Yesu A Tlhelela Matilweni

Yesu a ye kumana ni vadondzrisiwa vake a Galileya, nakone a va nyike ntizro wa lisima. A va byela leswi: ‘Fambani mi ya yentxa vhanu va matiko hinkwawu va va vadondzrisiwa. Va dondzrisani hinkwaswu leswi ni mi dondzrisiki swone mi tlhela mi va babatisa.’ Kutani a va dumbisa a ku: ‘Dzrimukani leswaku minkama hinkwayu ni ta va na n’wine.’

Ku dzringana 40 wa masiku, Yesu a humelele ka madzanadzana ya vadondzrisiwa vake a Galileya ni le Yerusalema. A va dondzrise tidondzro ta lisima a tlhela a yentxa mahlolana ya ku tala. Kutani Yesu a tlhangane ni vapostola vake hi khambi dzra wugamu a Nhaveni ya Minhlwazri, a va a va byela leswi: ‘Mi nga suki a Yerusalema. Tamani mi yimela leswi Papayi a swi dumbisiki.’

A vapostola a va swi twisisanga leswi Yesu a a djula ku hlaya swone. Xileswo va mu vutisa va ku: ‘Xana hi swoswi u taka va hosi ya Israyele?’ Yesu a va hlamula a ku: ‘A wu si tlhasa nkama lowu Yehovha a wu bekiki leswaku ni va Hosi. Ku nga li khale mi ta yamukela moya wa ku xwenga, kutani mi ta va timboni tanga. Fambani mi ya zrezra a Yerusalema, Yudeya, Samariya ni ku ya tlhasa mimbangwini ya le kule ya misava.’

Kutani Yesu a sungula ku tlhantukela matilweni nakone a funeketiwa hi tlavi. A vadondzrisiwa va tama va langusa henhla, kambe a a nga ha voneki.

Kutani a vadondzrisiwa va suka Nhaveni ya Minhlwazri va ya Yerusalema. Minkama hinkwayu a va hlengeletana va tlhela va khongota. A va yimela leswaku Yesu a va nyika minkongomiso.