Xikwembu Nkulukumba A Vulavula Na Hine Hi Ku Tizrisa Bibele

Yehovha a hi nyike xihiwa xa ku hlamalisa, a nga 66 wa mabuku lama hlengeleteliwiki ma vumba Bibele. Kambe u nga tivutisa leswi: ‘Bibele dzri pfa kwini? Hi mani mutsrali wa dzrone?’ Akuva hi kuma tinhlamulo ta swivutiso leswi, a hi bule mayelanu ni leswi Zritu dzra Xikwembu Nkulukumba, ku nga Bibele, dzri tlhasisiki xiswone ka hine.

1. Leswi vhanu va nga tsrala Bibele, ha yini hi ku dzri pfa ka Xikwembu Nkulukumba?

Bibele dzri tsraliwe hi kolomu ka 40 wa vhanu ku dzringana nkama wa kolomu ka 1.600 wa malembe ku sukela hi 1513 M.N.Y. ku ya ka 98 N.Y. Vhanu va kone a va li va swiyimu swa ku hambanahambana. Kambe swiyenge hinkwaswu swa Bibele swa pfumelelana. Swi kotekisa kuyini leswo? Swi koteka hikusa Bibele i buku dzra Xikwembu Nkulukumba. (Dondzra 1 Ba-le-Thesalonika 2:13.) Lava tsraliki a va tsralanga miyanakanyu yavu. A matsrhan’wini ya leswo, ve ku ‘kanela na va susumetiwa hi Moya lowa ku xwenga’.a (2 Petros 1:21) Xikwembu Nkulukumba a tizrise moya wake lowo wa ku xwenga ku huhutela, kumbe ku susumetela, vhanu ku tsrala miyanakanyu yake.—2 Timoteo 3:16.

2. Xana Bibele dzra va tlhasela vhanu hinkwavu?

Vhanu va ‘hinkwawu matiko, ni tinxaka, ni tindzrimi, ni tintsrhundzru’ va nga pfuniwa hi madzrungula lamanene lama kumekaka a Bibeleni. (Dondzra Apfuletelo 14:6.) Xikwembu Nkulukumba a yentxe leswaku Bibele dzri kumeka hi tindzrimi tinyingi ku tlula buku dzrini na dzrini ku sukela vhanu va va kone misaveni. Xileswo, vhanu hinkwavu va nga tidondzrela Bibele kumbe va dzri yingela kwini na kwini lomu va tsrhamaka kone hi tindzrimi tavu.

3. Xana Yehovha a dzri sizrelele hi ndlela yini Bibele?

Bibele a dzri tsraliwe hi mintxhumu ya ku kala yi nga tiyelanga ya ku fana ni xikhumba kambe vavanuna lava zrandzraka Bibele, hi wuxiyaxiya va hambe makopiya manyingi hi voko nambiloko vhanu lava nga ni ntamu swinene va zame ku helisa Bibele. Vambeni a va tiyimisele ku beka wutomi byavu nghozini akuva va dzri huluxa. Yehovha a nge pfumeleli mhunu kumbe ntxhumu wu mu sivela ku khanela na hine. Bibele dzri li: ‘Zritu dzra Xikwembu Nkulukumba wezru dzri tsrhama hi laha ku nga helikiki.’—Ezaya 40:8.

KELISISA

4. Bibele Dzri Vulavula Hi Mutsrali Wa Dzrone

Vonani VHIDIYU. Ntsrhaku Dondzrani 2 Timoteo 3:16, mi gama mi bulisana hi swivutiso leswi landzrelaka.

VHIDIYU: I Mani Mutsrali Wa Bibele?—Xitlephu (2:48)

• Loko a li leswaku Bibele dzri tsraliwe hi vavanuna, ha yini dzri vitaniwa Zritu dzra Xikwembu Nkulukumba?

• Xana u pimisa leswaku swa twala ku pfumela leswaku Xikwembu Nkulukumba a nga byela miyanakanyu yake vatsrali lava nga vhanu?

5. Bibele dzri huluke a minhlaselo

VHIDIYU: Bibele A Dzri Ni Lisima Ka Vone—Xitlephu (William Tyndale) (6:17)

• Ku tiva leswaku ku yentxiwi swinyingi akuva Bibele dzri sizreleliwa, swi ku yentxa u navela ku dzri dondzra? Ha mhaka muni?

Dondzrani Amapsalma 119:97, mi gama mi bulisana hi xivutiso lexi:

• I yini lexi nga yentxa vhanu vanyingi va beka wutomi byavu nghozini akuva va ndzrulutela Bibele va va va dzri hangalasa?

6. Buku Dzra Vhanu Hinkwavu

Bibele i buku ledzri hangalasiwiki ku tlula mabuku hinkwawu a matin’wini ya vhanu. Dondzrani Amintiṛo 10:34, 35, mi gama mi bulisana hi swivutiso leswi landzrelaka:

• Ha yini Xikwembu Nkulukumba a djula kuva Zritu dzrake dzri ndzruluteliwa dzri tlhela dzri hangalasiwa hi ndlela leyikulu?

• I yini leswi u swi zrandzraka ka Bibele?

NKATSRAKANYU

Bibele i Zritu dzra Xikwembu Nkulukumba nakone a yentxe leswaku dzri kumeka ka vhanu hinkwavu.

Mpfuxeto

• Xana swi tlhamuxela yini loko hi ku Xikwembu Nkulukumba a huhutele vavanuna ku tsrala Bibele?

• I yini lexi xi ku hlamalisaka hi ndlela leyi Bibele dzri nga huluka ha yone, ku hangalasiwa ni ku ndzruluteliwa?

• U titwisa kuyini hi ku tiva leswaku Xikwembu Nkulukumba a hambe minzamu ya ku fana ni leyi akuva a vulavula na wene?

HANDZRISISA

Dondzra mayelanu ni matimu ya Bibele ku sukela ka matsralwa ya ku sungula lama tsraliwiki hi voko ku ta tlhasa ka wundzruluteli bya namunhla.

“Ndlela Leyi Bibele Dzri Tlhasiki Ha Yone Ka Hine” (Pfukani!, Novhembru wa 2007)

Vona minhlaselo yizrazru leyi Bibele dzri hulukiki ka yone.

“Ndlela Leyi Bibele Dzri Hulu-kiki Ha Yone” (Xihondzro Xa Ku Zrindzra N^o 4 2016)

Tlhela u vona makhombo man’wana lawa vhanu va tlhanganiki na wone akuva va ndzrulutela Bibele.

Bibele A Dzri Ni Lisima Ka Vone (14:26)

Bibele dzre kopiyariwa dzri tlhela dzri ndzruluteliwa. U nga tiyisekisa kuyini leswaku leswi dzri swi hlayaka a swi txintxiwanga?

“Xana Bibele Dzri Txintxiwile?” (Leswi kumekaka ka jw.org)