Daniyele A Xikheleni Xa Tinghonyama

A Babilona ku ve ni hosi yimbeni, a vito dzra yone a a li Dariyosi. Dariyosi a a swi tiva leswaku Daniyele a a hlawulekile. Xileswo a beke Daniyele akuva a va muzrangeli wa vavanuna hinkwavu va lisima va Babilona. Kambe a vavanuna lavo a va mu tsrhohoka Daniyele nakone a va djula ku mu dlaya. A va swi tiva leswaku Daniyele a a khongota kazrazru hi siku. Xileswo va ya byela hosi va ku: ‘Hosi Dariyosi, hi kombela u humesa nawu wa leswaku vhanu hinkwavu va fanela ku khongota kwaku ntsena. Mani na mani lweyi a khongotaka ka xikwembu xin’wana a fanela ku txukumeteliwa a xikheleni xa tinghonyama.’ Kutani hosi Dariyosi a nyonxa hi leswo, a va a humesa nawu lowumpshwa.

Loko Daniyele a yingela leswo a suka a timukela, a tlhasa a khinsama mahlweni ka janela a khongota ka Yehovha. Na Daniyele a ha le ku khongoteni, a valala vake va nghena kaya kwake. Va gama va famba hi ku tsrutsruma va ya byela hosi Dariyosi va ku: ‘Daniyele a nga wu yingisetanga nawu waku. A khongota ka Xikwembu xake kazrazru hi siku.’ Kambe hosi Dariyosi a a mu zrandzra Daniyele nakone a a nga swi djuli leswaku a fa. Kutani hi siku ledzro, a yentxa hinkwaswu leswi a nga swi kota akuva a huluxa Daniyele. Kambe leswo a swi nga ha koteki hikusa hosi Dariyosi a a wu humesile nawu futsrhi a nge he na ku wu txintxa. Xileswo swi sindzrise kuva a zruma masotxha yake ma txukumetela Daniyele a xikheleni xa tinghonyama.

Ka wusiku byolebyo, hosi Dariyosi a kazrateka ngopfu swinene hi ku pimisa hi Daniyele lakakuva ni wuzrongo byi nga ti. Hi mixo wa kone a tsrutsruma a ya xikheleni xa tinghonyama a va a huwelela a ku: ‘Daniyele, Xikwembu Nkulukumba waku xana a ku huluxile?’

Hiloko Daniyele a hlamula hosi a ku: ‘Ina, a ni huluxile, a ntsrumi ya Yehovha yi pfale minomu ya tinghonyama.’ Hosi Dariyosi a tala hi ku hlamala a tlhela a nyonxa ngopfu swinene lakakuva a zruma masotxha yake leswaku ma humesa Daniyele a xikheleni! Daniyele a nga zanga a vavisiwa. Kutani hosi yi leleta leswaku vavanuna lava a va tsrhohoka Daniyele va txukumeteliwa xikheleni xa tinghonyama. Loko vavanuna volavo va txukumeteliwa xikheleni, a tinghonyama ti va hahlulela.

Ntsrhaku ka leswo, hosi Dariyosi a byela vhanu hinkwavu a ku: ‘Hinkwenu mi fanela ku gandzrela Xikwembu Nkulukumba wa Daniyele. Hikusa a huluxe Daniyele ka tinghonyama.’

Swi ngo yini u yetisela Daniyele hi ku khongota ka Yehovha siku ni siku?