Pawulo A Yendzra A Ya A Roma

A liyendzro dzra wuzrazru ledzri Pawulo a dzri yentxiki ka ntizro wa ku zrezra dzri gamele a Yerusalema. Na a li kohala a khomiwe a pfaleliwa djele. Ka wusiku bya kukazri, Yesu a humelele ka Pawulo a xivonisweni, a va a mu byela leswi: ‘Famba u ya nyikela wumboni ni le Roma.’ Pawulo a tekiwe a Yerusalema a yisiwa a Khezariya, lani a hetiki malembe mabidzri na a pfaleliwile. Loko a thethisiwa hi govhernadori Fextu, Pawulo a kombela a ku: ‘Ni kombela ku yisiwa a Roma akuva ni ya yavanyisiwa hi Khezari.’ Hiloko Fextu a pfumela, xileswo Pawulo a khwelisiwa botini a yisiwa Roma. A fambe ni vanghanu vake vabidzri, ku nga Luka na Arixtaku.

Na va ha li ku yendzreni, ku sungula xidzedze lexikulu lexi tekiki masiku manyingi. Hinkwavu lava va nga botini va tibyela leswaku va ta fa. Kambe Pawulo a ku: ‘Vavanuna, vanani ni xixixi, a hi nge ti fa hikusa ka wusiku bya kukazri a ntsrumi yi ni byele leswi a milozrweni: U nga txhavi Pawulo, u fanela ku ya yima mahlweni ka Khezari, wene kun’we ni hinkwavu lava u nga na vone a botini.’

A xidzedze xi tama xi ba ku dzringana 14 wa masiku, kutani loko va vona xihlale, ve vhela va kongoma ka xone. A xihlale lexo a xi vitaniwa Melita. Loko va li kusuhi ni le nkingeni va honekeliwa hi boti, kambe hinkwavu va 276 va hulukile. Van’wana va tlhase xihlaleni hi ku hlambeta, kasi van’wana va hlambete hi ku pfuniwa hi switlephu swa mapulangu ya boti. Loko va tlhasile, a vhanu va le Melita va va hlayisa nakone va va tsrhivelela ndzrilo akuva va wozra, va susa xizrami.

Ntsrhaku ka tihweti tizrazru, a masotxha ma teka Pawulo hi boti dzrin’wana ma mu yisa a Roma. Loko a tlhasa a Roma, vamakwezru va mu yamukela. Loko Pawulo a vona vamakwezru na va tlhasa, a khensa Yehovha a va a tama a va ni xixixi. Nambileswi a a li xib’otxhwa, Pawulo a a ni mfanelo ya ku tsrhama ka muti wa ku lugara kambe na a voneleliwa. A tsrhame ka muti wolowo ku dzringana malembe mabidzri. Loko vhanu va mu pfuxela, Pawulo a a londzrovota mukhandlu lowo akuva a va zrezrela mayelanu ni Mfumu wa Xikwembu Nkulukumba kun’we na Yesu. Pawulo a tlhela a tsralela mabandla lawa a ma kumeka a Aziya Menor ni le Yudeya a mapapela. A wudzrunguli bya Pawulo byi hi dondzrisa leswaku Yehovha a mu tizrisile akuva a zrezra madzrungula lamanene ka mimbangu ya ku siyanasiyana.