Ha Yini Vito Dzra Yehovha Dzri Li Dzra Lisima Ka Yesu?

1-2. a) I yini leswi Yesu a swi yentxiki ka wusiku bya wugamu na a nge si na fa? b) Hi ta kambisisa yini ka nhlokomhaka leyi?

A KU LI hi wusiku bya Wawumune, 14 ka Nisani hi 33 N.Y., Yesu a a li kusuhi ni ku wongiwa, a yavanyisiwa, a xanisiwa ni ku dlayiwa. A a ha ku heta ku da xilalelo xa ku hlawuleka ka sala dzra le henhla kun’we ni vapostola vake va ku dumbeka. Ntsrhaku ka xilalelo lexo, Yesu a lelele vapostola vake hi mazritu ya kukazri lama kutxanaka. Kambe na va nge si na hangalaka, Yesu a hambe xikhongoto xa lisima swinene. Mupostola Yohane a tsrale xikhongoto lexo lexi kumekaka ka Yohane ndzrima 17.

² Xana xikhongoto lexo xi swi kombisa hi ndlela yini leswi a swi li swa lisima ka Yesu hi nkama wa wutizreli byake na a li lani misaveni? Ka xidondzro lexi, hi ta vona yin’we ya mintxhumu leyi hi nga yi dondzraka ka xikhongoto xa Yesu ni leswi a swi mu kazrata na ku sale kutsrongo akuva a fa.

“NI VA TIVISE VITO DZRAKU”

3. I yini leswi Yesu a swi hlayiki mayelanu ni vito dzra Yehovha nakone a a djula ku tlhamuxela yini ha swone? (Yohane 17:6, 26)

³ Ka xikhongoto xake, Yesu a te: “Ni va tivise vito dzraku.” Ku hlaya ntiyiso, Yesu a hlaye makhambi mabidzri ka xikhongoto xake leswaku a tivise vito dzra Yehovha ka vadondzrisiwa vake. (Dondzra Yohane 17:6, 26.) Xana a a djula ku hlaya yini hi leswo? Xana a a va tivise vito ledzri a va nga dzri tivi? Leswi vadondzrisiwa va Yesu a va li Vayuda, a va dzri tiva vito dzra Xikwembu Nkulukumba ku nga Yehovha. Vito ledzro dzra kumeka ka Matsralwa ya Xiheberu kolomu ka 7.000 wa makhambi. Leswi liki Yesu a a nga vulavuli hi vito dzra Xikwembu Nkulukumba hi ku kongoma. A matsrhan’wini ya leswo, a a vulavula hi leswi vito ledzro dzri tlhamuxelaka swone. Yesu a pfune vadondzrisiwa vake leswaku va mu tiva ku yampswa Yehovha, leswi patsraka matsrhamela yake ni nkongometo wake hi misava ni vhanu. Ko va Yesu ntsena lweyi a mu tivaka ha hombe Yehovha.

4-5. a) Xana vito dzra mhunu dzri nga va dzra lisima ngopfu hi ndlela yini? Nyikela xikombiso. b) Xana vito dzra Yehovha dzri ve dzra lisima ngopfu ka vadondzrisiwa va Yesu hi ndlela yini?

⁴ A hi nge hi xikombiso, nkulu wa kukazri ka bandla dzraku lweyi a vitaniwaka Davhida a tizra swanga dokodela. U ni malembe manyingi na u mu tiva makwezru lweyo. A hi loko siku dzrin’wana u khomiwa hi mavabyi u vilela dokodela hi xihantla. Kutani hi ku kahlula va ku teka va ku heketa ka xipiritana lexi makwezru lweyo a tizrelaka ka xone, a va a tizrisa wuswikoti byake swanga dokodela akuva a huluxa wutomi byaku. Xana a u ta mu vonisa kuyini makwezru lweyo? A u nge he ti mu vona swanga nkulu ntsena! Kambe a u ta mu vona swanga dokodela lweyi a huluxiki wutomi byaku.

⁵ Hi lani ku fanaka, a vadondzrisiwa va Yesu kutani a va dzri tiva vito dzra Yehovha. Kambe vito ledzro dzri ve dzra lisima ngopfu swinene kwavu hikusa Yesu a va pfune ku mu tiva ku yampswa Yehovha. Ha yini hi hlaya leswo? Hikusa Yesu a a yetisela wumhunu bya Papayi wake ka ndlela leyi a a hanya ha yone. Hi ndlela leyo, vapostola vake va sungule ku mu “tiva” ku yampswa Yehovha hi ku yingiseta leswi Yesu a a swi dondzrisa ni ku vona ndlela leyi yene a a tizrisana ni vhanu ha yone.—Yoh. 14:9; 17:3.

“VITO DZRAKU, LEDZRI U NI NYIKIKI DZRONE”

6. Yesu a a djula ku hlaya yini loko a te Yehovha a mu nyike vito dzrake? (Yohane 17:11, 12)

⁶ Ka xikhongoto xake, Yesu a khongotelele vadondzrisiwa vake a ku: “Va voneleli hi mhaka ya vito dzraku, ledzri u ni nyikiki dzrone.” (Dondzra Yohane 17:11, 12.) Xana leswi swi tlhamuxela leswaku Yesu a a ta tiviwa swanga Yehovha? Nikutsrongo. Xiya leswaku Yesu ka xikhongoto xake a te: “Vito dzraku.” Leswi hlayaka leswaku Yesu a nga vitaniwanga hi vito dzra Yehovha. Kutani Yesu a a djula ku hlaya yini loko a ku vito dzraku, ledzri u ni nyikiki dzrone? Xa ku sungula, Yesu a a li muyimeli wa Yehovha. Yesu a a zrumiwe hi Papayi wake akuva a ta misaveni nakone a yentxe mintizro yinyingi ya ku hlamalisa hi vito dzra Yehovha. (Yoh. 5:43; 10:25) Handle ka leswo, vito ledzri liki Yesu, dzri tlhamuxela leswaku “Yehovha I Muhuluxi”. Hi ndlela leyo, ka ntlhamuxelo wa vito dzra Yesu, ku patsreka ni vito dzra Yehovha.

7. Yesu a yimele vito dzra Yehovha hi ndlela yini? Nyikela xikombiso.

⁷ Akuva hi kombisa leswaku ha yini Yesu a nyikiwe vito dzra Yehovha, yanakanya hi xikombiso lexi. Mufumi wa kukazri a nga ha zrumela mhunu akuva a mu yimela mahlweni ka vhanu kumbe ku vulavula na vone hi ku tizrisa vito dzrake. Leswi liki, leswi mhunu lweyo a taka swi vulavula swi nga tekiwa swanga leswi mufumi wa tiko ledzro a a ta vulavula swone. Hi lani ku fanaka, Yesu a yimele Yehovha nakone a vulavule ni vhanu hi ku tizrisa vito dzrake.—Mat. 21:9; Luk. 13:35.

8. Ha yini Yehovha a hlaye leswaku vito dzrake a dzri li ka Yesu na a nge si ta la misaveni? (Eksoda 23:20, 21)

⁸ A Bibele dzri vitana Yesu swanga “Zritu” hikusa Yehovha a mu tizrise akuva a byela tintsrumi ni vhanu leswi a a djula leswaku va swi tiva ni ku swi yentxa. (Yoh. 1:1-3) Swi nga yentxeka Yesu ku li ntsrumi leyi Yehovha a yi zrumiki akuva yi ya hlayisa Vaisrayele nkama lowu a va li mananga. Loko Yehovha a byele Vaisrayele leswaku va yingiseta ntsrumi leyi a a va zrumelele yone, a te: ‘Hikusa vito dzranga dzri le ku yone.’a (Dondzra Eksoda 23:20, 21. BX) A vito dzra Yehovha a ‘dzri le’ ka Yesu hi leswi a yimelaka Yehovha, a lwelaka ni ku xwengisa vito dzra Papayi wake.

“PAPAYI, TWALISA VITO DZRAKU”

9. Xana vito dzra Yehovha a dzri li dzra lisima ngopfu swinene ka Yesu ku ya tlhasela kwini? Tlhamuxela.

⁹ Hi lani hi swi voniki ha kone, na Yesu a ha li matilweni, a vito dzra Yehovha a dzri li dzra lisima ngopfu swinene kwake. A swi hi hlamalisi leswi vito dzra Yehovha a dzri fambisana hi ku helela ni hinkwaswu leswi Yesu a swi yentxiki loko a li misaveni! Loko wutizreli byake byi ve kusuhi ni ku hela lani misaveni, a te: “Papayi, twalisa vito dzraku.” Hi nkama wolowo, Papayi wake a mu hlamule hi zritu ledzri tlakukiki na a li matilweni a ku: “Ni dzri twalisile nakone ni ta tlhela ni dzri twalisa.”—Yoh. 12:28.

10-11. a) Xana Yesu a twalise vito dzra Yehovha hi ndlela yini? (Tlhela u vona ni mufoto.) b) Ha yini vito dzra Yehovha dzri fanela ku xwengisiwa ni ku lweliwa?

¹⁰ Yesu a tlhele a twalisa vito dzra Papayi wake. Hi ndlela yini? Hi ku byela van’wana mayelanu ni matsrhamela ya ku xonga kun’we ni swiyentxo swa Papayi wake. Kambe a ka ha ni swin’wana leswi patsrekaka ka ku twalisa vito ledzro. A vito dzra Yehovha a dzri fanela ku xwengisiwa ni ku lweliwa.b Yesu a kombise ndlela leyi a swi li swa lisima ha yone loko a dondzrise vadondzrisiwa vake xikhongoto xa Hosi. A te: “Papayi wezru lweyi a nga matilweni, a vito dzraku a dzri xwengisiwe.”—Mat. 6:9.

¹¹ Ha yini vito dzra Yehovha dzri fanela ku xwengisiwa ni ku lweliwa? Hikusa a xizrambeni xa le Edeni Sathana a hlaye madzrimi mayelanu na Yehovha Xikwembu Nkulukumba a tlhela a mu ntxhimisa. Sathana a hlaye leswaku Yehovha i muhembi nakone a a tsrona Adamu na Evha mintxhumu leyinene. (Gen. 3:1-5) Hi ku yentxa leswo, Sathana a a zama ku kombisa leswaku ndlela leyi Yehovha a yentxaka mintxhumu ha yone a hi yinene. A swihehlo swa Sathana swi hone vito dzra Yehovha hi ku kongoma. Hi ku famba ka nkama, a masikwini ya Yobe, Sathana a hlaye leswaku vhanu va tizrela Yehovha ntsena hi leswi va djulaka ku pfuneka hi ndlela ya kukazri. A tlhele a hlaya leswaku vhanu a va tizreli Yehovha hi leswi va mu zrandzraka nakone va ta tsrhika ku mu tizrela loko va kumana ni mindzringo. (Yb. 1:9-11; 2:4) A ku djuleka nkama akuva ku tiveka leswaku lweyi a hembaka i Yehovha kumbe i Sathana.

“NI NYIKELA WUTOMI BYANGA”

12. Xana Yesu a a tiyimisele ku yentxa yini hi kola ka lizrandzru ledzri a nga na dzrone hi vito dzra Yehovha?

¹² Hi kola ka lizrandzru ledzri Yesu a nga na dzrone hi Papayi wake, yene a a djula ku lwela ni ku xwengisa vito dzra Yehovha. A te: “Ni nyikela wutomi byanga.” (Yoh. 10:17, 18) Ku hlaya ntiyiso, Yesu a a tiyimisele ku fa hi kola ka vito dzra Yehovha.c A vhanu va ku sungula lava a va hetisekile ku nga Adamu na Evha, a va mu yingisetanga Yehovha xileswo va yime na Sathana. Ku hambana na vone, Yesu a a tiyimisele ku ta a misaveni ni ku kombisa ndlela leyi a a mu zrandzra ha yone Yehovha. Yesu a yingisete Yehovha ka hinkwaswu leswi a a swi hlaya ni ku swi yentxa. (Heb. 4:15; 5:7-10) A tsrhame na a dumbekile ku ya tlhasela loko a fa a mhandzrini ya nxanisa. (Heb. 12:2) Hi ndlela leyo, a kombise lizrandzru dzrake ha Yehovha ni vito Dzrake.

13. Ha yini Yesu a a li mhunu lweyi a a ta kombisa ha hombe leswaku Sathana i muhembi? (Tlhela u vona ni mufoto.)

¹³ Hinkwaswu leswi Yesu a swi yentxiki, handle ka ku ganaganeka swi kombise leswaku lweyi a hembaka i Sathana, ku nga li Yehovha! (Yoh. 8:44) Yesu a a mu tiva ku yampswa Yehovha ku tlula mun’wana ni mun’wana lweyi a samiki a hanya. Loko yin’we ya mintxhumu leyi Sathana a yi hlayiki mayelanu na Yehovha a yi li ntiyiso, Yesu a a ta va a swi tivile. Kambe Yesu a tame a lwela vito dzra Yehovha. Nambiloko a swi tikomba ingiki Yehovha a mu tsrhikile, Yesu a a tiyimisele ku fa a matsrhan’wini ya ku pfukela Papayi wake.—Mat. 27:46.d

“NI KU TWALISILE . . . HI KU HETA NTIZRO LOWU U NI NYIKIKI WONE”

14. Xana Yehovha a hakele ku dumbeka ka Yesu hi ndlela yini?

¹⁴ Ka xikhongoto lexi a xi hambiki ka wusiku bya wugamu na a nge si fa, Yesu a te: “Ni ku twalisile . . . hi ku heta ntizro lowu u ni nyikiki wone akuva ni wu tizra.” Yesu a a yentxa swone hi ku dumba Papayi wake. A a tiyiseka leswaku Yehovha a ta mu hakela hi kola ka ku dumbeka kwake. (Yoh. 17:4, 5) Yehovha a nga pfumelelanga kuva Yesu a tsrhama nkama wa ku leha a sizreni. (Mint. 2:23, 24) A pfuxe Yesu a va a mu beka ka xiyimu lexi tlakukiki ngopfu swinene a matilweni. (Filp. 2:8, 9) Hi ku famba ka nkama, Yesu a sungule ku fuma swanga Hosi ya Mfumu wa Xikwembu Nkulukumba. Xana Mfumu lowu wu ta hetisisa yini? A xiyenge xa wubidzri xa xikhongoto xa Hosi xi hi byela leswi: “A Mfumu waku a wu te. A ku zrandzra kwaku a ku yentxeke la misaveni, hi lani ku yentxekaka ha kone matilweni.”—Mat. 6:10.

15. He swini swin’wana leswi Yesu a taka swi hetisisa?

¹⁵ Ku nga li khale, Yesu a ta lwa ni valala va Mfumu wa Xikwembu Nkulukumba a va a va helisa ka yimpi ya Armagedoni. (Mpful. 16:14, 16; 19:11-16) Ntsrhakunyana ka leswo, Yesu a ta teka Sathana a mu peta ka xikhele xa ku yenta lani a nge he tiki kota ku yentxa ntxhumu, leswi nga fanisiwaka ni loko a file. (Mpful. 20:1-3) Kutani Yesu a ta fuma ku dzringana 1.000 wa malembe, a ta pfuxeta ku zrula a tlhela a yentxa leswaku vhanu va va lava hetisekiki. Nakone a ta pfuxa lava fiki, a ta yentxa leswaku misava yi va paradeyisi lani ku taka hetiseka nkongometo wa Yehovha!—Mpful. 21:1-4.

16. Xana wutomi byi ta va hi ndlela yini ntsrhaku ka Mfumu wa 1.000 wa malembe?

¹⁶ Xana wutomi byi ta va hi ndlela yini loko ku hela 1.000 wa malembe ya Mfumu wa Kriste? A xidoho ni ku kala ku hetiseka a swi nge he ti va kone. A vhanu a va nge he ti va vilela lava 144.000 akuva va va vaprista vavu, nakone a vhanu a va nge he ti mu vilela Yesu leswaku a va muprista wavu lwenkulu akuva va va ni wuxaka na Yehovha. Nakone “a nala wa wugamu, ku nga lifu, [ledzri vangiwiki hi Adamu] [dzri] ta helisiwa”. Masizra ma nge he ti va ni mhunu. Vafi va ta va na va pfuxiwile. Hinkwavu a misaveni va ta va na va hetisekile.—1 Kor. 15:25, 26.

17-18. a) I yini leswi taka yentxeka a wugan’wini bya Mfumu wa 1.000 wa malembe? b) I yini leswi Yesu a taka swi yentxa loko ku hela 1.000 wa malembe ya Mfumu wake? (1 Vakorinte 15:24, 28) (Tlhela u vona ni mufoto.)

¹⁷ I yini swin’wana leswi taka yentxeka loko Mfumu wa Kriste wa 1.000 wa malembe wu ta va na wu helile? Ku ta yentxeka ntxhumu wa ku hlamalisa swinene hikusa ni mun’we a nge he ti va kone lweyi a taka ganaganeka leswaku Yehovha i Xikwembu Nkulukumba lweyi a xwengiki ni lweyi a lulamiki. A xizrambeni xa le Edeni, Sathana a hlaye leswaku Yehovha i muhembi nakone a nga fumi vhanu hi ndlela ya lizrandzru. Ku sukela ka nkama wolowo lava gandzrelaka Yehovha va kombisa leswaku va mu hlonipha ni leswaku tindlela take i tinene. A ku heleni ka Mfumu wa 1.000 wa malembe, a vito dzra Yehovha dzri ta va dzri lweliwe hi ku helela. Handle ka ku ganaganeka, Yehovha a ta va a kombise leswaku i Papayi wa le matilweni lweyi a nga ni lizrandzru.

¹⁸ Loko 1.000 wa malembe ya ku fuma ka Yesu ma ta va na ma helile, hinkwavu va ta swi tiva leswaku hinkwaswu leswi Sathana a swi hlayiki mayelanu na Yehovha a a li madzrimi. I yini leswi Yesu a taka swi yentxa loko ku hela 1.000 wa malembe ya ku fuma kwake? Xana a ta yetisela Sathana a va a pfukela Yehovha? Im-him! (Dondzra 1 Vakorinte 15:24, 28.) A ta tlhelisela Mfumu ka Papayi wake. Ku hambana na Sathana, Yesu a tiyimisele ku yentxa hinkwaswu hi kola ka lizrandzru ledzri a nga na dzrone ha Yehovha.

19. Xana vito dzra Yehovha dzri tlhamuxela yini ka Yesu?

¹⁹ A swi hi hlamalisi leswi Yehovha a a tiyimisele ku nyika Yesu vito Dzrake! Yesu a tikombise a li muyimeli lweyi a hetisekiki wa Papayi wake. Kutani, xana a vito dzra Yehovha dzri tlhamuxela yini ka Yesu? I vito ledzri nga ni lisima ngopfu ku tlula ntxhumu wun’wana ni wun’wana kwake. A a tiyimisele ku fa hi kola ka vito ledzro nakone a ta tiyimisela ku tlhelisela hinkwaswu ka Yehovha loko 1.000 wa malembe ya ku fuma kwake ma hela. Xana hi nga yetisela xikombiso xa Yesu hi ndlela yini? Hi ta kambisisa nhlamulo ya xivutiso lexi ka nhlokomhaka leyi landzrelaka.