha kone ka Amapsalma 105:3, xana hi titwisa kuyini hi vito dzra Yehovha?

¹⁴ Ha tikhuza hi ku vitaniwa hi vito dzra Yehovha. (Dondzra Amapsalma 105:3.) Yehovha a nyonxa ngopfu swinene loko hi tikhuza ha yene. (Yer. 9:23, 24; 1 Kor. 1:31; 2 Kor. 10:17) I tovoko dzrikulu kwezru ku byela van’wana leswaku “Yehovha a xwengile” ni leswaku hinkwaswu leswi a swi yentxaka i swinene. A hi fanelanga hi va ni tingana ta ku byela lava hi tizraka na vone, vayakelani vezru ni van’wana leswaku hi Timboni ta Yehovha! Diyavulosi a nga swi djuli leswaku hi byela van’wana hi vito dzra Yehovha. (Yer. 11:​21; Mpful. 12:17) Ku hlaya ntiyiso, nkongometo wa Sathana ni vaprofeta vake va madzrimi i ku yentxa leswaku vhanu va dzrivala vito dzra Yehovha. (Yer. 23:​26, 27) Kambe ndlela leyi hi mu zrandzraka ha yone Yehovha yi hi yentxa hi nyonxa ‘masiku hinkwawu’.—Amaps. 5:11; 89:16.

15. Swi tlhamuxela yini ku vitana vito dzra Yehovha?

¹⁵ Hi ya mahlweni hi ku vitana vito dzra Yehovha. (Yuw. 2:32; Rom. 10:​13, 14) Ku vitana vito dzra Yehovha a swi hlayi ntsena ku tiva ni ku tizrisa vito dzrake. Swi patsra ku mu tiva swanga mhunu wa hakakunene, ku djula mpfunu ni nkongomiso wake. (Amaps. 20:7; 99:6; 116:4; 145:18) Hi tlhela hi twalisa vito dzrake ka van’wana ni ku va byela matsrhamela yake, na hi nkama wu li wun’we hi va kutxa kuva va tisola leswaku va ta yamukeliwa hi Yehovha.​​—⁠Eza. 12:4; Mint. 2:21, 38.

16. Hi nga kombisa leswaku Sathana i muhembi hi ndlela yini?

¹⁶ Hi tiyimisele nambi ku xaniseka hi kola ka vito dzra Yehovha. (Yak. 5:10, 11) Loko hi tsrhama na hi dumbekile ka Yehovha nambiloko hi langutana ni ku xaniseka, hi ta kombisa leswaku Sathana i muhembi. A masikwini ya Yobe, Sathana a hlaye leswi mayelanu ni lava tizrelaka Yehovha: ‘Hinkwaswu leswi mhunu a nga naswu, a ta swi humexela wutomi byakwe.’ (Yb. 2:4) Sathana a hlaye leswaku vhanu a vo to tizrela Yehovha loko ntsena mintxhumu yi va fambela ha hombe, kambe loko va kumana ni swikazratu a wuton’wini va ta tsrhika ku tizrela Yehovha. Yobe lweyi a a dumbekile ka Yehovha, a kombise leswaku mazritu lawa ma hlayiwiki hi Sathana i madzrimi. Na hine namunhla hi nga kombisa leswaku nambiloko wutomi byi hi bindzrela kumbe Sathana a zama ku hi heta ntamu a hi nge mu fulazreli Yehovha. Hi nga tiyiseka hi ku helela leswaku Yehovha a ta hi bekisa hi kola ka vito dzrake.—Yoh. 17:11.

17. He yini ndlela yin’wana leyi hi nga dzrumisaka vito dzra Yehovha ha yone hi lani swi tsraliwiki ha kone ka 1 Petro 2:⁠12?

¹⁷ Hi kombisa leswaku ha dzri hlonipha vito dzra Yehovha. (Amapr. 30:9; Yer. 7:8-11) Leswi hi yimelaka vito dzra Yehovha hi tlhela hi vitaniwa hi vito dzrake, hi nga hlonipha, hi tlakuxa vito dzrake kumbe ku dzri ntxhimisa. (Dondzra 1 Petro 2:12.) Xileswo, hi djula ku yentxa hinkwaswu leswi hi nga swi kotaka akuva hi dzrumisa Yehovha hi mavulavulela ni hi mintizro yezru. Loko hi yentxa leswo, nambileswi hi kalaka hi nga hetisekanga hi ta yisa lidzrumu ka Yehovha.

18. He yini ndlela yin’wana leyi ha yone hi nga kombisaka leswaku a vito dzra Yehovha i dzra lisima kwezru? (Tlhela u vona ni ntlhamuxelo wa le hansi.)

¹⁸ Swi nge na mhaka ni leswi vhanu va swi yanakanyaka ha hine, xa lisima kwezru i ku nyika lisima vito dzra Yehovha. (Amaps. 138:2) Ha yini leswo swi li swa lisima? I swa lisima hikusa loko hi yentxa leswi nyonxisaka Yehovha, minkama yinyingi swi nga yentxeka vhanu va nga swi zrandzri kumbe ku hlaya mintxhumu ya ku biha ha hine.a Yesu a a tiyimisele ku fa ni ku voniwa swanga xigevengu leswaku a dzrumisa vito dzra Yehovha. A ‘dzrele tingana’ hi ku va ni kutsrongo a nga vanga na mhaka ni leswi a va swi pimisa ha yene. (Heb. 12:2-4) Nkongometo wake a ku li ku yentxa ku zrandzra ka Xikwembu Nkulukumba.—Mat. 26:39.

19. U dzri vonisa kuyini vito dzra Yehovha nakone ha yini u dzri vona hi ndlela leyo?

¹⁹ Ha tikhuza hi vito dzra Yehovha nakone i ndjombo yikulu ku vitaniwa swanga Timboni ta Yehovha. Leswi vito dzra Yehovha dzri nga dzra lisima ngopfu swinene kwezru, hi ta tama hi dzri dzrumisa nambiloko van’wana va tama va hi dzrela. A vito dzra Yehovha i dzra lisima ngopfu swinene kwezru ku tlula leswi van’wana va swi yanakanyaka ha hine. Kutani, a hi tiyimiseleni ku tama hi dzrumisa Yehovha swi nge na mhaka leswi Sathana a nga ha hi yentxaka swone. Hi ndlela leyo, hi ta kombisa ndlela leyi vito dzra Yehovha dzri nga dzra lisima ha yone kwezru hi lani dzri nga dzra lisima ha kone ka Yesu Kriste.