Va Yale Ku Gandzrela Xifaniso

Hi ku famba ka nkama, hosi Nebukadnetsara a hambe xifaniso xa woru xa xikulu ngopfu swinene a gama a vitana vhanu hinkwavu va lisima va le Babilona akuva va ya vona xifaniso lexo. Ka vhanu volavo a ku na Xadraki, Mixaki na Abedinego. Kutani a hosi yi ku: ‘Loko mi yingela mpfumawulu wa xipalapala ni wa arpa, khinsamani mi gandzrela xifaniso lexi. Lweyi a taka kala a nga xi khinsameli ni ta mu txukumeta a xikheleni xa ndzrilo.’ Xana a Vaheberu lavazrazru a va ta gandzrela xifaniso kumbe a va ta tama va gandzrela Yehovha hi ku dumbeka?

Loko ku twala mpfumawulu, hinkwavu va khinsama va gandzrela xifaniso lexo, kambe Xadraki, Mixaki na Abedinego a va zanga va xi khinsamela nambi ku xi gandzrela. Loko vavanuna va kukazri va vona leswo, va ya byela hosi Nebukadnetsara. Hiloko hosi yi va vitana yi va yi ku: ‘Ni ta tlhela ni mi nyika mukhandlu wun’wana, loko mi nga xi gandzreli xifaniso lexi, mi ta txukumeteliwa a xikheleni xa ndzrilo nakone a ku na xikwembu lexi nga kotaka ku mi huluxa.’ Kutani va hlamula va ku: ‘A swi sindzrisi ku hi nyika mukhandlu wun’wana, hikusa Xikwembu Nkulukumba wezru a ta hi huluxa. Nambiloko a nga hi huluxi a hi nge txhuki hi xi gandzrela xifaniso lexi.’

Nebukadnetsara a hlundzruka ngopfu swinene kutani a va byela a ku: ‘Tsrhivelelani ndzrilo akuva wu hisa hi lani ku phindhiwiki ka 7 ku tlula ku hisa loku tolovelekiki, mi tsrimba vavanuna lava mi va txukumetela a xikheleni xa ndzrilo!’ Kutani a masotxha ma yentxa leswi hosi yi ma zrumiwiki swone. Kambe leswi a ndzrilo a wu hisa ngopfu, ku yentxeke leswaku a masotxha lawa ma petiki vanghanu va Daniyele ka xikhele lexo ma fa. Kutani loko hosi yi lavisa ndzreni ka xikhele yi vona vavanuna na va fambafamba, yi txhava yi va yi vutisa yi ku: ‘Kasi hi peti vhanu vangani ndzrilweni, a hi vavanuna vazrazru? Kambe ni vona mune wa vavanuna lani nakone mun’we wa vone ingiki i ntsrumi.’

Hiloko hosi Nebukadnetsara a tsrhindzrekela a xikheleni xa ndzrilo kutani a vitana Xadraki, Mixaki na Abedinego leswaku va huma. Lexi hlamalisiki vhanu hinkwavu hi leswaku ha wuzrazru byavu va hume na va nga pshwanga nikutsrongo. A xikhumba xavu, misisi yavu ni mpahla yavu a swi zanga swi pshwa futsrhi a va nga nun’hwi ximusi.

Kutani hosi Nebukadnetsara a ku: ‘Xikwembu Nkulukumba wa Xadraki, Mixaki na Abedinego hi yene wa ntamu hinkwawu ku tlula swikwembu hinkwaswu. A zrumele ntsrumi akuva yi va huluxa, a ku na xikwembu lexi fanaka ni Xikwembu Nkulukumba wavu.’

Xana hi dondzra yini ka xikombiso xa Xadraki, Mixaki na Abedinego? Hi dondzra leswaku hi fanela ku tiyimisela ku tama hi dumbeka ka Yehovha swi nge na mhaka leswi nga ha yentxekaka.