Ku Hlayisa Bandla Leswaku Dzri Tsrhama Na Dzri Basile Dzri Tlhela Dzri Va Ni Ku Zrula

LEMBE ni lembe ku nhingena makhulukhulu ya vhanu a ndlwini ya wugandzreli bya ku xwenga bya Yehovha, leswi hetisisaka wuprofeta bya Bibele. (Mik 4:1, 2) Hi nyonxa ngopfu hi ku va yamukela a ‘bandleni dzra Xikwembu Nkulukumba’! (Min 20:28) Va yi tlangela ndjombo ya ku tizrela Yehovha na hine va tlhela va nyonxela paradeyisi dzrezru dzra moya ledzri zruliki dzri tlhela dzri basa. A moya wa ku xwenga wa Yehovha kun’we ni swilayu leswi nga Zritwini dzrakwe swi hi pfuna ku hlayisa ku zrula ni ku yentxa bandla dzri tsrhama na dzri basile.​—Ps 119:105; Zk 4:6.

² Loko hi hanya hi minsinya ya milawu ya Bibele, hi va na hi yambala ‘mhunu lwe mumpshwa’. (Kl 3:10) Hi fulazrela timholova ta wumpswaka ni leswi swi yentxaka wumhunu byezru byi nga fani. Loko hi vona mintxhumu hi ndlela ya Yehovha, hi kota ku hlula nhlohlotelo wa misava hi tlhela hi tizra hi wumun’we swanga nhlengeletanu ya vamakwezru lava nga misaveni hinkwayu.​—Min 10:34, 35.

³ Nambitanu, minkama yimbeni ku nga ha humelela swikazratu leswi nga ha khumbaka ku zrula ni wumun’we bya bandla. Hi ndlela yini? Minkama ya ku tala swi vangiwa hi ku hluleka ku tizrisa nkongomiso wa Bibele. Hi lwisana ni ku pfumala ku hetiseka. A nga kone lweyi a nga dohikiki. (1Yh 1:10) Mhunu wa kukazri a nga ha yentxa ntxhumu lowu hoxekiki lowu nga ha nhingenisaka mahanyela kumbe moya lowu nga basangakiki a ndzreni ka bandla. Hi nga ha dohela mhunu hi ku yentxa kumbe ku hlaya ntxhumu lowu nga pimisiwangakiki, kumbe hi nga ha hetiwa ntamu hi leswi mhunu wa kukazri a swi hlayiki kumbe ku swi yentxa. (Ro 3:23) Ka swiyimu swa ku fana ni leswi, hi nga yentxa yini akuva hi lulamisa timhaka?

⁴ Leswi a nga ni lizrandzru, Yehovha awa zron’weka hi timhaka leti hinkwatu. Zritu dzrakwe dzri nyikela swilayu mayelanu ni leswi nga yentxiwaka loko ku humelela swikazratu. Vakulu, ku nga vabyisi va moya lava nga ni lizrandzru, va nga pfuna mhunu hi ku kongoma. Loko hi tizrisa swilayu swavu leswi humaka Matsralweni, hi nga tlhela hi pfuxeta wuxaka lebyinene ni vambeni ni ku tlhela hi yamukeleka ka Yehovha. Loko hi layiwa kumbe hi khwaveliwa loko hi dohile, hi nga tiyiseka leswaku ku layiwa koloko i xikombiso xa leswaku Tatana wezru wa le matilweni awa hi zrandzra.​—Pr 3:11, 12; Hb 12:6.

NDLELA YA KU LULAMISA TIMHAKA LETITSRONGO

⁵ Minkama yimbeni ku nga ha humelela timholova kumbe swikazratu leswi nga nyawulikiki a ndzreni ka bandla. Swi fanela ku lulamisiwa hi xihatla, hi moya wa lizrandzru dzra wumakwezru. (Ef 4:26; Flp 2:2-4; Kl 3:12-14) Minkama ya ku tala, u ta xiya leswaku swikazratu swa ximhunu leswi khumbaka wuxaka byaku ni mukriste-kuloni swi nga lulamisiwa hi ku tizrisa xilayu xa mupostola Petrosi lexi liki ‘zrandzranisani, hikusa a lizrandzru li ta fukumeta wunyingi bya swihono’. (1Pe 4:8) Bibele dzri li: ‘Ha hoxa hinkwezru ku leswinyingi.’ (Yk 3:2) Loko hi tizrisa Nawu wa Mahanyela, ku nga ku yentxela vambeni hinkwaswu leswi hi djulaka va hi yentxela, minkama ya ku tala hi nga swi kota ku dzrivala mimphazamu yavu leyitsrongo.​—Mt 6:14, 15; 7:12.

⁶ Loko u xiya leswaku mhunu wa kukazri a khunguvanyisiwile hi leswi u swi hlayiki kumbe u swi yentxiki, u fanela ku va wa ku sungula ku yentxa ku zrula hi xihatla. Dzrimuka, wuxaka byaku na Yehovha bya khumbeka. Yesu a laye vadondzrisiwa vakwe a ku: ‘Ke, loko u humexa mhamba yaku, u yi yisa gandzrelweni, u va u dzrimuka kone leswaku makwenu a na ni mhaka na wene, tsrhika mhamba yaku, u yi siya kone mahlweni ka gandzrelo, u famba, u ya zranga u tlhangana ni makwenu; lanu ke buya, wa ta humexa mhamba yaku.’ (Mt 5:23, 24) Swi nga yentxeka mi nga twisisananga. Loko swi li tanu, bulisanani. Loko hinkwavu a bandleni va bulisana hi ndlela leyinene swi sivela ngopfu kuva vhanu va nga twanani ni ku pfuna a ku tlhantlheni ka swikazratu leswi humelelaka hi ku pfumala ku hetiseka.

KU NYIKELA XILAYU XA MATSRALWA LOKO XI DJULEKA

⁷ Minkama yimbeni, valaviseli va nga ha vona swi faneleka ku nyikela xilayu akuva ku lulamisiwa mapimisela ya mhunu. A hi minkama hinkwayu swi nabyalaka. Pawulo a tsralele vakriste va le Galatiya a ku: “Vamakwezru, nambi loko mhunu a teka gwansu ledzri hoxekiki na a nge si na swi xiya, n’wine lava nga ni timfanelo ta moya dzringisani ku wololoxa mhunu wa ku tanu hi moya wa ku zrula.”​—Ga 6:1, NM.

⁸ Hi ku byisa ntlhambi, valaviseli va nga sizrelela bandla ka timhangu tinyingi ta moya va tlhela va sivela ku kula ka timhaka. Vakulu va tikazratela ku tizrela bandla hi ndlela leyi Yehovha a yi dumbisiki hi ku tizrisa Ezaya: ‘A mhunu a ta fana ni wutxhavelo loko moya wu hunga, swanga hi xisizrelelo loko ku tlhasa xidzedze, swanga hi swinambyana swa mati a mbangwini lowa ku woma, ni ntsrhuti wa zribye ledzri tlakukiki a tikweni ledzri pshwiki.’​—Eza 32:2.

KU FUNGA LAVA NGA HLELEKANGAKIKI

⁹ Mupostola Pawulo a basopise mayelanu ni vhanu va kukazri lava a va ta va nhlohlotelo wa ku biha a bandleni. Pawulo a te: ‘Ha n’wi laya . . . akuva n’wi tsravukana ni vamakwezru hinkwavu lava fambaka hi futa, va nga fambi ha swihena leswi va nga swi yingela ha hine.’ A khanyise mazritu lawo hi ku tsrala leswi: ‘Loko ku ni mhunu lweyi a nga yingisetikiki zritu dzrezru, mu lavisisani lweyo, n’wi nga ha tlhangani na ye, a kota a va ni tingana. Kambe n’wi nga mu yentxisi xi-nala, mu lulekisani xi-makwenu.’​—2Te 3:6, 14, 15.

¹⁰ Minkama yimbeni, ku nga ha va ni mhunu lweyi nambi leswi a nga hambangakiki xidoho lexikulu lakakuva a faneliwa hi ku hlongoliwa bandleni, a nga ni mahanyela lama dzrelaka hi ndlela leyikulu milawu ya Xikwembu Nkulukumba leyi kongomisaka vakriste. Leswo swi nga ha patsra mintxhumu ya ku fana ni ku lolohwa ku tlula mpimu, ku sola-sola, kumbe futa. A nga ha “tipeta ka timhaka leti nga mu lumbikiki”. (2Te 3:11, NM) Kumbe a nga ha va mhunu lweyi a kanganyisaka vambeni leswaku a va tekela swavu kumbe lweyi a hungataka hi mintxhumu leyi swi nga livaleni leswaku a hi yinene. Mahanyela lama nga hlelekangakiki ma bihe ngopfu lakakuva ma nga hona vito dzra bandla ma tlhela ma tlulela vakriste vambeni hi ku nabyala.

¹¹ Vakulu va ta zranga hi ku zama ku pfuna mhunu lweyi a nga hlelekangakiki hi ku mu nyika xilayu lexi humaka Bibeleni. Nambitanu, loko mhunu lweyo a tama a yeyisa minsinya ya milawu ya Bibele nambi leswi a nyikiwiki swilayu hi ku phinda-phinda, va nga ha teka xiboho xa ku beka wukaneli lebyi baka ndleve bandla. Vakulu va fanela ku tizrisa wutlhazri loko va kambisisa leswaku xiyimu xa kukazri i xikulu xi tlhela xi kazrata vambeni lakakuva swi fanela ku beka wukaneli bya ku ba ndleve. Xikaneli xi ta lulamisela swilayu leswi fanelekaka mayelanu ni moya wa ku pfumala ku hleleka, kambe xi nge ti hlaya vito dzra mhunu wa kone. Xileswo, lava va yi tivaka mhaka leyi ku vulavuliwiki ha yone ka wukaneli va ta tivonela ku titlhanganisa na yene, nambi leswi va taka tama va tlhangana ka mintizro ya moya, va mu luleka swanga makwezru.

¹² Loko swizro swa bandla leswi dumbekaka swi tiya ka xiboho lexi tekiwiki, swi ta pfuna mhunu lweyi a nga hlelekangakiki leswaku a biwa hi tingana hi kola ka mahanyela yakwe a va a susumeteleka ku txintxa. Loko swi li livaleni leswaku mhunu wa ku tanu a ma tsrhikile mahanyela yakwe ya ku pfumala ku hleleka, a swa ha vileleki ku tama a khomiwa swanga mhunu lwa fungiwiki.

NDLELA YA KU LULAMISA SWIDOHOSWA KUKAZRI LESWIKULU

¹³ Ku tiyimisela kwezru ku ba swihoxo hi makatla ni ku dzrivalela vambeni a swi hlayi leswaku a hi na mhaka ni xidoho kumbe leswaku ha xi yamukela. A hi swidoho hinkwaswu swi yentxiwaka hi ku kala ku hetiseka; nakone a hi swinene ku ba swidoho leswikulu hi makatla (Lv 19:17; Ps 141:5) Ntwananu wa Nawu afa wu pfumela leswaku swidoho swin’we afa swi li swikulu ku tlula swimbeni, nakone swa ha fana ni le ndzreni ka lulamiselo dzra wukriste.​—1Yh 5:16, 17

¹⁴ Yesu a nyikele swileleto leswi kongomaka mayelanu ni malulamisela ya timhaka letikulu a makazri ka vakriste. Vona magwansu lawa a ma nyikeliki: “Loko makwenu a yentxa xidoho, [1] famba u ya yandlala xidoho xakwe na mi li wuswenu. Loko a ku yingela, u ta va u kume makwenu. Kambe loko a nga ku yingeli, [2] yengeta u teka mun’we kumbe vabidzri akuva a mhaka hinkwayu yi ta tiyisiwa hi milomu ya timboni tibidzri kumbe tizrazru. Loko a yala ku va yingela, [3] byela bandla. Loko nambi bandla a nga dzri yingeli, ku wene a a ve swanga hi wa matiko ni muhlengisi.”​—Mt 18:15-17, NM.

¹⁵ Hi ku ya hi xifananiso lexi Yesu a gamiki a xi nyikela, lexi tsraliwiki ka Mattheo 18:23-35, swi tikomba na xin’wana xa swidoho leswi ku khaneliwaka ha swone ka Mattheo 18:15-17 xi patsra timhaka ta mali kumbe nhundzru ya mhunu, ku fana ni kuva a nga hakeli xikweneti kumbe ku kanganyisa. Ku nga ha tlhela ku va nandzru wa ku hehla mhunu hi ndlela leyi mu honaka vito swinene.

¹⁶ Loko u ni wumboni bya leswaku manyana a bandleni a ku dohele hi ndlela ya ku tanu, u nga tsrutsrumeli ku ya byela vakulu, u va kombela ku ku pfuna ku thetha mhaka yaku. Hi lani Yesu a hi biki ndleve ha kone, zranga hi ku ya khanela ni mhunu lweyi u nga ni mhaka na yene. Dzringisa ku lulamisa mhaka na mi li n’wine vabidzri ntsena, ku nga petiwi vhanu vambeni. U nga dzrivali leswaku Yesu a nga hlayanga leswaku u ta ‘famba kan’we ntsena u ya yandlala xidoho xakwe’. Xileswo, loko mhunu wa kone a nga wu pfumeli nandzru a va a kombela ku dzrivaleliwa, swi nga va swinene ku yanakanya hi ku mu yela hi nkama wumbeni. Loko mhaka yi kota ku lulamisiwa hi ndlela leyi, i ntiyiso leswaku lweyi a ku doheliki a ta tlangela leswi u nga byelangakiki vambeni xidoho xakwe kumbe ku mu hona vito a bandleni. “U ta va u kume makwenu.”

¹⁷ Loko lweyi a ku doheliki a pfumela nandzru, a kombela ku dzrivaleliwa, a va a yentxa leswi djulekaka akuva a lulamisa leswi honekiki, a ku na xivangelo xa ku yisa mhaka mahlweni. Nambi leswi a ku doheliki ngopfu, xidoho xa muxaka lowo xi nga lulamisiwa hi vhanu vabidzri lava dohelaniki.

¹⁸ Loko u hluleka ku twanana ni makwenu hi ku kombisa xidoho xakwe “na mi li wuswenu”, u nga ha yentxa leswi Yesu a swi hlayiki: “Yengeta u teka mun’we kumbe vabidzri”, u tlhela u vulavula ni makwenu. Lava u fambaka navu va fanela ku va ni nkongometo wa ku pfuna makwenu. Loko swi koteka va fanela ku va ni wumboni bya xidoho xa kone, kambe loko ku nge na timboni leti swi voniki, u nga ha hlawula ku vitana mun’we kumbe vabidzri akuva va va timboni ta mabulu lawo. Va nga ha va ni wutlhazri a mhakeni ya kone va tlhela va kota ku twisisa kumbe leswi yentxekiki swi phazamekile hakakunene. Vakulu lava hlawuliwaka ku va timboni ta bulu a va yimeli bandla, swanga hi leswi a huvo ya vakulu yi nga va hlawulelangakiki ku yentxa leswo.

¹⁹ Loko ku hambiwe minzamu ya ku tala kambe a mhaka ya kone yi nge si na lulamisiwa, nambi loko u bule na yene na mi li wuswenu u tlhela u mu yela na u ni mhunu mumbeni kumbe vabidzri, kambe u titwa na swi ku hlula ku swi tsrhika swi khaluta, u nga byela valaviseli va bandla mhaka ya kone. Dzrimuka leswaku a nkongometo wavu i ku hlayisa ku zrula ni ku basa ka bandla. Loko u vulavule ni vakulu, tsrhika mhaka a mavokweni yavu u va u dumba Yehovha. Nambi swo yini, u nga pfumelele mhunu a ku tsrhikisa ku gandzrela Yehovha kumbe a ku susela ku nyonxa loku u ku twaka a ntizrweni wakwe.​—Ps 119:165.

²⁰ Vabyisi va ntlhambi va ta kambisisa mhaka ya kone. Loko swi voneka leswaku nakunene a mhunu wa kone a ku dohele ngopfu kambe a nga djuli ku tisola nakone a nga naveli ku lulamisa leswi honekiki, swi nga ha vileleka kuva a huvo ya valaviseli yi hlongola mudohi lweyo a bandleni. Hi ndlela leyo va ta sizrelela ntlhambi va tlhela va hlayisa ku basa ka bandla.​—Mt 18:17.

NDLELA YA KU TAMELA SWIDOHO LESWIKULU

²¹ Swidoho swimbeni leswikulu, ku fana ni ku woswa, wumbuye, ku yetlela ni mhunu wa limbewu ledzri fanaka, ku sandzra, ku gandzrela swithombe, ni swimbeni swa ku fana ni leswi, a swi heleli ka ku dzrivaleliwa hi lweyi a doheliwiki. (1Ko 6:9, 10; Ga 5:19-21) Leswi ku basa ka bandla hi tlhelo dzra moya ni dzra mahanyela ku nga nghozini, swidoho leswikulu swa ku tanu swi fanela ku byeliwa vakulu swi tlhela swi lulamisiwa ha vone. (1Ko 5:6; Yk 5:14, 15) Vambeni va nga ha tsrhindzrekelela vakulu va va byela swidoho swavu kumbe swidoho leswi yentxiwiki hi vambeni. (Lv 5:1; Yk 5:16) A swi na mhaka leswaku vakulu va dzri kumisa kuyini dzrungula mayelanu ni xidoho lexikulu lexi yentxiwiki hi Mboni leyi babatisiwiki, a mhaka ya kone yi fanela ku kambisisiwa hi vakulu vabidzri. Loko swi voneka leswaku a ndzrava leyo i ya ntiyiso ni leswaku byi kone wumboni bya leswaku xidoho xi yentxiwile hakunene, a huvo ya vakulu yi ta vumba xihubyana xa wuyavanyisi lexi patsraka vakulu vazrazru kumbe ku tlula leswaku xi thetha mhaka ya kone.

²² Vakulu va beka tihlo ka ntlhambi leswaku va wu hlayisa, va tlhela va wu sizrelela ka ntxhumu wini na wini lowu nga wu dlayaka he moyeni. Va tlhela va nyonxela ku tizrisa Zritu dzra Xikwembu Nkulukumba hi wutlhazri leswaku va laya wini na wini lweyi a dohaka ni ku mu daha hi tlhelo dzra moya. (Yd 21-23) Leswi swi fambisana ni nkongomiso lowu nyikiwiki Timotewu ha mupostola Pawulo, lweyi a tsraliki leswi: ‘Ni ku leleta mahlweni ka Xikwembu Nkulukumba ni le ku Kriste Yesu, lwa taka yavanyisa lava hanyaka ni lava fiki, . . . khata, khongotela, khwavela hi mbilu ya ku leha ni hi [wuswikoti bya, NM] ku dondzrisa.’ (2Tm 4:1, 2) Ku yentxa leswo swi nga ha djula nkama swinene, kambe lexi i xiyenge xa ntizro lowukulu wa vakulu. A bandla dzra nyonxa hi ku tikazrata kwavu dzri tlhela dzri va kombisa xihluwa lexi ‘tlulaka kumbe lexi phindiwiki ha kabidzri’.​—1Tm 5:17.

²³ Ka swiyimu hinkwaswu leswi mhunu a kumekaka na a ni xidoho, a ntizro wa ku sungula wa valaviseli i ku daha mudohi hi tlhelo dzra moya. Loko mudohi a tisola na swi sukela mbilwini, valaviseli va tlhela va kota ku mu pfuna. Ku mu laya kwavu, loku nga ha yentxiwaka a xihundleni kumbe a mahlweni ka timboni tini na tini leti viki kone loko a yavanyisiwa, ku ta dondzrisa yene ku tlhela ku pfuna vahlaleli ku txhava ku yentxa leswi bihiki. (2Sa 12:13; 1Tm 5:20) Ka swiyimu hinkwaswu swa ku layiwa hi xihubyana xa wuyavanyisi, mudohi a siveliwa ku yentxa swa kukazri. Xileswo a nga ha pfuniwa ku lulamisa tindlela ta minkondzro yakwe. (Hb 12:13) Hi nkama lowu faneliki, loko swi va livaleni leswaku a lulamisile xiyimu xakwe xa moya, a nga ha ntsrhunxiwa ku tlhela a yentxa leswi afaka a siveliwile.

XITIVISO XA KU KHWAVELIWA

²⁴ Loko xihubyana xa wuyavanyisi xi vona leswaku a mudohi a tisolile kambe swi tikomba na mhaka yakwe yi ta tiviwa a bandleni kumbe a mugangeni, kumbe a bandla dzri fanela ku tivonela ka mudohi lweyi a tisoliki, ku ta nyikeliwa xitiviso xa ku goma ka Ntlhanganu Wa Wutomi Ni Wutizreli. Xi ta va hi ndlela leyi: “[Vito dzrakwe] a khwaveliwile.”

LOKO KU TEKIWA XIBOHO XA KUSUSA MHUNU A BANDLENI

²⁵ Ka swiyimu swimbeni, mudohi a tolovelana ni ndlela yakwe ya wudohi lakakuva a xidoho xi yakela, kutani a nga wu yamukeli mpfuno. Swi nga yentxeka yi nga voneki ‘mintizro leyi yi kombisaka ku ndzruluka’ loko mhaka yakwe yi li ku thethiweni. (Min 26:20) Xana ku ta yentxiwa yini? Ka swiyimu leswo, mhunu lweyi a nga tisoliki a fanela ku susiwa a bandleni, xileswo a ta siveliwa ku titlhanganisa ni vhanu lava basiki va Yehovha. Ku susiwa nhlohlotelo wa ku biha wa mudohi a bandleni, hi ndlela leyo dzri kota ku hlayisiwa na dzri basile hi le moyeni ni le mahanyeleni ku tlhela ku sizreleliwa vito dzra dzrone ledzrinene. (Dt 21:20, 21; 22:23, 24) Loko mupostola Pawulo a tive leswaku ku ni lweyi a nga ni mahanyela ya tingana a bandleni dzra le Korinte, a be ndleve vakulu leswaku va “nyiketa mhunu wa ku tanu ka Sathana . . . akuva a moya [wa bandla] wu ta huluxiwa”. (1Ko 5:5, 11-13, NM) Pawulo a tlhele a vulavula hi ku susiwa ka vambeni lava pfukeliki ntiyiso hi dzana dzra ku sungula.​—1Tm 1:20.

²⁶ Loko ku tekiwa xiboho xa leswaku mudohi lweyi a nga tisoliki a fanela ku susiwa, a xihubyana xa wuyavanyisi xi fanela ku mu byela hi ta xiboho lexo, xi mu khanyisela swivangelo swa Matsralwa leswi seketelaka ku susiwa kwakwe. Loko kutani a xihubyana xa wuyavanyisi xi tlhamuxele mudohi hi ta xiboho lexo, xi ta mu byela leswaku loko a vona leswaku ndlela leyi a yavanyisiwiki ha yone yi phazamekile swinene, a navela ku tlhela a yavanyisiwa hi ximpshwa, a fanela ku yentxa hi ku tsrala papela, a tlhamuxela swivangelo hi ku kongoma. A ta nyikiwa 7 wa masiku lama sungulaka ku nkonta hi siku ledzri a xihubyana xa wuyavanyisi xi mu byeliki xiboho ha dzrone. Loko ku yamukeliwa papela dzra xikombelo lexo, a huvo ya vakulu yi fanela ku bula ni mulaviseli wa muganga, lweyi a taka hlawula vakulu lava fanelekaka leswaku va vumba xihubyana xa wuyavanyisi lexi taka tlhela xi thetha mhaka. Xi ta yentxa minzamu hinkwayu leswaku xi thetha mhaka a ndzreni ka vhiki a ntsrhaku ka ku yamukeliwa ka papela. Loko ku ni xikombelo xa ku tlhela ku thethiwa mhaka, a xitiviso xa ku susiwa a bandleni xi ta pfana xi bekiwa hi tlhelo. Hi nkama wolowo, mhunu lweyi a nga ku yavanyisiweni a fanela ku siveliwa ku hlamula ni ku hamba swikhongoto a bandleni kun’we ni mintizro yimbeni ya ku hlawuleka.

²⁷ Mpfumelelo wa ku kombela ku thethiwa ka mhaka hi ximpshwa i ndlela ya ku kombisa wunene ka mudohi nakone yi mu pfumelela ku tlhela a pfula xifuva mayelanu ni leswi mu kazrataka. Xileswo, loko mudohi, ha mavomu, a nga yi ka ntlhanganu wa ku tlhela ku yavanyisiwa mhaka yakwe, loko ku hambiwe minzamu ya ku tlhela ku tlhanganiwa na yene kambe swi nga koteki, ku ta hambiwa xitiviso xa ku susiwa kwakwe.

²⁸ Loko mudohi a nga kombeli ku tlhela a thethisiwa hi ximpshwa, a xihubyana xa wuyavanyisi xi ta mu tlhamuxela hi ta xivileleko xa ku tisola ku patsra ni magwansu lawa a fanelaka ku ma teka leswaku a tlheliseliwa a bandleni hi nkama lowu faneliki. Leswi swi nga mu pfuna swi tlhela swi kombisa wunene, nakone swi fanela ku yentxiwa na ku laviseliwa leswaku a txintxa mahanyela yakwe, a kota ku tlhelela ka nhlengeletanu ya Yehovha hi ku famba ka nkama.​—2Ko 2:6, 7.

XITIVISO XA KU SUSIWA BANDLENI

²⁹ Loko swi vileleka kuva mudohi lweyi a nga tisoliki a susiwa bandleni, ku hambiwa xitiviso xa ku goma hi ndlela leyi: “[Vito dzrakwe] a nga ha li Mboni ya Yehovha.” Leswo swi ta pfuna lava ku dumbeka a bandleni akuva va tivonela ku titlhanganisa ni mhunu lweyo.​—1Ko 5:11.

KU TIHAMBANISA

³⁰ Zritu “ku tihambanisa” dzri hlaya mhunu lweyi a nga Mboni leyi babatisiwiki, kambe ha mavomu a tekaka gwansu dzra ku fulazrela xiyimu xakwe xa wukriste hi ku hlaya leswaku a nga ha swi djuli ku tiviwa kumbe ku va mun’wana wa Timboni ta Yehovha. Kumbe a nga ha tihambanisa ni bandla dzra wukriste hi mintizro yakwe, ku fana ni kuva a hamba tlhelo dzra nhlengeletanu ya misava leyi nga ni minkongometo leyi lwisanaka ni tindondzro ta Bibele, xileswo, yi faneliwaka hi ku yavanyisiwa ha Yehovha Xikwembu Nkulukumba.​—Eza 2:4; Mpf 19:17-21.

³¹ Loko a khanela hi lava fulazreliki lipfumelo dzravu dzra wukriste a masikwini yakwe, mupostola Yohane a tsrale leswi: ‘Va hume ku hine, ifa va ku ka va nge va kwezru; hikusa loko fanga nha ve va kwezru, inha va tsrhame na hine.’​—1Yh 2:19.

³² Loko mhunu a tihambanisa, xiyimu xakwe a mahlweni ka Yehovha xi hambane ngopfu ni xa mukriste lweyi a holiki, lweyi a yimiki ku huma nsimu. Mhunu a nga ha hola hi mhaka ya kuva a nga dondzri Zritu dzra Xikwembu Nkulukumba siku ni siku. Kumbexana a langusane ni swikazratu swa ximhunu kumbe nkaneto wa lipfumelo, kutani a lahlekeliwa hi nkhinkhi ya ku tizrela Yehovha. Vakulu kun’we ni vambeni a bandleni va ta ya mahlweni va pfuna mukriste lweyi a holiki hi tlhelo dzra moya, hi lani swi fanelaka ha kone.​—Ro 15:1; 1Te 5:14; Hb 12:12.

³³ Ku hambana ni leswo, loko mhunu lweyi a nga mukriste a hlawula ku tihambanisa, bandla dzri hambeliwa xitiviso xa ku goma, hi ndlela leyi: “[Vito dzrakwe] a nga ha li Mboni ya Yehovha.” Mhunu wa ku tanu a khomiwa ku fana ni lweyi a susiwiki bandleni.

KU TLHELELISIWA A BANDLENI

³⁴ Mhunu lweyi a susiwiki bandleni kumbe lweyi a tihambanisiki na dzrone a nga ha tlhelelisiwa loko swi voneka leswaku hakunene awa tisola ni loko ku khaluta nkama lowu dzringanaka na a kombisa leswaku a yi tsrhikile ndlela yakwe ya xidoho. Awa swi kombisa leswaku a navela ku va ni wuxaka lebyinene na Yehovha. Vakulu va kambisisa hi wuxiyaxiya ku vona loko hakunene nkama lowu khalutaka wu yanela, ku nga va tihweti ta ku hlawa, lembe kumbe ku tlula, hi ku ya hi swiyimu, akuva mhunu a kombisa leswaku ku tisola kwakwe i ka xihlayelamfuzri. Loko huvo ya vakulu yi yamukela papela dzra ku kombela ku tlhelela, a xihubyana xa ku tlhelelisa xi ta khanela na yene. Xi ta kambisisa akuva xi vona kumbe awa yi humexa ‘mintizro leyi yi kombisaka ku ndzruluka’, kutani xi boha kumbe swa fanela ku mu tlhelelisa hi nkama wolowo kumbe im-him.​—Min 26:20, TLM.

³⁵ Loko mhunu lweyi a kombelaka ku tlhelela a susiwe a bandleni dzrimbeni, ku ta vumbiwa xihubyana xa ku tlhelelisa a bandleni ledzri a nga ka dzrone swoswi akuva xi tlhangana na yene xi kambisisa xikombelo xakwe. Loko swizro swa xihubyana xa ku tlhelelisa swa bandla dzra swoswi swi vona leswaku a nga tlhelelisiwa, swi ta zrumela vonela dzra swone ka huvo ya vakulu va bandla ledzri tameliki mhaka a ku sunguleni. Swihubyana leswi patsrekaka swi ta tizrisana akuva swi tiyiseka leswaku ku ni wumboni hinkwabyu lebyi djulekaka akuva ku tlhaseliwa xiboho lexinene. Nambitanu, a xiboho xa ku tlhelelisa xi tekiwa hi xihubyana xa ku tlhelelisa xa bandla ledzri khomiki mhaka ya kone a ku sunguleni.

XITIVISO XA KU TLHELELISIWA A BANDLENI

³⁶ Loko xihubyana xa ku tlhelelisa xi kholwiseka leswaku lweyi a susiwiki awa tisola hakunene nakone swa fanela kuva a tlhelelisiwa, ku hambiwa xitiviso xa ku tlhelelisiwa kwakwe a bandleni ledzri tameliki mhaka ya kone a ku sunguleni. Loko mhunu lweyo swoswi a li bandleni dzrimbeni, na kone ku ta hambiwa xitiviso. Xi fanela ku va hi ndlela leyi: “[Vito dzrakwe] a tlhelelisiwile swanga Mboni ya Yehovha.”

TIMHAKA LETI KHUMBAKA VATSRONGWANALAVA BABATISIWIKI

³⁷ Swidoho leswikulu leswi yentxiwaka hi vatsrongwana lava babatisiwiki swi fanela ku byeliwa vakulu. Loko vakulu va thetha timhaka ta swidoho leswikulu leswi yentxiwiki hi vatsrongwana, i swinene kuva vapswele lava babatisiwiki va n’wana lweyo va va kone. Ku yimeliwe leswaku va tizrisana ni xihubyana xa wuyavanyisi, ku nga li ku dzringisa ku sizrelela n’wana lwa dohiki leswaku a nga layiwi. Ku fana ni loko ku lulamisiwa swidoho swa vhanu lava kuliki, xihubyana xa wuyavanyisi xi lwela ku laya ni ku tlhelelisa mudohi. Nambitanu, Loko ntsrongwana a nga tisoli, a fanela ku susiwa bandleni.

LOKO VAZREZRI LAVA NGA SIKI NA BABATISIWA VA DOHA

³⁸ Xana ku fanela ku yentxiwa yini loko vazrezri lava nga siki babatisiwa va hamba xidoho lexikulu? Leswi va nga liki Timboni leti babatisiwiki, va nge susiwi. Swi nga ha yentxeka va nga yi twisisi hi ku helela milawu ya Bibele, xileswo ku va laya swi nga ha va pfuna ku lulamisa tindlela ta minkondzro yavu.​—Hb 12:13.

³⁹ Loko mudohi lweyi a nga siki na babatisiwa a nga tisoli a ntsrhaku ka kuva vakulu vabidzri va tlhangane na yene va zama ku mu pfuna, ku fanela ku byeliwa bandla. Ku hambiwa xitiviso xa ku goma, hi ndlela leyi: “[Vito dzrakwe] a nga ha li muzrezri lweyi a nga siki na babatisiwa.” Bandla dzri ta teka mhunu lweyo swanga wa matiko. Nambi leswi mudohi a nga susiwiki, vakriste va fanela ku tivonela ku titwananisa na yene hi ndlela yini na yini. (1Ko 15:33) Ntizro wakwe wa nsimu a wu fanelanga wu yamukeliwa.

⁴⁰ Hi ku famba ka nkama, mhunu lweyi a nga siki na babatisiwa, lweyi a suseliwiki timfanelo ta ku zrezra a nga ha navela ku tlhela a va muzrezri. Ka xiyimu lexo, vakulu vabidzri va fanela ku tlhangana na yene akuva va vona ku hluvuka kwakwe ka moya. Loko a faneleka, ku hambiwa xitiviso xa ku goma, hi ndlela leyi: “[Vito dzrakwe] a tlhele a va muzrezri lweyi a nga siki na babatisiwa.”

YEHOVHA A TOVOKISA WUGANDZRELIBYA KU ZRULA BYI TLHELA BYI BASA

⁴¹ Hinkwavu lava titlhanganisaka ni bandla dzra Xikwembu Nkulukumba namunhla va nyonxa hi xiyimu xa wupfundzri bya moya lexi Yehovha a xi nyikaka vhanu vakwe. Nakunene, mimbenga yezru ya swakuda swa moya yi nonile, nakone hi ni mati lamanyingi ya xihlayelamfuzri lama pepisaka. Nakone Yehovha awa hi sizrelela hi lizrandzru hi ku tizrisa lulamiselo dzrakwe dzra moya ledzri nga hansi ka wuzrangeli bya Kriste. (Ps 23; Eza 32:1, 2) Ku va a paradeyisini dzra moya a masikwini lawa ya ku bindzra ya wugamu swi hi yentxa hi titwa na hi sizrelelekile.

⁴² Loko hi hlayisa ku zrula ni ku basa ka bandla, hi ya mahlweni hi pfumelela livaningo dzrezru dzra ntiyiso mayelanu ni Mfumu dzri phatima. (Mt 5:16; Yk 3:18) Hi ku tovokisiwa ha Yehovha, hi ta nyonxa hi ku vona mawakawaka ya vhanu ma tama ma tiva Yehovha ma tlhela ma tipatsra na hine a ku yentxeni ka ku zrandzra kwakwe.